Zãn 17

Yiezu ɛ́ Dɔfĩn ɛ̀ hɛ̃nnin mí kɛ̀ránzɛ̀ɓɛ̀ bòo hũn

1Ɛ́ hɔ́ lɛ ɛ́ Yiezu bie kɛ̀amu vɔ́, á hóoniɛ mí ɲún ɛ́ yòó húi àá hɔ́ hóohũn à zɔn bie ɛ́ nɛ làa: «Yàá, lè pɛ̃̀hṹ ɛ́ ɓen dɛ̃un, ɛ́ kɔ́ ɓàaní ńpe kɔ́ Zuú ǹ, ɛ̀ kɔ̀ Zuú ɓiɛ̀ ɓàaní kɔ ǹ. 2Kɔ́ lɛ́ hɔ́ pànkɛ́ ɔ̀ ǹ ɓɛ̀ nìnbirìe ɓɛ́kùi lɔ̀n, bòo lɛ ɛ́ wé à lɛ́ lé mɛkɛ̃nì lɛ yá vé ɓɛ̀pe lɛ ɛ́ kɔ́ dɔ́ piè núnú hũn ɓɛ́kùi. 3Ɛ́ lé mɛkɛ̃nì lɛ yá vé ɛ́ den iè hɔ̀ lɛ ɛ̀ ɓɛ̀ dũń kɔ, kɔ̀pe lɛ temu iè Dɔfĩn kɔ̀ dòonún àá bɔ̀bín, ɛ̀ ɓɛ̀ lò dũń ɔ́lɛ ɛ́ kɔ́ tɔrɛ lɛ iè ɔ̀ Yiezu Kirisa. 4Ń ɓàaniɛ kɔ ǹ lè sṹsùnù, ɛ̀ hɔ̀ bòo lɛ kɔ́ nɛ ń wé ɛ́ ń wɔ́ ɛ́ víeniɛ. 5Ɛ́ kɛ̀a sáalɛ ɛ́ kɔ́pe Yàá, ɓàaní mi ǹ kɔ̀ viì àá hɔ́ ɓàarɔ́ lɛ ɛ́ ń hṹn wi hũn kɔ̀ viì, lɛ kɛ́ lè dímíɲɛ́ ɛ́ dàa ɲɛùn mí wɛ̀.

6Ń zɛ̃́niɛ kɔ ɛ́ lɛ́ ɓɛ́ nìnbirìe lɛ ɛ́ kɔ́ munɛ lè dímíɲɛ́ hũn ɛ́ lɛ́ mi ǹ. Kɔ́ te ɓɛ́, kɛ́ kɔ́ lɛ́ ɓɛ́ mi ǹ, ɛ́ ɓɛ́ tɛ̀ kɔ̀ bienù bòo. 7Ɛ́ kɛ̀a sáalɛ, ɛ́ ɓɛ́ wo dũ kɛ́ hɔ́ bòo lɛ ɛ́ kɔ́ lɛ́ mi ǹ míkùi ɛ́ lɔ́ àá kɔ́ viì. 8Iè hɔ̀ lɛ ɛ́ ń bie hɔ̀ biehĩ́ lɛ kɔ́ bie lɛ́ mi ǹ ɛ́ lɛ́ ɓà ǹ, ɛ́ ɓɛ́ tɛ̀ ɲɛ́ hɔ́, ɛ̀ ɓɛ̀ dũnɛ sãàniɛ kɛ́ ń lɔ́ kɔ́ viì, ɛ̀ ɓɛ̀ dũmuasɛ̃̀ kɛ́ kɔ́ tɔrɛ mi. 9Hɔ̀ iè ɓɛ̀pe bòo hũn ɛ́ ń dàá kɔ̀ hɛ̃nnin. Ń yá kɔ̀ hɛ̃nnin ɓɛ̀ dímíɲɛ́ nìɛ bòo hũn, kɛ́ ɓɛ́ iè ɓɛ̀pe lɛ ɛ́ kɔ́ lɛ́ mi ǹ bòo hũn, iè hɔ̀ lɛ ɛ́ kɔ́ te ɓɛ́. 10Ɛ́ hɔ́ bòo lɛ ɛ́ ń te míkùi ɛ́ kɔ́ te, ɛ̀ hɔ̀ bòo lɛ ɛ́ kɔ́ te míkùi ɛ́ ń ɓiɛ̀ te. Ɛ́ ɓɛ́pe ɛ́ te niǹ ɓàarɔ́ ɛ́ zɛ̃́ní. 11Hũ̀nún àá fĩ́i ɛ̀ ǹ yá wé hɔ́ dímíɲɛ́ hũn wɛ̀, ɛ̀ ɓɛ̀pe ɛ́ wi lé dímíɲɛ́ hũn, ǹpe vaá-ɓen kɔ̀ viì. Ɛ́ Kɔ́pe Yàá lɛ ɛ́ ce, hìé ɓà ǹ àá kɔ́ yèrè pànkɛ́, lèpe yèrè lɛ ɛ́ kɔ́ lɛ́ mi ǹ pànkɛ́, bòo lɛ ɛ́ wé ɛ̀ ɓɛ̀ wé dìcóoní, kɛ̀a bòo lɛ ɛ́ ńpe àá kɔ́pe ɛ̀ dàa iè dìcóoní. 12Pɛ̃̀hṹ lɛ ɛ́ ń hṹn wi àá ɓɛ́, ɛ́ ń dàa ɓɛ̀ àá kɔ́ yèrè pànkɛ́ lɛ ɛ́ kɔ́ lɛ́ mi ǹ. Ń hìe ɓà ǹ, ɛ́ hɛ̀rí nìbí-cóoní ɛ́ yí vĩ́ wɛ̀. Kɛ́ á ɓen yí-e pe lɛ ɛ́ fɔ́ɓán à vĩ́, ɛ̀ lè Dɔfĩn bienù bòo lɛ ɛ́ lé bie ɛ̀ dàá ɲunù tí#17.12 À iè Zudaasi Yisikariyɔɔti ɛ́ Yiezu nɛ̀.. 13Ɛ́ kɛ̀a sáalɛ, ɛ́ ń wo vaá-ɓen kɔ̀ viì. Ɛ́ nín bie kɛ̀amu lɛ kɛ́ ń pɛwi wi le dímíɲɛ́ hũn wúàní, bòo lɛ ɛ́ wé ɛ̀ ɓɛ̀ dàá yí niǹ tĩwiɛ̀, lè tĩwiɛ̀ lɛ ɲunù tú. 14Ń bie kɔ̀ bienù ɛ́ lɛ́ ɓà ǹ, ɛ́ peɓɛ̀ lɔ́kɔ́ ɛ́ lɔ́ ɓɛ́ dímíɲɛ́ nìɛ ǹ, iè hɔ̀ lɛ ɛ́ lé dímíɲɛ́ ɛ́ yí te ɓɛ́, kɛ̀a bòo lɛ ɛ́ hɔ́ dàa yí te mi wɛ̀. 15Ń yá kɔ̀ hɛ̃nnin nɛ kɔ leń ɓɛ́ ɛ̀ lé lé dímíɲɛ́ hũn, kɛ́ nin kɔ̀ hɛ̃nnin nɛ kɔ pɛ ɓà ǹ, à nìsũmúi ɛ̀ bí dɛ̃ ɓɛ wɛ̀.#17.15 À nìsũmúi lɛ ɛ́ ɓɛ́ bòo bie hũnú iè Sitũanɛ ɛ́ ɓɛ́ nɛ̀. 16Peɓɛ̀ bòo yí sĩ̀ lè dímíɲɛ́ ǹ, kɛ̀a bòo lɛ ɛ́ nín bòo dàa ɓiɛ̀ yí sĩ̀ lè dímíɲɛ́ ǹ wɛ̀. 17Lɛ́ nɛ peɓɛ̀ bòo sĩ̀ kɔ ǹ míkùi, hɔ̀ bɔ̀berà hũn, kɔ̀ bienù ɛ́ iè bɔ̀berà. 18Kɛ̀a bòo lɛ ɛ́ kɔ́ dàa tɔrɛ mi ɛ́ ń ɓɛrɛ lè dímíɲɛ́ hũn, ɛ́ ń ɓiɛ̀ nin tɔn ɓɛ̀ nɛ ɓɛ vɛ lepe dímíɲɛ́ hũn. 19Ń lɛ́ niǹte míkùi kɔ ǹ peɓɛ̀ bòo hũn, bòo lɛ ɛ́ wé ɛ̀ ɓɛ̀pe ɓiɛ̀ dàń ɓɛ́te míkùi ɛ̀ lɛ́ kɔ̀ ǹ àá bɔ̀bín.

20Hɔ̀ yí ɓɛ́pe ɓɛ́ dòonún ɛ́ nín kɔ̀ hɛ̃nnin ɛ̀ lɛ́ nin wɛ̀. Kɛ́ niǹ kɔ̀ hɛ̃nnin ɛ̀ lɛ́ ɓɛ́pe nìnbirìe lɛ ɛ́ ɓén dɛsĩ̀ mi ǹ ɓɛ́kùi, lè bienù lɛ ɛ́ ɓɛ́pe lɛ ɛ́ ɓén vɛ bie ɛ́ lɛ́ ɓà ǹ bòo hũn. 21Nín kɔ̀ hɛ̃nnin nɛ ɓɛpe ɓɛ́kùi ɛ̀ wé dìcóoní kɛ̀a bòo lɛ ɛ́ kɔ́pe Yàá ɛ́ dàa wi mi ǹ, ɛ̀ ǹpe ɛ́ ɓiɛ̀ wi kɔ̀ ǹ. Nɛ ɓɛpe ɛ̀ ɓiɛ̀ cɛ ɓán àá kiè, bòo lɛ ɛ́ wé ɛ̀ lè dímíɲɛ́ ɛ̀ dũń kɛ́ kɔ́ te mi tɔrɛ. 22Hɔ̀ ɓàarɔ́ lɛ ɛ́ kɔ́ lɛ́ mi ǹ, ɛ́ ń lɛ́ ɓà ǹ, bòo lɛ ɛ́ wé ɛ̀ ɓɛ̀ wé dìcóoní kɛ̀a bòo lɛ ɛ́ kɔ́pe àá ńpe ɛ́ dàa iè dìcóoní. 23Ǹpe ɛ́ wi ɓà ǹ, ɛ̀ kɔ̀pe ɛ́ wi mi ǹ. Ɛ́ ɓɛ́ wo ɓén wé dìcóoní àá bɔ̀bín, bòo lɛ ɛ́ wé ɛ̀ ɓɛ̀ dímíɲɛ́ nìɛ ɛ̀ dũń kɛ́ kɔ́ tɔrɛ mi, ɛ̀ kɔ̀ wɛ ɓɛ kɛ̀a bòo lɛ ɛ́ kɔ́ dàa wɛ mi. 24Yàá, ń wɛ nɛ le viì lɛ nin kań hũn, ɛ́ ɓɛ́pe lɛ ɛ́ kɔ́ lɛ́ mi ǹ ɛ̀ ɓiɛ̀ kań hũn àá mi, ɛ̀ ɓɛ̀ dàá mi niǹ ɓàarɔ́ fúu, hɔ̀ ɓàarɔ́ lɛ ɛ́ kɔ́ lɛ́ mi ǹ; iè hɔ̀ lɛ ɛ́ kɔ́ wɛniɛ mi kɛ́ lé dímíɲɛ́ ɛ́ ɲɛùn yí mí wɛ̀. 25Yàá, kɔ̀pe lɛ ɛ́ cã̀aní, ɓɛ̀ dímíɲɛ́ nìɛ ɛ́ yí dũń kɔ wɛ̀. Kɛ́ ńpe ɛ́ dũnɛ kɔ, ɛ̀ ɓɛ̀pe lɛ ɛ́ dũnɛ kɛ́ kɔ́pe ɛ́ te nin tɔrɛ. 26Ń lɛ́ ɛ́ ɓɛ́ dũnɛ kɔ, ɛ̀ nin bĩní lɛ́ ɛ̀ ɓɛ̀ wookɛ dũń kɔ sãàní, bòo lɛ ɛ́ wé ɛ̀ lè wanminu lɛ ɛ́ kɔ́ dàa wɛniɛ mi ɛ̀ kań ɓà ǹ, ɛ̀ ǹpe kùusɔ ɛ̀ ɓiɛ̀ kań ɓà ǹ.»

Currently Selected:

Zãn 17: bwj

Highlight

Copy