Bɔ̀werà 7

Hɔ̀ bòo lɛ á Etiɛnɛ ɛ́ iè ɓɛ nìzã̀amáa híɛhɔ́

1Á khɛ̃́ndàarɔ wì-bɛhɔ́ ɛ́ zɔn Etiɛnɛ dìenin nɛ làa: «Hɔ̀ bòo lɛ ɛ́ ɓɛ́ bie kɔ bòo hũn iè bòo lɛ ɛ́ bɔn?» 2Ɛ́ Etiɛnɛ ɛ́ zɔn kɔ̃́niɛ ɛ́ nɛ làa: «Mìpe kìe zɛ̀ɓɛ̀ àá kìe yàáɓɛ́, mì tɛ́ mí ɲɛkɛ̃̀a: Dɔfĩn bɛhɔ́ ɛ́ pɛ̃̀hṹ zɛ̃́niɛ míte àá kìe zĩkĩ́n Abarahaamu kɛ́ á wi hɔ Mezopotami hũn, lɛ kɛ́ á dàa ɲɛùn yí vɛ kansí Haran hũn wɛ̀. 3Ɛ́ hɔ́pe Dɔfĩn ɛ́ pɛ̃̀hṹ bie à ǹ nɛ làa: “Hĩ́ní lé mì cɛ̃̀mɛ̀nɛ́ àá mì zũnù hũn ɛ̀ vɛ le cɛ̃̀mɛ̀nɛ́ lɛ ɛ́ nin zɛ̃́ní kɔ ǹ hũn.” 4Ɛ́ Abarahaamu ɛ́ zɔn lɔ́ ɓɛ́ Kalideɲɛɓɛ cɛ̃̀mɛ̀nɛ́ hũn ɛ́ lɔ́ van kɛsí Haran hũn. Ɛ́ hɔ́ lɛ ɛ́ ɓà yàá ɛ́ khie húrun, ɛ́ Dɔfĩn ɛ́ lɛ́ á Abarahaamu ɛ́ lɔ́ Haran cɛ̃̀mɛ̀nɛ́ ɛ́ dàa ɓɛrɛ kɛsí lépe cɛ̃̀mɛ̀nɛ́ lɛ ɛ́ mí wi hũn hɔ̀ zoòni. 5Ɛ́ Dɔfĩn ɛ́ hàarí ɛ́ yí lɛ́ sṹsùnù ɔ̀ ǹ nɛ a wé àá mí kù-zìɛ lɛ ɛ́ piè nìɛ ɛ́ ɓén hĩ́ní teń lépe cɛ̃̀mɛ̀nɛ́ sɔ hũn lɛ wɛ̀. Hɛ̀rí viì dɛ̀cíi lɛ á ɛ́ bè mí zeǹ hũn ɛ́ yí wé wɛ̀. Kɛ́ Dɔfĩn ɛ́ den lɛ́ mí ɲunù ɔ̀ ǹ nɛ mí ɓén bɛ̃́nkí lɛ́ lépe cɛ̃̀mɛ̀nɛ́ sɔ ɔ̀ ǹ; ie kɛ́ á ɓen húrun, ɛ́ piè hũn nìɛ ɛ́ lépe cɛ̃̀mɛ̀nɛ́ sɔ ɛ́ bòo ɛ́ ɓén sĩ̀nin. Kɛ́ pehɔ̀ yìi hũn, àpe Abarahaamu ɛ́ lò ɲɛùn yí dàa yɛ̀nù wɛ̀. 6Ɛ́ lɛ iè hɔ̀pe bòo lɛ ɛ́ Dɔfĩn ɛ́ hàarí khɛ́ lɛ́ à n: “Kɔ̀ hũn nìɛ ɛ́ ɓén vɛ wé nɛ̀hãà cɛ̃̀mɛ̀nɛ́ dɔ̀ hũn. Ɓɛ̀ ɓén wé wɔhĩ́ yán, ɛ́ ɓɛ́ ɛ́ biení lɔ̀n fúu lɔ́líe khĩɛ́-naa (400). 7Kɛ́ lépe cɛ̃̀mɛ̀nɛ́ lɛ siè ɛ́ te ɓɛ ɓén wé àá ɓɛ́ wɔhĩ́ ɛ́ ń ɓén lè lìe. Ɛ́ pehɔ̀ máahṹ ɛ̀ ɓɛ̀ ɓén zɔ́ lé yán ɛ́ khũ̀á ɛ́ ɓén ɓàaní mi ǹ lèpe viì sɔ lɛ hũn.” 8Ɛ̀ Dɔfĩn ɛ́ khie dú lé ɲɛbíi àá ɔ́pe Abarahaamu, ɛ́ hɔ́ bòo lɛ ɛ́ te lepe ɲɛbíi sɔ ɛ́ zɛ̃́ní ɛ́ iè hɔ̀ fĩ̀nlɔ́. Ɛ́ sí iè hɔ̀pe ápe Abarahaamu ɛ́ dàa fɛ̃̀ mí zuú Yizaake piè tenlɔ́ wihĩ́ hùutĩlán zɔn. Ɛ́ Yizaake ɛ́ ɓiɛ̀ fɛ̃̀ mí zuú Zakɔɔbu, ɛ́ Zakɔɔbu ɛ́ ɓiɛ̀ fũ̀a mí bɛ́zikíini pírú àá nìɛ ɓɛ̀ ɲu lɛ iè pe kìe zĩkĩ́nɓɛ̀.

9Ɛ́ ɓɛ́pe kìe zĩkĩ́nɓɛ̀ ɛ́ pɛ̃̀hṹ dú lé yanlienú àá ɓá zuú Zozɛɛfu, ɛ̀ ɓɛ̀ yìɛniɛ-ɔ̀ ɛ́ ɓɛ́ fɔ́ ɛ́ van wɔ́ àá wɔnù hɔ̀ Eziputi cɛ̃̀mɛ̀nɛ́ hũn. Kɛ́ Dɔfĩn ɛ́ hàarí ɛ́ wi àá ɔ́. 10Hɔ̀ lerɛ-à ɛ́ lɔ́ piè lɔ̀nbiè míkùi hũn, ɛ̀ Hɔ̀ lɛ́ bɔ̀dũmunù ɔ̀ ǹ, ɛ̀ hɔ̀ lɛ́ ɛ́ piè bòo ɛ́ tĩìniɛ ɔ̀ Eziputi bɛ́zuú Faraɔn. Ápe Faraɔn ɛ́ wɔ́ á Zozɛɛfu àá Eziputi cɛ̃̀mɛ̀nɛ́ hándí àá mí zũnù bòo míkùi hándí. 11Ɛ́ hɔ́ hĩni ɛ́ hàarí lɔ́ Eziputi míkùi hũn àá hɔ́ kanan cɛ̃̀mɛ̀nɛ́ hũn. Ɛ́ lé lɔ̀nbiè ɛ́ hɛ̀ ɓàaniɛ fúu ɛ́ kìe zĩkĩ́nɓɛ ɛ́ yí loo bòo lɛ ɛ́ dí wɛ̀. 12Ɛ́ Zakɔɔbu ɛ́ ɲɛ́ ɛ̀ ɓɛ̀ nɛ dínlɔ́ wi Eziputi cɛ̃̀mɛ̀nɛ́ hũn, á tɔrɛ ɓɛ̀ kìe zĩkĩ́nɓɛ̀ ɛ́ ɓɛ́ van yɛ̀ hɔ̀ dínlɔ́ yán. 13Ɛ́ hɔ́ lɛ ɛ́ ɓɛ́ bĩniɛ khũ̀a van kɛ̀a yìehɛ̃̀ ɲulán, á Zozɛɛfu ɛ́ zɛ̃́niɛ míte ɓá zɛ̀ɓɛ̀ ǹ, á Faraɔn ɛ́ wo dũnɛ à Zozɛɛfu ɓà zũnù nìɛ. 14Ɛ́ Zozɛɛfu ɛ́ wo nɛ ɓɛ vɛ fé ɓá yàá Zakɔɔbu àá mí zũnù nìɛ ɓɛ́kùi lɛ hàarí iè nìnbirìe ɓaàtĩ àá pírú àá hùanú (75) ɛ̀ dàá ɓen. 15Á Zakɔɔbu ɛ́ wo hĩ́nà van hɔ̀ Eziputi cɛ̃̀mɛ̀nɛ́ hũn, ɛ́ sí iè yán á van húrun hũn, àpe àá ɓɛ́pe kìe zĩkĩ́nɓɛ̀ lɛ kɛ́. 16Ɛ́ ɓɛ́ khuie peɓɛ̀ nìheemu ɛ́ dàa khũ̀a van hɔ̀ Sisɛɛmu ɛ́ van wũ̀nɛ lè búi lɛ á Abarahaamu ɛ́ hàarí yɛ̀ àá hɔ́ màa ɔ̀ Hamɔɔre nìɛ viì, hɔ̀ Sisɛɛmu hũn.

17Ɛ́ bòo lɛ ɛ́ Dɔfĩn ɲunù lɛ ɛ́ hɔ́ hàarí lɛ́ á Abarahaamu ǹ ɲunù tínlɔ́ ɛ́ van lúwi, ɛ́ kìe nìɛ ɛ́ ɲinɛ cɛ̃̀un hɔ̀ Eziputi cɛ̃̀mɛ̀nɛ́ hũn. 18Ɛ́ pehɔ̀ máahṹ, ɛ̀ nìnbí-ɓuɛ̀ lɛ ɛ́ yí dũń ɔ́ Zozɛɛfu ɛ́ temu ɛ́ yòó wɔ́ bɛ́zuú hɔ̀ Eziputi cɛ̃̀mɛ̀nɛ́ lɔ̀n. 19Á bɛ́zuú sɔ ɛ́ fĩiniɛ kìe zĩkĩ́nɓɛ̀ àá hɛciri, à bieniɛ ɓɛ̀ lɔ̀n, à mɛmɛ́kɛa ɓɛ̀ nɛ ɓɛ wóo kóosí ɓɛ́ ńdìidíni bòo lɛ ɛ́ wé ɛ̀ ɓɛ́ híkɛ. 20Ɛ́ pehɔ̀ yìi hũn á Moyiize ɛ́ tɔn, à hàarí bòo ɛ́ tĩ Dɔfĩn. Ɛ́ ɓɛ́ díiniɛ ɔ̀ fúu ńpĩ́ihɛ̃ bɔ̀nbɔ̀ tĩ ɓà yàá zũnù hũn. 21Ɛ́ bòo lɛ ɛ́ ɓɛ́ van tɛviɛniɛ ɔ̀, á Faraɔn hãá ɛ́ van mɔ̀ à ɛ́ hɛ̃un kɛ̀a mí kùrú zuú. 22Ɛ́ sí iè hɔ̀pe ápe Moyiize ɛ́ dàa ɛ́ kɛ̀rɛa ɓɛ̀ Eziputi siè bɔ̀dũmunù bòo míkùi; á wo hàarí hɛciri wi mí biehĩ́ hũn, à lò pànkɛ́ wi mí bɔ̀werà hũn.

23Ɛ́ hɔ́ lɛ á Moyiize ɛ́ pɛ̃̀hṹ yú lɔ́líe dɛ̀wɛ́ (40), á nɛ mii vɛ húi ɓá nìɛ Yizarayɛɛle nìɛ ǹ. 24Á van yú kɛ́ Eziputi biɛ̀ dɔ̀ ɛ́ ɓà zuú dɔ̀ lɔ̀n ɛ̀ biení, á Moyiize ɛ́ khie tɛ̀ ɓá zuú ɲunù à han ɔ̀ Eziputi biɛ̀ ɛ́ ɓɔ́. 25À hṹn lieníkɛ à nɛ ɓá zɛ̀ɓɛ̀ Yizarayɛɛle nìɛ ɛ́ ɓén dũń kɛ́ hɔ́ iè mípe ɛ́ Dɔfĩn lerɛ ɛ́ mii dàá fuení ɓà ǹ. Kɛ́ ɓɛ́ den yí dũń hɔ́ wɛ̀. 26Ɛ́ pehɔ̀ sí lɛ ɛ́ tĩ̀, ɛ̀ Moyiize ɛ́ van yú Yizarayɛɛle nìɛ nìɛ ɓɛ̀ ɲu dɔ̀ kɛ́ ɓɛ́ ɛ́ hɛ ɓán, á nɛ mii yankɛ ɓɛ, à zɔn bie lɛ́ ɓà ǹ ɛ́ nɛ làa: “Kè pàáɓɛ́, mí iè zɛ̀ɓɛ̀, ɛ́ mí wiɛ ɛ́ dàa ɛ́ hɛ ɓán?” 27Kɛ́ álɛ ɛ́ te ɓá ńkɔnù ɛ́ hɛ ɛ́ khie pɛ̃́ à zɔn nɛ: “À iè wieni ɛ́ temu nɛ kɔ wé ké hándí àá ké lìe lèrɔ? 28Kɔ́ wìe wɛ ɛ́ kɔ ɓé mi kɛ̀a bòo lɛ ɛ́ kɔ́ dàa ɲuhṹ ɓɔ́ á Eziputi biɛ̀?” 29Ɛ́ bòo lɛ ɛ́ Moyiize ɛ́ ɲɛ́ hɔ́pe biehĩ́ sɔ sí á zɔ ɛ́ van kɛsí Madiyan cɛ̃̀mɛ̀nɛ́ hũn, á yú bɛ́zikíini bìɛ ɲu yán.

30Ɛ́ pehɔ̀ lɔ́líe dɛ̀wɛ́ ɛ́ van khie (40), ɛ́ Moyiize hàarí wi le ńɲiherà lɛ wi le sinayi ɓúkìe sɛnù. Ɛ́ Dɔfĩn mɛlɛkɛ dɔ̀ ɛ́ ɓɛrɛ zɛ̃́niɛ míte ɔ̀ ǹ lè vɛ̃̀n-cíi lɛ ɛ́ cĩ̀ hũn. 31Ɛ́ bòo lɛ ɛ́ Moyiize ɛ́ loo hɔ, ɛ́ hɔ́ hɛ̀ yòokɛa piè lɔ̀n. Ɛ́ hɔ́ lɛ á nɛ mii khɛ̃̀ún vɛ lúwiní ɛ̀ dàá ɛ̀ húi, á ɲɛ́ Ɲunsɔ Dɔfĩn tɛmu lɛ ɛ́ bie àá ɔ́ ɛ́ nɛ làa: 32“Hɔ̀ iè ǹpe mì zĩkĩ́nɓɛ̀ lɛ iè ɔ̀ Abarahaamu àá ɔ́ Yizaake àá ɔ́ Zakɔɔbu peɓɛ̀ Dɔfĩn.” Ápe Moyiize ɛ́ hɛ̀ zɛ́rɛ ɛ́ zɛ̀ wɛ̀wɛ̀ ɛ́ yí hĩ̀ mì tĩì ɛ̀ bie nɛ mii yòó húi wɛ̀. 33Ɛ́ Ɲunsɔ Dɔfĩn ɛ́ zɔn bie lɛ́ à ǹ nɛ làa: “Hankɛ kɔ naahĩ́ iè hɔ̀ lɛ ɛ́ lé viì lɛ ɛ́ kɔ́ dɛ̃̀ hũn ɛ́ iè viì lɛ ɛ́ ce. 34Ń mɔn niǹ nìɛ lɛ wi hɔ Eziputi cɛ̃̀mɛ̀nɛ́ hũn lɔ̀nbiè, ń ɲɛ́ peɓɛ̀ ɲinikɛà ǹ ɛ́ ń ɓɛrɛ síɛ nɛ nin síɛ ɛ̀ fuení ɓà ǹ. Ɛ́ kɛ̀a sáalɛ, ɛ́ nin tɔn kɔ ɛ̀ kɔ̀ vɛ lepe Eziputi cɛ̃̀mɛ̀nɛ́ hũn.”

35Àpe Moyiize lɛ ɛ́ ɓɛ́ Yizarayɛɛle nìɛ ɛ́ hàarí pɛ̃́ bòo ɛ̀ ɓɛ̀ nɛ a iè wieni ɛ́ temu nɛ a wé ɓɛ́ hándí àá ɓɛ́ lìe lèrɔ, iè pe ɛ́ Dɔfĩn ɛ́ tɔrɛ nɛ a wé peɓɛ̀ hándí àá peɓɛ̀ ɲún lenlɔ. Dɔfĩn ɛ́ den hàarí lɛ́ lé ɲunù sɔ à mɛlɛkɛ ǹ á van khɛ́ lɛ́ á Moyiize ǹ lè yìi lɛ á dàa mɔn ɔ̀pe mɛlɛkɛ sɔ lè vɛ̃̀n-cíi lɛ ɛ́ cĩ̀ hũn. 36Á iè pe Moyiize ɛ́ temu hàarí wɔ́ hɔ́ yéréké bòo àá hɔ́ bɔ̀bɛ̃hɛ̃ hɔ̀pe Eziputi cɛ̃̀mɛ̀nɛ́ hũn ɛ́ dàa lerɛ ɓɛ̀ Yizarayɛɛle nìɛ ɛ́ lieniɛ yán, à lò bĩniɛ wɔ́ hɔpe yéréké bòo àá hɔ́ bɔ̀bɛ̃hɛ̃ hɔ̀ ɲun-bɛhɔ́ lɛ ɛ́ ɓɛ́ wóo ve nɛ ɲun-miɛ̀ hũn àá lé ńɲiherà hũn fúu lɔ́líe dɛ̀wɛ́ (40). 37Ɛ̀ hɔ̀ lò bĩniɛ iè ɔ̀pe Moyiize ɛ́ temu hàarí bie lɛ́ ɓɛ́ Yizarayɛɛle nìɛ ǹ nɛ Dɔfĩn ɛ́ ɓén tɔn mí bɔ̀háanírɔ dɔ̀ lɛ kɛ kɛ̀a mípe ɛ́ lɛ́ ɓà ǹ, ɛ̀ ɓàasɔ ɛ́ ɓén lé ɓà dàa nìɛ hũn. 38Àpe Moyiize ɛ́ hàarí wi àá ɓɛ́pe Yizarayɛɛle nìɛ lɛ hàarí koo ɓánlɔ̀n lè ńɲiherà hũn, à iè ɔ̀pe ɛ́ temu hàarí wi ɓɛpe kìe zĩkĩ́nɓɛ̀ àá ɔ́ Dɔfĩn mɛlɛkɛ tĩ́ihṹ, àpe mɛlɛkɛ lɛ hàarí ɛ́ bie àá ɔ́ lè Sinayi ɓúkìe lɔ̀n. Ápe Moyiize ɛ́ ɲɛ́ lé mɛkɛ̃nì biehĩ́ ɛ́ khie bie lɛ́ kiè ǹ.

39Kɛ́ kìe zĩkĩ́nɓɛ ɛ́ nɛ ɓɛ́ yá tɛ̀ piè bòo wɛ̀. Ɓɛ̀ den pɛ̃́-a, ɛ̀ ɓɛ̀ hṹn wɛ ɛ́ ɓɛ khũ̀á vɛ Eziputi. 40Ɛ́ ɓɛ́ hàarí bie lɛ́ á Aarɔn ɛ́ nɛ làa: “Mí wɛ̃̀hɛ̃ ɛ̀ lɛ́ kie ǹ nɛ hɔ́ dí ké híɛhɔ́; iè hɔ̀ lɛ ɛ́ ké wo yí dũ bòo lɛ yú-o pe Moyiize lɛ ɛ́ te kie ɛ́ fɔ́ ɛ́ dàa lɔ́ hɔ́ Eziputi wɛ̀.” 41Ɛ́ pehɔ̀ yìi hũn ɛ́ ɓɛ́ khie mɛ́ nàá-zuú dɔ̀, ɛ́ lerɛ ɓɛ́ miyiɛ́ lɔ̀n, ɛ̀ ɓɛ̀ khie wɛniɛ ɓɛ́te ɛ́ dú lé sɛ́rí lèpe wɔ̃̀hṹ lɛ ɛ́ ɓɛ́ te mɛ́ àá ɓɛ́ kùrú níhĩ́ bòo hũn. 42Ɛ́ Dɔfĩn ɛ́ wo bĩniɛ mí máahṹ ɛ́ lɛ́ ɓà ǹ, à fùɛrɛ̀sí ɓà ǹ ɛ́ ɓɛ́ wo khie wɔ́ lé wurù àá lé ńpĩ́ihṹ àá hɔ́ ńpĩ́inàwuò ɛ́ ɓɛ́ wóò ɓàanínin kɛ̀a bòo lɛ ɛ́ hɔ́ dàa wɛ̃́ ɓɛ́ Dɔfĩn bɔ̀háaníriè vɛ̃hṹ hũn ɛ́ nɛ làa:

“Mìpe Yizarayɛɛle nìɛ, ɛ́ bòo ɛ́ hɔ́ sũǹ iè ǹpe bòo hũn,

Ɛ́ mí dàa wùokɛa ɓɛ̀ bìlaàsiè ɛ́ wɔ́ àá miyiɛ́,

fúu lɔ́líe dɛ̀wɛ́ (40) lè ńɲiherà hũn?

43 Ńɓùé lò, mí den hàarí wɔ́ mí wɔ̃̀hṹ Molɔɔki pɔnkɔ̀-zũnù ɛ́ mí wóò mìí ɛ̀ tìé,

Ɛ̀ mì lò tìé mí wɔ̃̀hṹ lɛ ɛ́ mí wóo ve nɛ Refan pelè ńpĩ́inàwiì,

Hɔ̀pe sí míkùi ɛ́ iè hɔ̀ wɛ̃̀hɛ̃ lɛ ɛ́ mí mɛ́ ɛ́ wóò ɓàanínin.

Ɛ́ sí iè hɔ̀pe ɛ́ ń dàa ɓén lɛ́ ɛ́ ɓɛ́ ɛ́ mìí miɛ ɛ́ dàá vɛ́ pɛ̃́un hɔ́ Babilɔɔnɛ.”

44Lè ńɲiherà hũn ɛ́ ɓɛ́ kìe zĩkĩ́nɓɛ̀ ɛ́ hàarí dàa le pɔnkɔ̀-zũnù lɛ ɛ́ zɛ̃́ní kɛ́ Dɔfĩn ɛ́ wi àá ɓɛ́. Lè hàarí tɛ́ dɛ̃̀ kɛ̀a bòo lɛ ɛ́ Dɔfĩn ɛ́ dàa hàarí zɛ̃́níkɛa hɔ̀ ɛ́ lɛ́ á Moyiize ǹ. Dɔfĩn ɛ́ den hàarí bie lɛ́ á Moyiize ǹ nɛ a tɛ́ lé dĩ̀ní kɛ̀a bòo lɛ ɛ́ mí dàa zɛ̃́niɛ lè ɛ́ lɛ́ à ǹ. 45Ɛ́ lépe pɔnkɔ̀-zunù sɔ bòo ɛ́ khie sɛ̃̀ ɓɛ̀ kìe zĩkĩ́nɓɛ̀ lɛ ɓiɛ̀ hàarí khie sɛ̃̀ ǹ; ɛ́ ɓɛ́ mɔ̀ lè ɛ́ dàa cɔ́ van lè sṹsùnù lɛ ɛ́ ɓɛ́ hàarí vúa ɓɛ̀ dàa dɔ̀ nìɛ viì, ɓɛ̀pe lɛ ɛ́ Dɔfĩn ɛ́ hàarí ɲɛun lɔ́ peɓɛ̀ híɛhɔ́, lè yìi lɛ á Zozue ɛ́ dàa temu hàarí iè peɓɛ̀ hándí. Ɛ́ lé pɔnkɔ̀-zunù sɔ ɛ́ wo kɛrɛ yán fúu á Daviide pɛ̃̀hṹ ɛ́ van dɛ̃un. 46Ɛ́ Dɔfĩn ɛ́ hàarí wɔ́ mí hiì àá ɔ́pe Daviide, á dàa hàarí hɛ̃nnɛ hɔ̀pe Dɔfĩn nɛ Hɔ́ lɛ́ nɛ mí te pehɔ̀ zũnù ɛ̀ lɛ́ á Zakɔɔbu hũn nìɛ ǹ. 47Kɛ́ hɔ́ den wɔ́ Salomɔn ɛ́ te lepe zũnù sɔ ɛ́ tɔn. 48Kɛ́ Dɔfĩn lɛ wi hɔ bòo míkùi ɲún hũn ɛ́ den ɛ́ yáà zɔ zĩhĩɛ́ lɛ ɛ́ nìnbirìe ɛ́ te tɔn wɛ̀; kɛ̀a bòo lɛ ɛ́ Dɔfĩn bɔ̀háanírɔ ɛ́ dàa hàarí khɛ́ hɔ́ ɛ́ nɛ Dɔfĩn ɛ́ nɛ làa:

49 “Hɔ̀ hóohũn iè niǹ bɛ́záanú wànlé,

Ɛ̀ lè sṹsùnù ɛ́ iè niǹ zehĩ́ bìsílén.

Ɛ́ lé iè zũnù lɛ ɛ́ kɛ wiɛ ɛ́ mí dɛ̀ ɛ́ te ɛ́ lɛ́ mi ǹ?

Ɛ́ lé iè dáanú dúsɔ ɛ́ ń dɛ̀ ɛ́ zɔ́ vũùní hũn?

50 Hɔ̀ iè ǹpe ɛ́ te hɔpe sí míkùi ɛ́ mɛ́ lò!”»

51Ɛ́ Etiɛnɛ ɛ́ zɔn bie sĩiniɛ ɛ́ nɛ làa: «Mí hɛ̀ iè nìɛ lɛ ɲɛkɛ̃̀a dɛ̃un cɛ̃un. Mí yáà tɛ̀ Dɔfĩn bòo àá mí tĩɛ̀ míkùi, ɛ̀ mì yáà ɲí Dɔfĩn bòo, ɛ̀ mì wóo pĩ́ lé Mɛkɛ̃n-Sãanu bòo. Ɛ́ mí iè pe ɛ́ wo dɛ̃̀ kɛ̀a mì zĩkĩ́nɓɛ̀. 52À iè Dɔfĩn bɔ̀háanírɔ hɔ́sɔ ɛ́ mì zĩkĩ́nɓɛ ɛ́ hàarí yí biení lɔ̀n? Ɓɛ̀ hàarí ɛ́ ɓɔ́ ɓɛ́lɛ ɛ́ sɛ̃̀nɛ́hã̀ ɛ́ ɔ̀lɛ ɛ́ cã̀aní ɓenlɔ́ bòo ɛ̀ bie, ɛ́ kɛ̀a sáalɛ ɛ́ hɔ́ iè mìpe ɛ́ te piè máahṹ ɛ́ bɛ́ ɛ́ lɛ́ ɛ́ ɓɛ́ ɓɔ́. 53Dɔfĩn ɛ́ bɔ̀ mí mɛlɛkɛɓɛ ǹ ɛ́ dàa lɛ́ mí làndɛ́ miɛ ǹ, kɛ́ mí den yí tɛ̀ ɛ̀ dàá hɔ́pe làndɛ́ sɔ wɛ̀.»

Etiɛnɛ taa ɓénlɔ́ bòo

54Ɛ́ bòo lɛ ɛ́ ɓɛ́ lìe lèriè ɛ́ ɲɛ́ hɔ́pe biehĩ́ sɔ sí, ɛ́ peɓɛ̀ tĩɛ̀ ɛ́ hɛ̀ síɛ hĩ́nà ɔ̀ Etiɛnɛ ǹ, ɛ́ ɓɛ́ hɛ̀ ɛ́ ɓɛ́ ɲiɛ̀ ɛ̀ khĩ piè lɔ̀n. 55Kɛ́ Etiɛnɛ ɛ́ pe tú àá Mɛkɛ̃n-Sãanu, á yòó húi àá hóohũn. Á mɔn Dɔfĩn ɓàarɔ́ àá Yiezu kɛ́ á dɛ̃̀ hɔ̀pe Dɔfĩn ńdóonín. 56Á zɔn bie nɛ làa: «Mì húi, ń loo hɔ hóohũn kɛ́ hɔ́ hɛ́rɛ à nìnbírɔ Zuú ɛ́ dɛ̃̀ Dɔfĩn ńdóonín.» 57Ɛ́ ɓɛ́ lìe lèriè ɛ́ wo zɔn bénkɛ kɛ́ ɓɛ́ sunkɛ ɓɛ́ ɲɛkɛ̃̀a. Ɛ́ ɓɛ́pe ɓɛ́kùi ɛ́ zɔ̀ van kírie ɔ̀ ǹ, 58ɛ̀ ɓɛ̀ dɔ́nkɛa ɔ̀ ɛ́ dàa van lɔ́ lé lóo máahṹ ɛ́ van lɔ́ táa ɓɔ́ àá hɔ́ sɛ̃̀nlɛ̀a. Ɓɛ̀pe nìnbirìe lɛ wɔ́ hɔ́pe sí ɛ́ hàarí fùɛrɛ̀sí ɓɛ́ tĩɛ̀ à zufìɛ dɔ̀ lɛ yèrè ɛ́ ɓɛ́ nɛ Sooli híɛhɔ́ nɛ a hìénin. 59Ɛ́ hɔ́ lɛ ɛ́ ɓɛ́ ɔ̀ Etiɛnɛ ɛ̀ táa, á ɛ́ Dɔfĩn hɛ̃nnin ɛ́ nɛ: «Ɲunsɔ Yiezu, fé niǹ mɛkɛ̃nì.» 60À kùerɛ síɛ mí nunkɛ́yìe lɔ̀n, à wũamɛa àá pànkɛ́ ɛ́ nɛ: «Ɲunsɔ, bí líi hɔ́pe bɔ̀koohɔ́ lɛ ɛ́ ɓɛ́ ɛ́ wé ɛ̀ bè peɓɛ̀ lɔ̀n wɛ̀.» Á khɛ́ hɔ́pe biehĩ́ sɔ sí vɔ́, à wo húrun.

Currently Selected:

Bɔ̀werà 7: bwj

Highlight

Copy