Bɔ̀werà 6

Ɓɛ̀ nìɛ hùuɲu lɛ ɓɛ wóo sĩiní ɓɛ́ tɔnkɛriè lenlɔ́

1Ɛ́ pehɔ̀ yìi hũn, ɛ́ ɓɛ́ ńdɛsĩ̀riè ɛ́ buòní. Ɛ́ ɓɛ́ Zuifuɓɛ lɛ ɛ́ wóò bie hɔ̀ Kɛrɛkiɓɛ níi ɛ́ yí wɛ ɓɛ́te àá ɓɛ́pe Zuifuɓɛ lɛ ɛ́ iè ɓà Hebereɓɛ níi ɛ́ ɓɛ́ wóò bie wɛ̀. Ɓɛ̀ nɛ ɓɛ́ mɛ-hã́a ɛ́ ɓɛ́ yáà húi bòo sãàní hɔ̀ díe sankɛrɔ yìi hũn àá sítĩnlɔ́ wɛ̀. 2Ɛ́ ɓɛ́ tɔnkɛriè pírú àá nìɛ ɓɛ̀ ɲu ɛ́ vɔn ɓɛ̀ ńdɛsĩ̀riè ɓɛ́kùi ɛ́ koo ɓánlɔ̀n ɛ̀ ɓɛ̀ bie lɛ́ ɓà ǹ nɛ làa: «Hɔ̀ yí te mí yìe ɛ̀ kè fùansí lé Dɔfĩn bienù buierɔ́ ǹ ɛ̀ kè khíi wé díe bòo ɛ̀ kè húi wɛ̀. 3Ɛ́ sí iè hɔ̀pe ɛ́ mípe kìe zɛ̀ɓɛ̀, mì leń nìnbirìe hùuɲu mì tĩ́ihṹ lɛ ɛ́ ɲúuhɛ̃ ɛ́ cã̀aní, lɛ ɛ́ tú àá Mɛkɛ̃n-Sãanu àá bɔ̀dũmunù, ɛ̀ kè wo dé hɔ́ tɔnlɔ́ sɔ peɓɛ̀ núnú hũn. 4Ɛ́ képe ɛ́ wo ɛ́ yí lé pɛ̃̀hṹ ɛ́ vɛ́ àá híɛhɔ́ Dɔfĩn hɛ̃nnɛ̀ àá Dɔfĩn bienù buierɔ́ hũn.» 5Ɛ́ ɓɛ́pe ɓɛ́kùi ɛ́ tɛ̀ hɔ̀. Ɛ́ ɓɛ́ khie lerɛ Etiɛnɛ lɛ dàa ńdɛsĩ̀nlɔ́ à lò tú àá Mɛkɛ̃n-Sãanu, àá Filiipu àá Porokɔɔre àá Nikanɔɔre àá Timɔn, àá Paramenaasi àá Nikola lɛ ɛ́ lé hɔ́ Antiɔsi kɛ́ á hàarí khie zɔn ɓɛ̀ Zuifuɓɛ Dɔfin wṹn benlɔ́ hũn. 6Ɛ́ ɓɛ́ khie dàa ɓɛ̀ ɛ́ dàa ɓɛrɛ ɓɛ̀ tɔnkɛriè viì. Ɛ́ ɓɛ́ tɔnkɛriè ɛ́ bɔ̀ ɓɛ́ níhĩ́ peɓɛ̀ lɔ̀n, ɛ̀ ɓɛ̀ hɛ̃nnɛ Dɔfĩn ɛ́ lɛ́ ɓà ǹ. 7Ɛ́ lé Dɔfĩn bienù ɛ́ wo hṹn buie cɔ́, ɛ́ ɓɛ́ ńdɛsĩ̀riè ɛ́ wookɛa ɛ́ boòní lé Zerizalɛɛmu lóo hũn, ɛ́ ɓɛ́ khɛ̃́ndàariè bìkùi ɛ́ tɛ̀ ɛ́ dũmuasɛ̃̀ à Yiezu ǹ.

Etiɛnɛ ɓaàrɔ́ bòo

8Á Etiɛnɛ lɛ ɛ́ Dɔfĩn ɛ́ wɔ́ àá mí hiì ɛ̀ Hɔ̀ lɛ́ mí pànkɛ́ ɔ̀ ǹ, ɛ́ hṹn hɔ̀ bɔ̀bɛ̃hɛ̃ àá hɔ́ yéréké bòo ɛ̀ wé ɓɛ́ nìnbirìe tĩ́ihṹ. 9Ɛ́ ɓɛ́ nìnbirìe dɔ̀ ɛ́ ɓɛrɛ ɛ́ wũ̀aní àá ɔ́pe Etiɛnɛ. Ɓàasiè ɛ́ iè ɓɛ̀ Zuifuɓɛ lɛ ɛ́ wóò vɛ kóo ɓánlɔ̀n ɓɛ́ zũnù lɛ ɛ́ ɓɛ́ wóò ve nɛ «wɔhĩ́ lɛ ɛ́ ɓɛ́ lerɛ ɲún hũn.» Ɓɛ̀ ɛ́ lɔ́ hɔ́ Sirɛnɛ àá hɔ́ Alɛkisandiri àá ɓɛ́lɛ lɔ́ hɔ́ Silisi àá hɔ́ Azii pɛ̃̀hɛ̃ hũn. 10Kɛ́ ɓɛ́ den hṹn yí dɛ̀ àpe Etiɛnɛ ɛ́ yá bie ɛ́ ɲì nin wɛ̀; iè hɔ̀ lɛ ɛ́ Mɛkɛ̃n-Sãanu ɛ́ te hɔ bɔ̀dũmunù biehĩ́ ɛ́ hṹn lɛ́ à ǹ. 11Ɛ́ ɓɛ́ khie yɛ̀ ɓɛ̀ nìnbirìe dɔ̀ ɲunù nɛ ɓɛ bie nɛ ɓɛ́ mɔn ɔ̀ kɛ́ á ɔ̀ Moyiize àá Dɔfĩn ɛ̀ tòokɛ. 12Ɛ́ ɓɛ́ wo khie sùkúrɛ ɓɛ̀ nìzã̀amáa àá ɓɛ́ nìkĩ́ɛ àá ɓɛ́ làndɛ́ kɛ̀ránliè, ɛ̀ ɓɛ̀ van ɓaa ɔ̀pe Etiɛnɛ àá pànkɛ́ ɛ́ dàa van ɓɛ̀ lìe lèriè viì. 13Ɛ̀ ɓɛ̀ lò lɛ́ ɛ́ ɓɛ́ nìnbirìe dɔ̀ ɛ́ khie ɔ̀pe Etiɛnɛ ɲunù ɛ̀ ɓúukɛ ɛ́ nɛ làa: «Àpe nùún sɔ lɛ ɛ́ wóò dìń khɛ́ hɔ́ ben-làahɛ̃ lè Dɔfĩn zũ-bɛhɔ́ àá Moyiize làndɛ́ bòo hũn. 14Ké ɛ́ ɲɛ́ kɛ́ á ɛ́ bie nɛ ape Nazarɛɛte Yiezu ɛ́ ɓén wua lepe Dɔfĩn zũ-bɛhɔ́, á ɛ́ zɛ̀ní hɔ́ làndɛ́a lɛ á Moyiize ɛ́ lɛ́ kie ǹ.» 15Ɛ́ ɓɛ́ lìe lèriè ɓɛ́kùi ɛ́ mɔ̀ ɓɛ́ yìe ɛ́ fɛ́ á Etiɛnɛ ǹ, ɛ́ ɓɛ́ mɔn kɛ́ piè híɛhɔ́ ɛ́ dɛ̃̀ kɛ̀a mɛlɛkɛ híɛhɔ́.

Currently Selected:

Bɔ̀werà 6: bwj

Highlight

Copy