Bɔ̀werà 13

Baranabaasi àá Sooli tɔrɛ̀ bòo

1Hɔ̀ Antiɔsi lóo ńdɛsĩ̀riè tĩ́ihṹ ɛ́ Dɔfĩn bɔ̀háaníriè àá ɓɛ́ kɛ̀ránliè dɔ̀ ɛ́ hàarí wi hũn: ɓɛ̀ hàarí iè Baranabaasi àá Simiyɔn lɛ ɛ́ ɓɛ́ wóò ve nɛ Nì-bíì, àá Likiise lɛ ɛ́ lé hɔ́ Sirɛnɛ, àá Manahɛɛnɛ lɛ páaniɛ wɔ́ mí zĩncɛ́mu àá ɔ́ bɛ́zuú Herɔɔde, ɛ̀ khíi páa Sooli. 2Ɛ́ wurù dɔ̀ zɔn ɛ́ ɓɛ́ páaniɛ lù ɓɛ́ ɲihĩɛ́ ɛ́ Dɔfĩn ɛ̀ ɓàanínin. Ɛ́ lé Mɛkɛ̃n-Sãanu ɛ́ bie lɛ́ ɓà ǹ ɛ́ nɛ làa: «À Baranabaasi àá ɔ́ Sooli ɛ́ mí leń ɛ̀ khíi dĩ̀ní ɓɛ́ dòonún hɔ̀ tɔnlɔ́ lɛ ɛ́ ń vɔn ɓɛ̀ bòo hũn.» 3Ɛ́ ɓɛ́ wo lù ɓɛ́ ɲihĩ́ɛ ɛ̀ ɓɛ̀ hɛ̃nnɛ Dɔfĩn ɛ́ lɛ́ ɔ́pe Baranabaasi àá Sooli ǹ, ɛ́ bɔ̀ ɓɛ́ níhĩ́ peɓɛ̀ lɔ̀n ɛ̀ ɓɛ̀ wo fùɛrɛ̀sí ɓà ǹ ɛ́ ɓɛ́ cɔ́.

Baranabaasi àá Sooli bòo lɛ ɛ́ ɓɛ́ ɛ́ wé hɔ́ Siipere cɛ̃̀mɛ̀nɛ́ hũn bòo

4Ɛ́ lé Mɛkɛ̃n-Sãanu ɛ́ iè pe wo tɔrɛ à Baranabaasi àá Sooli kɛ̀amu; ɛ́ ɓɛ́ wo khie ɛ́ van hɔ̀ Selesi lóo ɛ́ van mɔ̀ lè ɲumu wiè dɛ̀bɛhɔ́ yán ɛ́ dàa vaá-vɛ hɔ Siipere, hɔ̀ cɛ̃̀mɛ̀nɛ́ dɔ̀ lɛ wi hɔ ɲun-bɛhɔ́ tĩ́ihṹ. 5Ɛ́ hɔ́ lɛ ɛ́ ɓɛ́ van dɛ̃un hɔ̀ Salamiinɛ lóo, hɔ̀pe Siipere cɛ̃̀mɛ̀nɛ́ hũn, ɛ́ ɓɛ́ khie bɔ̀ ɓɛ̀ Zuifuɓɛ ńkóoɓánlɔ̀n zĩhĩ́ɛ ǹ ɛ́ lè Dɔfĩn bienù ɛ̀ buie pehɔ̀ hũn. À Zãn lɛ ɛ́ ɓɛ́ wóo ve nɛ Marike ɛ́ hṹn wi àá ɓɛ́ ɛ́ ɓɛ̀ sĩiní. 6Ɛ́ ɓɛ́ zɔn cánkɛa hɔ̀ Siipere cɛ̃̀mɛ̀nɛ́ ɛ́ van lɔ́ dɛ̃un lè lóo dɔ̀ ɓɛ́ nɛ Pafɔɔsi. Ɛ́ ɓɛ́ van tɛ̀rɛa bɔ̀miníkɛ dɔ̀ lɛ yèrè ɛ́ ɓɛ́ nɛ Baare-Yiezu yán; à iè Zuifuɓɛ nùún dɔ̀ lɛ ɛ́ hṹn iè ɓúo bɔ̀háanírɔ. 7À hàarí wi ɓánlɔ̀n àá lépe cɛ̃̀mɛ̀nɛ́ sɔ kuvɛrɛnɛɛre lɛ yèrè ɛ́ ɓɛ́ nɛ Sɛrɛziise Polɔɔsi. Àpe kuvɛrɛnɛɛre sɔ ɛ́ hàarí iè nìnbírɔ lɛ hɛciri wi. Á vɔn Baranabaasi àá Sooli iè hɔ̀ lɛ á wɛ mii ɲí Dɔfĩn bienù. 8Kɛ́ á bɔ̀miníkɛ Elimaasi (sí iè piè yèrè àá Kɛrɛkiɓɛ níi), ɛ́ pɛ̃́ à sun Baranabaasi àá Sooli ɛ́ cɛ̀ mii fĩiní-ɛ pe kuvɛrɛnɛɛre à bí dɛsĩ̀ Dɔfĩn wɛ̀. 9Ɛ́ Sooli lɛ ɛ́ ɓɛ́ lò wóò bĩní ve nɛ Pooli#13.9 Sooli ɛ́ iè ɔ́pe Yiezu tɔnkɛrɔ yèrè ɓà Zuifuɓɛ níi hũn. Ɛ̀ hɔ̀ lɛ á lò hàarí iè Rɔmu sɔ, ɛ́ piè yèrè ɛ́ hàarí iè Pooli. (Bĩní vɛ húi Bɔw 22.27-29) lɛ ɛ́ tú àá Mɛkɛ̃n-Sãanu ɛ́ mɔ̀ mí yìe ɛ́ fɛ́ ápe Elimaasi ǹ ɛ́ ɔ̀ húi, 10à zɔn bie lɛ́ à ǹ nɛ làa: «Kɔ́ hɛ̀ iè nìnbírɔ lɛ ɛ́ tú àá nìwàámu àá mɛkɛ̃nɲiì! Sitũanɛ zuú, bɔ̀tente míkùi ɓà ńbíyanle! Kɔ́ hɛ̀ yí kɔ fùansí Ɲunsɔ wṹn bũmɛkɛrɔ́ ǹ? 11Ɛ́ hɔ́pe lɛ lɔ̀n, ɛ́ kɔ́ wo húi: Ɲunsɔ ɛ́ mii lí kɔ ǹ àá mí núnú ɛ̀ kɔ̀ yìe ɛ̀ muì, ɛ́ kɔ́ yí kɔ mi wurù ńpiemu pɛ̃̀hṹ dɔ̀ hũn wɛ̀.» Ɛ́ mí laà hũn, ápe Elimaasi sɔ yìe ɛ́ yòó wɔ́ síbínú míkùi, á ɛ́ lànkɛ khíi viì míkùi, ɛ́ nìnbírɔ lɛ mii dí piè híɛhɔ́ ɛ̀ cɛ̀. 12Ɛ́ bòo lɛ á kuvɛrɛnɛɛre ɛ́ mɔn hɔ̀ bòo lɛ wɔ́, á dũmuasɛ̃̀ Dɔfĩn. Hɔ̀ bòo lɛ ɛ́ ɓɛ́ kɛ̀rɛ́a àá ɔ́ Ɲunsɔ bòo hũn ɛ́ hɛ̀ zɔn piè tĩì cɛ̃̀un.

Pooli àá Baranabaasi bòo lɛ ɛ́ ɓɛ́ ɛ́ wé Antiɔsi lóo lɛ wi hɔ Pisidi pɛ̃̀hɛ̃ hũn

13Ɛ́ Pooli àá ɓá ńkɔhĩ́ ɛ́ khie zɔn lè ɲumu wiè dɛ̀bɛhɔ́ ɛ̀ ɓɛ̀ lɔ́ Pafɔɔsi ɛ́ khie kã́a Pɛrɛzee lóo, hɔ̀ Panfili pɛ̃̀hɛ̃ hũn. Ɛ́ hɔ́ lɛ ɛ́ van dɛ̃un, á Zãn lɛ ɛ́ ɓɛ́ wóò ve nɛ Marike ɛ́ fùɛrɛ̀sí ɓà ǹ à khie khũ̀a van Zerizalɛɛmu. 14Ɛ́ ɓɛ́ khie lɔ́ hɔ́ Pɛrɛzee ɛ́ bɔ̀ ɓɛ́ wṹn ɛ́ van dɛ̃un hɔ̀ Antiɔsi lɛ wi hɔ Pisidi pɛ̃̀hɛ̃ hũn. Ɛ́ ɓɛ́ Zuifuɓɛ ńvũùnín sí zɔǹ, ɛ́ ɓɛ́ van zɔn peɓɛ̀ ńkóoɓánlɔ̀n zũnù ɛ́ zɔn kɛsí yán. 15Ɛ́ hɔ́ lɛ ɛ́ ɓɛ́ kɛ̀rɛa ɔ̀ Moyiize làndɛ́ vɛ̃hṹ àá ɓɛ́ Dɔfĩn bɔ̀háaníriè vɛ̃hɛ̃ vɔ́, ɛ́ ɓɛ́ Zuifuɓɛ ńkóoɓánlɔ̀n zũnù hándíe ɛ́ khie bie lɛ́ ɓɛ́dɔ̀ ǹ nɛ ɓɛ khíi bie lɛ́ ɓà ǹ nɛ làa: «Kìe zɛ̀ɓɛ̀, mí ɓen dàa bòo dɔ̀ ɛ́ mii bie lɛ́ ɓɛ́ nìzã̀amáa ǹ ɛ̀ dàá hĩ̀iníkɛ peɓɛ̀ tĩɛ̀ ɛ̀ mì wo dɛ̀ hɔ̀ ɛ́ bie kɛ̀a sáalɛ.» 16Ɛ́ Pooli ɛ́ síɛ hĩ́nà hóoniɛ mí núnú à zɔn bie ɛ́ nɛ làa: «Mìpe Yizarayɛɛle nìɛ àá mípe lɛ ɛ́ páaníɛ ɓɛrɛ koo ɓánlɔ̀n ɛ́ dàa ɛ́ Dɔfĩn ɛ̀ ɓàanínin, mì tɛ́ mí ɲɛkɛ̃̀a! 17Hɔ̀pe Yizarayɛɛle Dɔfĩn ɛ́ hàarí munɛ kìe zĩkĩ́nɓɛ̀. Ɛ́ Hɔ́ hàarí lɛ́ ɛ́ ɓɛ́ buòniɛ pɛ̃̀hṹ lɛ ɛ́ ɓɛ́ dàa hàarí van iè ɓɛ̀ nɛ̀hãà hɔ̀ Eziputi cɛ̃̀mɛ̀nɛ́ hũn, ɛ́ máahṹ lɔ̀n ɛ̀ hɔ̀pe Dɔfĩn ɛ́ zɛ̃́niɛ mí núnú pànkɛ́ ɛ́ dàa lerɛ ɓɛ̀ ɛ́ lieniɛ lépe cɛ̃̀mɛ̀nɛ́ sɔ hũn. 18Ɛ́ Hɔ̀ hɛ̃̀ mí hũn àá ɓɛ́ ɛ́ dàa ɓɛ̀ fúu ɛ́ dɛ̃un lɔ́líe dɛ̀wɛ́ (40) ɓà ńmàa lè ńɲiherà hũn. 19Ɛ́ Hɔ́ ɛ́ ɓɔ́ dàa ɲúuhɛ̃ hùuɲu nìɛ ɲún hɔ̀ Kanan cɛ̃̀mɛ̀nɛ́ hũn, ɛ̀ Hɔ̀ khie lɛ́ peɓɛ̀ cɛ̃̀mɛ̀nɛ́ sɔ ɓɛ̀pe Yizarayɛɛle nìɛ ǹ ɛ́ wɔ́ àá peɓɛ̀ kĩ́ɛ. 20Ɛ́ hɔ́pe sí ɛ́ míɛ fúu ɛ́ van dɛ̃un lɔ́líe khĩɛ-naa àá dɛ̀wɛ́ àá pírú (450) ɓà ńmàa. Ɛ́ pehɔ̀ máahṹ ɛ̀ Dɔfĩn ɛ́ khie lɛ́ ɓɛ́ hándíe lɛ ɛ́ ɓɛ́ wóo ve nɛ lìe lèriè ɓà ǹ, ɛ́ ɓɛ́ dú ɓɛ́pe kìe zĩnkĩ́nɓɛ̀ híɛhɔ́ fúu ɛ́ van dɛ̃un mí bɔ̀háanírɔ Samuyɛle pɛ̃̀hṹ. 21Ɛ́ pehɔ̀ máahṹ, ɛ̀ ɓɛ̀ khie nɛ ɓɛ́ ɛ́ bɛ́zuú ɛ̀ cɛ̀. Ɛ́ Dɔfĩn ɛ́ lɛ́ á Kiisi yɛ̀nù Sayuuli ɓà ǹ; à hàarí ɛ́ lé Bɛ̃nzamɛn zũnù nìɛ hũn. Á wɔ́ peɓɛ̀ bɛ́zuú fúu lɔ́líe dɛ̀wɛ́ (40) hũn. 22Ɛ́ pehɔ̀ máahṹ, ɛ̀ Dɔfĩn ɛ́ pɛ̃́ á Sayuuli ɛ́ fùɛrɛ̀sínin, ɛ̀ Hɔ̀ khie wɔ́ á Daviide àá bɛ́zuú ɛ́ lɛ́ ɓà ǹ, ɛ̀ Hɔ̀ bie piè bòo hũn ɛ́ nɛ làa: “Ń yú-o Zese yɛ̀nù Daviide, á iè nùún lɛ ɛ́ bòo tĩ mi ǹ, á wóo ɓén wé hɔ́ bòo lɛ ɛ́ ń wɛ míkùi.” 23Ɛ́ hɔ́ iè pe Daviide hũn nìɛ hũn á Yiezu ɛ́ zɔn tɔn lɔ́ hũn, àpe lɛ ɛ́ Dɔfĩn ɛ́ wɔ́ àá ɓɛ́ Yizarayɛɛle nìɛ fuenírɔ kɛ̀a bòo lɛ ɛ́ Hɔ́ dàa hàarí lɛ́ mí ɲunù ɓà ǹ. 24Ɛ́ pɛ̃̀hṹ lɛ ápe Yiezu ɛ́ ɲɛùn yí ɓen, á Zãn ɛ́ hàarí buie lè Dɔfĩn bienù ɛ́ lɛ́ ɓɛ́ Yizarayɛɛle nìɛ ǹ nɛ ɓɛ zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bɔ̀koohɛ̃ wénlɔ́ ǹ, ɛ̀ ɓɛ̀ lɛ́ ɓɛ́te ɛ̀ ɓɛ̀ líiníkɛ hɔ ɲumu hũn. 25Ɛ́ pɛ̃hṹ lɛ á Zãn tɔnlɔ́ ɛ́ hàarí vaá-vɛ mí vénlén, á hàarí ɛ́ bie ɛ́ nɛ làa: “Mí ɛ́ líi ɛ̀ mì nɛ npe ɛ́ iè wieni? Ǹpe ɛ́ yí-e pe lɛ ɛ́ mí ɛ́ hìé wɛ̀. Kɛ́ mí tɛ́ mí ɲɛkɛ̀a: àpe lɛ ɛ́ mí ɛ́ hìé ɛ́ vaá-ɓen nin máahṹ, ɛ̀ niǹ ɲún yɛ̀rɛ́ kɛ fĩ́i ɛ̀ ǹ siɛ lúnlúsí ɛ̀ bie nɛ nin fuen piè naahĩ́ huunìɛ.”

26Ɛ́ mípe kìe zɛ̀ɓɛ̀, mìpe Abarahaamu hũn nìɛ àá mípe lɛ wi hũ̀nún ɛ́ Dɔfĩn ɛ̀ ɓàanínin àá kie, hɔ̀ iè kèpe ɛ́ Dɔfĩn ɛ́ tɔniɛ lèpe fuerɛ̀ bienù lɛ ɛ́ lɛ́ nin. 27Ɛ́ ɓɛ́ Zerizalɛɛmu nìɛ àá ɓɛ́ hándíe ɛ́ den yí dũń ɔ́pe Yiezu, ɛ̀ ɓɛ̀ lò yí dũń ɓɛ́ Dɔfĩn bɔ̀háaníriè biehĩ́ ɲún wɛ̀; hɔ̀pe lɛ ɛ́ ɓɛ́ wóo kɛ̀rán ɓɛ́ ńvũùnín sí zɔǹ fúu. Kɛ́ hɔ́ bòo lɛ ɛ́ ɓɛ́ bɔ̀háaníriè sɔ ɛ́ bie iè pe ɛ́ ɓɛ́ den wɔ́, lɛ ɛ́ ɓɛ́ dàa nɛ Yiezu ɛ́ fɔ́ɓán àá húmú. 28Ɛ́ ɓɛ́ lò ɛ́ yí mi bɔ̀koohɔ́ dɔ̀ lɛ á wɔ́ á dàa fɔ́ɓán à ɓé, ɛ̀ ɓɛ̀ lò den pɛ́wi hɛ̃nnɛ à Pilaate ǹ nɛ a lɛ́ à hí. 29Ɛ́ kɛ̀amu, ɛ́ ɓɛ́ ie pe wo wɔ́ hɔ́ bòo lɛ ɛ́ wɛ̃́ lé Dɔfĩn bienù vɛ̃hṹ hũn míkùi piè bòo hũn ɛ́ van víeniɛ. Ɛ́ pehɔ̀ máahṹ, ɛ̀ ɓɛ̀ yòó lerɛ-à lè ɓáalén dãanù lɔ̀n ɛ́ síɛniɛ, ɛ̀ ɓɛ̀ mɔ̀ a ɛ́ van dɔ́ lé búi dɔ̀ hũn. 30Kɛ́ Dɔfĩn ɛ́ vìeniɛ ɔ̀ ɛ́ líeniɛ hɔ̀ húmú hũn. 31Ɛ́ pehɔ̀ máahṹn, á zɛ̃́niɛ míte wihĩ́ cɛ̀rìɛɛ àá ɓɛ́ nìnbirìe lɛ ɛ́ hàarí bɔ̀ɓán àá ɔ́ ɛ́ lɔ́ hɔ́ Kalile ɛ́ dàa yòó van hɔ̀ Zerizalɛɛmu. Ɛ́ kɛ̀a sáalɛ, ɛ́ ɓàasiè sɔ ɛ́ te hɔ bòo lɛ ɛ́ ɓɛ́ mɔn ɔ̀pe Yiezu bòo hũn ɛ́ bie ɛ̀ lɛ́ ɓɛ́pe Yizarayɛɛle nìɛ ǹ. 32Ɛ́ képe, ké ɓiɛ̀ iè lèpe Bentĩnu sɔ ɛ́ ké ɛ́ buie ɛ̀ lɛ́ miɛ ǹ, nɛ hɔ bòo lɛ ɛ́ Dɔfĩn hàarí lɛ́ mí ɲunù nɛ mí ɓén wé ɛ́ lɛ́ kìe zĩkĩ́nɓɛ̀ ǹ, 33ɛ́ hɔ́ ɛ́ wɔ́ ɛ́ lɛ́ kiè ǹ, kèpe lɛ ɛ́ iè peɓɛ̀ hũn nìɛ. Hɔ̀ ɛ́ vìeniɛ Yiezu ɛ́ líeniɛ hɔ̀ húmú hũn, kɛ̀a bòo lɛ ɛ́ hɔ́ dàa wɛ̃́ hɔ́ Yanbehĩ vɛ̃hṹ bɔ̀nbɔ̀ ɲulán hũn ɛ́ nɛ làa:

“Kɔ̀pe temu iè nìn Zuú,

Ɛ̀ dàá mìí zoòni, ɛ́ ń iè mì Yàá.”

34Dɔfĩn ɛ́ hàarí bie nɛ mí ɓén vìení-ɛ ɛ́ líení hɔ́ húmú hũn bòo lɛ ɛ́ wé ɛ̀ piè tɛkɛ̀a ɛ̀ bí tiè wɛ̀. Hɔ̀ den hàarí bie hɔ̀ ɛ́ nɛ làa:

“Ń ɓén lɛ́ lé dúɓìɛ tente mìɛ ǹ, lèpe lɛ ɛ́ mí dɛ̀ mì tĩɛ̀ ɛ́ bè lɔ̀n,

Lèpe lɛ ɛ́ ń hàarí lɛ́ niǹ ɲunù ɔ̀ Daviide ǹ bòo hũn.”

35Ɛ́ sí iè hɔ̀pe ɛ́ hɔ́ dàa bĩniɛ wɛ̃́ hɔ́ Yanbehĩ vɛ̃hṹ viì dɔ̀ hũn nɛ Daviide ɛ́ khɛ́ àá Dɔfĩn ɛ́ nɛ làa:

“Kɔ́ yá ɓén fùansí ɛ́ kɔ́ nìnbírɔ lɛ ɛ́ ce ɛ́ tiè lè búi hũn wɛ̀.”

36Ápe Daviide mí pɛ̃̀hṹ hũn ɛ́ hàarí wɔ́ Dɔfĩn tɔntɛ́ ɛ́ wɔ́ pehɔ̀ bòo lɛ ɛ́ Hɔ́ wɛ. Ɛ́ pehɔ̀ máahṹ à khie húrun, ɛ́ ɓɛ́ wũ̀nɛ-à ɓà zĩkĩ́nɓɛ̀ wũ̀nlén, á tie lè búi hũn. 37Kɛ́ ápe Yiezu lɛ ɛ́ Dɔfĩn ɛ́ vìeniɛ ɛ́ pe yí tiè lè búi hũn wɛ̀.

38Ɛ́ mípe kìe zɛ̀ɓɛ̀, mì dũń sãaní kɛ́ hɔ́ iè ɔ̀pe Yiezu bòo hũn ɛ́ hɔ́ bɔ̀koohɛ̃ sɛ́wɛ́rí dénlɔ́ ɛ́ dàa yú ɛ́ buie ɛ̀ lɛ́ miɛ ǹ; iè hɔ̀ lɛ á Moyiize làndɛ́ ɛ́ yí dàń ɛ́ yí lɛ́ ɛ̀ mì ɛ̀ cã̀aní Dɔfĩn híɛhɔ́ wɛ̀. 39Kɛ́ nìnbírɔ yée nìnbírɔ lɛ ɛ́ dũmuasɛ̃̀ àpe Yiezu ǹ, ɛ̀ ɓàasɔ ɛ́ Dɔfĩn wɔ́ àá nì-cã̀anírɔ. 40Ɛ́ mí ɓɛ́ɓɛ́ míte ǹ sãàní, bòo lɛ ɛ́ wé ɛ̀ hɔ̀ bòo lɛ ɛ́ wɛ̃́ ɓɛ́ Dɔfĩn bɔ̀háaníriè vɛ̃hɛ̃ hũn ɛ̀ bí yí miɛ wɛ̀. Hɔ̀ ɛ́ wɛ̃́ yán ɛ́ nɛ làa:

41 “Mì húi, mìpe nìɛ lɛ yìe ɛ́ yá tí Dɔfĩn bòo lɛ ɛ́ Hɔ́ wóò wé,

Nɛ hɔ hɛ̀ yòokɛ mí lɔ̀n fúu ɛ̀ mì híkɛ,

Iè hɔ̀ lɛ ɛ́ nin wé bòo dɔ̀ kɛ́ mí yìe wi,

Lɛ kɛ́ nìnbírɔ dɔ̀ ɛ́ hṹn te hɔ ɛ́ bie lɛ́ miɛ ǹ,

Ɛ́ mí yá dɛsĩ̀ wɛ̀.”»

42Ɛ́ Bòo lɛ ɛ́ Pooli àá Baranabaasi ɛ́ zɔn lɔ́ ɓɛ́ Zuifuɓɛ ńkóoɓánlɔ̀n zũnù hũn, ɛ́ ɓɛ́ hɛ̃nnɛ ɓà ǹ nɛ ɓɛ bĩní khũ̀á ɓen lè ńvũùnín sí lɛ van ɓen zɔn, ɛ̀ bĩní ɓen bie hɔpe bɔ̀cóoní sɔ bòo. 43Ɛ́ peɓɛ̀ ńkóoɓánlɔ̀n máahṹ, ɛ́ ɓɛ́ Zuifuɓɛ nìnbí-kùi àá ɓɛ́ nìnbirìe dɔ̀ lɛ hṹn khie van zɔn ɓɛ̀ Zuifuɓɛ Dɔfin wṹn bènlɔ́ bòo, ɛ́ khie bɔ̀ Pooli àá Baranabaasi máahṹ. Ɛ́ Pooli àá Baranabaasi ɛ́ khie ɛ́ dìkìmú àá ɓɛ́, ɛ́ peɓɛ̀ tĩɛ̀ ɛ̀ hĩ̀iníkɛ nɛ ɓɛ bè ɓɛ́ tĩɛ̀ lè hìi ɓàasɔ Dɔfĩn lɔ̀n.

44Ɛ́ lé ńvũùnín sí lɛ ɛ́ khie sɛ̃̀, ɛ́ ɓɛ́ tan wɔ́ ɓɛ́ lóo nìɛ ɓɛ́kùi ɛ́ temu ɓɛrɛ koo ɓánlɔ̀n ɛ́ ɓɛ́ ɛ̀ ɲí Dɔfĩn bienù. 45Ɛ́ hɔ́ lɛ ɛ́ ɓɛ́ Zuifuɓɛ ɛ́ mɔn ɓɛ̀ nìní-dũmu, ɛ́ lé yanlienú ɛ́ síɛ tú ɓɛ́. Ɛ́ Pooli ɓen khɛ́ bòo lɛ, ɛ̀ ɓɛ̀ nɛ hɔ yí be wɛ̀, kɛ́ ɓɛ́ ɛ́ ɔ̀ tòokɛ. 46Ɛ́ Pooli àá Baranabaasi ɛ́ wo zɔn bie lɛ́ ɓà ǹ kɛ́ ɓɛ́ fɔhĩ́ɛ tɛ́rɛ ɛ́ nɛ làa: «Lè Dɔfĩn bienù ɛ́ hṹn fɔ́ɓán ɛ̀ lè khɛ́ ɛ̀ lɛ́ mípe ǹ vé. Kɛ́ hɔ́ lɛ ɛ́ mí pɛ̃́ pelè bòo, ɛ́ hɔ́ wo ɛ́ zɛ̃́ní kɛ́ mí nɛ mí yí fɔ́ɓán àá lépe mɛkɛ̃nì lɛ yá vé wɛ̀. Ɛ́ ké wo ke khíi vɛ àá ɓɛ́ nìnbirìe lɛ ɛ́ yí ɓɛ́ Zuifuɓɛ viì. 47Iè hɔ̀ lɛ ɛ́ lɛ iè hɔ̀ bòo lɛ á Ɲunsɔ ɛ́ bie ɛ́ lɛ́ kiè ǹ:

“Ń bɔ̀sí kɔ nɛ kɔ wé hɔ́ dàa nìɛ lɛ kɛ́ ńpiemu,

Bòo lɛ ɛ́ wé ɛ̀ kɔ̀ vɛ bie lɛ́ ɓɛ́ nìnbirìe ǹ lè sṹsùnù míkùi lɔ̀n,

Nɛ Dɔfĩn ɛ́ mii fuení ɓà ǹ.”»

48Ɛ́ ɓɛ́ nìnbirìe lɛ ɛ́ yí ɓɛ́ Zuifuɓɛ ɛ́ ɲɛ́ hɔ́ biehĩ́ sɔ, ɛ́ ɓɛ́ hɛ̀ wɛ ɓɛ́te ɛ̀ ɓɛ̀ ɛ́ Ɲunsɔ bienù ɛ̀ ɓàanínin. Ɛ́ ɓɛ́pe lɛ ɛ́ lé mɛkɛ̃nì lɛ ɛ́ yá vé bòo ɛ́ sɛ̃̀ nin ɓɛ́kùi ɛ́ dũmuasɛ̃̀. 49Ɛ́ Ɲunsɔ bienù ɛ́ wo hṹn khie ɛ́ buie cɔ́ lépe cɛ̃̀mɛ̀nɛ́ sɔ míkùi hũn. 50Kɛ́ ɓɛ́ Zuifuɓɛ ɛ́ den khie sùkúrɛ ɓɛ̀ hã́a dɔ̀ lɛ ɲúuhɛ̃ lìkɛ lɛ yí Zuifuɓɛ kɛ́ ɓɛ́ den ɛ́ Dɔfĩn ɛ̀ ɓàanínin, ɛ̀ ɓɛ̀ lò sùkúrɛ ɓɛ̀pe lóo hándíe nɛ ɓɛ pĩ́ Pooli àá Baranabaasi bòo. Ɛ́ ɓɛ́ bieniɛ peɓɛ̀ lɔ̀n ɛ̀ ɓɛ̀ ɲɛun ɓɛ̀ ɛ́ líeniɛ ɓɛ́ cɛ̃̀mɛ̀nɛ́ hũn. 51Ɛ́ Pooli àá Baranabaasi ɛ́ ɓánɓɛ́a ɓɛ́ zehĩ́ khũnkhũnù ɛ́ kóosí yán ɛ́ dàa zɛ̃́niɛ kɛ́ lépe lóo sɔ nìɛ ɛ́ wɔ́ khɔ̀n, ɛ̀ ɓɛ̀ khie cɔ́ van àá Yikoniɔmu. 52Kɛ́ hɔ́ Antiɔsi ńdɛsĩ̀riè ɛ́ pe den hṹn wɛ ɓɛ́te cɛ̃̀un, ɛ̀ ɓɛ̀ tú àá Mɛkɛ̃n-Sãanu.

Currently Selected:

Bɔ̀werà 13: bwj

Highlight

Copy