Bɔ̀werà 12

Zaake ɓénlɔ́ àá Piɛre ɓaà dénlɔ́ lé kɛ̀sí hũn bòo

1Ɛ́ pehɔ̀ yìi hũn, á bɛ́zuú Herɔɔde ɛ́ hĩ́nà ɛ́ ɓɛ̀ ńdɛsĩ̀riè dɔ̀ ɛ̀ ɲínkɛ. 2Á Zãn ɓà zuú Zaake á lɛ́ ɛ́ ɓɛ́ ɓɔ́ àá lé khɛ̃́n-tɔ́nú. 3Ɛ́ hɔ́ lɛ á mɔn kɛ́ ɓɛ́ Zuifuɓɛ ɛ́ wɛniɛ hɔ̀, á nɛ ɓɛ bĩní ɓaà ɔ̀ Piɛre. Hɔ̀ wɔ́ hɔ́ búrú lɛ ɛ́ ɲɛfĩni mí hũn sɛ́rí yìi hũn. 4Ápe Herɔɔde ɛ́ wo lɛ́ ɓɛ́ ɓaa ɔ̀ Piɛre ɛ́ van dɔ́ lé kɛ̀sí hũn, à nɛ ɓɛ sɛ̃̀nɛ̀dɔ́síɓɛ́ nìɛ ɓɛ̀ nɛ́ nɛ́ ɲúuhɛ̃ nɛ́ ɛ̀ hìé ɔ̀ ǹ. Àpe Herɔɔde ɛ́ den hṹn wɛ kɛ́ lé Nyiewɛlɔn sɛ́rí ɛ́ ɓen dú vɔ́, ɛ́ mí den ɛ́ lɛ́ ɛ́ ɓɛ́ ɛ́ lè piè lìe ɓɛ̀ nìzã̀amáa yìe hũn. 5Ɛ́ Piɛre ɛ́ wo hàarí zɔn wi le kɛ̀sí hũn ɛ́ ɓɛ́ sɛ̃̀nɛ̀dɔ́síɓɛ́ ɛ́ hìénin, hɔ́rɔsí kɛ́ lé Dɔfĩn zũnù ńkóoɓánlɔ̀n nìɛ ɛ́ pe hàarí can ɓɛ́ kuò ɛ́ Dɔfĩn ɛ̀ hɛ̃nnin àpe Piɛre bòo hũn.

Bòo lɛ ɛ́ Piɛre ɛ́ dàa yú lɔ́ lé kɛ̀sí hũn bòo

6Ɛ́ sí hṹn ɓen van tɛ̃un, ɛ̀ Herɔɔde ɛ́ wo hṹn wɛ ɛ́ mii dàá ɔ́ Piɛre ɛ̀ dàá vɛ ɓɛ nìzã̀amáa hiɛhɔ́, ɛ̀ vɛ lè piè lìe. Ɛ́ hɔ́pe sũnúhṹ sɔ, ɛ́ Piɛre wo ɛ́ zɔn dũmua wi ɓɛ sɛ̃̀nɛ̀dɔ́siɓɛ̀ nìɛ ɓɛ̀ ɲu tĩ́ihṹ, lè kɛ̀sí zũnù hũn. Ɛ̀ ɓɛ̀ can ɔ̀ àá zɔ̀kɔ̀zɔ́kɔ́ɓɛ̀ bɔ̀nbɔ̀ ɲu, ɛ̀ ɓɛ̀ kɛ̀sí zũhìeriè dɔ̀ ɛ́ lɔ́ dɛ̃̀ ɛ́ lè Zĩínù ɲunù ɛ̀ lè hìénin. 7Ɛ́ Ɲunsɔ Mɛlɛkɛ dɔ̀ ɛ́ pan pan à ɓɛrɛ zɛ̃́niɛ míte lè kɛ̀sí zũnù hũn, ɛ́ lé zũnu ɛ́ yòó wɔ́ hɔ́ ńpiemu míkùi. Á Mɛlɛkɛ ɛ́ síɛ ɓánɓɛ́a ɔ̀ Piɛre dũ̀kɛ̃́nlé ǹ ɛ́ tĩ̀níɛ ɔ̀, à bie lɛ́ à ǹ ɛ́ nɛ làa: «Síɛ hĩ́ní fùa fùa!» Ɛ́ hɔ́ zɔ̀kɔ̀zɔ́kɔ́ɓɛ̀ ɛ́ yòó lɔ́ piè níhĩ́ ǹ ɛ́ kùenkɛa khie siɛ. 8Á mɛlɛkɛ ɛ́ zɔn bie lɛ́ à ǹ ɛ́ nɛ làa: «Hĩ́ní ɓùó kɔ́ tĩ́ihṹ ɛ̀ kɔ̀ kóo kɔ́ naahĩ́.» Ɛ́ Piɛre ɛ́ hĩ́nà wɔ́ hɔ́. Á Mɛlɛkɛ ɛ́ bĩniɛ zɔn nɛ: «Mìí kɔ́ mùakú yòó zɔ ɛ̀ kɔ̀ bè niǹ máahṹ.» 9Ɛ́ Piɛre ɛ́ khie bɔ̀ à Mɛlɛkɛ máahṹ ɛ́ dàa zɔn lɔ́ lé kɛ̀sí hũn. Kɛ́ á den hṹn yí dɛsĩ̀ kɛ́ hɔ́pe bòo lɛ á Mɛlɛkɛ ɛ́ wé ɛ́ iè bòo lɛ ɛ́ bɔn wɛ̀. À hṹn líi à nɛ hɔ iè dɛ̀wuò. 10Ɛ́ Piɛre àá ɔ́ Mɛlɛkɛ ɛ́ van khie ɓɛ̀ hán sɛ̃̀nɛ̀dɔ́síɓɛ́ lɛ dɛ̃̀ ɛ́ lè kɛ̀sí ɛ̀ hìénin, ɛ́ bĩniɛ van khie ɓɛ̀ ńɲuunín bán, ɛ́ ɓɛ́ wo van dɛ̃un lè hɛnlɔ́ zĩínù ɲunù lɛ ɛ́ híɛhɔ́ ɛ́ sɛ̃́ɓán àá hɔ́ lóo. Ɛ́ lé zĩínù ɲunù sɔ ɛ́ hɛ́rɛ míte ǹ peɓɛ̀ híɛhɔ́ ɛ́ ɓɛ́ wo zɔn lɔ́, ɛ́ lɔ́ bɔ̀ lè wṹn dɔ̀ ɛ́ vɛ cɔ́, á Mɛlɛkɛ wo pan pan à vṹnun à kɛ́ á Piɛre.

11Ɛ́ Piɛre den yìe yòó fɛ́ á dũnɛ hɔ̀ bòo lɛ ɛ́ wɔ́, á ɛ́ bie mí tĩì hũn ɛ́ nɛ làa: «Kɛ̀a sáalɛ ɛ́ ń den wo dũ kɛ́ hɔ́ iè bòo lɛ ɛ́ bɔn. Ɲunsɔ ɛ́ tɔrɛ mí Mɛlɛkɛ á ɓɛrɛ fueniɛ mi ǹ ɛ́ lɔ́ á Herɔɔde núnú hũn àá hɔ́ bɔ̀koohɔ́ lɛ ɛ́ ɓɛ́ Zuifuɓɛ ɛ́ hṹn cɛ̀ ɛ́ ɓɛ wé àá mi núnú hũn.» 12Ɛ́ hɔ́ lɛ á dũnɛ pehɔ̀ híɛhɔ́ kɛ̀amu, á khie van ɔ̀ Zãn lɛ ɛ́ ɓɛ́ wóò ve nɛ Marike ɓà nín Maari yíe. Nìnbirìe bìkuì ɛ́ hṹn van koo ɓánlɔ̀n yán ɛ́ Dɔfĩn ɛ̀ hɛ̃nnin. 13Ɛ́ Piɛre ɛ́ van ɓánɓɛ́a lè zĩínù ɲunù; ɛ́ tɔntɛ́ hṹnu dɔ̀ lɛ yèrè ɛ́ ɓɛ́ nɛ Rɔɔde ɛ́ ɓɛrɛ ɛ́ mii ɓen húi nɛ a wieni. 14Á dũnɛ à Piɛre tɛmu á hɛ̀ wɛniɛ míte fúu ɛ́ yí hán lé zĩínù ɲunù wɛ̀, kɛ́ á den khie zɔ̀ ɛ́ van bie nɛ a iè Piɛre temu ɓɛrɛ wi le zĩínù ɲunù. 15Ɛ́ ɓɛ́ zɔn bie lɛ́ à ǹ nɛ làa: «Kɔ̀ wìe ɲún hĩ́nà lò!» Kɛ́ á hṹnu ɛ́ pɛ̃́ à nɛ hɔ bɔn. Ɛ́ ɓɛ́ wo zɔn nɛ làa: «Ɛ́ lé iè piè bɔ́nú ɛ́ kɔ́ mɔn lò.» 16Hɔ́rɔsí kɛ́ á Piɛre ɛ́ pɛ́wi dɛ̃̀ ɛ́ lè zĩínù ɲunù ɛ̀ lè ɓánɓɛ́. Ɛ́ bòo lɛ ɛ́ ɓɛ́ hɛ́rɛ lè, ɛ́ ɓɛ́ wo mɔn ɔ̀ ɛ́ hɔ́ hɛ̀ yòokɛa peɓɛ̀ lɔ̀n. 17Ɛ́ Piɛre ɛ́ hóoniɛ mí núnú ɛ́ nɛ ɓɛ tɛ́ ɓɛ́ ɲɛkɛ̃̀a, à bie hɔ bòo lɛ ɛ́ Ɲunsɔ dàa lerɛ-à ɛ́ líeniɛ lè kɛ̀sí hũn ɛ́ lɛ́ ɓà ǹ. À bĩniɛ bie lɛ́ ɓà ǹ nɛ ɓɛ vɛ bie hɔ ɛ̀ lɛ́ á Zaake ǹ àá ɓɛ́ ńdɛsĩriè lɛ ɛ́ kɛ́ ǹ. À zɔn lɔ́ yán ɛ́ lɔ́ van àá vi-ɓuiɛ̀.

18Ɛ́ hɔ́ lɛ ɛ́ hɔ́ sí van tɛ̃un, ɛ́ ɓɛ́ sɛ̃̀nɛ̀dɔ́síɓɛ́ ɛ́ hɛ̀ hĩ́nà ɛ́ kĩ̀nkĩ́ ɓán hũn cɛ̃̀un, kɛ́ ɓɛ́ ɛ́ ɓɛ́te ɛ̀ dìekɛnin nɛ hɔ iè ńɓùo ɛ́ temu wo wɔ́ á Piɛre ǹ? 19Á Herɔɔde ɛ́ dɔ́ ɓɛ́ nìnbirìe nɛ ɓɛ cɛ̀ à Piɛre, kɛ́ ɓɛ́ den van cɛ̀ tan ɛ́ yí mi-ɛ wɛ̀. Á dièkɛa ɓɛ̀ kɛ̀sí zũhìeriè ǹ, à lɛ́ lé ɲunù ɛ́ ɓɛ ɓɔ́ ɓɛ́. Ɛ́ pehɔ̀ máahṹ àpe Herɔɔde ɛ́ hĩ́nà lɔ́ hɔ́ Zudee pɛ̃̀hɛ̃ ɛ́ khie van hɔ̀ Sezaree lóo hũn ɛ́ van kɛsí yán.

Herɔɔde húmú bòo

20Herɔɔde ɛ́ den hàarí tĩì ɛ́ ɓɛ̀ Tiire àá Sidɔn siè ɛ̀ cĩ̀nin cɛ̃̀un. Ɛ́ ɓɛ́pe ɛ́ wɔ́ ɓɛ́ ɲunù àá dìcóoní ɛ̀ ɓɛ̀ nɛ vɛ hɛ̃un ɔ̀pe Herɔɔde ǹ. Ɛ́ pehɔ̀ bòo hũn ɛ́ ɓɛ́ ɲɛ́ɓán àá Bilasitiise, àpe lɛ ɛ́ ti-e pe bɛ́zuú zũnù bòo ɛ́ húi, ɛ́ ɓɛ́ wo páaniɛ bɔ̀ɓán ɛ́ van bie lɛ́ á Herɔɔde nɛ a wé mí sɛ́wɛ́ri à lɛ́ ɛ̀ ɓɛ́ ɲí ɓán. Ɓɛ̀pe Tiire àá Sidɔn siè ɲunù díe ɛ́ den hàarí wóò lé àá ɔ́pe bɛ́zuú Herɔɔde ɓà cɛ̃̀mɛ̀nɛ́ hũn. 21Ɛ́ lé sí lɛ ɛ́ ɓɛ́ lerɛ zɔn, ɛ́ Herɔɔde ɛ́ zɔn mí bɛ́záanú tĩ̀ɛ, à khie kɛsí mí bɛ́záanú wànlè lɔ̀n, à ɛ́ bie àá ɓɛ́ ɓɛ̀pe nìzã̀amáa yìe hũn. 22Ɛ́ ɓɛ́ nìzã̀amáa ɛ́ zɔn ɛ́ wũamɛkɛ ɛ́ nɛ làa: «Àpe lɛ hɛ̀ iè Dɔfĩn temu ɛ́ bie kɛ́ á hɛ̀ yí nìnbírɔ wɛ̀.» 23Ɛ́ pehɔ̀ laà hũn, ɛ́ Dɔfĩn mɛlɛkɛ dɔ̀ ɛ́ ɓen siɛ lú-o pe Herɔɔde ǹ, ɛ́ ńtĩɛ̀ ɛ́ zɔn ɔ̀, ɛ́ piè hũn ɛ́ tie á wo húrun iè hɔ̀ lɛ á yí lɛ́ ɓàarɔ́ hɔ̀ Dɔfĩn, kɛ́ á den wɔ́ míte á ɓàaniɛnin.

24Hɔ́rɔsí kɛ́ lé Dɔfĩn bienù ɛ́ pe den wookɛa ɛ́ vɛ àá híɛhɔ́ ɛ́ saakɛ ɛ̀ vɛ míkùi. 25Ɛ́ hɔ́ lɛ ɛ́ Baranabaasi àá Sooli ɛ́ tɛ́ ɓɛ́ tɔnlɔ́ vɔ́ hɔ́ Zerizalɛɛmu lóo hũn ɛ́ khũ̀a vaá lan, ɛ́ ɓɛ́ fɔ́ á Zãn lɛ ɛ́ ɓɛ́ wóò ve nɛ Marike ɛ́ dàa khũ̀a cɔ́.

Currently Selected:

Bɔ̀werà 12: bwj

Highlight

Copy