MARK 4

Jagjõõ je bug coore

(Mat 13.1-9; Lug 8.4-8)

1Yeso fer had jar jag maarog ma Galile, jar raw tay ti ɓiŋ ɓe ni ngaɓa debaŋ, á raw ɗii gi ɓi daage wo nen maarog no, jar de lagge go ciŋ, jag biin lay. 2Á raw had rage debaŋ de jagjõõ, raw riŋ rage ga : 3Coʼ we sug ɓay. Jobo kal go bug coore. 4Á de bug gi ɓe mo caw, maapo raw wo ray ge go ti faage, dweere raw wo sig rage go ɓuy. 5Ma la raw wo ray ge go ti ngel ma de jeʼãy maga sir bay ni debaŋ wa, cooren tĩĩ wo le go tuuseŋ, wer maga sir bay wo wer ɓaara debaŋ gesiŋ ni kuɗum wa. 6Wur wo le go kalge mokay, á raw wo lwaɗge go, raw wo higgi go, doo ga cẽw ɓaara bay de rawge gesiŋ wa. 7Ma tigriŋ raw wo rayge yoo ɗewseŋ, ɗewseŋ gig go ne hara ti, sen daʼ wo nen ma gẽẽge gà. 8Ma tigriŋ raw wo ray ge ti ngel ma de sõʼge, á raw wo gẽẽge, raw wo ruggi debaŋ, ma baapo naa ti kluu riŋ, la naa ti kluu ɗawa, ma la naa ti gaʼ ɗawa lay.

9Yeso raw riŋ rage ga : Wosela maga yaŋ de sug no, mo laa wer wããre se no.

Yeso wãɗ wããre diŋ de jagjõõ le la

(Mat 13.10-17; Lug 8.9-10)

10Yeso kal rawge wo go fentray ɓe boŋ, jar ma ɓiŋ ɓen wo de jar ma wer ɓe ma hwal ti ɓogn raw wo age see ɓe wiigi ɓe ga wer jagjõõ sen nà gahãy la. 11Á raw riŋ rage ga : Ma ɓay á ɓod wer yoŋre ngel twaywaŋ mani Baan we go ne nday, ama ma jar lan á laa ɓod wer see ɓe go ne hara gà ga say á mo laa wo wer wããre sen diŋ de jagjõõ, 12maga :

Á mo hõʼ bà mbaara nen ɓaara go koge ɓe, ama á ko ge wo wer ɓe go pah gà

Á mo coʼ bà mbaara sugi, ama á laa ge wer ɓe go pah gà

Nen maga á mo ɓoɗ wo jag go pel Baa wa, day Baa mo men ɗig re ɓlagge

ɓaaran go ne hara ti wa lay.

Yeso ɓoɗ wer jagjõõ je bug cooren go

(Mat 13.18-23; Lug 8.11-15)

13Day Yeso raw riŋ rage ga : Nday laa wer jagjõõ se kayn we gà no, ni nday laa ge wer jagjõõ po gà so. 14Je bug cooren bug diŋ wããre Baa. 15Jar po wo yoo ɓaara de maŋ jeŋ faage maga wããren ray go ni mono, wããre maga á laa ne wo ɓil ɓaara mo lag, Manhúulí raw age ndarge ɓe wo go. 16Jar maapo wo yoo ɓaara pa, de maŋ jeʼãy, wo diŋ jar maga laa wo wããre Baa, yããn wo go ɓil feh tuu. 17Ama cẽw ɓaara bay de rawge gesiŋ wa. Sen wo diŋ jar maga ig wo de hã ɓil ɓaara meʼ koɗe. Re ma de gaali wo de joŋge bon a we ti ɓaara wer wããre Baa, á raw wo men wããre Baa go tuuseŋ. 18Jar po wo yoo ɓaara de maŋ ɗewseŋ, wo diŋ jar maga laa wo wããre Baa, 19ama ɗiggi fẽẽre ma gesiŋ la wo de koŋne horog gig wo go ne wããre ma ɓil ɓaaran ti, sen daʼ wo nen ma joŋ mbèere gà. 20Jar ma de maŋ ngel ma de sõʼgen, diŋ jar maga laa wo wããre Baa, yããn wo de ele, rug wo mbèere lay, ma baapo naa ti kluu riŋ, la naa kluu ɗawa, ma la naa gaʼ ɗawa lay.

Jagjõõ ma de ngaɓge de gèere

(Lug 8.16-18)

21Yeso raw riŋ rage ga : Jobo doʼ gér ɓe go kay, kal kaŋge ɓe wer preŋ noga kuɓ hãn ne hẽn ti gà. Á hagn go ciŋ. 22Fẽẽre maga jar bay wo koge go wa mo ɓuy, á raw ko rage go, fẽẽre ma de yoŋren wo ɓuy raw wo ndar nen go tinoo poɗag poɗage. 23Je maga yaŋ nen coʼ sug de el no, mo laa wer wããre se no.

24Yeso raw riŋ rage ga : Ko we see ɓay de el ti wããre maga nday de laage ɓe mo ɓuy no. Baa ngaɓ ge fen maga á hãn ge ne nday yaŋ de mundoore maga nday ngaɓ ne jar lan wo de ɓe mo lay. 25Je maga yaŋ de mopo doo, à hã ne hẽn ni, je maga bay de mopo doo wa no, fen maga hay doo ɓe meʼ, a yãã ge sen go pa.

Jagjõõ ma de ngaɓ ge de mbèere maga g ẽẽ de see ɓe

26Yeso raw riŋ rage pa ga : twaywaŋ mani Baan de ngaɓge doo mbèere mopo maga jobo kapn ɓi pay ɓe. 27Á leʼ naa de suŋ, pũy go ciŋ de jag toŋ, mbèere laa wo waa go, tĩĩ wo, á joŋ wo joŋ ge la, á bay de ko rage wa. 28Sir tĩĩ mbèeren go de see ɓe, kal le go taŋgu diŋ koo ɓe no, blam ɓe diŋ sug ɓe, blam sen pa mbèeren rug go ti ɓe. 29Mbèeren wo we go rug gi no, bloo raw carge ɓe go de mbege.

Jagjõõ mbèere mandufi

(Mat 13.31-32,34; Lug 13.18-19)

30Yeso raw riŋ rage pa ga : twaywaŋ mani Baan de maŋ may ɓa? Naa mo ngaɓn diŋ de jagjõõ may la? 31Á maŋ mbèere yeg maga à bug ɓi pay, á klee meʼ daŋ mbèere fẽẽre ma ti tamsir wo la ɓuy. 32Ama blam maga à bugn we go, á raw lir doo kluu debaŋ daŋ fẽẽre maga à bug ra ɓi pay mo ɓuy, jaw doo de pããrege, hãã dweere kaŋ wo tiŋ ti doo ɓe nen cee sug ɓe.

33Yeso had jar ɓuy diŋ de jagjõõ doo kay wo no, á wãɗ ne hara nen maga jar cor sug wããre ɓen mo laɗ wo ne. 34Á wãɗ ne hara say de jagjõõ, ama á yaŋ wo de jar ma wer ɓen wo tawa no, se raw ɓoɗ wer ɓe go ne hara paha.

Yeso dig leege ga á mo fĩɗ wa

(Mat 8.23-27; Lug 8.22-25)

35Wur sen de law, Yeso raw wii jar ma wer ɓen wo ga : Naa cegaɗ go faale bii ɓaŋla. 36Á raw wo men ngaɓan wo go, jar ma wer ɓen raw wo maŋ Yeso ɓi daage maga á hay ni mono. Daage ma tigriŋ hay yaŋ wo ɓiŋ ɓe ni mbaŋ pa. 37Ko la, leege po raw naage le de egre, kaŋngaw biin raw kagge ɓi daage no, daagen leʼ bagge go. 38Yeso ɓen le glog daagen ti naa de ɓoʼ ti ti fen ɗagal ti. Jar ma wer ɓen raw wo pũygi ɓe go, raw wo ɗege ɓe ga : Waŋ, naa go de basge mo kaʼ, ndo bay ɗig sen wa an ge?

39Yeso raw pũygi go, raw caa põõ ne leege no, raw riŋ maarogn ga : Hay go baʼa, oo eŋ. Leegen raw men fidgi go, raw ooge eŋ. 40Blam sen, Yeso raw riŋ rage ga : Nday joŋ hẽẽne le ɓa? Nday bay de hã ɓil ɓay ne ndi wa gahãyne?

41Ama á joŋ wo hẽẽne debaŋ, á raw wo wiɗ kããra ga : Sen diŋ je may ga leege wo de bii yãã wo jag ɓe lay ɓuy mo ɓa?

Currently Selected:

MARK 4: TUP

Highlight

Copy