MARK 2

Yeso ur je grúm go ciŋ vboŋ vboŋ

(Mat 9.1-8; Lug 5.17-26)

1Naw naa go blam sen rabe, Yeso fer wo Kapernam pa, à raw laage ga á yaŋ liŋ ni. 2Jar raw tay ti ni ngaɓa, ngel gwaʼ gà has, ko jag tiŋ draʼ ngel bay wa. Yeso raw had rage. 3Jar raw wo nduugi de je grúm po, jar de soɗge ɓe naa. 4Á laa wo daʼ ngel ma age de ɓe pel Yeso gà doo ngaɓan wo, á raw wo ɗiigi ciŋ ti tiŋ, raw wo cloʼ ti ɓe, sir wo je grúm wo ti fen suuli ɓen pel Yeso. 5Yeso wo koge ga á wo de hã ɓil ɓaara ne se mokay, raw ɗe je grúm ga : Wel ɓi no, ndi men ɗig re ɓlagge ɓon wo we go mo ti.

6Jar ma ndar wer wããre Baa yaŋ wo yoo ngaɓan ni, raw wo ɗiggi ga : 7Bloo se deŋ wãã doosen mokay wããge ɓa? A ɗar Baa mo pa ɓa? Je tabay kãã ma men ɗig re ɓlagge go ne jobo ti has gà say diŋ Baa boŋ.

8Yeso raw koge ti ɗiggi ɓe tuuseŋ ga á wo de ɗiggi jiili ɓaara doosen no, raw riŋ rage ga : Nday ɗig ɗiggi ma se kayn ɓil ɓay gahãy ɓa? 9Maga go gus diŋ ma hon ne, ga ndi mo riŋ je grúm ga : Ndi men ɗig re ɓlagge ɓon we go mo ti mo yaw, noga ndi mo riŋ ga : Ur go ciŋ, maŋ fen suuli ɓon, see mono? 10Ama ndi da ga nday mo ko ga Wel je táabay yaŋ de kããge ma men ɗig re ɓlagge go ne jar wo ti tamsir la. Blam sen á raw riŋ je grúm ga : 11Ndi de riŋ ndo, ur go ciŋ, maŋ fen suuli ɓon doo ɓo, see liŋ ni ɓo.

12Bloo raw urgi go ciŋ tuuseŋ, raw maŋ fen suuli ɓen doo, kal go nen jar ɓuy caw. Wosela ɓuy yoo ɓaara raw ngrisgi de hẽẽne, á raw wo togoɗ Baa ga : Wùr bay de ko sen mokay ti boŋ wa hase.

Yeso ɗe Lefi wer ɓe

(Mat 9.9-13; Lug 5.27-32)

13Yeso raw ferge le ti jeŋ maarog ma Galilen pa, jar raw age le see ɓe debaŋ, á raw had rage. 14De maga á de seege mo caw, á raw ko Lefi wel ma Alfe, de hayle ti ngel ma tar see gen yeʼe. Yeso raw riŋgi ɓe ga : See le wer ɓi. Lefi raw urgi go ciŋ raw maŋ blam ɓe.

15De maga Yeso wo hayge rege liŋ Lefid mokay, jar tar seen wo de jar maga à bay kee rage jag wa raw wo lagge rege ɓiŋ ɓe ni debaŋ de jar ma wer ɓen wo. Werga te jar ma doosen hay wo seege wer ɓe ngaɓa debaŋ. 16Jar ma ndar wer wããre Baa ma yoo Farisiyẽẽ ko wo Yeso rege ɓiŋ jar ma de ɓlagge wo de jar tar see wo mokay, raw wo riŋ jar ma wer ɓen wo ga : A re hoole ɓiŋ jar tar see wo de jar maga à bay kee rage jag wa le ɓa?

17Yeso wo laa wããre ɓaaran mokay, raw riŋ rage ga : Jar maga bay wo de cegè wa, bay wo de sãy dogtor ti wa, de sãy dogtor ti diŋ jar ma de cege wora. Day ndi a ɗe ge bay diŋ jar maga a de hoo sug ti ɓaara ga á wo de deele pel Baa mo wa, ama ndi a ɗege diŋ jar maga jobo bay kee rage jag wa mono.

Wããre hẽẽge bii

(Mat 9.14-17; Lug 5.33-39)

18Ti wurpo jar ma wer Jaŋ ma Yog Jar wo de Farisiyẽẽ raw wo hẽẽ bii, jar raw wo age riŋ Yeso ga : Jar ma wer Jaŋ ma Yog jar wo de jar ma wer Farisiyẽẽ hẽɗ wo bii, day jar ma ɓon hẽɗ wo bii gà an le ɓa?

19Yeso raw riŋ rage ga : Nday ɗig ga jar maga à ɗe ra le re doo ɓoʼge wãy ti bii hẽẽ bii de maga war wãy yaŋ ɓiŋ ɓaara ni ɗa mono? Go tinoo ga bay wa. De maga war wãy yaŋ ɓiŋ ɓaara ni ɗa no, á hẽẽ bii gà. 20Ama wurpo a ge yaŋ le, á baa ge wo war wãy yaŋ go, wur sen hẽẽ wo bii kway lay so.

21Jobo sãã õõbe ma defay jag õõbe ma de tããbe gà ama á sãã mbe we de sen ɓuy no, ma defay ngar ma de tããben go de pele. 22Jobo ser yii ma de jiigi defay ɓi ndar bii ma de tããbe gà ama á ser mbe we de sen ɓuy no, yiin cag ndar bii ma de tããben go, yiin yuu gi go, ndar biin ɓlag go lay. Kiɗ see yii ma de jiigi defay diŋ ndar bii ma defay lay.

Yeso wãã re ti wur Saba

(Mat 12.1-8; Lug 6.1-5)

23Ti wurpo, Yeso hee ɓi payre wur Saba. Jar ma wer ɓen raw wo hrag coore ma ti jeŋ faage. 24Farisiyẽẽ raw wo riŋ Yeso ga : Ko nen ɓo. Á wo de joŋ re maga go de diggi ga joŋ wur Saba wa mo deŋ ɗa la.

25Yeso raw riŋ rage ga : Nday bay de jaŋ wããre maga Dafid hay joŋ de kããre ɓen doo koŋne mo wa yawla? 26Á kal ɓil tiŋ Baa nen Abiyatar je kluu ma siɗ jag ne Baa no, re hoole maga de hãge ne Baa, jag liŋgi go de dig jar ga jar mo ren hãy wa, say diŋ jar ma siɗ jag wo tawa, de sen ɓuy Dafid hoo hoolen rege, hã ne kããre ɓen wo lay.

27Yeso fer riŋ rage pa ga : Baa joŋ wur Saban ma hã de el ne je tabay no, Baa bay de joŋ je tabayn gà mo hay nen doo wur Saban wa. 28Wersen, Wel je tabayn diŋ Waŋ wur Saban ɓuy yaw.

Currently Selected:

MARK 2: TUP

Highlight

Copy