MATIYE 7

Yeso ga jobo mo car re ne kẽẽ se wa

(Lug 6.37-38,41-42)

1Ko we see ɓay diŋ jar cag re jar lan wo wa, ni Baa cag re ɓay gà lay. 2Werga Baa caage kiida ɓayn diŋ doo ga nday de cag ge ɓe no lay. Baa ngaɓ ge fen maga á hãn ge ne nday yaŋ de mundoore maga nday ngaɓ ne jar lan wo de ɓe mo lay. 3Ndo go de mbal taale nen kigrig tiʼ, ɓon ko doo ɓo gà day ndo kãã ma ko ti fíi ma nen hẽn ɓon ko ge yaw ne. 4Ndo de mbal taale nen kigrig tiʼ yaw, ɓon ko doo ɓo gà ndo raw riŋ hẽn ɓon ga : Ɗaw ndi maŋ ti fíi go mo nen maŋ ge yawla. 5Ndo je bag bii jar sen mo deŋ no, maŋ mbal taale ma nen ɓon go taŋgu ɗa, ni nen ɓo ko yaŋ go de el ma maŋ ti fíi go ne hẽn ɓon nen kway.

6Hã we mo ma bay ɗagn go ne wayre wo maga á mo fer wo mbuɗ nen de ɓay lorge wa, lag we redew ɓayn wo ne gaduuru wo pel maga á mo dagn wo go de ɓaale wa.

Wiɗ we, kiɗ we, mbar we jag tiŋ

(Lug 11.9-13)

7Wiɗ we, ni à hã yaŋ ne nday, kiɗ we, ni nday daɗ yaŋ, mbar we jag tiŋ, ni à buln yaŋ go ne nday. 8Werga wosela maga yaŋ wiɗgi mo ɓuy, à hã ne hẽne, je maga yaŋ kiɗgi, daʼ, à bul jag tiŋ yaŋ go ne je mbar jag tiŋ lay. 9Wose yaŋ yoo ɓay la ga wel ɓe wii hoole doo ɓe, se hã ne hẽn diŋ húulì la? 10Noga á wii cẽẽ se hã ne hẽn diŋ cwe ne? 11Hayga nday jar se ma de ɓlaggen, nday yaŋ de ko hã fẽẽre ma de el ne weere ɓay wo yaw no, Pan ɓay ma ciŋ hã ge fẽẽre ma de el wo ne jar maga wiɗn wo de daŋ sen so yaw.

12Wersen joŋre maga nday da ga jar lan mo joŋ wo ne nday mo ɓuy, joŋ we ne hara doosen no lay. Mokay diŋ jag liŋgi wo de wããre maga jar ndar nen wããre ma jag Baa gon wããn wo mo so no.

Jagjiŋ ma kwereŋ no

(Lug 13.24)

13Ɓred we ma laage jagjiŋ ma kwereŋ no. Werga jagjiŋ maga go bul, sen bay de gaali wa, sen wo de jar ti ngel ma bas jar go, jar maga wo de laa ge ti sen wo ngaɓa debaŋ. 14Ama ma jagjiŋ maga sen kwereŋ, sen ɓred de gaali, sen wo de jar diŋ kol ge go tenen tiʼ i, day jar maga daʼ wo faage ma laa ge ni bay wo ngaɓa wa.

Leʼge koo

(Lug 6.43-44)

15Koɗ we see ɓay doo jar geteʼ maga wãɗ wo ga saara diŋ jar ndar nen wããre ma jag Baa go wo, á a ge wo yaŋ ɓiŋ ɓay joŋ see ɓaara desãy doo sããre wo nono, ama nen ɓil ɓaara, á wo diŋ way-baa ma de hãã wo. 16Nday ko ra yaŋ see leɗge ɓaara, tlalum leɗ wo mbèere koo ma de hõõre ti ɓaara ni gà gum leɗ wo mbèere daswa ti ɓaara ni gà lay. 17Koo ma de el leʼ mbèere ɓen de el lay, ama ma koo ma de cege leʼ mbèere ɓen go de cege lay. 18Koo ma de el leʼ mbèere de ɓlagge gà koo ma de cege leʼ mbèere ma de el gà lay. 19Koore maga leɗ wo mbèere de el gà mo ɓuy à car ra ge go, blam sen à wo go de ɓaara lagge ti wùu. 20Wersen nday ko ge jar geteʼ maga wãɗ wo ga saara diŋ jar ndar nen wããre Baa go wo yaŋ diŋ wer joŋre ɓaaran wo.

Yeso ga se ko rage gà hase

(Lug 13.25-27)

21Ko we go ga wo ge lagge ti twaywaŋ ma ciŋ bay diŋ jar maga ɗe wo ndi ga : Waŋkluu, Waŋkluu mo ɓuy koɗ wa, ama say diŋ jar maga wo de joŋ fẽẽre maga Pan ɓi ma ciŋ de dage ɓe mono. 22Wur sen wo ge nduugi mokay, jar debaŋ ɗe wo ndi yaŋ wur sen ga : Waŋkluu, Waŋkluu, wùr hay siɗ wããre ɓo we ne jar ti jag ɓo. Wùr hay niɗ sõõre wo we go ne jar ti ti jag ɓo, wùr hay joŋ fẽẽre mbuɗgi we debaŋ ti jag ɓo lay. 23Blam sen ndi raw riŋ rage ga : Ndi bay de ko nday wa hase, yaʼ we wo go see ɓi hãã, nday jar joŋ ɓlagge.

Tiŋri po wo ɓoge

(Lug 6.47-49)

24Wosela ɓuy maga yaŋ coʼ sug wããre ɓi maga ndi de wããge ɓe mo deŋ we, day yaŋ joŋge doo ga ndi wãã ne no, je sen de ngaɓge doo je ma de ko re maga boo tiŋ ɓen go ciŋ ti húulì. 25Baa raw cwaage, pyewre dug wo go, leege fĩɗ ne tiŋn ti de egre, mbe de sen ɓuy tiŋn leʼ go gà werga glog ɓe de ɓoʼ ge ciŋ ti húulì. 26Day wosela ɓuy maga yaŋ coʼ sug wããre maga ndi de wããge ɓe mo deŋ we, day day we joŋge doo ga ndi wãã no gà no, je sen doo je ma de loɗge ga ɓoʼ wer tiŋ ɓen go diŋ ti ngel bii tããlãy taʼa. 27Baa raw cwaage, pyewre dug wo go, leege fĩɗ tiŋ de egre, tiŋ raw leʼ ge go, ɓlag go ɓuy.

Yeso had hadge ma ɓen de egre

28Yeso wo taw hadge sen go mokay, ngaɓan raw wo ngrisgi wer hadge ɓen debaŋ, 29werga á had bay doo jar ma ndar wer wããre Baa wo no koɗ wa, ama á had ɓen de egre debaŋ.

Currently Selected:

MATIYE 7: TUP

Highlight

Copy