MATIYE 28

Yeso fer kal ge go ciŋ tenen

(Mark 16.1-10; Lug 24.1-12; Jaŋ 20.1-10)

1Blam wur Saba de wur dimasi de maga wur le de kalge mokay, Mari ma Magdala wo de Mari ma lan raw wo age ko tipaale no. 2Ko la sirn raw fĩɗ gi de egre debaŋ, je peele Waŋkluu sir le ciŋ, raw age legad húulì ma jag tuun go ti jeŋ, raw hayge go ti ɓe yeʼe. 3See ɓe sag doo wur no, õõbe ma ti ɓen wo depiiri doo few no lay. 4Hẽẽne raw joŋ sooden wo debaŋ hãã kol wo go daɗge, kol wo doo ga saara huɗ go nono.

5Je peele Baa raw riŋ naaren wo ga : Ma ɓay joŋ we hẽẽne wa, ndi ko we ga nday kiɗ Yeso maga à hay ɓaln go ciŋ ti koo mono. 6Á bay la wa, á fer we go birgi doo ga á hay riŋ we nono, see we le ko ngel maga à hay de ɓoʼge ni mono. 7See we deparday riŋ jar ma wer ɓen wo ga á fer we le go kalge yoo jar ma de húulín wo ciŋ tenen, á raw yaŋ wo patala pel ɓay Galile, nday wo yaŋ ko nen ɓe wo ni. Mokay diŋ wããre maga ndi da ga ndi sii ne nday mono.

8Á raw wo men tipaalen go deparday doo hẽẽne, ɓil ɓaara raw fuggi go debaŋ lay, á raw wo hoo ɗeere de wããre sen mokay ne jar ma wer Yeson wo. 9Yeso raw caa pel ɓaara deparday tuu, raw riŋ rage ga : Ndi hee jag ne nday, naaren raw wo yaʼge see ɓe, ɗaw wo ɓaale ɓe, raw wo leʼ monɗra ne hẽn pele. 10Yeso raw riŋ rage so ga : Joŋ we hẽẽne wa, see we riŋ hẽẽre ɓin wo ga á mo wo wo Galile, á wo wo yaŋ ko nen ɓi wo ni.

Wããre sooden wo

11Naaren wo le ti faage ɗa mokay, jar po wo yoo soode maga hay wo gor ti tipaalen, raw wo rawge ɓi leege, siɗ wo wããre maga joŋ mo deŋ ne waŋre ma siɗ jag wo. 12Waŋre ma siɗ jag raw wo tay ti de jar kluurin wo ɓoʼ ti wããre. Blam maga jag ɓaara wo tayge go boŋ mokay, á raw wo hã solay ne sooden wo pur debaŋ, 13raw wo riŋ rage ga : Ni nday riŋ we jar ga jar ma wer ɓen á wo maŋ húulí ɓe go de suŋ freŋ de maga ni nday ti naa. 14Hayga waŋ wo we laa wããre se kayn, ni wùr bawn yaŋ de wããre se no. Ni nday kãã ma daŋ re ma de gaalin yaŋ go ɓuy lay. 15Sooden raw wo yãã solay no, raw wo joŋge doo ga á riŋ ra wo nono. Blam sen wããre sen raw dusgi go yoo jar Jwif wo hãã wara.

Yeso naa nen see ɓe ne jar ma wer ɓen wo

(Mark 16.14-18; Lug 24.36-49; Jaŋ 20.19-23; Joŋ 1.6-8)

16Jar ma wer Yeso ma hwal ti boŋ kal wo rawge Galile, ti húulì maga Yeso hay riŋ ra ti ɓe mono. 17Á wo wo ko ge ɓe mokay, á raw wo laa kõyõgre gesiŋ goŋ ge ɓe, de sen ɓuy jar po wo yoo ɓaara raw wo gwaʼ ge mbrawge jiili ɓaara. 18Yeso raw yaʼ ge see ɓaara, raw riŋ rage ga : Egre ma ciŋ de ma gesiŋ la ɓuy Baa go de hãge ɓe me. 19Wersen see we see wer jarn wo ɓuy, kol ra we go jar ma wer ɓi, joŋ we batem go ne hara de ɗe ge ɗúu Pããbe, de ɗúu Wel no, de ɗúu Nenterse ma bay ɗagn lay. 20Blam sen ni nday had ra we ga á mo hoo wo sug ti wããre maga ndi hay had we de ɓaara mo ɓuy no. Hay we go de koge ga ndi joŋ ge yaŋ see ɓay ti naw tum ɓuy, hãã go ti wur tawge tamsir no.

Currently Selected:

MATIYE 28: TUP

Highlight

Copy