MATIYE 24

Yeso wãã ga tiŋ Baa ɓlag ge go

(Mark 13.1-2; Lug 21.5-6)

1Yeso raw kalge le go ɓi tiŋ Baa no, á wo raw ge mokay, jar ma wer ɓen raw wo yaʼge see ɓe riŋ gi ɓe ga á mo ko mbe tiŋ Baa de booge mo kaʼ ɗa la. 2Yeso raw riŋ rage ga : Nday yaŋ de ko sen mo deŋ ɓuy yawla? Kidolgi ndi riŋ nday ga húulì po boŋ draʼ layblaʼ gwaʼ ge de jag ge ti kẽẽ lam taʼ la bay srogge go gesiŋ gà hase.

Bon maga a ge wo taŋgu tawge tamsir no

(Mark 13.3-13; Lug 21.7-19)

3Yeso raw hayge ti húulì maga koore Olif wo ti ɓe mono jar ma wer ɓen raw wo yaʼge see ɓe de see ɓaara tawa, raw wo wii gi ɓe ga : Sii ne wùr ɗa la, re sen joŋ ge nà hun ɓa? May se kaŋ nen wùr ge ti wur age ɓon wo de tawge tamsirn mo la?

4Yeso raw riŋ rage ga : Joŋ we see ɓay de el nen maga jobo mo hãy we nen go wa. 5Jar debaŋ a ge wo yaŋ de ɗúu ɓi jage, day wosela ɓuy yoo ɓaara wãã yaŋ ga se diŋ Mesi, se diŋ Mesi. Á hãy ge wo nen jar yaŋ go debaŋ lay. 6Nday leʼ ge yaŋ laa re durgi wo, de re durgi ma ɓi sir ma hãã hãã wo le, de sen ɓuy ni nday joŋ we hẽẽne wa, joŋ bà joŋ ge layblaʼ, sen joŋ go, day sen joŋ ge diŋ tawge tamsirn gà ɗa ane. 7Wer jar ma baapo dur wo yaŋ de wer jar ma lan wo, day waŋ ma baapo leʼ wo waŋ ma lan yaŋ wo, koŋne joŋ ge yaŋ, fĩɗ gi sir joŋ ge yaŋ ɓi sir ma tigriŋ wo sar sar lay. 8Re sen mo deŋ joŋ ge wo, diŋ doo tĩĩ gi wer bon maga joŋ wãy maga leʼ biŋgi nono.

9Wersen jar hã ge wo nday yaŋ go ga joŋ bon ɓay, id gi wo nday yaŋ go lay, jar ɓuy car wo hee yaŋ de ɓay ti re ɓi. 10Ti wur sen jar debaŋ mbuɗ wo nen ɓaara yaŋ blam, kol ge wo yaŋ joŋ cogob ne kããra ti, car wo hee yaŋ de kããra. 11Jar geteʼ maga wãɗ wo ga saara diŋ jar ndar nen wããre ma jag Baa go ndar wo nen yaŋ debaŋ, kaŋ wo wer jar yaŋ go debaŋ lay. 12Ɓlagge dus yaŋ debaŋ, dage maga jar hay da kããra woɗ ge go debaŋ lay. 13Ama ma je maga oo we ngiŋ, hãã go ti wur taw ge sir no, je sen daʼ ge see ɓe. 14À wo yaŋ go sii Wããre ma de Cõõre maga wãã ti twaywaŋ mani Baan go ti tamsir krub ɓuy, maga wer jar ɓuy mo laa wo sedewa sen go de sug ɓaara ɓuy, blam sen joŋ ge diŋ tawge tamsir kway so.

Wããre bon ma de horgese

(Mark 13.14-23; Lug 21.20-24)

15Ti wur sen nday ko ge «fen horgese», maga Danyel je ndar nen wããre ma jag Baa go hay wãã ti ɓe de oole ti ngel ma bay ɗagn no. (Je maga yaŋ jaŋ ge ɓe, á mo laa wer ɓe de ele.) 16Wersen, jar maga á wo we daʼ rage ɓi sir Jude, ni á mo daŋ ge wo wo go ti húulì wo. 17Je maga á wo we go daʼ ge ɓe ciŋ ti tiŋ ɓe, ni á mo ɗii gi gesiŋ kalge tiŋma horge fẽẽre ɓe po wo doo ɓe wa so. 18Je maga á wo we daʼ ge ɓe go ɓi pay ɓe, ni á mo fer ge liŋ ni ɓe hoo õõbe ɓen wa so lay. 19Re ma de gaali joŋ yaŋ debaŋ wur sen ti naare ma de ɓiili wo de maga wo de weere jiili mono. 20Tos we Baa ga re sen mo a ti ɓay ti ceere noga wur Saba wa. 21Werga ti wur sen bon joŋ ge yaŋ de hãã debaŋ daŋ bon maga joŋ wo le ti tĩĩgi wer tamsir le hãã patala mono, day joŋ ge de maŋ sen mokay gà so has lay. 22Diŋ ga Baa raw caa ge go se naw se no, hay gà no, jobo de hay gwaʼ tenen boŋ yeʼ draʼ gà hase. Diŋ ga á raw caage go see ɓe, wer jar maga se hoo ra go ma ɓe mono.

23Hayga jobo raw riŋ we ge we so ga : Ko we nen ɓay, Mesi yaŋ la, noga á yaŋ wo mono, ni nday yãã we jag ɓe wa. 24Werga jar geteʼ maga wãɗ wo ga saara diŋ Mesi, wo de jar geteʼ maga wãɗ wo ga saara diŋ jar ndar nen wããre Baa go ndar wo nen yaŋ, joŋ wo fẽẽre mbuɗgi yaŋ debaŋ de fẽẽre ma joŋ hẽẽne wo ma kaŋ wer jar go, ɗig wo ga Hayga saara kãã yaŋ no, saara mo kaŋ wer jar maga Baa hoo ra go wo go. 25Coʼ we sug ɓay. Ndi siin we go we taŋgu pel bole.

26Jar mo riŋ bo wo nday ga : Ko we nen ɓay á yaŋ wo ti puuli, wo we wo ni wa, á mo riŋ we bo wo ga : Á yaŋ de yoŋre la, yãã we wããre sen wa. 27Wel je Táabay a ge le diŋ doo sagge Baa maga sag le nen wer hãã wo go nen wur bolaw nono. 28Ngel maga fen ma de húulí yaŋ ni no, gebegre tay wo ti ni lay.

Yeso ga Wel je Táabay fer yaŋ le

(Mark 13.24-27; Lug 21.25-28)

29Blam joŋ ge bon sen wo tuuseŋ, wur kol ge go lurum lurum, few ler ge ngel go gà lay, gér ma ciŋ leɗ ge wo yaŋ le go gesiŋ lay, fẽẽre maga sag wo le ciŋ fĩɗ gi wo yaŋ hãy hãy lay. 30Day fen ma kaŋ nen jar ti age Wel je Táabay raw naa nen ge le ciŋ so, wer jar ma ti tamsir la ɓuy rag ge wo, ko ge wo Wel je Táabay le age ti swaare ma ciŋ le de egre, de gragge de woore debaŋ doo waŋ no so no. 31Cõõ ma kluu raw rage, á raw lag jar peele ɓen wo go ti cõõ sir cwẽẽ ɓuy. Á raw wo tay ti jar maga Baa hoo ra go ma ɓe le ti jag sir tawgi le ciŋ kaʼ hãã go ɓaŋla taʼa.

Hadge maga jar kon se gum mono

(Mark 13.28-31; Lug 21.29-33)

32Laa we wer wããre maga gum de kaŋ nen ɓay ni mono. De maga pãã ɓe a we go jag doo ɓe ɓuy, sug ɓe raw goɗge, nday raw koge ga jag tob kos we go. 33Wersen nday leʼ ko re sen wo mo deŋ we ɓuy so no, ni ko we go ga Wel je Táabay yaŋ go de kos ge jagjiŋ mbaŋ. 34Kidolgi ndi de riŋ we ge ga wer jar se maga wo tenen patala mono, huɗ gi wo go taŋgu a ge re sen wo ɓuy gà. 35Ngel ma ciŋ wo de tamsir ɓog ɓuy taw ge wo go, ama ma wããre ɓin taw ge go gà hase.

Yeso ga ko naw tawge tamsir diŋ Baa mbe boŋ

(Mark 13.32-37; Lug 17.26-30,34-36)

36Ama ma nawn wo de wur sen, jobo bay de ko age ɓe wa hase, hay bo jar peele Baa wo layblaʼ kon wo gà hay bo weln de see ɓe, say diŋ Pããben boŋ de koge ɓe ane. 37Re maga hay joŋ le nen Nowe, naw age Wel je Táabay joŋ ge doosen no lay. 38Werga taŋgu maga bii hay bay maŋge ɗa, jar hay rege, joge, da wo naare, hã wo mayre ɓaara go ne werpiiri, joŋ wo doosen no, hãã go ti wur maga Nowe wo kalge ɓil daagen mono. 39Laa wo hoo sug ti mopo gà so has, hãã bii maŋge ma kluu wo hoo rage ɓuy. Age Wel je Táabayn wo joŋ ge wurpo doosen no lay. 40Jar po joŋ ge wo yaŋ ɓi pay ɓoge, à raw maŋ ge yoo ɓaara boŋ, men go boŋ lay. 41Naare ɓog joŋ wo yaŋ naŋge ti niini, à maŋ ge yoo ɓaara boŋ, men go boŋ lay. 42Lag we go de pũygi so, werga nday bay de ko wur maga Waŋ ɓayn fer le de ɓe mo wa. 43Laa we wer wããren de ele. Hayga pan tiŋ po yaŋ de ko ngel ma de suŋ ga je freŋ nduu de ɓe mono, á raw hayge tenen yeʼ men le ngar ywaale gà. 44Wersen nday no lay no, lag we go de gragge, werga Wel je Tabay wo fer ge le la de wur maga nday bay ɗiggi ti ɓe wa mono.

Wejõõ ma yãã jag wo de maga bay yãã jag wa

(Lug 12.41-48)

45Wejõõ maga de deele, de ti lay, diŋ ma hon ne? Diŋ je maga pan tiŋ ɓen hã joŋre weere jõõre ma lan wo ne hẽn doo, maga á mo hã rege ne hara ti ngel ɓe mono. 46Wejõõ se ga pan tiŋ ɓen wo le ferge a daʼge ɓe ti joŋre sen, raw wooge. 47Kidolgi ndi de riŋ we ge ga : pan tiŋ hã ge joŋre fẽẽre ɓe ma de el wo ne hẽn doo fẽd ɓuy. 48Ama Hayga wejõõ sen la yaŋ de ɓlagge, kal wããge de ɓil ɓe ga : Pan tiŋ ɓin ig yaŋ le ɗa. 49Á raw ɓoʼ ɗee mbar kããre ɓe maga saara ti joŋre de kããra, kal rawge rege, joge diŋ yoo jar ma taɗge de yii wo ra. 50Blam sen pan tiŋ wo le ferge ge mokay, diŋ de wur maga wejõõn bay gorge ɓe wa, wo de wur maga se kon gà. 51Ama á raw joŋ bon wejõõ sen de hãã debaŋ, á raw hã ngel ma ɓen ne hẽn yoo jar bag bii jar wo, ti ngel maga á rag wo wo ni, so wo saŋ ɓaara ni mono.

Currently Selected:

MATIYE 24: TUP

Highlight

Copy