MATIYE 22
22
Jagjõõ ma de ngaɓ ge de rege ɓoʼ ge wãy ti bii
(Lug 14.15-24)
1Yeso raw kiɗ jagjõõ ma tigriŋ wãã ge ne jar maga wo de coʼ sug wããre ɓe mono, á kal ga : 2Twaywaŋ ma ciŋ de maŋ wããre waŋ po ɓoʼ wãy ti bii ne wel ɓe. 3Á raw laa weere jõõre ɓe wo wo ɗe jar ti rege doo no, ama jarn laa wo dayge age gà. 4Á raw laa weere jõõre ma tigriŋ wo wo pa ga : Riŋ jar maga ndi ɗe ra le re doon wo ga : Hoolen ɓoʼ we go, ndi id bloore deere ɓin wo de horogre ɓi ma de goɓren wo we go, fẽẽren go de bag jage, á we le re hoole doo no. 5Ama jar maga à ɗe ra le, laa wo joŋ ge de sãy age ti gà hase, kal wo rawge ti joŋre ɓaara, je ma la raw ɓi pay ɓe, je ma lan raw joŋ trere ɓe, 6jar ma lan kal wo bag weere jõõren wo mbarge, id ra wo go lay. 7Ɓil waŋ raw sõõge debaŋ, á raw laa soode ɓe wo wo, id jar maga id wo jar lan wo go, doɗ ɓi leege ɓaaran go lay. 8Blam sen á raw riŋ weere jõõre ɓen wo ga : Hoole doon go de bag jage, ama jar maga ndi hay ɗe ra le keɓaa taŋgu kãã wo ma rege ɓe gà so. 9See we ti largaʼ faage, ɗe we jar maga nday daɗ ra we pel ɓay mo ɓuy le re doo no. 10Weere jõõren kal wo rawge ti largaʼ faage tay jar maga á daɗ ra wo mo ɓuy so no, jar hãy hãy wo de ma de el ɓuy, blam sen tiŋ ma re doon raw baage go de jar mbaŋ mbaŋ so.
11Waŋ raw kalge le tiŋma ko jar maga à ɗe ra le mo so no, á raw daʼ jobo ni boŋ, bay de õõbe fewn ti wa. 12Waŋ raw ɗe ge ɓe ga : Bar ɓi, ndo kal ɓon le bay õõbe few ti kal ge ɓa? Bloo laa bul jag go gà hase. 13Waŋ raw riŋ weere jõõre ɓen wo ga : Baŋ we ɓaale ɓe wo de doo ɓe, ɓoʼn we wo go faale tiŋ nen suŋgu ti ngel maga á rag ge, soo ge saŋ ɓe wo ni mono. 14Yeso raw wãã ge ga : Jar maga Baa ɗe ra le wo ngaɓa debaŋ, ama maga Baa far ra sen wo mbag koɗe.
Yeso ga hã targe ne Sesar
(Mark 12.13-17; Lug 20.20-26)
15Farisiyẽẽ raw wo laage go ɓoʼ ti wããre ga saara mo wii jag Yeso ti mopo ma kii wããre ne hẽn ti. 16Á raw wo laa jar po wo yoo jar ma wer ɓaaran wo wo de maapo wo yoo jar ma wer Herod wo riŋ Yeso. Jar sen raw wo ɗe Yeso ga : Waŋ, wùr de koge ga ndo diŋ je wãã cwãy, ndo yaŋ had jar de wããre ma cwãy doo ga Baa da nono, ndo bay joŋ hẽẽne doo re maga jar ɗign wo mo wa, werga ndo á bay joŋ hẽẽne doo jar wa. 17Sii wããre maga ndo ɗig ne ti re ma kay mo ɗa so la. Wããre Baa de hã faage ma hã targe ne Sesar waŋ Rom yaw, noga bay wa yawla? 18Ama Yeso raw ko ɗiggi ɓaara ma de ɓlaggen go, á raw riŋ rage ga : Nday jar bag bii jar no, nday kiɗ kii wããre me ti le la? 19Maŋ we solay maga à poɗ targen de ɓe le me, ndi kon ɗa. Á raw wo age de solay ne hẽn boŋ, 20Yeso raw wii rage ga : Nenceere wose mo taʼ ni ne, ɗúu wose de yerge ɓil ɓe mo taʼ ne? 21Á raw wo ga : Diŋ Sesar waŋ Rom. Yeso raw wii rage ga : Hã we fen maga diŋ ma Sesar go ne Sesare, hã we fen maga diŋ ma Baa ne Baa lay.
22Á wo wo laa wããre sen mokay, á raw wo ngrisgi debaŋ, raw wo menge ɓe, kal wo rawge jag ɓaara.
Wããre birgi jar ma de húulí wo go
(Mark 12.18-27; Lug 20.27-40)
23Ti wur sen ni tuuseŋ Sadusiyẽẽ po raw wo nduugi see Yeso. (A wo diŋ jar maga wãɗ wo ga jar ma de húulí fer wo go birgi gà so mono.) Á raw wo wiigi ɓe ga : 24Waŋ, Moyis wãã ga : Hayga jobo huu we go bay biŋ weere no, wegeman ɓen mo hoo wãy no, mo biŋ weere de ɓe ne hẽn ɓe maga go de húulí mono. 25Day jar po hay yaŋ wo hẽẽrebe renam. Ma kluun da wãy raw huugi go bay biŋgi. Ma ti ɓen raw hoo wãy no, 26joŋ doosen no lay, blam sen pa ma de swaʼ joŋ no lay, hãã wo go ti ɓaara renam ɓuy. 27Blam ɓaara ɓuy wãyn raw huu gi go lay. 28Ti wur maga jar ma de húulín wo wo go bir gi mokay, wãyn joŋ ge diŋ wãy wose yoo jar se renam wo mo lag la? Werga á gusn wo go wer ɓaara ɓuy wãy ɓaara mono.
29Yeso raw fer wããre ne hara ga : Nday de hãy see ɓay werga nday bay de ko wããre Baa ma de yergen mo wa, nday bay de ko egre Baa wa lay. 30Ti wur maga jar ma de húulín wo wo go birgi mokay, werpiiri wo de naare kaŋ wo kããra gà so, ama á lag wo doo jar peele Baa wo nono. 31Ama ti wããre ferge jar ma de húulín wo go birgi mokay, nday bay de jaŋ wããre maga Baa hay siin ne nday ti boŋ wa yawla? Baa wãã ga : 32Ndi diŋ Baa maga Abraham, Isag, Jakob goŋ wo mono, Baa diŋ Baa ma jar ma tenen wo, bay ma jar ma de húulí wo wa.
33Ngaɓa jar maga hay wo laa wããre sen mo deŋ ɓuy raw wo ngrisgi doo hadge ɓen debaŋ.
Jag liŋgi ma kluu de daŋ lan wo ɓuy no
(Mark 12.28-34; Lug 10.25-28)
34Farisiyẽẽ wo wo laage ga Yeso baw Sadusiyẽẽ wo we go de wããre mokay, á raw wo tay ti see ɓaara. 35Je ma pel jar had jar de wããre Baa po yoo ɓaara da ga se kii wããre ne Yeso ti, raw ɗege ɓe ga : 36Waŋ, yoo jag liŋgi wo mono, ma kluun diŋ ma hon ɓa? 37Yeso raw ga : Ndo da ge Waŋkluu, Baa ɓon yaŋ go de jiili ɓo ɓuy, de see ɓo ɓuy de ɗiggi ɓo ɓuy. 38Mokay diŋ wããre ma de daŋ lan wo ɓuyn so. 39Ma de ɓog ɓe de ngaɓge de ɓe mokay pa ga : Ndo mo da kan ɓo je tabayn doo see ɓo no lay. 40Jag liŋgi mani Moyis wo de wããre maga jar ndar nen wããre ma jag Baa go hay wããn wo mo ɓuy wo de lagge diŋ ti jag liŋgi se ɓogn wo mo lag no.
Mesi wo de Dafid
(Mark 12.35-37; Lug 20.41-44)
41Farisiyẽẽ raw wo tay ti, Yeso raw riŋ rage ga : 42Nday ɗig ti Mesi mokay gahãy ɓa? Ga á ti ɓĩĩni mani wo ɓa? Á raw wo ga : A ti ɓĩĩni mani Dafid no. 43Yeso raw riŋ rage ga : Day joŋ ge joŋ ge ga Nenterse kay Dafid ɗege ɓe ga Waŋkluu sen mo ne? Werga Dafid raw wãã ge ga :
44Baa Waŋkluu riŋ Waŋkluu ɓin ga :
Hay ɓo go ti ɓaŋ war ɓi la,
Hãã go ti wur maga ndi kaŋ ɓaale ɓo ge go ti jar hee ɓon wo ɗa.
45Hayga Dafid ɗen we Waŋkluu ɓe yaw, day Mesi fer joŋge diŋ ti ɓĩĩni mani Dafid joŋ ge pa la?
46Jobo kãã ma bul jag go ne Yeso yoo ɓaara ni boŋ gà so hase. Tĩĩ wer de wur sen hãã tuu jobo laa wii Yeso ti wããre gà so has.
Currently Selected:
MATIYE 22: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
