MATIYE 16

Farisiyẽẽ wo de Sadusiyẽẽ wii wo Yeso ga á mo joŋ fen mbuɗgi

(Mark 8.11-13; Lug 12.54-56)

1Farisiyẽẽ wo de Sadusiyẽẽ raw wo yaʼge see Yeso, maga saara mo kii wããre ne hẽn ti, á raw wo wiigi ɓe ga : Joŋ fen mbuɗgi ma kaŋ nen wùr ga hã egre sen le mo diŋ Baa. 2Ama Yeso raw fer wããre ne hara ga : Wur leʼ we gesiŋ, nday kal wãã ge ga : ngel caa yaŋ go toŋ de ele, werga ngel ma ciŋ go de caa kay. 3De jag toŋ crum nday kal wãã ge ga : Baa cwaa yaŋ wara, werga ngel ma ciŋ ko lurum lurum. Ngel maga cor le ciŋ doosen no kay, nday de ko wer ɓe, day re maga de joŋ ge wara ga nday mo ko ni lay mono, nday bay de kããge ma ko wersen wa an le la? 4Jar se ma de ɓlagge ma waran wo, ga bay wo hoo sug ti wããre Baa de el wa, wiɗ wo fen mbuɗgi mono, ndi joŋ fen mbuɗgi po ne hara gà so, say ndi men diŋ mani Jonas no.

Blam sen á raw men rage go, kal rawge mbe so.

Yeso ga re Farisiyẽẽ wo de Sadusiyẽẽ de ngaɓge doo defõõre nono

(Mark 8.14-21)

5Jar ma wer Yeson raw wo cegaɗge wo go faale maarog ɓaŋla, ti ɓaara raw yõõ hoo hoole go doo ɓaara. 6Yeso raw riŋ rage ga : Joŋ we see ɓay de ele, koɗ we see ɓay doo Farisiyẽẽ wo de Sadusiyẽẽ wo, re ɓaara doo defõõre nono.

7Jar ma wer ɓen raw wo riŋ kããra ga : Á wãã ne naa mo deŋ diŋ wer maga naa hoo hoole le doo gà mono. 8Yeso raw ko wããre ɓaaran go, raw riŋ rage ga : Nday wãɗ ti holaŋ ɓay ga werga nday bay de hoole doo wa ga le la? Nday bay de hã ɓil ɓay go sog wa. 9Hãã patala nday bay de koge wa ɗa yawla? Nday bay ɗig ti hoole ma dwee maga ndi car nen ɓe ɓes ge ne jar ndar dwee wo de ngaɓa yããge maga à bag ra wo de nen ɓe maga gwaʼ ni mo wa yawla? 10Nday bay ɗig ti hoole ma renam maga ndi ɓes ne jar ma ndar naa wo de ngaɓa yããge maga á bagn wo de nen ɓe maga gwaʼ ni mo wa yawla? 11Nday bay de koge ga ndi riŋ we diŋ ti hoole gà wa le la? Koɗ we see ɓay doo Farisiyẽẽ wo de Sadusiyẽẽ wo, re ɓaara doo defõõre nono.

12Blam sen jar ma wer ɓen raw wo laa wer ɓe so ga á riŋ saara bay diŋ ti defõõre ma ur hoolen wa, ama á riŋ saara diŋ ti hadge Farisiyẽẽ wo de Sadusiyẽẽ wo no.

Piyer ɓoʼ wer Yeso go ga á diŋ Mesi mono

(Mark 8.27-30; Lug 9.18-21)

13Yeso kal rawge ɓi sir maga wo ɓiŋ kããra de Sesare mani Filip mbaŋ no, á kal riŋ jar ma wer ɓen wo ga : Ɓa jar wii wo ti Wel je Táabayn ga á diŋ wo ɓa? 14Á raw wo fer wããre ga : Jar po riŋ wo ga ndo diŋ Jaŋ ma joŋ batem jar no, jar la wãã wo ga ndo diŋ Eli, jar ma tigriŋ wo pa ga ndo diŋ Jermi noga je ndar nen wããre Baa go po. 15Yeso raw wii rage ga : Nday de see ɓay, nday wii ti ɓi ga ndi diŋ wo lay? 16Simoŋ Piyer raw riŋgi ɓe ga : Ndo diŋ Mesi, ndo diŋ wel Baa ma tenen no. 17Yeso raw ɗege ɓe ga : Simoŋ je ni Jaŋ no, ndo woo we, werga kaŋ nen ɓo ti cwãy sen bay diŋ je tabay wa, ama diŋ Pan ɓi maga le ciŋ mono. 18Ma ɓi, ndi de riŋ moge ga ndo diŋ Piyer, wer ɓe ga húulì, day ndi boo ge ti Tayge jar ma wer ɓin wo yaŋ ti ɓo. Húulí de see ɓe draʼ kãã ma joŋ mopo see ɓe gà. 19Ndi hã ge fen ma bul jag faage twaywaŋ ma ciŋ mo doo, re maga ndo saʼn we go gesiŋ la, le go de saʼge ciŋ doosen no lay, re maga ndo bud faage ɓe we go gesiŋ la, le go de bud faage ciŋ no lay.

20Blam sen Yeso raw ruu jar ma wer ɓen wo ga : Sii we re sen mokay go ne jobo ga ndi diŋ Mesi wa.

Yeso ga se huu gi, se bir gi go pa

(Mark 8.31—9.1; Lug 9.22-27)

21Ti ngel ni tuuseŋ Yeso raw tĩĩ wer riŋ jar ma wer ɓen wo go poɗag ga : Nen daga se mo wo Jerusalem, maga jar kluurin wo de waŋre jar siɗ jag wo, de jar ma ndar wer wããre Baa mo joŋ wo bon se debaŋ, mo ii wo se go, se mo fer ge go bir gi wur síilí ma de swaʼ no.

22Piyer raw baage ɓe go boŋ, raw ruugi ɓe ti wããre sen ga : Joŋ doosen no gà Waŋkluu, Baa mo dig re se kay no. Re ma kay mokay mo joŋ mo wa hase.

23Ama Yeso raw mbuɗ nen ne Piyer ti, raw riŋgi ɓe ga : Yaʼ wo go see ɓi hãã, ndo diŋ Manhúulí. Ndo kiɗ ga ndo kaŋ wer ɓi go joŋ ɓlagge, werga ndo bay ɗig gi doo Baa no wa, ama ndo ɗig diŋ doo jar téebeere wo no.

24Blam sen Yeso raw riŋ jar ma wer ɓen wo ga : Wosela da we ga se maŋ blam ɓi, á mo men ɗig ti ti see ɓe go, á mo hay go de gragge ga se mo huu mbe go ti re ɓi, ni á mo maŋ blam ɓi so. 25Werga je maga da ga se mo ʼwar see se go ti re ɓi wa, sen diŋ je maga bas ge see ɓe go mo so no, ama je maga yãã wããre ɓi, da ʼwar see ɓe mbe go wer ɓi mono, je sen kol ge tenen caw tum so. 26Je tabay mo daʼ bà horogre ma ti tamsir wo go la ɓuy ma ɓe layblaʼ, hayga á bas see ɓe we go, day horogre se ma ti tamsirn la day joŋ wo may yaŋ ne hẽn la? Fen po bay maga je tabay kãã ma hãge ɓe ma coo see ɓe wa so. 27Wersen, Wel je Táabay fer ge yaŋ le de gragge de woore doo Pan ɓe wo de jar peele ɓen wo, á poɗ ge wosela ɓuy yaŋ wer joŋre ɓe. 28Ndi de riŋ nday kidolgi ga jar po yaŋ wo yoo jar ma lag wo la huɗ gi wo gà hãã Wel je Táabay wo le fer ge le de gragge doo Waŋ nono, saara kon go ɗa.

Currently Selected:

MATIYE 16: TUP

Highlight

Copy