MATIYE 14

Herod ii Jaŋ go

(Mark 6.14-29; Lug 9.7-9)

1Ti wur sen Herod waŋ Galile raw laa re Yeso. 2Á raw riŋ weere jõõre ɓen wo ga : Á diŋ Jaŋ ma joŋ batem jarn fer le go birgi. A daʼ egre ma joŋ fẽẽre mbuɗgi sen wo mo deŋ diŋ wer se no.

3Werga Herod hay laa jar wo bà Jaŋ baŋ ne ɓoʼ ne ti daŋgay. Herod joŋ doosen wer Herodiyad wãy wegeman ɓe Filipi, 4werga Jaŋ hay riŋ Herod ga : Faage bay de hãge mo ma yãã Herodiyad wãy ɓo wa. 5Herod raw ɗiggi ga se ʼwar Jaŋ go, ama á raw joŋ hẽẽne werga jar Jwif wo de koge ga Jaŋ diŋ je ndar nen wããre ma jag Baa go.

6Day ti wurpo Herod raw joŋ few wur naw biŋgi ɓe, may ma Herodiyad raw dag jõõ pel jar maga à ɗe ra le ti few sen ni mono. Á raw joŋ ɓil go ne Herod feh feh debaŋ, 7hãã se kol haʼ ge go ga : Mayn mo deŋ wii gi may we doo ɓi la ɓuy ndi hãn ge ne hẽne.

8Mayn raw riŋgi ɓe ti jag man ɓe ga : Hã ti Jaŋ ma joŋ batem jar ne ndi ɓi taasa patala.

9Waŋ raw rage de ɓil ɓe debaŋ, ama wer haʼge maga se haʼ go pel jar maga à ɗe ra le mokay, á raw hã faage ga wo hã ti Jaŋ ne hẽne. 10À raw ɓoʼ jobo wo caa ti Jaŋ ma joŋ batem jar le go. 11À raw age de tin ɓi taasa ne may no, á raw hãge ɓe ne man ɓe lay. 12Jar ma wer Jaŋ raw wo age maŋ húulí ɓe, raw wo teege ɓe, blam sen á raw wo rawge sii re sen ne Yeso.

Jar ndar dwee, Yeso hã rege ne hara

(Mark 6.30-44; Lug 9.10-17; Jaŋ 6.1-14)

13Yeso wo laa wããre sen mokay, kal rawge ɗiigi ɓi daage ma woge go hayge ti ngel po fentray ɓe boŋ. Ama ngaɓan raw wo laa wããre ɓe, á raw wo laage le go ɓi leege no, raw wo maŋ blam ɓe de ɓaale ti jeŋ maaroge. 14Yeso wo le go ɗiigi ɓi daagen mokay, ko nen ɓe la ngaɓan pel ɓe la hĩf deŋ, jarn raw wo ko decoo nen ɓe debaŋ, á raw tĩĩ wer pẽɗ jar cege ɓaaran wo go.

15Wur wo go coŋ ge mokay, jar ma wer ɓen raw wo yaʼge see ɓe, raw wo riŋ gi ɓe ga : Wur go de coŋ ge lay, ngel sen la go se tiŋ hãã lay, men jarn wo raw ge ɓi leege yeɗ fẽẽre rege.

16Yeso raw fer wããre ga : Á raw wo we doosen no kay bay de el wa, hã we rege ne hara diŋ nday mbay. 17Á raw wo fer wããre ne hẽn ga : Hoole doo wùr la dwee de cẽẽ ɓog koɗe. 18Yeso raw riŋ rage ga : A we le de ɓaara me lam no. 19Blam sen á raw riŋ jarn wo ga : Lag we gesiŋ ti fíi, raw hoo hoole ma dwee de cẽẽ ma ɓog no, raw maŋ nen ɓe ciŋ raw joŋ suseʼ ne Baa wo ti hoole no. Á raw car nen hoolen go, raw hãge ɓe ne jar ma wer ɓen wo, saara raw ɓesge ɓe go ne jarn wo. 20Wosela ɓuy wùu go. Jar ma wer ɓen hoo wo yããge le go hwal ti ɓog de bagge de nen hoole maga gwaʼ go doo ɓaara ni mono. 21Werpiiri ma re hoolen wo ndar dwee, jobo kee naare wo de weere kleere wo ni gà.

Yeso see ti maarog de ɓaale

(Mark 6.45-52; Jaŋ 6.15-21)

22Blam sen ni tuuseŋ Yeso raw hoo jar ma wer ɓen wo ɓi daage maga á mo wo wo go faale maarog ɓaŋla taŋgu se de maga se men ngaɓan rawge mono. 23Á wo men rage rawge mokay, á raw ɗii gi ciŋ ti húulì tosge fentray ɓe boŋ. Wur wo go coŋge mokay, á mbe wo go ni boŋ yeʼe. 24Daagen hay go gesiɗgi maarog no, daagen hay gleŋge doo kaŋngaw-bii, werga leegen hay le fidgi pel ɓe. 25Wo dayge ti roo kag mokay, Yeso raw seege le ti bii de ɓaale ne jar ma wer ɓen wo ti ɗeger. 26Á wo wo koge ɓe le seege ti biin mo caw, á raw wo joŋ hẽẽne debaŋ, raw wo wãã ge ga : Á diŋ Barkage. Á raw wo laa ngar jag doo hẽẽne.

27Yeso raw riŋ rage deparday tuu ga : Coɓ we nen ɓay, á diŋ ndi.

28Piyer raw ɗege ɓe ga : Waŋkluu hayga á yaŋ diŋ ndo no, riŋ me le ga ndi mo see wo see ɓo ti biin caw lay.

29Yeso raw fer wããre ne hẽn ga : See mbo le. Piyer raw ɗiigi le go ɓi daagen, raw tĩĩ wer seege ti bii ma woge ɓiŋ Yeso. 30Ama á wo ko leegen mokay, á raw joŋ hẽẽne, raw tĩĩ wer sirgi nen bii tuu, á raw ngar jag ga : Waŋkluu, Waŋkluu yãã me go.

31Ni tuuseŋ Yeso raw coŋ doo ɓe wo cegaw ge ɓe, raw riŋgi ɓe ga : Ndo bay go de hã ɓil ɓo me pah wa has debaŋ. Ndo mbraw ɓon le la?

32Á raw wo ɗiigi ɓi daagen ɓog ɓuy, leegen raw ooge lay. 33Blam sen jar ma wer Yeso ma ɓi daagen raw wo leɗ monɗra pel ɓe ga : Ndo diŋ wel Baa cwãy.

Yeso pẽɗ jar cege wo go ɓi sir Jenesared

(Mark 6.53-56)

34Á raw wo cegaɗ maarogn go, raw wo dayge Jenesared. 35Jar ma ti ngel sen ni raw wo go ko Yeso, kal wo dus wããre ɓen wo go ɓi sir ma ɓiŋ ɓen ni ɓuy, à raw age de jar cegè wo ne hẽn ɓuy. 36À raw wo kam ge ɓe ga á mo men jar cegèn wo mbaara duɗ jag õõbe ɓen tawa. Jar maga duɗ wo õõbe ɓen mo ɓuy pẽɗ wo go.

Currently Selected:

MATIYE 14: TUP

Highlight

Copy