MATIYE 12

Yeso wãã re ti wur Saba

(Mark 2.23-28; Lug 6.1-5)

1Naw raw nage blam sen rabe, Yeso raw heege ɓi payre wo wur Saba no. Koŋne raw cee jar ma wer ɓen wo, á raw wo hrag coore sooge. 2Farisiyẽẽ wo wo ko rage doosen mokay, á raw wo riŋ Yeso ga : Ko nen ɓo, jar ma wer ɓon wo de joŋ re maga go de diggi ga joŋ wur Saba wa mo deŋ ɗa la.

3Yeso raw fer wããre ne hara ga : Nday bay de jaŋ wããre maga Dafid hay joŋ de kããre ɓen wo doo koŋne mo wa yawla? 4Á laa wo ɓi tiŋ Baa de kããre ɓen wo, re wo hoole maga de hãge ne Baa, Wããre Baa go de dig jar ga jar mo reen hãy wa, say diŋ jar ma siɗ jag wo tawa. 5Noga nday bay de jaŋ jag liŋgi ga : wur Saban, jar kluuri jar siɗ jag ma ɓi tiŋ Baa, mo joŋ bà wo joŋre wur sen layblaʼ re bay ti sen ni wa wa? 6Wersen ndi de riŋ nday ga ma de daŋ tiŋ Baan yaŋ la. 7Hayga nday yaŋ de laa wer wããre maga a de yerge ɓe go ga : Ndi da diŋ ga wosela mo hay ko decoo kẽẽ, ama bay diŋ ngaɗge fẽẽre siɗ jag wa we no, nday de hay kol re ne jar maga bay wo de joŋ re wa ti gà. 8Werga Wel je Táabayn diŋ Waŋ wur Saban no.

Bloo ma doo de húulí

(Mark 3.1-6; Lug 6.6-11)

9Yeso kal rawge, wo kalge ɓi tiŋ tosge ɓaara po. 10Á Wo daʼ jobo ni doo ɓe go de húulí. Jar ma ɓi tiŋ wo ni ɓil ɓaara raw wo da ge ga saara mo kii wããre ne Yeso ti, á raw wo wii gi ɓe ga : Wããre Baa yaŋ mbe de men faage ma pẽẽ jobo go wur Saba yawla?

11Yeso raw fer wããre ga : Wose yoo ɓay la ga sam doo ɓe boŋ, day sam raw leʼ ge we go ɓi tuu wur Saba, day se wo wo maŋ ge ɓe go ciŋ gà diŋ wosela? 12Day je tabay de daŋ sam yaw. Jag liŋgi de hã faage ma kol jobo go de el wur Saba mbe. 13Yeso raw riŋ bloon ga : Yaʼ doo ɓo le.

Á raw yaʼ doo ɓe le, doo ɓe fer birgi go de el doo ma lan no lay. 14Farisiyẽẽ raw wo rawge ɓoʼ faare ti yoo ɓaara ga saara mo ʼwar Yeso go.

Baa ga Yeso diŋ wejõõ se maga se maŋ ne go mono

15Yeso wo laa wããre sen mokay, á raw men ngel sen go kal rawge, jar debaŋ raw wo maŋ blam ɓe. Á raw pẽɗ jar cegèn wo go ɓuy, 16ama, se raw ruu rage debaŋ ga á mo ɓoʼ wo wer se go wa. 17Wããre maga Esay je ndar nen wããre Baa go, hay yer le go ɓaa ga :

18Ndi maŋ wejõõ ɓin go mokay no,

Á diŋ je dage ɓi, ɓil ɓi go ti ɓe feh debaŋ.

Ndi ɓoʼ ge Nenterse ɓin yaŋ ne hẽn ti.

Day á sii gi wããre kiida ɓin yaŋ ne wer jar wo.

19Á de see ɓe joŋ ge kwãy de jobo boŋ gà ngar ge jag gà lay.

Jobo laa ge gẽẽge ɓe ge go wãɗ wããre ti faage wo gà lay.

20Á haw ge fíiri-bii ma de dĩĩgin go gà

ii gi wùu gér maga wùu ɓen go de gayre go mo gà lay.

Á joŋ ge see ɓe yaŋ doosen no hãã wo go joŋ blum reen wo ɓuy de joŋre ɓe ma de deele no.

21Blam sen wer jarn ɓuy kaŋ ge wo ɗiggi ɓaara yaŋ boŋ diŋ ti ɓe.

Re sen raw leʼ ge go ti jag ɓe so.

Yeso wo de Belsebul

(Mark 3.22-30; Lug 11.14-23)

22À raw age de je rẽw maga mbululum go ɓiŋ Yeso, je sen de sõõ ti. Yeso raw wal jag je sen go, raw caa nen ɓe go lay. Se raw tĩĩ wer wãɗ wããre, nen ɓe raw koge. 23Ngaɓan ɓuy raw wo ngrisgi, raw wo wãã ge ga : Ɓa bloo sen mbe n á diŋ moo Dafidn ge?

24Ama de maga Farisiyẽẽ wo wo laa wããre sen mokay, á kal wo riŋgi ga : Hã egre ma niɗ sõõren wo ne bloo sen mo deŋ diŋ Belsebul waŋ sõõren wo.

25Yeso raw ko ɗiggi ɓaara go, á raw riŋ rage ga : Hayga jar ma ɓi sir waŋ po yaŋ wo leɗ kããra no, sir waŋ sen ɓlag go. Jar ma ɓi leege ma honla ɓuy de jar ma liŋ ni ɓaara po ma honla ɓuy yaŋ wo leɗ kããra no, joŋre ɓaara kãã wo ma seege pel gà. 26Hayga Manhúulí yaŋ niɗgi go diŋ jar ma ɓe wo pa no, ni á leʼ see ɓe de see ɓe mo pa la, day jar ma ti ɓen kãã wo ma lagge lagge pa la? 27Nday wãɗ ti ɓi ga hã egre ma niɗ sõõren wo me diŋ Belsebuli, day wose hã egre ma niɗ rage go ne te ɓayn wo mo lay la? Joŋre jar ɓay wo draʼ yaŋ wo go kaŋ nen jar ga nday wãã ni gà. 28Kidolgi ndi niɗ sõõren wo go diŋ de Nenterse Baa, fen sen de kaŋ nen ɓay ga twaywaŋ mani Baan a we go we ti so.

29Jobo kal liŋ ni je ma de egre de daŋ ge ɓe horge fẽẽre ɓe mono, á baŋ go taŋgu baŋ baŋ, blam ɓe se kal frum tiŋ ɓen kway.

30Je maga bay tay jag de ɓi wa, diŋ je hee ɓi, je maga bay kay mege ferge tay ti horog wo wa, diŋ je dus ɓil horogn wo go. 31Wersen ndi riŋ we ga : Baa fug mbe ɓil yaŋ go ti ɓlagge maga jar téebeere joŋn wo de wããre ɓaara ma de ɓlagge maga á wãɗ wo mo ɓuy no. Ama je maga yaŋ ɗar Nenterse ma bay ɗagn no, Baa fug ɓil go ti ɓlagge ɓe maga á joŋ mokay go ne hẽn ti gà hase. 32Je maga mbuɗ foo Wel je Táabay we, Baa fug gi ɓil go ne hẽn ti ɓlagge ɓen wo, ama je maga mbuɗ foo Nenterse ma bay ɗagn we no, Baa fug ɓil go ne hẽn ti nen wur ma patalan gà lay, ma wurpon gà lay.

Leʼge koo

(Lug 6.43-45)

33Nday da we ga nday mo daʼ leʼge koo ma de el, ni nday mo kiɗ koo ma de ele, hayga nday yaŋ de koo ma de ɓlagge, nday wo daʼ leʼge ɓen de ɓlagge lay. Werga à ko de el koo diŋ se leʼge ɓe. 34Nday diŋ weere cwe, nday diŋ jar ma de ɓlagge, day nday kãã ma wãã wããre ma de el mokay wãã ge lay la? Werga jag wãã go diŋ re maga le go de baa ɓil je ɓe no. 35Je ma de el naa nen go joŋ joŋre ma de el werga ɓil ɓe de ele, je ma de ɓlaggen naa nen go joŋ joŋre ma de ɓlagge diŋ werga ɓil ɓe de ɓlagge lay.

36Ndi de riŋ we ga wããre maga jar wãɗ wo bay blam mo deŋ ɓuy, á fer ge wo yaŋ go wãɗ ge ɓe ti wur kiidan pa. 37Werga ndo naa ge nen de deele diŋ wer wããre ma jag ɓo, baw mo de kiida ɓuy diŋ wããre ma jag ɓon tuu pa.

Jar wiɗ wo Yeso ga á mo joŋ fen mbuɗgi saara mo ko see ɓe

(Mark 8.11-12; Lug 11.29-32)

38Blam sen jar po wo yoo jar ma ndar wer wããre Baa wo de jar po yoo Farisiyẽẽ, raw wo ɗe Yeso ga : Waŋ, wùr da ga ndo mo joŋ fen mbuɗgi wùr kon ɗa la. 39Yeso raw fer wããre ne hara ga : Jar ma wara maga wo de ɓlagge, bay wo hoo sug ti wããre Baa wa, wiɗ wo fen mbuɗgi, ama ndi joŋ fen mbuɗgi maapo ne hara gà so, ndi men say diŋ mani Jonas je ndar nen wããre Baa go no. 40Jonas sii de liggi ɓil cẽẽ ma kluu hẽẽ hẽẽ swaʼa, day Wel je Táabayn sii yaŋ nen sir hẽẽ hẽẽ swaʼ doosen no lay. 41Jar Ninif hoo wo ge yaŋ ciŋ ti wur Caage kiidan de jar se ma waran wo, day jar Ninif baw wo jar ma waran ge wo yaŋ de wããre, werga ɓaaran á hay coo wo ɗiggi ɓaara ma de ɓlagge de deele tigriŋ wer siigi wããre maga Jonas siin ne hara mono. Day je ma de daŋ Jonas yaŋ la. 42Wãy maga diŋ waŋ le nen ɓaŋ ni wãyban kal ge yaŋ go ciŋ ti wur Caage kiidan de jar se ma waran wo, day á baw ra yaŋ de wããre no, werga á ur le laa wããre koge re mani Salomoŋ le ɓi sir maga le go hãã debaŋ. Day je ma de daŋ Salomoŋ yaŋ la.

Sõõ kal go, fer le

(Lug 11.24-26)

43Sõõ kal we le go ɓil je tabay no, á raw raŋge ti ngel ma de heg kiɗ ngel ig see ɓe, day á wo we daʼ ge gà has no, 44á raw wãã ge ga : Ndi fer ɓi tiŋ ɓi maga ndi hay le ni mono, se raw ferge le, wo daʼ tiŋ de koɗe, go de torge, go de kneʼ ge lay. 45Á kal rawge hoo sõõre ma tigriŋ wo le renam pa so, ma de daŋ ge ɓe hãã wo, raw wo ferge le de kããra lagge ni ɓuy so. Blam sen je sen raw joŋge de ɓlagge daŋ ma taŋgun so. Á de ngaɓge degaʼ doo jar se ma de ɓlagge ma waran wo no lay.

Hẽẽre Yeso wo de man ɓe

(Mark 3.31-35; Lug 8.19-21)

46Yeso de wãã re ne ngaɓan wo deŋ ɗa, ko la man ɓen wo de hẽẽre ɓe raw wo nduugi. Lag wo le go siigi, kiɗ wo ga saara wãã re ne hẽne. 47Jobo raw riŋ Yeso ga : Coʼ sug ɓo, man ɓo wo de hẽẽre ɓon yaŋ wo le siigi, á wo de dage ga saara wãã re ne ndo. 48Yeso raw fer wããre ne je sen ga : Man ɓi wo de hẽẽre ɓin diŋ wose wo ne? 49Blam sen á raw wii doo ɓe ti jar ma wer ɓen wo, raw wãã ge ga : Ko we nen ɓay, man ɓi wo de hẽẽre ɓin wo mo lag no. 50Werga je maga yaŋ joŋ joŋre maga Pan ɓi Baa da ne no, je sen diŋ wegeman ɓi, maygeman ɓi, diŋ man ɓi lay.

Currently Selected:

MATIYE 12: TUP

Highlight

Copy