LUG 22

Waŋre wo de kiɗ faage ma ʼwar Yeso ge go

(Mat 26.1-5; Mark 14.1-2; Jaŋ 11.45-53)

1Naw few hoole ma bay defõõre maga à ɗen ga Pag, wo kos ge mokay, 2waŋre ma siɗ jag wo, de jar ma ndar wer wããre Baa raw wo kiɗ faage ma ʼwar Yeso go, de sen ɓuy á raw wo joŋ hẽẽne doo jare.

Judas hã Yeso go ne waŋren wo

(Mat 26.14-16; Mark 14.10-11)

3Day Satan raw kalge ɓil Judas maga à ɗen ga Iskariyod, je sen yoo jar ma wer Yeso ma hwal ti ɓogn wo lay. 4Judas raw woge se waŋre ma siɗ jag wo de waŋre ma gor ti tiŋ Baa wo, raw sii ɗeŋ maga se hã ge Yeso go ne hara mono. 5Á raw wo fug ɓil go feh, raw wo wãã ge ga saara hã solay yaŋ ne hẽne. 6Judas raw yãã jag ɓaara lay, á raw kiɗ faage de taw gi ma hã Yeso go ga ngaɓan mo kon wo wa.

Yeso joŋ rege few Pag

(Mat 26.17-25; Mark 14.12-21; Jaŋ 13.21-30)

7Naw few hoole ma bay defõõren wo age maga á ngaɗ sããre ma rege wur few Pag, 8Yeso raw laa Piyer wo wo de Jaŋ ga : See we joŋ rege few Pag ne naa. 9Á raw wo wii gi ɓe ga : Ndo da ga wùr mo wo joŋ ge ɓe la gen ne? 10Á raw riŋ rage ga : Coʼ we sug ɓay, nday wo we laa ge ɓi leege, nday wo yaŋ yiŋ gi de jobo de hoole bii ti, ni nday maŋ we blam ɓe hãã wo ɓi tiŋ maga á wo kal ge ni mono, 11ni nday riŋ pan tiŋ ga : Waŋ de wii mo ge ga : ngel maga se re hoole few Pag de jar se ma wersen wo ni genla? 12Ni á kaŋ ge nen ɓay yaŋ ti tiŋ ma ciŋ ti kẽẽ kluu de ʼwũy gi go de fẽẽre lagge ɓuy, ni nday joŋ we regen ni so. 13Á wo wo daʼ fẽẽren ɓuy doo ga Yeso hay riŋ ra ti ɓen no, á raw wo joŋ rege few Pag ni so.

Hoole ma bay ɗage

(Mat 26.26-30; Mark 14.22-26; 1 Kor 11.23-25)

14Wur regen wo a ge mokay, Yeso raw wo lagge rege de jar peele ɓen wo. 15Yeso raw riŋ rage ga : Ndi de da ge debaŋ ga naa mo re hoole few Pag de kããra taŋgu joŋge bon ɓi no. 16Coʼ we sug ɓay, ndi riŋ nday ga ndi rege hoole few Pag gà so has, hãã go ti wur maga á wo go bag jag ti twaywaŋ mani Baan ɗa. 17Á raw maŋ we hãn doo de yii ɓili, raw joŋ suseʼ ne Baa, raw wãã ge ga : Maŋ we ne, ɓes we ne go ti yoo ɓay. 18Coʼ we sug ɓay, ndi riŋ nday ga : Tĩĩ wer wara tuu ndi jo ge yii gà so hase, hãã wo go ti wur maga twaywaŋ mani Baan á ɗa.

19Blam sen á raw maŋ hoolen doo, raw joŋ suseʼ ne Baa, á raw car nen ɓe go, raw hãge ɓe ne hara ga : [Mokay diŋ hõõgese ɓi á hãn go ne nday, joŋ we doo sen, maga ndi mo hay de ɗaw ge ɓil ɓay tum. 20Blam maga á re wo go re, á raw maŋ we hãn no, raw hãge ɓe ne hara doo sen no pa, raw wãã ge ga : We hãn mokay diŋ barge maga Baa fer baa ge de jar téebeere wo mono de cíi ɓi maga kaa ge go ti re ɓay mono.]

21Ko we nen ɓay, je maga kaŋ taw ɓi go yaŋ de hayle see ɓi rege la. 22Wel je táabayn wo yaŋ go huu gi doo ga Baa da no cwãy no, ama re yaŋ debaŋ ti je maga kaŋ taw ɓe go mo an tawa. 23Á raw wo tĩĩ wer wiɗ kããra ga je maga joŋ re sen yoo naa mokay diŋ wo ɓa, diŋ wo ɓa.

Wose diŋ je kluu la

24Jar ma wer Yeso raw wo joŋ faare ti yoo ɓaara glum glum, ma ko ge ga wo se joŋ ge diŋ je kluu ma wãã re saara yoo saara mo la. 25Yeso raw wãã ge ga : Waŋre wer jar yaŋ wo wãã re sir ɓaaran wo, jar maga egre de hãge ne hara ti jar ɓaaran, yaŋ wo ɗe see ɓaara ga saara diŋ jar joŋ de el lay. 26Ama á mo joŋ yoo ɓay doo sen no wa. De el ɓen je ma kluu yoo ɓay mo joŋ see ɓe doo we klee ɓay nono, je maga egre de hãge ne hẽn mo joŋ see ɓe wejõõ ɓay. 27Hayga á yaŋ doo kayn no, je ma kluu daŋgen diŋ wo ne. Diŋ je maga de hayle rege tiwer mo yeʼ yaw, noga diŋ je maga ma joŋ peele mo caw yaw no. Diŋ je maga de hayle rege tiwer mo yeʼ no, á doo sen no. De ele. Ama ndi yoo ɓay la doo wejõõ ɓay nono.

28Nday yaŋ de tayge de ɓi tum nen bon ɓi no. 29De ngaɓ ge doo ga Pan ɓi hã waŋ go me ga ndi mo hay Waŋ nono, day ndi hãn waŋ ɓin we ga nday mo lag waŋre doo ndi no lay. 30Nday re ge, jo ge yaŋ ɓiŋ ɓi ti wur maga ndi hay ge Waŋ mono, nday lag ge ti paale ma cag re wer mani weere Israyel ma hwal ti ɓogn wo no.

Yeso de wãã ge ga Piyer kaŋ kiŋ yaŋ ga se ko se ga

(Mat 26.31-35; Mark 14.27-31; Jaŋ 13.36-38)

31Yeso raw ɗe Simoŋ ga Simoŋ, Simoŋ, coʼ sug ɓo, Satan wii egre ma faʼ we ge go, doo ga á faɗ hoole coore go ne no. 32Ama ndi raw tos ge ti ɓo, ga da ga hãge ɓil ɓo go ne Baa mo woo go wa. Day ndo wo ge we le ferge ma ɓi no, ni ndo coɓ nen hẽẽre ɓon wo ra. 33Piyer raw ɗe ge ɓe ga : Waŋkluu, ndi go de gragge ma kal ge ti daŋgay ti re ɓo, day naa wo ge huɗ gi de kããra ɓog ɓuy pa. 34Yeso raw fer wããre ne Piyer ga : Ndi de riŋ mo ge ga : ndo kaŋ kiŋ yaŋ wara ɓaale swaʼ ga ndo ko me ga : taŋgu maga kag wo rage mono.

Ndar solay de ndar bii wo de moslam

35Blam sen Yeso raw riŋ rage ga : Ti wur maga ndi hay laa we wo bay ndar solay, bay ndar bii, bay taarag mokay, mopo day pẽẽ we ti ɓay wur sen yawla? Á raw wo wãã ge ga : Pẽẽ ga hase. 36Blam sen Yeso raw riŋ rage ga : Ma patala je maga yaŋ de ndar solay doo, mo maŋ mbe doo ɓe so, je maga yaŋ de ndar bii, mo maŋ lay, je maga moslam ɓe bay wa, mo yee õõbe ɓe ma kluun go, ma yee moslam boŋ. 37Coʼ we sug ɓay ndi de riŋ we ge ga da ga wããren maga á go de yerge ga : á hay go de keege yoo jar joŋ ɓlagge wo, mo baa jag go de ɓi so. Wersen wããre maga hay go de wãã ge ti ɓi yaŋ go wo ge baa jag so. 38Jar ma wer ɓen raw wo ɗege ɓe ga : Waŋkluu, ko nen ɓo, moslam wo mo ɓog kay no. Á raw ga : Sen kãã we.

Yeso wo tos ge ti húulì maga koore Olif wo ti ɓe mono

(Mat 26.36-46; Mark 14.32-42)

39Yeso kal go, raw rawge ti húulì maga koore Olif wo ti ɓe doo ga se joŋ tumn no, jar ma wer ɓen raw wo maŋ blam ɓe lay. 40Á wo wo day ge ti ngel sen ni mokay, á raw riŋ rage ga : Tos we Baa ga nday mo leɗ ge go nen re ma jãɗ we go wa. 41Blam sen á raw yaʼ ge wo go see ɓaara mbeɗa ɗawa, raw laa kõyõgre gesiŋ tos ge ga : 42Baba, hayga ndo da we no, da ga bon sen mokay mo daʼ me wa ɗa la. De sen ɓuy joŋ diŋ re maga ndi de da ge ɓe no wa, ama joŋ diŋ doo ga ndo da nono. [43Blam sen je peele Baa raw age le ciŋ coɓ nen ɓe. 44Yeso raw caa jiiri go debaŋ, á raw tos ge de egre tigriŋ pa. Gibigri ɓe raw kol ge go doo cíi maga yor le go gesiŋ de bag ge nono.]

45Blam maga á wo go taw tosgen mokay, á raw go ur gi ciŋ, raw ferge le se jar ma wer ɓen wo, á daʼ rage de laa naa de hrag se lagge. 46Á raw riŋ rage ga : Nday laa naa le ɓa? Hoo we go ciŋ tos we Baa ga á mo men we joŋ re ma de ɓlagge wa.

À baa Yeso

(Mat 26.47-56; Mark 14.43-50; Jaŋ 18.3-11)

47Yeso de wãã ren ɗa, ko la ngaɓan á wo we yaw. Judas je ma yoo jar ma wer ɓe ma hwal ti ɓogn wo, a de ɓaara, á raw yaʼ ge see Yeso klew doo ne hẽn soole. 48Ama Yeso raw ɗe ge ɓe ga : Judas, diŋ de klew ge sen mokay ga ndo kaŋ taw wel je táabayn go de ɓe mo so ga? 49Jar ma wer Yeso wo wo ko re se ga joŋ mokay, á raw wo wii gi ga : Waŋkluu, wùr mo car ra mbe de moslamre? 50Jobo yoo jar ma wer ɓen wo, raw caa sug ɓaŋ war wejõõ je kluu ma siɗ jagn go. 51Ama Yeso raw ga : Men we ni no maʼ no, sen kãã we. Á raw duʼ sug bloo se no, raw lẽẽ sug bloo sen ne hẽn ni.

52Blam sen Yeso raw riŋ waŋre ma siɗ jag wo, waŋre jar gor jag tiŋ Baa wo, de jar kluuri maga a wo baa ge ɓe mo ga : Nday a ɓayn le de moslamre wo de grawre ti ɓi doo ga ndi diŋ je leɗ faage no le ɓa? 53Ndi hay yaŋ a ge ɓi tiŋ Baa see ɓay tum, nday kiɗ me ma baa ge ti boŋ gà. Ama wur se ma kaʼ waran diŋ ma ɓay, diŋ egre je ma nen suŋgun lay.

Piyer kaŋ kiŋ ti Yeso ga se kon ga

(Mat 26.57-58,69-75; Mark 14.53-54,66-72; Jaŋ 18.12-18,25-27)

54Á raw wo baa Yeso, raw wo age de ɓe liŋ ni je kluu ma siɗ jag no. Piyer raw maŋ blam ɓe le, raw greg glog le go hãã. 55Á raw fug wùu go ciŋ ɓi feelen ni, Piyer raw hayge yoo jar maga wo de lagge jag wùu ni mono. 56Maygebe po raw koge ɓe jag wùu ni, mayn raw kaŋ nen ɓe ko ge ɓe ɗeŋres, raw ga : Bloo ma yeʼ la hay we le wer ɓe la lay. 57Ama Piyer raw kaŋ kiŋ ga : Wãy, ndi bay de ko ge ɓe wa. 58Ig blam sen meʼ je ma tigriŋ raw ko Piyer pa, raw riŋgi ɓe ga : Ndo mo yeʼ diŋ je ɓaara lay. Ama Piyer raw fer wããre ne bloo sen ga : Aʼa, ndi bay diŋ je ma wer ɓe wa. 59Wo ig gi blam sen smagga pa, je ma tigriŋ raw wãã ge de egre pa ga : Cwãy, bloo sen mo deŋ hay we le see Yeso, werga á diŋ je Galile lay mono. 60Ama Piyer raw riŋgi ɓe ga : Bar ɓi, ndi bay de ko wããre maga ndo wãɗ mo deŋ wa. Á bay ɓoʼ jag wããren go kway, kag raw rage tuuseŋ. 61Yeso raw mbuɗ nen le, raw kaŋ nen ko Piyer ɗeŋres. Piyer raw ɗig ti wããre maga Yeso hay wãã ne hẽn ga : Taŋgu maga kag wo rage, ndo kaŋ kiŋ yaŋ ɓaale swaʼ ga ndo ko me ga mono. 62Á raw kalge go siigi, raw rage debaŋ.

Jar ɗar wo Yeso, mbarn wo lay

(Mat 26.67-68; Mark 14.65)

63Jar ma gor Yeson raw wo feg ge ti ɓe, mbar wo ne. 64Á raw wo kuu nen ɓe go, raw wo wiɗ gi ɓe ga : Wose mbar mo mo ne? Gaɓ ɗa so. 65Á ɗarn wo de wããre ma tigriŋ debaŋ pa.

Yeso pel jar ɓoɗ ti wããren wo no

(Mat 26.59-66; Mark 14.55-64; Jaŋ 18.19-24)

66ngel wo go teege mokay, jar kluuri jar Jwif wo de waŋre ma siɗ jag wo, de jar ma ndar wer wããre Baa raw wo tay ti see ɓaara, raw wo age de Yeso pel jar kluuri ma ɓoɗ ti wããre ɓaaran wo, 67raw wo wii Yeso ga : Sii ne wùr ɗa, ndo mbo diŋ Mesi mono? Á raw fer wããre ne hara ga : Ndi mo sii bà we, nday yãã mbay ga pa, 68Hayga ndi wii jag ɓay we ti wããre po nday day fer wããre me ga pa. 69Ama tĩĩ wer patala wel je táabay hay yaŋ de hayle go ti ɓaŋ war Baa ma de egre daŋge ɓuy yeʼe. 70Wersen á raw wo wãã ge ɓuy ga : Day ndo diŋ wel Baa so? Yeso raw riŋ rage ga : Nday go de wãã ge ɓe, ndi diŋ se.

71Á raw wo wãã ge ga : Naa bay de sãy wii jag jobo ti re sen wa so. Naa de se naa, naa laa wããre ɓen we.

Currently Selected:

LUG 22: TUP

Highlight

Copy