JAŊ Kalge ɓil kefder seno
Kalge ɓil kefder seno
Je yer Wããre ma de Cõõre mani Jaŋ yer kefder sen go maga jar mo yãã wo ga Yeso diŋ je maga Baa maŋ ne go. Á diŋ wel ɓe, nen maga jar jaŋ kefder sen mo hã wo see ɓaara go ne hẽn maga saara mo hay tenen tiʼ i.
Wããre maga Jaŋ tĩĩ wer yerge ɓe taŋgu diŋ maga se mo kaŋ nen naa ti Yeso ga Yeso diŋ Wããre maga Baa wãã ne, Wããre ɓen mbe tenen tiʼ tum. Wããre sen la raw kol ge go diŋ je tabay caw, je tabay sen la raw age yoo ɓaara ma ler ngel go ne hara ti, á kaŋ nen ɓaara ti wããge cwãy, ma joŋ rage tenen tiʼ lay. Wo go ti taw ge ti (ma kluuri 1.19-51) sen wãã diŋ ti joŋre Jaŋ ma yog jar de bii wo de ɗúu maga Yeso ɗe jar ma wer ɓen wo, ngaɓa maŋ blam ɓe mono. Jaŋ yer wããre ti joŋre maga Yeso tĩĩ wer joŋ ge ɓe pel jar poɗag ga á dog raŋ ge maga á wo Jude, wo Jerusalem ɓaale puri (2.1—12.50).
Jar lan bay wo de yerge ti raŋ ge ɓe sen doo sen no wa. Yeso wo Jerusalem daŋge ɓuy de wur few ɓaara maga jar jwif joŋ ra wo mono. Joŋre maga Yeso tĩĩ wer ɓe go tinoo pel jar poɗag go de ko ge diŋ se re mbuɗgi maga á joŋ ra mo renam taʼ ma naa nen ɗiggi ɓe go ga á mo ko go cwãy ga se diŋ wosela, se nduu diŋ ti re mayla. Re mbuɗgi maga Yeso joŋ ra wo de ɓoɗ wer kããge ɓaara tem tem. Mbe de re mbuɗgi se maga Yeso joŋ ra mo deŋ ɓuy jar ngaɓa debaŋ giŋ wo ne laa wo day ge yãã wããre ɓen gà. Wããre maga Jaŋ yer ti rege maga Yeso ren wo de jar peele ɓen wo ga taw wo ti de ɓe blam lam taw go de sii gi wer de el daŋ ma jar lan wo no (ma kluuri 13.17) Yeso had jar ma wer ɓen wo sen doo ga á wãã jag húulì ɓe ne haran no, á wii ra ga se ɓoʼ Nenterse Baa yaŋ le ne hara ma kay rage ti joŋre sii gi wããre Baa go ne jar ma ti tamsir wo la krub ɓuy.
Á le de oo le wii Pan ɓe le ne hara ti ga á mokay ra. Wããre ma de yerge pel wo ni wãã diŋ ti maga à baa Yeso, a cag wããre ɓe, á raw ga kiida baa ne, a raw ɓal ge ɓe go ti koo ma ɓal jar, á raw ferge le go kal ge ɓe ciŋ tenen caw, ndar nen see ɓe ne jar ɓe no (ma kluuri 18.20). Wããre maga taw ti go de ɓe blam taw wãã diŋ ti maga Yeso naa nen see ɓe go ne jar ma wer ɓe po wo renam jag pyew ma Galile, saara wãã wããre de Piyer wur sen ni (ma kluuri 21).
Wããre ma de Cõõre maga Jaŋ yern mokay, Jaŋ de oo le ma ɓen go pah diŋ ga jar maga hã wo see ɓaara ne Yeso mo ɓuy, á kol naa go tenen tiʼ huɗ wo ga so mono. De maga ndo bul kefder mani Jaŋ no kay, ndo ngris deŋ tuu ɗa, kiŋ fẽẽre maga naa de bag doo ne hara se tum tiʼ tiʼ naa maga naa tenen ti tamsir la tiʼ ɗa mono diŋ fẽẽre se maga á ngaɓ ra ma kaŋ nen jar ti Nenterse Baa de ɓaara mono. Fẽẽre se maga á ngaɓ joŋre Nenterse Baa de ɓaara wo diŋ bii, hoole, ngel maga ler go, je koɗ horog ɓen wo, koo ma de maŋ tlalum wo de leʼge ɓe...
Doo sen no kay, ti wããre Yeso maga á wããn mono, naa ko tuu ga Yeso de maŋ blam naa yoo naa ni caw tiʼ tiʼ naa maga naa mo tiʼ no. Maga naa mo ko ga se yoo naa mo caw diŋ maga naa mo daʼ wer go ne se ga se yoo nà mo caw diŋ ma woo naa.
Currently Selected:
JAŊ Kalge ɓil kefder seno: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.