JAŊ 13

Yeso yog ɓaale jar ma wer ɓen wo

1Naw few Pag wo kosge go mbaŋ mono, Yeso raw koge ga wur se maga se men tamsir sen la go ma rawge se Pan se a we so. Á hay da jar ma ti tamsir lan wo tum tum, dage sen wo go de ɓe hãã jag húulí ɓe.

2Yeso raw wo lagge rege de jar ma wer ɓen wo. Manhúulí raw kalge ɓil Judas wel Simoŋ Iskariyod, maga á mo wo go kaŋ taw Yeso. 3Yeso de koge ga se de see se, se a le go se Baa, se fer ge ni Baa, Baa de hã egre ne se wãã re fẽẽren ɓuy pa. 4Á le jag regen yeʼ raw urgi le, raw naa õõbe ɓe ma kluun go, raw hoo õõbe maapo, raw saʼ ɓil ɓe de ɓe. 5Blam sen á raw kaa bii ɓi hãn boo ma kluu, raw yog ɓaale jar ma wer ɓen wo, saɗ ra go de õõbe se maga se hay hoon saʼ ɓil ɓe mo lay. 6Blam sen á raw dayge ti Simoŋ Piyer, Piyer raw ga : Ɓa Waŋkluu, yog ɓaale ɓi diŋ ndo yaw? 7Yeso raw riŋgi ɓe ga : Fen maga ndi de joŋge ɓe mokay, ndo kon patala gà ɗa, ama ndo wo yaŋ laa wer ɓe blam kway. 8Piyer raw riŋgi ɓe ga : Ndo yog ɓaale ɓi gà hase. Yeso raw riŋgi ɓe ga : Hayga ndi yog ɓaale ɓo we gà no, ni ndo daʼ ge mopo doo ɓi gà has lay. 9Simoŋ Piyer raw riŋgi ga : Waŋkluu, hayga á yaŋ doosen, ni ndo yog diŋ ɓaale ɓi tawa wa, yog doo ɓi wo de ti ngel ɓi ɓuy. 10Yeso raw riŋgi ɓe ga : Wosela maga yog we go bay de sãy yog see ɓe ɓuy wa so, say diŋ ɓaale ɓe, werga see ɓe go ɓuy cwelgede. Nday go cwelged, ama bay ɓuy wa. 11(Yeso go de ko je maga wo ge kaŋ taw ɓe go mono, diŋ wersen á raw wãã ge ga : Nday bay go cwelged ɓuy wa mono.)

12Yeso yog ɓaale ɓaara go yog, blam sen á raw laa õõbe ɓen wo ti, raw hayge jag rege, raw riŋ rage ga : Nday yaŋ de ko wer fen maga ndi joŋ we de ɓe mokay no? 13Nday ɗe me ga : Waŋ ma pel kããra, ga : Waŋkluu, nday ɗe mbay naa ni, ndi mbi diŋ se. 14Hayga ndi Waŋkluu, ndi Waŋ ma pel kããran, ndi yog ɓaale ɓay we no, joŋ we nen yog ɓaale ne kããra doosen lay. 15Ndi joŋ ne nday diŋ fen ma kaŋ nen jar ga nday mo joŋ we kããra doo ga ndi joŋ we no lay. 16Kidolgi ndi riŋ nday, wejõõ jobo bay de daŋ pan tiŋ ɓen wa, je maga à ɓoʼn le peele bay de daŋ je maga ɓoʼn le mo wa. 17Patala nday yaŋ de ko se no, hayga nday wo we joŋ ge doosen no mono, ni nday woo yaŋ.

18Ndi bay de wãã ge diŋ ti ɓay ɓuy wa, ndi de ko jar maga ndi hoo ra go mono, ama wããre maga jobo yern go ɓi kefder ga : Bloo maga de rege ɓiŋ ɓi fer mbuɗ nen caa hee de ɓi doga mono, re sen mo leʼ go ti jag ɓe so. 19Ndi sii re sen we go ne nday taŋgu maga re sen wo ge joŋ ge, de maga á wo ge we joŋ ge, ni nday mo ko ga : Ndi diŋ je maga ndi diŋ ndi. 20Kidolgi ndi riŋ nday, je maga yãã waare je maga ndi ɓoʼn wo we, ni á yãã diŋ waare ɓi, day je maga yãã ndi we, ni á yãã diŋ je maga ɓoʼ me le mo lay.

Yeso de wãã ge ga Judas kaŋ ge taw se yaŋ go

(Mat 26.20-25; Mark 14.17-21; Lug 22.21-23)

21Blam maga á sii wããren go sii mono, jiili Yeso raw daŋ ge ɓe go debaŋ, á kal riŋgi ga : Kidolgi, ndi riŋ we, jobo yoo ɓay kaŋ ge taw ɓi yaŋ go. 22Jar ma wer ɓen raw wo ko kããra, bay wo de ko je maga á wãã ti ɓe mo wa. 23Jobo yoo jar ma wer ɓen wo, diŋ je maga Yeso da ne mono, de hayle ti jeŋ Yeso yeʼe. 24Simoŋ Piyer raw joŋ doo wo ga á mo wii Yeso ga á wãã ti wosela. 25Je sen raw gis see ɓe wo see Yeso wii gi ga : Je sen diŋ wose ɓa, Waŋkluu? 26Yeso raw ga : Ndi day caa hoole heege nen nee, je maga ndi wo ge hãge ɓe ne hẽn, diŋ je sen so. Yeso raw maŋ hoole raw heege ɓe nen nee, raw hãge ɓe ne Judas je ni Simoŋ Iskariyod no. 27Judas wo yãã hoolen mokay, Satan raw kalge ne Judas ɓil tuu. Yeso raw riŋgi ɓe ga : Re maga ndo da ga ndo joŋ ne mokay, joŋ ne go deparday.

28(Jobo laa laa wer wããre maga Yeso riŋ Judas de ɓe mokay boŋ gà. 29Wer maga Judas diŋ je ɗaw solay, jar debaŋ raw wo ɗig ɓaaran ga Yeso riŋ Judas ga á mo wo yee mopo ne saara ma joŋ few yawla noga á mo wo hã fẽẽre po ne jar coo wo yawla.) 30Judas raw yãã hoole no kay, raw kalge go deparday. Ngel hay go de suŋ.

Wããre ma defay

31Blam maga Judas kal go mokay, Yeso raw wããge ga : Patala woore Wel je táabayn de naa nen go so, woore Baa go de naa nen lay. 32Day hayga woore Baa yaŋ go naa nen no, Baa de see ɓe naa nen woore Wel je táabayn yaŋ go see ɓe lay, day á joŋ yaŋ go patala gus yaw. 33Nday weere ɓi no, ndi ɓiŋ ɓay la diŋ ma naw po rab koɗe. Nday kiɗ gi ndi yaŋ, ndi sii wããre maga ndi hay wããn ne jar Jwif wo ga á kãã wo ma woge go ti ngel maga ndi de woge ni mo gà we ne nday patala lay. 34Ndi de hã jag liŋgi ma defay ne nday, da we kããra, doo ga ndi hay da we no lay. Daga nday mo da we kããra lay. 35Hayga nday yaŋ da kããra no, ni jar ɓuy ko wo yaŋ ga nday diŋ jar ɓi ma wer ɓi.

Yeso de wãã ge go ga Piyer kaŋ kiŋ yaŋ ti se ga se ko se gà

(Mat 26.31-35; Mark 14.27-31; Lug 22.31-34)

36Simoŋ Piyer raw ga : Ndo wo gen ɓa, Waŋkluu? Yeso raw riŋgi ɓe ga : Ndo kãã ma maŋ blam ɓi ti ngel maga ndi wo ni patala gà ɗa, ama ndo maŋ ge blam ɓi yaŋ wurpo kway. 37Piyer raw ɗege ɓe ga : Waŋkluu, wer may ga ndi kãã ma maŋ blam ɓo patala gà la? Ndi go de gragge ma tob see ɓi ti re ɓo. 38Yeso raw riŋ ge ɓe ga : Ndo yaŋ mbo go de gragge ma tob see ɓo ti re ɓi cwãy gla? Kidolgi ndi riŋ ndo ga taŋgu maga kag wo rage, ndo dog yaŋ kaŋ kiŋ go ti ɓi ɓaale swaʼ ga ndo ko me gà.

Currently Selected:

JAŊ 13: TUP

Highlight

Copy