TĨĨGI WERE 11

Ɓi leege ma Babel wo de tiŋ ma Babel no

1Jar ɓuy hay wããge diŋ jag po boŋ, de wããre se boŋn lay. 2Á pud wo le nen ɓaŋ wer no kay no, kal wo age daʼ ful po ɓi sir Sineyare, saara kal lagge de tiŋ ni. 3Á kal wo wii kããra ti holaŋ kããra ga : Naa see we! Naa ndar we brigi, ni naa jiin we go ti wùu. Brign mokay la no saara kol diŋ húulì ɓaara, bitum#11.3 Bitum : Á diŋ bitum ma nen sir po de maŋ gudroŋ. Ko ɓil Tĩĩgi wer 14.10. Laage go 2.3. mo lay no saara koln diŋ mo ma neɗ nen ɓen tuu lay. 4Á kal wo pa ga : Naa see we! Naa boo we ɓi leege wo de tiŋ ma kluu nen maga ti pẽẽge ɓe mo wo daʼ ngel ma ciŋ, naa ra we ɗúu naa go nen maga naa mo joŋ nen dusgi wo go ciŋ ti tamsir ɓuy wa.

5Manwur kal ɗiigi le gesiŋ ko ɓi leege wo de tiŋ ma kluu maga weere jar téebeere wo de booge ɓe mono. 6Manwur day ga : Jar ma de tayge boŋ wo mo lag so no! Á wãã wo ɓuy diŋ jag se boŋ no, day ko fen maga saara bà de tĩĩ wer joŋ sen mo hãʼ ɗa pa! Patala mopo ma dig rage bay wa so mo pa de maga á ɗig wo we ga saara joŋ mopo no. 7Naa see! Naa ɗii wo : Naa wo la ni naa brum nen wããre ɓaaran go nen maga á mo laa wo jag kããra ti yoo ɓaara wa so. 8Manwur kal dus rage wo go see ngel sen hãã ciŋ ti tamsir ɓuy, á kal wo men boo ɓi leege no. 9Diŋ wersen ga à kal kaŋ ɗúu ne hẽn ga Babel, werga diŋ ni, ga Manwur brum jag jar ma ti tamsir wo go ɓuy. Diŋ ni ga Manwur joŋ nen mber rage wo go ciŋ ti tamsir ɓuy mo lay.

WÃÃRE SEM DE WER MANI ƁE NO

10Mokay diŋ wer mani Sem no : De maga Sem joŋ kiŋgi kis mono, se biŋ Arpaksade, sen kiŋgi ɓog blam maŋge bii no. 11Sem joŋ kiŋgi blam maga se biŋ Arpaksad go kiskis dwee, á kal biŋ weere ma twerpiiri wo de ma tenaare wo.

12Kiŋgi Arpaksad hay doo swaʼ ti dwee de maga á biŋ Sela mono. 13Arpaksad joŋ kiŋgi blam maga se biŋ Sela go kiskis naa ti ɓe swaʼa, á kal biŋ weere ma twerpiiri wo de ma tenaare wo.

14Kiŋgi Sela hay doo swaʼa, de maga á biŋ Heber mono. 15Sela joŋ kiŋgi blam maga se biŋ Heber go kiskis naa ti ɓe swaʼa, á kal biŋ weere ma twerpiiri wo de ma tenaare wo.

16Kiŋgi Heber joŋ doo swaʼ ti naa, á kal biŋ Peleg. 17Heber joŋ kiŋgi blam maga se biŋ Peleg go kiskis naa ti ɓe doo swaʼa, á kal biŋ weere ma twerpiiri wo de ma tenaare wo.

18Kiŋgi Peleg joŋ doo swaʼa, á kal biŋ Rewu. 19Peleg joŋ kiŋgi blam maga se biŋ Rewu go kiskis ɓog ti ɓe kaawaʼa, á kal biŋ weere ma twerpiiri wo de ma tenaare wo.

20Kiŋgi Rewu joŋ doo swaʼ ti ɓoge, á kal biŋ Serug. 21Rewu joŋ kiŋgi blam maga se biŋ Serug go kiskis ɓog ti renam, á kal biŋ weere ma twerpiiri wo de ma tenaare wo.

22Kiŋgi Serug joŋ doo swaʼa, á kal biŋ Nahor. 23Serug joŋ kiŋgi blam maga se biŋ Nahor go kiskis ɓoge, á kal biŋ weere ma twerpiiri wo de ma tenaare wo.

24Kiŋgi Nahor joŋ doo ɓog ti kaawaʼ á kal biŋ Tera. 25Nahor joŋ kiŋgi blam maga se biŋ Tera go kis ti ɓe hwal ti kaawaʼa, á kal biŋ weere ma twerpiiri wo de ma tenaare wo.

26Kiŋgi Tera joŋ doo renam, se kal biŋ Abram, Nahor wo de Haran.

WÃÃRE TERA WO DE ABRAHAM

27Mokay diŋ wer mani Tera no : Tera biŋ Abram, Nahor wo de Haran. Haran biŋ Lod. 28Haran huu go nen pan ɓe Tera ɓi sir maga se biŋ ni, ga diŋ Ur ni jar Kalde wo mono. 29Abram kal wo da naare de Nahor. Ɗúu wãy mani Abramn ga Saray, ɗúu mani Nahorn ga Milka, may ma Haran pan Milka, pan Yiska. 30Saray hay go de gedge, á hay bay de mbarga wa.

31Tera kal baa je ni ɓe Abram, moo ɓe lod je ni Haran no, blam ɓe moo ɓe Saray wãy mani je ni ɓe Abram no. Á laa wo le go wer kããra ɓuy le Ur ni jar Kalde wo, ma woge ɓi sir ni jar Kanaan wo.

32Kiŋgi maga Tera joŋn caw ɓuy mono, á kiskis ɓog ti ɓe dwee, á kal huugi go ɓi sir Haran.

Currently Selected:

TĨĨGI WERE 11: TUP

Highlight

Copy