Ruuka 12

Yeesu kaakengya abhaanu inguru ya obhwirimaanya bhwa Abhafarisaayo

1Omwanya ogwo, abhaanu ebhiwumbi na ebhiwumbi, bhaariga bheekofyanyiisye eyo, nibhakingira okutajana.

Yeesu ˆnaamba okubhwira abheeyigisibhwa bhaaye ati, “Mwikenge obhwirimaanya bhwa Abhafarisaayo kwa okubha obhwirimaanya obhwo obhuswirana rwa echifwimbya. 2Bhuri musango gunu gubhisirwe, guriswerurwa. Ka wone imbisike yooneyoone irimenyekana. 3Emisango jinu omwayika mu‑mbisike, abhaanu bharijuungwa abhwerubhweru. Omusango gunu omwayika kwa okubhobhootera mu‑bhisago, guriraasibhwa kwa obhuraka bhunene, korereki abhaanu bhaguungwe.

Unu eeyire okuubhaywa ni Nyamuwanga era

(Mataayo 10:28‑31)

4“Emwe abhasaani bhaani, enibhabhwira ati, mwasiga okuubhaya abhaanu bhanu abhatura okwita omubhiri era, kwa okubha bhakamara okubheeta, bhatakutura okukora gundi okukira ogwo. 5Nawe, enija okubheeresya unu mwenderwe okuubhaya. Muubhaye Nyamuwanga, kwa okubha akamara okwita omuunu, ari na obhuturo bhwa okumwesa mu‑muriro gwa akajaanende koone. Mbe, muubhaye omwene eenyere.

6“Angu, jimakuyure etaanu tari ati ejigusibhwa ku‑bhugusi bhutooto muno? Nawe, Nyamuwanga atakurabhirwa‑ko noorwo imwi. 7Nawe emwe, muri na obhurambu obhunene okukira jimakuyure nyafu. Nyamuwanga wone kaamenya obhukumi bhwa jifwiri ja ku‑mitwe jeemwe, kwa okubha ajibharire. Kurwa ejo, mwasiga okuubhaya.

Okwikirisya na okurema Yeesu imbere ya abhaanu

(Mataayo 10:32‑33, 12:32, 10:19‑20)

8“Enibhabhwira ati, omuunu woonewoone unu kaanyikirisya imbere ya abhaanu, anye wone Omwana wa Omuunu nirimwikirisya imbere ya bhamaraayika bha Nyamuwanga ati, omuunu oyo ni waani. 9Nawe, omuunu woonewoone unu kaanyigaana imbere ya abhaanu, anye wone nirimwigaana imbere ya bhamaraayika bha Nyamuwanga. 10Bhuri muunu unu kaayika emisango emibhiibhi ja okunyingirira anye Omwana wa Omuunu, Nyamuwanga arimufwira echigongo. Nawe, omuunu unu keefumirisya Mwoyo Mweru, oyo Nyamuwanga atarimufwira echigongo.

11“Bhaakabhasira mu‑nju ja ameekofyanyo geebhwe, imbere ya abhatungi na imbere ya abhakuru, mwasiga okuyaya inguru ya emisango jinu omuja okwayika mu‑kwibhagira. 12Okubha ku‑mwanya ogwoogwo, Mwoyo Mweru aribheeyigisya emisango jinu omuja okwayika.”

Obhuwanga bhutakusookana na obhwafu bhwa ebhiinu

13Mbe, omuunu umwi mu‑chise echo, ˆnaabhwira Yeesu ati, “Omwiyigisya, nuubhwire omumura waasu, chigabhane omwandu gunu raata ꞉aachisigiiye.”

14Yeesu ˆnaamusubhya ati, “Musaani, niga unu ꞉aanteeye‑wo nibhe omuramusi weemwe, amwi omugabhi wa omwandu gwemwe?” 15Niwo, Yeesu ˆnaabhwira abhaanu abho ati, “Murore! Mwikenge na omuruuru gwa ebhiinu! Okubha, obhuwanga bhwa omuunu, bhutakusookana na obhwafu bhwa ebhiinu bhyaye.”

16Neeya Yeesu, ˆnaabhabhwira echijekekanyo, ˆnaayika ati, “Aariga ari‑wo omuniibhi umwi, unu risambu ryaye ryariga riwundisye muno. 17Omuniibhi oyo, ˆneebhuusya mu‑mutima gwaye ati, ‘Nikore kutiki woori? Nitari na owa okutuura ebhigeswa bhyani bhinu!’ 18Neeya, ˆnaayika ati, ‘Woori nikore kutya. Enija okufumura ebhitara bhyani, na okuruka ebhitara ebhindi ebhinene muno. Omwo nimwo enija okutuura ebhigeswa bhyani bhyone, aamwi na ebhiinu ebhindi. 19Niwo enija okwiyayikira mu‑mutima gwani ati, “Woori neebhiikira ebhibhiikwa bhyafu bhya ekisi. Ebhibhiikwa ebhyo ebhija okungega‑wo emiguuga myafu! Mbe, niisye omwoyo, nirye, ninywe na okukonderwa!”’

20“Nawe, Nyamuwanga ˆnaamubhwira ati, ‘Omutaamutaamu awe! Ingeta inu, owuja okwitwa! Ka ebhiinu bhyone bhinu wibhiikiiye, ebhija okubha bhyaga?’”

21Yeesu, ˆnaamariisya kwa okwayika ati, “Nikwo kutyo jiribha, ku‑muunu unu keekumanyisya ebhiinu bhyafu inguru yaaye omwene, nawe obhuniibhi bhwaye bhutari na omuriiro gwonegwone imbere ya Nyamuwanga.”

Ameeyigisyo inguru ya okunyaaka

(Mataayo 6:25‑34)

22Ka wone, Yeesu ˆnaabhwira abheeyigisibhwa bhaaye ati, “Mbe enibhabhwira ati, mwasiga okuyaya inguru ya obhurame bhwemwe ati, murirya ki, amwi emibhiri jeemwe ati murifwara ki. 23Okubha obhurame bhuri na indiyo okukira ebhiryo. Ka omubhiri wone, guri na indiyo okukira emyenda!

24“Mutegeresye echijekekanyo cha bhanyamuukoro. Bhanyamuukoro bhatakuyamba, bhatakugesa noorwo bhatari na ebhitara, nawe Nyamuwanga kaabhariisya. Emwe mukeenganyirisibhwa na jinyonyi muri na indiyo muno okukira jinyonyi! 25Niga mw‑imwe unu kwa okwinyaakirira omwene kaatura okwiyongesya‑ko noorwo esaa rimwi ku‑bhurame bhwaye?#12:25 Okwiyongesya‑ko noorwo esaa rimwi ku‑bhurame bhwaye. Obhugajuro obhundi obhutura okubha ati, okwiyongesya‑ko obhureera bhwaye noorwo echita chimwi. 26Mbe! Araabha mutakutura okukora omusango omutooto rwa ogwo, ni kurwa ki omunyaakirira agandi ago?

27“Muringire, obhwaso kutyo obhumera. Bhutakukora emirimu noorwo bhutakwibhariirira emyenda. Enibhabhwira ati, noorwo omukama Seremaani mw‑ikusyo ryaye ryone, ꞉ataafwaye kisi rwa obhwaso obhwo. 28Mbe, araabha Nyamuwanga kaafwafya amanyaasi ga mw‑ibhara ganu gari‑wo reero, na mutondo nigeeswa mu‑muriro, angu, Nyamuwanga oyo ataribhafwafya, emwe abha eriikirisya ritooto?

29“Mbe, emwe mwasiga okunyaaka ati, omuja okurya ki, amwi omuja okunywa ki. Mwasiga okuyaya inguru ya ejo! 30Ebhiinu ebhyo bhyone, nibhyo abhanyamanga abhanyaakirira. Nawe emwe, Esomwana unu ari mu‑rwire, amenyere kisi ati, omukena ebhiinu ebhyo. 31Woori emwe, muyenje obhukama bhwa Nyamuwanga, na ebhiinu ebhindi ebhyo bhyone Nyamuwanga kaja okubhoongesisya.

Obhuniibhi bhwa mu‑rwire

(Mataayo 6:19‑21)

32“Emwe echise echitooto, mwasiga okuubhaya, kwa okubha Esomwana keenda okubhayaana obhukama bhwaye. 33Mugusye ebhiinu bhyemwe, jiyera jinu omuja okubhona okuruubhana na ebhiinu ebhyo, muyaane abhataka. Mwibhariirire jisagwa jinu jitakunyamuka, na okwibhiikira ebhibhiikwa mu‑rwire anu bhitakugeruka‑ko. Eyo niwo omwifi atakukinga, korereki eebhe, noorwo amayeenje gatakunyamura. 34Okubha anu mwibhiikiiye ebhibhiikwa bhyemwe, awo niwo emyoyo jeemwe wone jiribha.

Abhaanu bhatengeeje omwanya gwa okuuja Yeesu

35“Mubhega mutengeejere okunkorera emirimu, na jidara jeemwe jibhega nijaaka. 36Mubhe rwa abhakosi bha emirimu, bhanu abharindirira omwami weebhwe asubhe okusooka mu‑bhuregesi. Omwanya gunu kaaja na okwibhuurisya, bhamwigurire orwigi bhwangu. 37Bhari na amabhando, abhakosi bhanu omwami weebhwe aribha aasubha ˆnaabhasongʼana nibhamurindiriraga. Ni chimari enibhabhwira ati, aritengeeja, aribheenyanjya ku‑nenda na okubhafurubhendera! 38Noorwo araabha omwami weebhwe arisubha mu‑bhwire agati, amwi mu‑ruguru, na okubhasongʼana bhatengeejere, abhakosi abho bhari na amabhando muno!

39“Nawe mumenye kisi ati, araabha omwene inju, akamenyere omwanya gunu omwifi kaaja, mbe atakawongeeye wuri, korereki omwifi aasiga okuuja ˆnaafumura inju yaaye. 40Kurwa ejo, emwe wone, mutengeeje omwanya gwone, kwa okubha anye Omwana wa Omuunu, niriija ku‑mwanya gunu mutakumenya.”

Omukosi omwiyikanyibhwa na unu atari omwiyikanyibhwa

(Mataayo 24:45‑51)

41Mbe, Peetero ˆnaabhuusya Yeesu ati, “Raatabhugenyi, echijekekanyo chinu waachibhwira ni inguru yeeswe abheene, tere ni inguru ya abhaanu bhoone?”

42Raatabhugenyi Yeesu ˆnaamusubhya ati, “Mbe, ni mubhiiki ki omwiyikanyibhwa na owa obhwengeeso? Ni mubhiiki unu omwami waaye kaawura okubha omwimereegururu omukuru ku‑bhakosi bheejaabho, korereki abhayaane omuyeero gwebhwe ku‑mwanya gwaye. 43Rusuku rumwi, omwami waaye arisubha okusooka mu‑rugendo. Ari na ribhando omukosi unu omwami waaye arimusongʼana ˆnaakoraga rwa kutyo ꞉aamuragiriiye. 44Ni chimari nibhabhwira ati, mwami waaye arimukora abhe omubhiiki omukuru wa ebhiinu bhyaye bhyone!

45“Nawe, araabha omukosi oyo akeeganirisya mu‑mwoyo gwaye ati, ‘Mwami waani aakoora muno okusubha,’ niwo ˆnaamba okubhuma abhakosi bheejaabho, ˆnaamba okurya na okunywa obhwarwa ˆnaakingira okukorwa, 46mbe, omwami waaye arisubha okusooka mu‑rugendo ku‑rusuku na isaa inu atakwiyikanya. Niwo omwami waaye arimuyaana jimbuma muno na okumwesa anu bhanyateekirisya bhari.

47“Omukosi unu ꞉aamenyere okwenda kwa omwami waaye, nawe, ꞉ataatengeejere okumuramira, noorwo okukora jinu omwami waaye keenda, ariyaanwa ebhitiibha bhyafu muno. 48Nawe, omukosi unu atakumenya okwenda kwa omwami waaye, nawe kaakora omusango gunu ogukora abhumwe okusombookerwa wuri, oyo aribhumwa simbo nooto era. Omuunu unu ꞉aayaanirwe ebhiinu bhyafu, aritongwa bhyafu, na omuunu unu ꞉aayaanirwe obhuturo bhwa okukora emirimu myafu muno, omwami waaye arimutonga bhyafu muno.

Yeesu kaataaganya abhaanu

(Mataayo 10:34‑36)

49“Anye, ꞉neejire ku‑chaaro anu, korereki nikongeesye omuriro gwa okutaaganya abhaanu. Naakeendere muno okurora omuriro ogwo gukongesiibhwe! 50Noorwo anye omwene, niri na ebhinyaasyo bhinu neenderwe nibhiikirisye, na enija okugenderera okunyaaka mu‑mwoyo gwani, okukingira bhikuumire.

51“Angu, omwitogera ati niijire ku‑chaaro anu okureeta omurembe? Enibhabhwira ati ꞉niteejire okureeta omurembe wuri! Tari niijire, okwawukanya abhaanu. 52Okwambira woori anu, mu‑nju inu bhari‑mo abhaanu bhataanu, abhasatu bharibhaga bhaawukeene na abhabhiri. Abhaanu bhabhiri wone, bharibhaga bhaawukeene na abhasatu abho. 53Omwana aryawukana na esemwene, na esemwene wone, aryawukana na omwana waaye. Omuyarakaji aryawukana na nyiramwene, nyira wone aryawukana na omuyaasya waaye. Nyaabhuko aryawukana na omukamwana waaye, omukamwana wone, aryawukana na nyaabhuko waaye.”

Okumenya okuuja kwa Yeesu

(Mataayo 16:2‑3)

54Ka wone, Yeesu ˆnaabhwira echise cha abhaanu abho ati, “Omwanya gunu omurora ameere nigeebhuka ebhugwa esuubha, omwayika ati, ‘Ingʼubha eyija okugwa,’ nyabhuriko niigwa. 55Mukoongwa omuyaga niguyemba okusookerera ebhurimbe, omwayika ati, ‘Reero imbiita eyija okubha nyafu,’ na nijibha kutyo. 56Emwe abheerimaanya! Kasi mumenyere kisi okusomboora kutyo orususo rwa echaaro na orutumba, oruyindukayinduka. Ejibha kutiki mutaamiibhwe okusombookerwa obhugajuro bhwa emisango jinu ejikorekana ku‑siku jinu?

Okuungwana na omusoko waawo

(Mataayo 5:25‑26)

57“Mbawo emwe abheene, mu‑mutima jeemwe omutaamibhwa okuramura okukora emisango jinu jiri ja rirenga? 58Omwanya gunu owugenda mw‑iramuriro aamwi na omuunu unu kaakusitaaka, ikomeesya uungwane nage, muchaari ku‑njira. Araabha ukarema okukora kutyo, kaja okukusira ku‑muramusi. Omuramusi oyo wone, kaja okukusira ku‑mukuru wa abhasirikare, korereki akubhoye mw‑ibhoyero. 59Ni chimari enikubhwira ati, utarisooka omwo, okukingira anu urimarira okuriya ribhanja ryone!”

Currently Selected:

Ruuka 12: jit

Highlight

Copy