Ruuka 11

Ameeyigisyo inguru ya okusabhwa Nyamuwanga

(Mataayo 6:9‑13, 7:7‑11)

1Rusuku rumwi, Yeesu aariga ari rubhaara rurebhe, ˆnaasabhwaga Nyamuwanga. Ejire aamara okusabhwa, owumwi wa abheeyigisibhwa bhaaye ˆnaamubhwira ati, “Raatabhugenyi, nuuchiiyigisye kutyo chiraasabhwega Nyamuwanga, rwa kutyo Yowana Omubhatiija ꞉eeyigisiisye abheeyigisibhwa bhaaye.”

2Yeesu ˆnaabhabhwira ati, “Omwanya gunu muraasabhwega Nyamuwanga, mwayikega ati,

‘Raata [weeswe unu uri mu‑rwire],

risiina ryawo rikusibhwe.

Obhukama bhwawo bhuuje.

[Okwenda kwawo kukorekane mu‑chaaro munu,

rwa kutyo okukorekana mu‑rwire eyo.]

3Uchiyaane bhuri rusuku ebhiryo bhyeswe.

4Uchifwire echigongo ebhibhiibhi bhyeswe,

rwa kutyo eswe wone echifwira echigongo bhanu abhachikayira.

Waasiga okuchiingisya mu‑maregeejo,

[nawe uchichungure okusooka ku‑Mubhiibhi urya].’”

5Mbe, ejire aamara okubheeyigisya, ˆnaabhabhwira echijekekanyo ati, “Chaayike ati, owumwi weemwe araabha aakagendere ku‑musaani waaye mu‑bhwire agati, amubhwire ati, ‘Musaani waani! Enisabhwa unsakire emikaate esatu, 6kwa okubha omusaani waani aaja iika ewaani ingeta inu, kaasooka mu‑rugendo, ka anye nitari na ebhiryo bhya okumuyaana.’ 7Nawe, omusaani oyo ˆnaamusubhya ati, ‘Siga okunnyaasya! Neegaaye orwigi, anye na abhaana bhaani chaamaamire ku‑mariri. Nitakutura okwimuka okukuyaana echiinu choonechoone.’

8“Woori, enibhabhwira ati, noorwo araabha omuunu oyo kaarema okwimuka okuyaana omusaani waaye omukaate, nawe kwa okubha omusaani oyo kaagenderera okumusabhwa okufwa omwoyo wuri, ku‑bhuteero omuunu oyo kaja okwimuka amuyaane echiinu choonechoone chinu keenda.

9“Kurwa ejo, anye wone enibhabhwira ati, musabhwega Nyamuwanga, kaja okubhayaana chinu omumusabhwa. Muyenjega ku‑Nyamuwanga, kaja okubhayaana chinu omuyenja. Mwibhuurega ku‑Nyamuwanga, kaja okubheegurira orwigi. 10Omuunu woonewoone unu kaasabhwa, kaja okuyaanwa. Omuunu woonewoone unu kaayenja, kaja okubhona, na omuunu woonewoone unu keebhuura, kaja okwigurirwa.

11“Angu ni mwibhusi ki wa echirume mw‑imwe, unu omwana waaye akamusabhwa omukaate, kaamuyaana ribhuyi?#11:11 Omwana waaye akamusabhwa omukaate, kaamuyaana ribhuyi? Emisango jinu jitari‑mo mu‑Nyabhurira ejindi ja Echiyunaani. Amwi akamusabhwa iiswi, kaamuyaana injoka? 12Amwi akamusabhwa riigi, kaamuyaana inge? 13Woori, emwe bhanu muri abhajabhi, mumenyere okuyaana abhaana bheemwe ebhiinu bhya ekisi. Mbe, Esomwana unu ari mu‑rwire kaja okukira muno mu‑kukora ja ekisi, na kaja okuyaana Mwoyo Mweru bhanu abhamusabhwa.”

Yeesu kaasoosya‑ko risambwa ku‑bhuturo bhwaye

(Mataayo 12:22‑30; Maariko 3:22‑27)

14Rusuku rumwi, Yeesu aariga ˆnaasoosya risambwa ku‑muunu unu ryariga rimukorere okubha omujibhi. Risambwa eryo ryejire ryamusooka‑ko, omuunu oyo ˆnaamba okwayika rindi. Abhaanu bhanu bhaariga bhari awo, nibharuguura muno.

15Nawe abhandi agati yeebhwe nibhaayika ati, “Kaasoosya‑ko amasambwa ku‑bhuturo bhwa Bherijebhuuri, omukuru wa amasambwa goone!” 16Abhandi bhaariga nibheenda okuregeeja Yeesu, bhaariga nimusabhwa abheeresye echibharikisyo chinu echeeresya ati asookere ku‑Nyamuwanga.

17Nawe ˆnaasombookerwa obhwiganirisya bhwebhwe, ˆnaabhabhwira ati, “Obhukama bhwonebhwone, bhukaawukana‑mo bhurisimagira. Nyabhuriko abhaanu bha inda imwi bhakarwana abheene kwa abheene, bhataryungana, mbe abhaanu abho bharisigana. 18Nikwo kutyo jiri ati, araabha Syetaani, keerwana omwene, obhukama bhwaye obhubha bhusokeene. Obhukama bhwaye obhutura kutiki okugenderera okubha‑wo?

“Enaayika kutyo kwa okubha omwayika ati, enisoosya‑ko amasambwa ku‑bhuturo bhwa Bherijebhuuri. 19Mbe! Araabha anye enisoosya‑ko amasambwa ku‑bhuturo bhwa Bherijebhuuri, noorwo abharuubhirisya bheemwe wone,#11:19 Abharuubhirisya bheemwe wone. Obhugajuro obhundi obhutura okubha ati, abheeyigisibhwa bhaani ni Bhayawudi bheejaanyu, abhasoosya‑ko amasambwa ku‑bhuturo bhwa Bherijebhuuri. abhagasoosya‑ko ku‑bhuturo bhwaga? Kurwa ejo, abharuubhirisya bheemwe abheeresya ati, emwe muri na ebhibhiibhi. 20Nawe, araabha anye enisoosya‑ko amasambwa ku‑bhuturo bhwa Nyamuwanga, mbe, mumenye ati, obhukama bhwa Nyamuwanga bhwabhakingiiye.

21“Mutegeresye echijekekanyo chinu! Omuunu owa amanaga unu ari na ebhigwato, akangarira ebhiinu bhya mu‑nju yaaye, ebhiinu bhyaye bhitakukunibhwa‑ko. 22Nawe, omuunu owundi unu ari na amanaga okumukira, akaaja okumurwana, ˆnaamuyiga, ˆnaamuteesya ebhigwato bhyaye bhyone bhinu aariga ˆneeyikanya, neeya ˆnaagega ebhiinu bhyone na okugabhira abhaanu abhandi.

23“Woori, omuunu woonewoone unu atari aamwi na anye, oyo ni musoko waani. Ka wone, omuunu woonewoone unu atakukumanya aamwi na anye, oyo ni munyarambusi wa abhaana bha Nyamuwanga.

Echijekekanyo cha okukengya abhaanu abhabhiibhi bha orwibhuro rwa Yisirayeeri

(Mataayo 12:43‑45)

24“Omwanya gunu risambwa erisooka ku‑muunu, eriyengayenga mw‑ibhara, niriyenja anu oomire ribhone orubhaara rwa okwisya omwoyo. Nawe rikabhurwa, eriyayikira ati, 25‘Siga nisubhe mu‑muunu waani unu ꞉naasookere‑mo.’ 26Rikamukinga‑ko nirisongʼana ati, ari rwa inju inu itari‑mo echiinu, yeereeywe na ichumachumirwe kisi. Niwo, erigenda okureeta amasambwa agandi gataanu na gabhiri ganu gari amajabhi muno okukira eryene. Ago goone, ageengira na okurama mu‑muunu oyo. Ku‑bhuteero, itungwa ya omuunu oyo eyibha mbiibhi muno okukira kutyo yaariga iri ku‑bhwambiro.”

Ribhando rya echimari

27Omwanya gunu Yeesu aariga ˆnaayika ejo, omugasi umwi mu‑chise chirya cha abhaanu, ˆnaamura obhuraka bhwaye ˆnaayika ati, “Ari na ribhando omugasi unu ꞉aakwibhuuye na okukuneenʼya!”

28Nawe Yeesu ˆnaayika ati, “Ni chimari! Tari, bhari na ribhando muno abhaanu bhanu abhoongwa omusango gwa Nyamuwanga na okugugayuka!”

Abhaanu abhasabhwa Yeesu echibharikisyo

(Mataayo 12:38‑42; Maariko 8:12)

29Omwanya ogwo, abhaanu bhaariga nibhagenderera okwikofyanya ku‑Yeesu, ˆnaabhabhwira ati, “Emwe muri yimbo ebhiibhi! Omwenda echibharikisyo, nawe nitaribheeresya echibharikisyo choonechoone. Tari murirora echibharikisyo rwa chirya cha omuragi Yoona era. 30Rwa kutyo, Yoona ꞉aabheeye echibharikisyo ku‑bhaanu bha mu‑musi gwa Ninaawi, nikwo kutyo anye wone Omwana wa Omuunu, niribha echibharikisyo ku‑bhaanu bha riyimbo rinu.

31“Ka wone, ku‑rusuku rwa indamu, omugore wa echaaro cha ebhurimbe ariimereeguru imbere ya Nyamuwanga, na ariramura abhaanu bha orwibhuro runu ati, muri bhakosi bha ebhibhiibhi. Omwene oyo, ꞉aasookere mu‑chaaro cha kura muno, korereki aaje oongwe emisango ja obhwengeeso ku‑mukama Seremaani. Woori enibhabhwira ati, anu ari‑wo omuunu omukuru okukira Seremaani!

32“Ku‑rusuku rurya rwa indamu, abhaanu bha mu‑musi gwa Ninaawi bhariimereeguru imbere ya Nyamuwanga, aamwi na abhaanu bha riyimbo rinu. Abhaninaawi abho, bhariramura abhaanu bha riyimbo rinu ati, ni bhakosi bha ebhibhiibhi. Abheene ꞉bhaataaye ebhibhiibhi bhyebhwe, omwanya gunu ꞉bhoonguuwe Yoona ˆnaaraasyaga omusango okusooka ku‑Nyamuwanga. Woori enibhabhwira ati, anu ari‑wo omuunu omukuru okukira Yoona!

Idara ya omubhiri ni meeso

(Mataayo 5:15, 6:22‑23)

33“Atari‑wo omuunu unu kaakongeesya idara, akamara ˆnaayituura mw‑ifuufu amwi okuyifundikira na ridebhe. Tari kaayituura inguru ku‑mutereko, korereki abhaanu bhakeengira mu‑nju omwo, bharore obhweru.

34“Ameeso gaawo gari rwa idara ku‑mubhiri gwawo. Araabha ameeso gaawo gari kisi, omubhiri gwawo gwone ogubha na obhweru. Nawe, araabha ameeso gaawo garwaye, omubhiri gwawo wone gwijuuye echisuute. 35Kurwa ejo, wangarire obhweru bhunu bhuri mu‑mubhiri gwawo, bhwasiga okubha echisuute. 36Okubha, araabha omubhiri gwawo gwone gwijuuye obhweru, gutari na echisuute wuri, uringʼarabhya rwa idara inu eyikumirikirira na obhweru bhwayo.”

Yeesu kaagonya Abhafarisaayo na abheeyigisya bha ebhiraagiro

(Mataayo 23:1‑36; Maariko 12:38‑40; Ruuka 20:45‑47)

37Yeesu ejire aamara okwayika ejo, Omufarisaayo umwi ˆnaamukuma iika ewaaye okurya ebhiryo. Yeesu ˆneengira mu‑nju, ˆneenyanja ku‑nenda okurya ebhiryo. 38Omufarisaayo oyo, ˆnaaruguura muno ejire aarora Yeesu ˆnaarya ebhiryo ateesaabhire rwa kutyo jaariga jeenderwe mu‑tungwa jeebhwe.

39Nawe, Raatabhugenyi Yeesu ˆnaabhabhwira ati, “Emwe Abhafarisaayo, omwiyesya kwa okwosya omutawo na orutubha anja, nawe mu‑myoyo jeemwe mwijuuywe obhusaakusi na obhujabhi. 40Abhataamutaamu emwe! Omubhumbi wa omubhiri gwa anja, atari niwe omubhumbi wa omwoyo wone? 41Muyaanega abhanare ebhiinu kwa emyoyo jeemwe joone, niwo bhyone ebhibha bhyosiibhwe kwa emwe.

42“Jiribhabhona, emwe Abhafarisaayo! Okubha omusoosisya Nyamuwanga ijaaka ya omutootoji, omuchicha na emikubhi ejindi, keenu nimusiga okukorera abhaanu abhandi emisango ja rirenga na okwenda Nyamuwanga. Ejo jeenderwe mujikore, aamwi na okumusoosisya jijaaka ejo.

43“Nawe jiribhabhona, emwe Abhafarisaayo! Okubha noorwo mu‑nju ja ameekofyanyo geemwe omubhaga nimwenda okwinyanja ku‑bhitebhe bhya imbere na okukeesibhwa kwa echibharo mu‑maguriro. 44Jiribhabhona emwe, kwa okubha muri rwa ebhituuro bhinu bhitakubhonekana wuri, ka abhaanu abhatura‑ko nibhabhitaja okumenya wuri ati ni musiro.”

45Awoawo, owumwi wa abheeyigisya bha ebhiraagiro bhya Muusa ˆnaabhwira Yeesu ati, “Omwiyigisya, ku‑misango jaawo ejo, owuchifuma eswe wone.”

46Yeesu ˆnaamubhwira ati, “Emwe abheeyigisya bha ebhiraagiro, jiribhabhona! Okubha omutwiikya abhaanu emigugu emisito jiinyateetwikibhwa, ka emwe abheene mutakwenda okujikuunʼya‑ko noorwo na echaara. 47Jiribhabhona emwe! Okubha omuumbaka kisi ebhituuro bhya abharagi bha Nyamuwanga ka bhasaaja waanyu nibho ꞉bhaabheetire. 48Kurwa ejo, omweresya ati, omwikirisyanya jinu bhasaaja weemwe ꞉bhaakorere, kwa okubha omuumbaka ebhituuro bhya abharagi abho keenu mugayaga emisango jeebhwe.

49“Nikwo okukora Nyamuwanga ꞉aayikire ku‑bhwengeeso bhwaye ati, ‘Enibhatumira abharagi bha Nyamuwanga na jitumwa. Nawe abhandi bhariitwa, na abhandi bharinyaasibhwa.’ 50Kurwa ejo, abhaanu bha riyimbo rinu, bhariramurwa ku‑songa ya isagama ya abharagi bhoone bhanu ꞉bheetirwe, okusookerera ku‑bhwambiro bhwa echaaro. 51Ejo, jiryambira ku‑sagama ya Abheeri, okukingira ku‑sagama ya Jaakariya,#11:51 Ku‑sagama ya Abheeri, okukingira ku‑sagama ya Jaakariya. Mu‑bhikaame bhya Abhayawudi, unu ꞉aambire okwitwa aariga ˆnaatogwa Abheeri, na owa obhuteero aariga ˆnaatogwa Jaakariya. Ringira Obhwambiro 4:1‑16; 2 Emisango ja Emyanya 24:20‑22. unu ꞉eetiiywe mw‑Iyekaru rya Nyamuwanga, agati ya echigabhiro na mu‑nju ingʼuru ya okuramirisya‑mo. Ni chimari enibhabhwira ati, abhaanu bha riyimbo rinu bhariramurwa ku‑songa ya ebhibhiibhi ebhyo bhyone.

52“Jiribhabhona, emwe abheeyigisya bha ebhiraagiro bhya Muusa! Okubha musibhire orwiguriro rwa okwigurira omuryango gunu abhaanu bhaakaturire‑mo korereki bhasombookerwe Nyamuwanga. Emwe abheene mutakwingira, ka wone omuyingirira abhaanu abhandi bhanu abheenda okwingira.”

53Omwanya gunu Yeesu ꞉aasookere awo, Abhafarisaayo na abheeyigisya bha ebhiraagiro bhya Muusa, nibhaamba okubha abharuru muno ku‑mwene. Bhaariga nibhamubhuusirisya inguru ya emisango myafu, 54korereki bhamugwate okuruubhana na emisango jaaye.

Currently Selected:

Ruuka 11: jit

Highlight

Copy