Ebhikorwa bhya Jitumwa 6

Abhasakisi bha jitumwa abhasorwa

1Mu‑siku ejo, obhukumi bhwa abheeyigisibhwa bha Yeesu bhwariga nibhugenderera okwiyongesya. Agati yeebhwe bhaariga bhari‑mo Abhayawudi bhanu bhaaromaga Echiyunaani, na Abhayawudi bheejaabho bhanu bhaaromaga Echiyebhuraniya.#6:1 Echiyebhuraniya. Mu‑Yerusareemu, bhwariga bhuri‑yo obhusaasikeene bhwa Abhayawudi. Abhandi bhaaromaga Echiyunaani na okuramira emisiro ja Echiyunaani. Abhandi bhaariga nibharoma inyaayika yeebhwe ya Echiyebhuraniya. Bhanu bhaaromaga Echiyunaani bheerurujaga ati, mu‑mirimu ja okugabha ebhiryo bhya bhuri rusuku, abhatumbagasi bheebhwe bhataagabhirwaga ebhiryo kisi na bhanu bhaaromaga Echiyebhuraniya. 2Kurwa ejo, jitumwa ekumi na bhabhiri ꞉bhaakumanyiisye abheeyigisibhwa bhoone, nibhabhabhwira ati, “Jitari ja ekisi eswe chisige okwiyigisya omusango gwa Nyamuwanga ku‑songa ya okugabhira abhaanu ebhiryo. 3Woori, abhayiri bhaasu, mwawure abhaanu bhataanu na bhabhiri bha echirume agati yeemwe, abha jitungwa ja kisi, bhanu bheejuuywe Mwoyo Mweru na obhwengeeso. Abho echija okubhayaana emirimu ejo, 4korereki eswe chibhone omwanya gwa okusabhwa Nyamuwanga na okwiyigisya abhaanu omusango gwaye.”

5Obhuramusi obhwo nibhukondera abheeyigisibhwa abho bhoone. Nibhasora Tefwano, omuunu unu eejuuywe Mwoyo Mweru na owa eriikirisya enene. Nibhasora na Firipo, Porokoro, Nikanoori, Timooni, Paarimeena, na Nikorawo wa Atiyookiya,#6:5 Amasiina ga bhoone abho ni amasiina ga Echiyunaani, kutyo, abho bhaariga bhari bha echise cha Abhayunaani. unu kara awo ꞉aafurukiiye mu‑diini ya Echiyawudi. 6Nibhareeta abhaanu abho imbere ya jitumwa. Jitumwa nibhabhasabhirwa na okubhateera‑ko amabhoko korereki bhaje okukora emirimu.

7Omusango gwa Nyamuwanga nigugenderera okuraasibhwa ku‑bhaanu na obhukumi bhwa abheeyigisibhwa bha Yeesu nibhwiyongesya muno mu‑Yerusareemu. Noorwo abhagabhisi bhaafu ꞉bhaagayukire Nyamuwanga, kwa okumwikirisya Yeesu.

Tefwano kaagwatwa

8Tefwano oyo, Nyamuwanga aariga amuyaaye ribhando enene, na amanaga maafu. Nikwo okukora aakoraga ebhiruguusyo na ebhibharikisyo mu‑bhaanu. 9Nawe abhandi mu‑Bhayawudi ꞉bhaaregeejiisye okubhambasyanya nage. Abho bhaariga bhasookere mu‑nju ya eriikofyanyo rya Abhayawudi rinu ryabhirikirwaga ati, inju ya Abhaanu bha Obhwitaage.#6:9 Inju ya Abhaanu bha Obhwitaage. Abhaanu bhanu, bhaariga bhari bhagaya bhanu bhaariga bhabhwene obhwitaage bhwebhwe. Abhandi bhaariga bhasookere mu‑musi gwa Kureene na mu‑musi gwa Arekijandiriya, abhandi ꞉bhaasookere mu‑mukoowa gwa Kiriikiya na echa Asiya. Abhayawudi abho bhaabhambasyanyaga na Tefwano, 10nawe aabhayigaga kwa okwayika emisango ja obhwengeeso kwa obhuturo bhwa Mwoyo Mweru.

11Niwo nibhakongya abhaanu abhandi kwa imbisike, korereki bhabheeye ati, “Choongwa Tefwano ˆnaayika emisango ja okufuma Muusa na Nyamuwanga.” 12Mu‑kwayika ejo, ꞉bhaakorere abhaanu bhaafu, aamwi na abhakuru bha Abhayawudi na abheeyigisya bha ebhiraagiro bhya Muusa#6:12 Abheeyigisya bha ebhiraagiro bhya Muusa. Ku‑meeresyo amaafu, ringira mu‑Meeresyo inguru ya Emisango Emikomeeye. nibhabhiyirwa. Nibharuubha Tefwano, nibhamugwata, nibhamusira mw‑ibharaja rikuru rya Abhayawudi. 13Nibhareeta abhabhambaasi bha orubheeyi, nibhaayika, inguru ya Tefwano ati, “Siku joone omuunu unu kaayika emisango emibhiibhi inguru ya Riyekaru eryeru rya Nyamuwanga, na inguru ya ebhiraagiro bhya Muusa! 14Okubha chaamuungwa ˆnaayikaga ati, Yeesu Omunajareeti arifumya Riyekaru rinu na ariyindura jitungwa jeeswe jinu Muusa ꞉aachiyaaye.”

15Abhaanu bhoone mw‑ibharaja rikuru awo, nibhamuringiraga Tefwano nekeneke, nibharora obhusu bhwaye nibhususana na obhusu bhwa maraayika.

Currently Selected:

Ebhikorwa bhya Jitumwa 6: jit

Highlight

Copy