Ebhikorwa bhya Jitumwa 5

Orubheeyi rwa Ananiiya na Saafira

1Aariga ari‑wo omuunu umwi, risiina ryaye aatogwaga Ananiiya. Omugasi waaye aatogwaga Saafira. Orusuku rumwi abho wone nibhagusya risambu ryebhwe. 2Ananiiya ˆnaagega‑ko jipirya ejindi okusooka ku‑jinu ꞉bhaabhwene, ˆnaajibhisa, Saafira ˆneekirisyanya nage. Niwo ˆnaagega jinu ꞉jaasigaaye ˆnaayaana jitumwa ja Yeesu, ˆnaayika ati nijo joone.

3Peetero ˆnaamubhuusya ati, “Awe Ananiiya! Ni kurwa ki Syetaani#5:3 Syetaani. Ku‑meeresyo amaafu, ringira mu‑Meeresyo inguru ya Emisango Emikomeeye. eengira mu‑mutima gwawo? Waabhwira Mwoyo Mweru orubheeyi na okubhisa‑ko ejindi jinu ꞉waabhwene ku‑bhugusi bhwa risambu ryawo. 4Omwanya gunu waariga uchaari okurigusya, ryariga riri mwandu gwawo. Noorwo bhunu ꞉waarigusiisye, waariga uri na obhwitaage bhwa okukorera choonechoone jipirya jinu ꞉waabhwene rwa kutyo waariga nuuwenda omwene. Mbe! Ni kurwa ki waaramura okukora omusango ogwa ejaabho gunu? Utaayika orubheeyi kw‑iswe era, tari waayika orubheeyi ku‑Nyamuwanga omwene!”

5Ananiiya ejire oongwa emisango ejo, awoawo ˆnaagwa aasi, ˆnaafwa. Abhaanu bhoone bhanu ꞉bhoonguuwe emisango ejo na okurora echikorwa echo ꞉bhoobhayire muno. 6Niwo abhasigaji nibheemereeguru, nibhaswikira omutumbi gwaye na risanda, nibhaguwurusya anja, nibhagusiika.

7Gwejire gwatura wuti mwanya gwa masaa gasatu kutya, omugasi wa Ananiiya wone ˆneengira mu‑chisago echo, atamenyere emisango jinu jikorekeene. 8Peetero ˆnaamubhuusya ati, “Nuumbwire, jinu nijo jipirya joone jinu ꞉mwabhwene bhunu ꞉mwagusiisye risambu ryemwe?” ˆNaamusubhya ati, “Nikwo kutyo! ꞉Chaagusiisye ku‑bhugusi obhwo!”

9Peetero ˆnaamubhwira ati, “Mbawo awe na omurume waawo mweekirisyanya okuregeeja Mwoyo Mweru wa Raatabhugenyi? Ringira! Abhasigaji bhanu, bhari bhagendere okusiika omurume waawo, bhaasubhire, woori anu bhari mu‑muryango awo, abhaja okwingira bhasire omutumbi gwawo anja woori kutya!”

10Awoawo Saafira wone ˆnaagwa aasi imbere ya amaguru ga Peetero, ˆnaafwa. Niwo abhasigaji nibheengira, nibhasongʼana Saafira wone aafuuwe. Nibhamuwurusya anja, nibhamusiika ayeeyi na omurume waaye. 11Ejo nijikora abheekirisya bhoone, aamwi na abhandi bhoone bhanu ꞉bhoonguuwe emisango ejo, nibhoobhaya muno.

Jitumwa abhakora ebhiruguusyo bhyafu

12Jitumwa ja Yeesu bhaariga nibhakora ebhibharikisyo na ebhiruguusyo bhyafu mu‑bhaanu. Abheekirisya bhoone bha Yeesu bhaariga nibheekofyanya aamwi mu‑rubhuga rwa Riyekaru mw‑Igaragariro rya Seremaani. 13Abhaanu bhanu bhaariga bhachaari okwikirisya Yeesu, nibhoobhaya okubha aamwi nabho. Noorwo kutyo, bhaariga nibhabhayaana echibharo muno. 14Nawe abhaanu abhandi abharume na abhagasi, ꞉bheekirisiisye Raatabhugenyi, kurwa ejo obhukumi bhwa abheekirisya bhweyongesyaga muno.

15Okuruubhana na ebhiruguusyo bhya jitumwa, abhaanu bhaariga nibhasira abharwaye na okubhatuura ku‑mbarimbari ja ku‑njira. Ku‑njira okwo, nikwo bhaabhamaamyaga ku‑mararo na ku‑majambi, korereki omwanya gunu Peetero aakatura, rirengesi ryaye ribhakuunʼye‑ko, bhawore. 16Abhaanu bhaafu bhaajaga okusooka mu‑misi ja ku‑mbarimbari ya Yerusareemu, nibhareetaga abharwaye bheebhwe na bhanu bhaanyaasibhwaga na amasambwa.#5:16 Amasambwa. Ku‑meeresyo amaafu, ringira mu‑Meeresyo inguru ya Emisango Emikomeeye. Bhoone, ꞉bhaawosiibhwe.

Jitumwa abhanyaasibhwa

17Omugabhisi omukuru na abheejaabho bhoone, bhanu bhaariga bhari Bhasadukaayo, ꞉bhaagwatirwe na orwiso muno inguru ya jitumwa. 18Kurwa ejo, nibhagwata jitumwa ejo, nibhabhatuura mw‑ibhoyero. 19Nawe mu‑ngeta irya maraayika#5:19 Maraayika. Ku‑meeresyo amaafu, ringira mu‑Meeresyo inguru ya Emisango Emikomeeye. umwi wa Raatabhugenyi ˆnaaja, ˆneegura jinjigi ja ribhoyero eryo, ˆnaabhawurusya anja. ˆNaamara ˆnaabhabhwira ati, 20“Mugende mwimereeguru mu‑rubhuga rwa Riyekaru, mubhwire abhaanu emisango joone inguru ya obhurame obhuyaaya bhunu!” 21Kutyo, jitumwa ejo nibhamugayuka, nibhamweja muno okuja mu‑rubhuga rwa Riyekaru, nibhaamba okwiyigisya abhaanu omwo.

Omwanya ogwoogwo, omugabhisi omukuru aamwi na abheejaabho bharya, nibhabhirikira abhakuru bhoone bha Abhayawudi, bhabhuganire mw‑ibharaja rikuru ryebhwe. Nibhatuma abhariisi mw‑ibhoyero omwo, korereki bhareete jitumwa jirya. 22Nawe omwanya ogwo abhariisi abho ꞉bheengiiye omwo, nibhasongʼana jitumwa ejo bhatari‑mo. Nibhasubha ku‑bhakuru abho, nibhabhabhwira ati, 23“Omwanya gunu chaakinga mw‑ibhoyero omwo, chaasongʼana jinjigi jigaaywe kisi, abhariisi bheemereeguuyu anja ya emiryango nibhajirindaga. Nawe omwanya gunu cheegura emiryango, chitaasongʼana‑mo omuunu woonewoone mw‑ibhoyero omwo!”

24Omukuru wa abhariisi bha Riyekaru na abhakuru bha abhagabhisi bhejire bhoongwa ejo, nibhataamibhwa okumenya, nibhabhuusyanya ati, “Omusango ogwo guribha kutiki?”

25Awo ˆnaaja omuunu umwi, ˆnaabhabhwira ati, “Muntegeresye! Abhaanu bhanu ꞉mweegariiye mw‑ibhoyero, woori kutya bhari mu‑rubhuga rwa Riyekaru! Abheeyigisya abhaanu omwo.” 26Niwo omukuru wa abhariisi oyo, aamwi na abhariisi bhaaye, nibhagenda ku‑tumwa ejo, nibhabhareeta. Nawe ꞉bhataabhagwatire kwa amanaga, kwa okubha abhariisi ꞉bhoobhayire abhaanu bhaasiga okubhabhuma na amabhuyi.

27Nibhabhareeta mw‑ibharaja rikuru eryo, nibhabhabhwira bheemereeguru imbere yeebhwe. Omugabhisi omukuru ˆnaabhabhwira ati, 28“꞉Chaabhagaanyiisye kwa amanaga ati musige okwiyigisya abhaanu inguru ya risiina rya omuunu oyo! Nawe emwe omugenderera okwiyigisya abhaanu emisango jaaye mbaara joone ja Yerusareemu, ka wone mukarariiye okureeta isagama ya omuunu oyo inguru yeeswe!”

29Peetero na jitumwa jeejaabho nibhabhasubhya ati, “Jiiyire chigayuke Nyamuwanga era, okukira abhaanu! 30Emwe ꞉mweetire Yeesu kwa okumubhamba ku‑musarabha, nawe Nyamuwanga wa bhasaaja weeswe ˆnaamusuurura. 31Neeya, Nyamuwanga ˆneenamusya Yeesu unu, ˆnaamutuura orubhaara rwaye rwa ebhuryo, abhe Omutungi na Omuchungusi, korereki asakire Abhayisirayeeri bhate ebhibhiibhi bhyebhwe, bhafwirwe echigongo. 32Eswe chiri bhabhambaasi bha ejo joone, aamwi na Mwoyo Mweru, unu Nyamuwanga ayaaye bhanu abhamugayuka.”

33Abhakuru abho bhejire bhoongwa ejo, ꞉bhaabhiyiiywe muno, bhaariga nibheenda okwita jitumwa ejo. 34Nawe, mw‑ibharaja rikuru awo, aariga ari‑wo Omufarisaayo#5:34 Omufarisaayo. Ku‑meeresyo amaafu, ringira Abhafarisaayo mu‑Meeresyo inguru ya Emisango Emikomeeye. umwi, risiina ryaye ˆnaatogwa Gamaryeri. Gamaryeri oyo aariga ari mwiyigisya wa ebhiraagiro, na aayaanwaga echibharo na abhaanu bhoone. ꞉Eemereeguuyu, ˆnaaragirira ati, jitumwa bhasirwe anja kwa omwanya mufuyi. 35Ejire eeya, ˆnaabhwira abhakuru abheejaabho ati, “Abhayiri bhaasu Abhayisirayeeri, muchaari okukora omusango ogwo omukena okukora ku‑bhaanu bhanu, okwamba mwiganirisye‑wo kisi! 36Okubha omwichuka jisiku jinu ꞉jaayitingʼeene, ꞉aabhonekeene omuunu umwi, risiina ryaye aatogwaga Tewuda. Tewuda oyo aariga ˆneekora ati ni omuunu mukuru, na abhaanu amagana gana (400) kutya ꞉bhaaruubheene nage. Nawe ku‑bhuteero, ˆneetwa na abharuubhirisya bhaaye bhoone nibhanyarambuka. Jifurubhendo jeebhwe joone nijiwa‑wo. 37Omwanya okutura bhunu abhaanu bhaariga nibhabharwa obhukumi bhwebhwe, ꞉aabhonekeene owundi, oyo aariga ari Mugariraaya, risiina ryaye aatogwaga Yuuda. Yuuda, ꞉aabhwene abharuubhirisya bhaafu, nawe wone ˆneetwa, abharuubhirisya bhaaye nibhanyarambuka.

38“Mbe woori enibhatongera, musige abhaanu bhanu! Mwasiga okubhakorera gwonegwone omubhiibhi, kwa okubha araabha obhutinge bhwebhwe na joone jinu abhakora jisookereeye ku‑bhaanu era, jiriwaa‑wo ejeene. 39Nawe, jikabha jiri emirimu ja Nyamuwanga, mutakutura okubhagaanya, muribhaga nimurwana na Nyamuwanga omwene.”

40Kurwa ejo, ritongera rya Gamaryeri eryo, niriikirisibhwa na abheejaabho abho. Bhejire bhaamara, nibhabhirikira jitumwa mw‑ibharaja eryo, nibhabhabhuma simbo nyafu. Nibheeya nibhabhagaanya ati, bhasige okubhwira abhaanu kw‑isiina rya Yeesu, nibhabhataatira, nibhagenda.

41Niwo jitumwa nibhasooka mw‑ibharaja rikuru rirya bhakondeeywe, kwa okubha ꞉bhaabharire ati bhaariga bheeyire okugaywa inguru ya risiina rya Yeesu. 42Bhuri rusuku ꞉jaagendereeye okuraasya, okwiyigisya mw‑Iyekaru na mu‑nju ja abhaanu. ꞉Bhataasigire okuraasisya abhaanu Emisango ja Ekisi ati Yeesu niwe Kirisito.

Currently Selected:

Ebhikorwa bhya Jitumwa 5: jit

Highlight

Copy