Ebhikorwa bhya Jitumwa 2

Mwoyo Mweru okwika orusuku rwa Pendekoosite

1Orusuku rwa Pendekoosite#2:1 Orusuku rwa Pendekoosite. Ni chikukuru ya Abhayawudi inu yaakorekanaga siku makumi gataanu Okwambuka kwaturire. Eyo yaariga iri chikukuru ya ebhigeswa. Ku‑meeresyo amaafu, ringira mu‑Meeresyo inguru ya Emisango Emikomeeye. rwejire rwakinga, abhaanu bhoone bhanu ꞉bheekirisiisye Yeesu bhaariga bheekofyanyiisye mu‑nju imwi. 2Awoawo, obhuraka rwa obhwa omuyaga mwafu nibhwitabhiirisya, okusooka mu‑rwire nibhwijusya inju yoone. 3Awoawo nibharora ebhiinu bhinu bhyariga bhiri wuti jimbeesi ja omuriro, nibhigabhanyika, nibhiika inguru ya bhuri muunu ku‑bheene. 4Abhaanu abho bhoone nibheejusibhwa na Mwoyo Mweru, nibhaamba okwayika mu‑nyaayika jingenyi, rwa kutyo Mwoyo Mweru aabhatangasyaga okwayika.

5Yerusareemu awo bhaariga bhari‑wo Abhayawudi bhanu bhaaramyaga Nyamuwanga. Abhayawudi abho bhaariga bhasookere mu‑maanga maafu ga echaaro.#2:5 Mu‑maanga maafu ga echaaro. Ku‑mwanya ogwo, Abhayawudi abhaafu bhaariga bhaswirire mu‑bhyaro ebhindi bhyafu. 6Bhejire bhoongwa obhuraka obhwo, echise echinene cha abhaanu nichiikofyanya. Bhuri umwi weebhwe ˆnaatitibhara, kwa okubha ꞉oonguuwe inyaayika yaaye niyayikwa na abheekirisya bha Yeesu abho! 7Nibharuguura na okujujuuma nibhaayikaga ati, “Angu bhanu bhoone abhaayika kutya, bhatari Bhagariraaya? 8Woori! Jaabha kutiki bhuri umwi weeswe koongwa nibhaayika ku‑nyaayika jeeswe ja obhusimukwa? 9Agati yeeswe, bhari‑wo abhaanu okusooka mu‑bhyaro bhya Pariiti, Meedi na Eraamu. Bhari‑wo abhandi okusooka mu‑bhyaro bhya Mesopotaamiya, Yuudeya, Kapadookiya, Pooto, na Asiya, 10Furiigiya, Pamufiriya na Miisiri. Bhari‑wo abhandi okusooka mbaara ja echaaro cha Riibhiya chinu chiri yeeyi na omusi gwa Kureene. Abhandi ni bhagenyi bhanu ꞉bhaasookere mu‑musi gwa Ruumi, Abhayawudi bha obhusimukwa na abhandi bhanu ꞉bheekirisiisye idiini ya Echiyawudi. 11Bhari‑wo abhandi ni Abhakireete na abhandi ni Abhaarabhu. Eswe bhoone, echuungwa nibhakuuya Nyamuwanga ku‑bhikorwa bhyaye ebhinene, mu‑nyaayika jeeswe!” 12Abhaanu bhoone nibharuguura muno nibhataamibhwa okumenya ati niki chinu chaariga nichikorekana, nibhabhuusyanyaga ati, “Jinu jiri na obhugajuro ki?”

13Nawe abhaanu abhandi, bhaariga nibhaseka abhaanu bha Yeesu abho, nibhaayikaga ati, “Bhakorerwe echifuufu!”

Peetero kaaraasisya echise cha abhaanu

14Niwo Peetero ˆneemereeguru, aamwi na jitumwa jeejaabho jirya ekumi na umwi, ˆnaamura obhuraka ˆnaabhwira abhaanu abho ati, “Emwe Abhayawudi bheejaasu, na emwe abhandi bhanu mwikaaye Yerusareemu anu, muntegeresye kisi, korereki nibheeresye emisango jinu! 15Omwitogera ati abhaanu bhanu bhakorerwe, jitari kutyo. Woori anu ichaari saa esatu era katondo! 16Nawe emisango ejo nijo jinu Nyamuwanga ꞉aayikire okutura ku‑muragi waaye Yoweeri, ati,

17‘Mu‑siku ja obhuteero,

niriitururira Mwoyo Mweru waani inguru ya abhaanu bhoone.

Abhaana bheemwe, abhamura na abhayarakaji bharisoosya obhuragi,

abhasigaji bheemwe bharirora ebhiroro

na abhakaruka bheemwe bhariroota ebhirooto.

18Mu‑siku ejo niribheetururira Mwoyo Mweru waani

noorwo inguru ya abhagaya bhaani, abharume na abhagasi,

wone bharisoosya obhuragi.

19Nirikora ebhiruguusyo ku‑rutumba inguru,

na ebhibharikisyo ku‑chaaro emwaro anu.

Bharirora ebhibharikisyo rwa bhinu, isagama, omuriro,

na ingesi sito muno.

20Risuubha ririyinduka okubha echisuute,

na okwesi kuribha kutukurasi wuti isagama.

Ejo joone jirikorekana okwamba,

ruchaari okuuja orusuku orukuru rwa rikusyo rya Raatabhugenyi.

21Bhuri muunu unu kaasabhwa kwa okwiyikanya risiina rya Raatabhugenyi, arichungurwa.’#2:17‑21 Ringira Yoweeri 2:28‑32.”

22Peetero ˆnaagenderera okwayika ati, “Emwe abhaanu bha Yisirayeeri, muntegeresye kisi! Nyamuwanga ꞉eeresiisye abhweru kw‑imwe ati Yeesu Omunajareeti ni wa echimari. ꞉Aakorere kutyo, ku‑njira ya ebhikorwa bhya obhuturo, ebhiruguusyo na ebhibharikisyo bhya mbaga nyafunyafu bhinu Nyamuwanga ꞉aamuyaaye amanaga okukora agati yeemwe. Ejo emwe abheene mujimenyere. 23Ejire eeya Yeesu oyo, ˆnaatuurwa mu‑mabhoko geemwe, rwa kutyo Nyamuwanga ꞉aaramuuye okuruubhana na obhukarariiye bhwaye, okusookerera kara. Emwe nimumwita ku‑musarabha, okutura ku‑bhanyamanga.#2:23 Ku‑bhanyamanga. Jinyabhurira ejindi ejaayika ati, abhaanu bhanu bhatari Bhayawudi. 24Nawe Nyamuwanga ˆnaamusoosya‑ko obhusungu obhururu bhwa orufu, kwa okumusuurura okusooka mu‑bhafuuwe, kwa okubha ꞉itaakaturikeene Yeesu agwatirirwe na amanaga ga orufu! 25Okubha Dawudi ꞉aayikire kutya inguru ya Yeesu,

‘Naarora Raatabhugenyi ari aamwi na anye siku joone,

kwa okubha ari rubhaara rwani rwa ebhuryo,

korereki nisige okusingisibhwa.

26Kurwa ejo, omutima gwani ogukonderwa,

ka wone mu‑kanwa kaani enisandabha.

Noorwo omubhiri gwani,

siku joone guri na obhwiyikanyo,

27kwa okubha utarinsiga nyombe.#2:27 Nyombe. Ku‑meeresyo amaafu, ringira mu‑Meeresyo inguru ya Emisango Emikomeeye.

Ka wone utariikirisya ati, omubhiri gwani gubhorere eyo,

anye Omweru waawo.

28Unyeeresiisye jinjira ja obhuwanga,

urinyiijusya risandabha enene,

kwa okubha uri yeeyi na anye.’#2:25‑28 Ringira Ijabhuri 16:8‑11.”

29Peetero ˆnaagenderera okwayika ati, “Abhayiri bhaasu, enitura okubhabhwira abhwerubhweru ati saaja weeswe Dawudi ꞉aafuuwe, ˆnaasiikwa, iifwa yaaye iri anu noorwo reero. 30Nawe Dawudi aariga ari muragi na ꞉aamenyere ati Nyamuwanga ꞉aamuragire kwa echirayiro ati, ariinamusya omuunu umwi wa mu‑rwibhuro rwaye okubha omutungi wa obhukama bhwaye. 31Okubha Dawudi ꞉aarorere emisango jinu ejija okukorekana, ꞉aayikire inguru ya okusuuruka kwa Kirisito ati, ꞉ataasigirwe nyombe na omubhiri gwaye ꞉gutaabhorere.#2:31 Ringira Ijabhuri 16:10. 32Yeesu oyo, Nyamuwanga ꞉aamusuuruuye okusooka mu‑bhafuuwe, eswe bhoone chiri abhabhambaasi bha omusango ogwo. 33Nyamuwanga ꞉aamwinamusiisye na okumuriinyya ku‑chibharo cha inguru, woori eenyanjire orubhaara rwaye rwa ebhuryo. Ka wone Raata Nyamuwanga ayaaye Yeesu Mwoyo Mweru rwa kutyo ꞉aamuragire. ꞉Aachiitururiiye Mwoyo Mweru, ebhikorwa bhyaye, nibhyo bhinu omurora na okuungwa. 34Okubha Dawudi omwene ꞉ataariinyire na okwingira mu‑rwire, nawe ꞉aayikire ati,

‘Raatabhugenyi Nyamuwanga ꞉aabhwiriiye Raatabhugenyi waani ati,

“Inyanja orubhaara rwani rwa ebhuryo,

35okukingira omwanya gunu enija okutuura abhasoko bhaawo emwaro ya amaguru gaawo.”’#2:34‑35 Ringira Ijabhuri 110:1.”

36Peetero ˆnaamariisya kwa okwayika ati, “Kurwa ejo, Abhayisirayeeri bhoone ni bhusibhusi bhamenye echimari ati, Nyamuwanga akorere Yeesu okubha Raatabhugenyi na Kirisito.#2:36 Kirisito. Ni musango gwa Echiyunaani, obhugajuro bhwagwo ni unu abhambagirwe amafuta. Mu‑Chiyebhuraniya ogutogwa ati, Masiya. Abhayawudi bhaariga nibheeyikanya ati, Nyamuwanga arituma Masiya, oyo niwe unu aribhachungura okusooka mu‑nyaako. Ku‑meeresyo amaafu, ringira mu‑Meeresyo inguru ya Emisango Emikomeeye. Oyo, niwe emwe ꞉mwabhambire ku‑musarabha!”

37Abhaanu abho bhejire bhoongwa emisango ejo, nibharumwa muno mu‑myoyo jeebhwe. Nibhabhuusya Peetero na jitumwa jeejaabho ati, “Abhayiri bhaasu, woori chikore kutiki?”

38Peetero ˆnaabhabhwira ati, “Bhuri umwi weemwe ate ebhibhiibhi bhyaye, na abhatiijibhwe kw‑isiina rya Yeesu Kirisito, korereki afwirwe echigongo ebhibhiibhi bhyaye, emwe omuja okuyaanwa echiyaanwa cha Mwoyo Mweru. 39Omurago gunu Nyamuwanga ꞉aachiragire inguru yeemwe, na abhaana bheemwe, noorwo ku‑bhandi bhoone bhanu bhari kura, bhoone bhanu Raatabhugenyi Nyamuwanga weeswe kaja okubhirikira bhabhe abhaanu bhaaye.”

40Peetero ꞉aagendereeye kwa omwanya mureera okubhwira abhaanu abho emisango myafu ja okubhakengya. ꞉Aabheerembeeresiisye ˆnaayikaga ati, “Muchungurwe na Nyamuwanga, mwasiga okuyaanwa indamu aamwi na abhaanu bha riyimbo rinu, bhanu bhari abhabhiibhi muno!” 41Abhaanu wuti bhiwumbi bhisatu (3,000) nibheekirisya emisango ja Peetero, nibhabhatiijibhwa, nibhoongesibhwa ku‑chise cha abheekirisya abhandi bha Yeesu orusuku orwo.

Obhusangisi bhwa abheekirisya bha Yeesu

42Abheekirisya bhoone nibheekomeesya okwiyigira ameeyigisyo ga jitumwa ja Yeesu, okusangira aamwi, okurya ebhiryo aamwi na okusabhwa Nyamuwanga aamwi. 43Jitumwa ejo bhaariga nibhakora ebhiruguusyo na ebhibharikisyo bhyafu, okukingira abhaanu bhoone nibhayaya. 44Abheekirisya bhoone bhaariga bhari na obhumwi, bhaariga nibhasangira ebhiinu bhyone. 45Bhaariga nibhagusya ebhiinu bhyebhwe na jipirya jinu bhaabhonaga, bhaajigabhanyaga, okuruubhana na obhukene bhwa bhuri muunu. 46Bhuri rusuku, bhaabhuganaga aamwi mu‑rubhuga rwa Riyekaru.#2:46 Riyekaru. Ku‑meeresyo amaafu, ringira mu‑Meeresyo inguru ya Emisango Emikomeeye. Nawe ku‑mwanya gwa okubhega omukaate, bhaabhuganaga mu‑nju jeebhwe na okurya aamwi kw‑ikonderwa na omutima mweru, 47enu nibhakusyaga Nyamuwanga na okwendwa na abhaanu bhoone. Bhuri rusuku Raatabhugenyi aagendereraga okuchungura abhandi, abheekirisya nibhagendereraga okwiyongesya.

Currently Selected:

Ebhikorwa bhya Jitumwa 2: jit

Highlight

Copy