Ap'u 30

A natn a Sikup

1Naran a Retsel ila ti ialev' mardel kinkin asn a Sikup, a Retsel nln ipr tv'aln kavr an a Sikup kavr ti a, “Patu kana mardel kinkin, imahei p'am'a.”

2Laha, a Sikup nln irer an a Retsel kavr ti a, “?Kv'ah ti kana nua m'lnen Atua, la itukarh a ti mkalev' sei ha?”

3Laha, ivr ti a, “Vitar na m'akarienak, iv'i a Pilha, hilaha. Pav'a kam'atr m'ei, a ti hin ipaua m'lnak kalev' a natn apavv'i nkak.” 4Laha, ilev' a Pilha, iv'i vitar na m'akarienan katau ani ipav'i tav'etan. Sarei, a Sikup im'atr m'ei. 5Dav'a, a Pilha itkar kalev' dui pa asn a Sikup. 6Sarei, a Retsel ivr ti a, “Atua ien sei iviviln m'a kana, karn drlk katu dui pa a kana.” Sena si lera itu nahan iv'i a Tan. 7Itauatah a Pilha, iv'i vitar na m'akarienan a Retsel, itkar ml kalev' dui ml iamk asn a Sikup. 8Sarei, a Retsel ivr ti a, “Nrv'lv'al istudau m'a tv'alk, v'eti kana nsiv'i.” Laha, itu nahan iv'i a Navtali.

9Naran a Lia ila ti ialev' sei ml, ilev' a Silpa, iv'i vitar na m'akarienan, katau an a Sikup a ti ipav'i tav'etan. 10Laha, a Silpa, iv'i vitar na m'akarienan a Lia, ilev' dui pa asn a Sikup. 11Sarei, a Lia ivr ti a, “Si p'as ima.” Laha, itu nahan iv'i a Kat. 12Sarei, a Silpa, iv'i vitar na m'akarienan a Lia, ilev' dui uraur ml asn a Sikup. 13Sarei, a Lia ivr ti a, “Nrn ip'as sena ti artav'et apavvr ti kana nrn ip'as.” Laha, itu nahan iv'i Aser.

14Dav'a, naran avtupien uit, a Rup'en iv'a kapasla nava nai na tkarien al pitvet kauirv'a asn a Lia, iv'i a unian. Sarei, a Retsel ivr an a Lia, “Patu kana nava nai na tkarien kinkin, la iv'i nkan au pam ha.”

15V'eti a Lia ivr ani, kavr ti a, “?Kv'ah ti iv'i si kaka uaki hin kualei a nauk a? ?V'eti hilaha krn ti pauala nava nai na tkarienan a natk laha ml a?” Laha, a Retsel ivr ti a, “Sena si lera ipam'atr m'ah lihat dika, sena nava nai na tkarienan a natm.”

16Sarei, a Sikup ima dan al pitvet knarev', a Lia ispsap alan kavr ti a, “Nvrdaui, mkm'atr m'a kana pr, sena ti ntul sarah a nava nai na tkarienan a natk.” Sarei, im'atr m'ei arna lihat lera.

17Laha, Atua iv'rn an a Lia, dav'a ti itkar kalev' dui iamk asn a Sikup, iv'i nilm'an. 18Laha, a Lia ivr ti a, “Atua itu ulienak a kana, sena ti nttu sera vitar na m'akarienak an a nauk.” Laha, itu nahan ani iv'i a Isakar. 19Sarei, a Lia itkar ml kalev' dui ml iamk asn a Sikup, iv'i lm'sei nen. 20Laha, a Lia ivr ti a, “Atua iani ti siak istudau, hilaha a nauk ipalak asnk, sena ti ntlev' sera dui itlm'sei asnn.” Laha, itu nahan ani iv'i a Sepulun. 21Itauatah ilev' tav'et iamk katu nahan ani, iv'i a Taina.

22Sarei, Atua iv'ahur a Retsel. Atua iv'rn ani kani ti itkar. 23Itkar sarei kalev' dui pa kavr ti a, “Atua itlev'la sera mamihienak.” 24Laha, itu nahan ani, iv'i a Susev', kavr ti a, “A Mlin Eia ipatu kana dui pa ml aranan.”

A Lapan m'ei a Sikup avhp'hap'il m'a hir

25Dav'a, naran a Retsel itlev' sarei a Susev', a Sikup ivr an a Lapan kavr ti a, “Patep'a kana ti p'ahau p'av'a kadav'a a utak m'a v'anuak. 26Patu kana artav'etak m'er a natk, la nten sera pariam sanar ha, kam'ahu a ti p'ahau, sena ti ktrndu sera parei nani asnm.”

27Laha, a Lapan ivr ani, kavr ti a, “Ipavr ti krn ip'as a ti pamhmah a kana, palak uaki, sena ti ntla sera ti a Mlin Eia itmhmah sarei a kana sanam.” 28Sarei, ivr ti a, “Pav'iv'en ulienam, laha p'etau anh.”

29Laha, a Sikup ivr ani, kavr ti a, “Nakm krndu nut nten sera parei asnm inap'ei, kap'aur plukam avlak asnk. 30Naran kana ndahma, plukam avdakr uaki, v'eti hilaha avrama kavnelnal. Naran nma itauamu ier hilaha, a Mlin Eia imhmah anh. ?V'eti hilaha ipanap'i? ?P'ep'aur nl nam'elak v'aran?”

31Laha, ivr ti a, “?P'etu v'ata anh?” Laha, a Sikup ivr ti a, “Mkatu kana si kinkin, v'eti ipavr ti pan si la nvr anh ha, p'emsnen si slmam udlani kap'aurr ml. 32Dika p'av'a kap'ep'a si slmam udlani kalev'la sivsiv udlani avv'i drentalei, mak nen isusupa, m'er nki mak nen ilil, m'er net sivsiv udlani la avram't ha, kalev'la nani udlani avv'i drentalei, mak nen ilil, m'er nki mak nen isusupa. Nki lera apavv'i ulienak. 33Inap'i lera, naran ti nakm pav'ahur ulienak lera, si viviln nten sarei ipavrp'ep'a ti nahap'il. Ipavr ti papasla nani kinkin ahavv'i drentalei, nki mak nen isusupa, m'er nki mak nen ilil, v'aha net sivsiv la ahavram't ha, pavr ti nv'nahi.”

34A Lapan ivr ti a, “Aau, ip'as, nrn ti ipanep'a nut kvri inap'ei.” 35Arna napn lera, ilev'la pua na nani avv'i drentalei, mak nen ip'arei kasapar, m'er nki mak nen ilil. Kalev'la prapar na nani udlani avv'i drentalei, mak nen isusupa, m'er nki mak nen ilil, m'er nki p'akr itva arna nut kinkin. Kalev'la sivsiv udlani avram't kataur al lm'ar a natn. 36Kadav'a kav'el napn itl iv'iv'a au asn a Sikup. Laha, a Sikup imsnen duana si slman a Lapan.

37Laha, a Sikup ilev' rana v'iv'ei kinkin, rana m'adak m'a rana mamariuk, kasesrlulua nila p'ak tv'eliel nen dav'a ti apala si tva iter al rana nai nen. 38Katu rana nai la itsesluluei hara al tav na nauei, iv'i nut si slm udlani avm'n nauei nakl, sena ti pua nar ihap'ra prapar atlera nakl. 39Laha, pua nar avhap'ra prapar naran avp'a rana nai lahara, dav'a ti prapar avtkar kavtu natr avv'i drentalei, mak nen ip'arei kasapar, m'er nki mak nen isusupa, m'er nki mak nen ilil. 40Sarei, a Sikup ilev'lar a natr, kani ti si slm udlani apavp'a nki avv'i drentalei m'er nki avram't arna si slman a Lapan, v'eti itupr nkan avp'lt a nut iamk. Iatup'ltanr m'er si slman a Lapan.

41Dav'a, naran terhua na si slm avrama asn nut na nauei hara, a Sikup itu rana nai lahara ml, a ti si slm apavp'ei al nut avm'n nauei nakl a ti pua nar apavhap'ra prapar asn rana nai lera. 42V'eti naran si slm nen ahavhua, iatu rana nai, dav'a ti si slm nki ahavhua avv'i nkan a Lapan, v'eti nki avhua avv'i nkan a Sikup. 43Dav'a dui lera sian ima kastudau, si slman avstudau, vitar m'a dui na m'akarienan avstudau, m'er kam'elan avstudau, tukian avstudau.

Currently Selected:

Ap'u 30: nmb

Highlight

Copy