Ap'u 29

A Sikup im'akar a ti ipalev' a Retsel m'ei a Lia

1Sarei, a Sikup isapa navanelan kadav'a asn v'anuar ardu avlak arna Is. 2Dav'a, parn, iklau kala tah na nauei iter arna m'lden. Laha, parn, ila sivsiv kinkin avp'lt arna nut itl kavm'atrtalu a tah na nauei lahara. Sena ti arna tah na nauei lera m'ertu avev' nauei kavtau anr sivsivar nakl. Nav'et lil iamk iter arna pn tah na nauei lahara. 3Nakl, naran sivsiv udlani avp'lt atlera, avtp'la nav'et lil la iter arna tah na nauei hara, kavev' nauei kavtau a sivsiv udlani. Sarei, kavtum'alet a nav'et lahara ml arna m'lnen arna pn tah na nauei.

4Laha, a Sikup ivr anr kavr ti a, “?Tv'alk, kam'i kvandan ip'i?” Hir avvr ti a, “Kam'em' nvandan a Haran.”

5Ivr anr ml kavr ti a, “?Kam'i kvrndau a Lapan, a natn a Nahur?” Hir avvr ti a, “Aau, kam'em' nvrndaui.”

6Ivr anr ml, kavr ti a, “?Hin ilak ip'as?” Hir avvr ti a, “Aau, ilak p'as. Palei, a Retsel, a natn tav'et, ima kav'ev'a sivsiv.”

7Ivri ml kavr ti a, “Pavlei, nut idahm't. Idav'i naran na ti apavtup'lten si slm. Pavev' nauei kavtau a sivsiv kavv'av'ar a ti apavud nina.”

8V'eti avvr ti a, “Kam'em' nkdavani iknap'i lera ipaier naran sivsiv udlani apavp'lt sera lei a nut ipamk, sarei apatp'la nav'et laha iter arna pn tah na nauei ra, sarei kavev' nauei kavtau a sivsiv.”

9Naran idv'ana uam m'er, a Retsel ima m'er sivsivan a tetian, sena ti iv'i tav'et ip'aur sivsiv nakl. 10Laha, naran a Sikup ilei a Retsel, iv'i a natn a Lapan, iv'i a p'nian, m'er sivsivan a Lapan, iv'i a p'nian hara, a Sikup iv'a katp'la nav'et la itukar pn tah na nauei hara, kav' nauei katau a sivsivan a Lapan, iv'i a p'nian. 11Laha, a Sikup ism a Retsel kavalau eia. 12Sarei, a Sikup ivr an a Retsel kavr ti ilak arna nl nam'elan a tetian kav'i a natn a Ripeka. Sarei, hin ivrvr kavr an a tetian.

13Laha, naran a Lapan irn v'nenan a Sikup, a natn a v'nn, hin ivrvr kadav'a asnn, karav'dei kasmi, kav'av'ei iv'a al nmahan. Laha, a Sikup ivr si udlani lera ani. 14Sarei, a Lapan ivr ani, kavr ti a, “Nvrdaui, kv'i suk kav'i p'akk.” Laha, ilak m'ei dav'a nal iamk.

A Sikup ilev' a Lia m'ei a Retsel, arv'i a naun

15Sarei, a Lapan ivr an a Sikup kavr ti a, “Nrv'i tiamk, v'eti iaviviln a ti pam'akar vn uaki asnk. Nakm pavr uliena pariam.” 16A Lapan a natn tav'et arru, naha titiamu iv'i a Lia, naha titiatah iv'i a Retsel. 17A Lia m'aten istu, v'eti a Retsel ip'eset arna p'akn m'a nahn ip'eset.

18Laha, a Sikup ilap'as an a Retsel, hin kavr ti a, “P'em'akaram pai ipasaru sanan a Retsel, iv'i a natm titiatah.”

19A Lapan ivrprani, kavr ti a, “Ip'as mau a ti p'etau anh ipasiv' ti p'etau a dui uraur. Nakm palak asnk.” 20Laha, a Sikup im'akaran pai isaru sanan a Retsel, kav'ah ti ip'hp'h kanep'a sera napn kinkin uaki, sena ti ilap'as ani istudau.

21Sarei, a Sikup ivr an a Lapan, kavr ti a, “Patu kana tav'etak a ti p'euei, sena ti napn na pariak ithiris.” 22Laha, a Lapan iv'ara ardu udlani avlak atlera kavan tim'ah. 23Dav'a, arna lihat lera, ilev' a Lia, iv'i a natn, katau an a Sikup, laha hin im'atr m'ei. 24A Lapan ilev' a Silpa ml, iv'i vitar na m'akarienan, katau an a natn, iv'i a Lia, a ti ipav'i vitar na m'akarienan. 25Dav'a, arna m'etav'aran, parn, a Sikup ila ti iv'i a Lia. Laha, ivr an a Lapan kavr ti a, “?V'ata la hin nakm kan a kana ha? Kana nm'akaram sanan a Retsel. ?Inap'i hin ksner kana?”

26Laha, a Lapan ivrprani, kavr ti a, “Akavani iknap'i lera arna utam'em', akatlen titiatah ipatauamu a titiamu. 27Pahiris a tim'ah sanan a Lia arna uik laha, sarei, p'etu tv'aln, iv'i a Retsel, anh. Laha, pam'akarak pai ipasaru ml.”

28Sarei, a Sikup iani inap'i lera, kahiris a tim'ah sanan a Lia. Laha, itau a natn ani, iv'i a Retsel, a ti ipav'i a naun. 29Laha, a Lapan itu vitar na m'akarienan, iv'i a Pilha, an a Retsel, iv'i a natn, a ti ipav'i vitar na m'akarienan. 30Sarei, a Sikup im'atr m'ei a Retsel ml, hin kalap'as an a Retsel kasiv' a Lia. Hin kam'akaran a Lapan pai isaru ml.

Armardelan a Sikup m'ei a Lia

31Naran a Mlin Eia ila ti a Sikup ilap'as an a Retsel isiv' a Lia, iani ti itkar, v'eti a Retsel iv'i pt m't uaki. 32Laha, a Lia itkar kalev' a natn katu nahan iv'i a Rup'en sena ti ivr ti a, “Nvrdaui, a Mlin Eia iledu derak. Sena ti hilaha a nauk ipalap'as a kana.” 33Hin katkar ml kalev' dui iamk ml, kavr ti a, “A Mlin Eia irndu ti a nauk ialap'as a kana, hin itu kana a natk laha ml. Laha, itu nahan iv'i a Simiun.” 34Dav'a itkar ml kalev' dui iamk ml, kavr ti a, “Hilaha a nauk ipap'lt mamh m'a kana, sena ti kana nlev' a natn artl.” Sena si lera itu nahan iv'i a Livai. 35Sarei, itkar ml kalev' a natn dui kavr ti a, “Hilaha p'epatei a Mlin Eia.” Sena si lera itu nahan iv'i a Suta. Sarei, ialev' sei ml.

Currently Selected:

Ap'u 29: nmb

Highlight

Copy