Ap'u 28

1Sarei, Aisak iv'ara an a Sikup kamhmah ani, katu v'nen ani, kavr ani, kavr ti a, “Nakm mkaua tav'et iv'i net m'ertu a Kenan. 2Pap'tir kadav'a a Patan Aram, asn nmahan a Petuel, iv'i a tetian a uniam, kaua tav'et ipamk atlera ipav'i nkam, asnr a natn a Lapan, iv'i a m'ann a uniam. 3Nrn ti Atua Na Nut Hua Udlani ipamhmah anh, kani ti a natm apavstudau kavnelnal, kani ti pav'i a tetiar pt v'anu kinkin. 4#Ap'u 17:4-8.Katu si p'sp'asan a Epraham anh, ipav'i nkam'i m'er a natm m'ah. A ti paua nadep' la kv'i v'anudl a nln ha, iv'i nki Atua itau an a Epraham.”

5Laha, Aisak itap'ei a Sikup iv'el. Iv'el dav'a kaier a Patan Aram, asn a Lapan, iv'i a natn a Petuel, iv'i dui a Siria, kav'i a m'ann a Ripeka, iv'i a unian a Sikup m'ei a Isau.

6A Isau ila ti Aisak imhmah an a Sikup katap'ei iv'el dav'a asn nut a Patan Aram, a ti ipaua tav'etan atlera. Kala ti, naran imhmah ani, itu v'nen ani, kavr ti a, “Nakm maua tav'et iv'i net m'ertu a Kenan.” 7Kala ti a Sikup isapa v'nenar a tetian m'ei a unian kadav'a a Patan Aram. 8Laha, a Isau ila ti Aisak, iv'i a tetian, ialap'as a tav'et a Kenan. 9Sena si lera a Isau iv'a asn a Ismail kalev' tav'et ml iamk aranan a tav'et itul sarar, iv'i a Mahalat, a natn a Ismail la iv'i a natn a Epraham ra, kav'i a v'nn a Nepasut, a ti ipav'i a naun.

Atua imima asn a Sikup arna nut a Petel

10Laha, a Sikup iruh a nut a Persipa kav'el kadav'a asn nut a Haran. 11Kaier nut iamk kavr ti ipalak atlera lihat lera, sena ti neiel itpl, kalev' nav'et ki iamk atlera kululn ani, kam'atr arna nut nen. 12#Sun 1:51.Sarei, im'atr kala sihu na nai ip'tir arna nadep', ualn ier p'knaran. Laha, parn, enselan Atua avrav'a eia kavrama a nadep' aranan.

13 # Ap'u 13:14,15. Laha, parn, a Mlin Eia ip'tir eia aranan kavr ti a, “Kana nv'i a Mlin Eia, kav'i Atuan a Epraham, iv'i a tetiam, kav'i Atuan Aisak. Nadep' la km'atr aranan ha, p'etau anh m'er a natm udlani. 14#Ap'u 12:3; 22:18.A natm apavnelnal kavnep'a neiev' na nadep'. Kam'i pavrav'a kavunanut arna Ues, arna Is, arna Nut, m'ei arna Saut. Laha, p'emhmah a pt v'anu udlani arna nadep' aranam, m'er aranan a natm. 15Parn, Kana p'elak m'ah, kap'aurh arna nut udlani pav'a, kauirmam'alet anh ml arna nadep' laha. Sena ti Kana nkalnh ipaier naran na ti p'en sei ntvr sarei anh.”

16Sarei, a Sikup ithal arna m'etrienan kavr ti a, “Nvrdaui, a Mlin Eia ilak arna nut laha, v'eti kana narndaui.” 17Laha, idedrn kavr ti a, “U, nut laha iv'i nutet, m'ertu ipadedrnet. Nut laha iv'i nmahan Atua uaki, iav'i si uraur, kav'i pn liu na v'anu p'as.”

18Sarei, a Sikup ithal m'etav'aran nrnren, kalev' nav'et la iululn ani hara, kani ip'tir inep'a nakal, katp'sran ueil arna nut eia nen. 19Katu naha nut lera iv'i a Petel. V'eti itauamu naha v'anu lil nen iv'i a Lus. 20Laha, a Sikup iah lm'an katuran an a Mlin Eia kavr ti a, “Ipavr ti Atua ipalak m'a kana kap'aur kana arna navanel la nsapei ha, katu kana tim'ah p'ehani m'a klus p'euei, 21a ti p'em'alet ml asn nmahan a tetiak arna tamat, a Mlin Eia ipav'i Atuak. 22Laha, nav'et la kana nani ip'tir kav'i nakal ra, ipav'i nmahan Atua. Nvrdaui, arna si udlani patu kana, p'etu nki iamk arna nki inal anh ml.”

Currently Selected:

Ap'u 28: nmb

Highlight

Copy