Parei 2

M'im'iln P'as ima

1 # Livai 23:15-21; TVH 16:9-11. Naran napn na tim'ah nahan iv'i Pedikus ima, hir udlani avlak arna nut iamk, v'ahienar iamk. 2Ilahml sarei, nadl iamk iaan eia inep'a sera nalen irn ti iparp, kalinkar udlen nmah avlak a nln. 3Laha, avla si kinkin inep'a nap' iluluv'en kadater arna ptr udlani p'sev'. 4Laha, hir udlani avlini a M'im'iln P'as kavv'anadinei arna v'nen uraur, inep'a nut M'im'iln P'as itau anr a ti apavvrp'ep'ei ipanap'ei.

Avv'ana arna v'nen uraur

5Laha, m'ertu a Isrel kinkin avlak a Serusalem avv'i m'ertu avpatei Atua nakl, kavandan arna v'anu udlani arna nadep'. 6Laha, naran avrn v'nen ururaur lera, nelnal avstudau avrama kavp'lt, kavtah ani istudau, sena ti hir udlani p'sev' avrn ti avv'ana arna v'nenar. 7Hir udlani avrdus nlr kavvrdedrn kavvrvr a hir kavvr ti a, “Pavlei, m'ertu udlani lera avv'ana avv'i m'ertu a Kalili uaki. 8?Inap'i hin nvrn ti avv'ana arna v'nenad udlani p'sev' nviak m'ei? 9Nvv'i m'ertu a Patia, a Mitia, m'ei a Ilam. Nakd kinkin nvlak arna nut a Mesuputemia, a Sutia, a Kapatusia, a Puntus, m'ei a Esia. 10Nvlak a Vritsia, a Pamvilia, a Itsip m'a pna nut a Lipia iter mima asn nut a Sairini, kavv'i v'anudl a Rum. Nakd kinkin nvv'i m'ertu a Isrel, nakd kinkin nvv'i v'anudl kavrama kavv'ah Atua. 11Nakd kinkin nvv'i m'ertu a Krit m'ei Arepia. Nakd udlani nvrn ti avv'ana arna v'nenad kavvrur pari lililan Atua.” 12Laha, hir udlani avtah ani kavrdus nlr, kavvrvr a hir kavvr ti a, “?Si lera itu hin inap'i?”

13V'eti m'ertu kinkin uraur avsip'lanr kavvr ti a, “Avm'n parndau a naui m'iel m'dah.”

A P'ita ivrp'ep'a v'nen p'as

14V'eti a P'ita ip'tir m'er apusel arnal lman iamk (11) kav'ara eia kavrp'ep'ei anr kavr ti a, “Ardu a Sutia, m'er kam'i udlani kvlak a Serusalem, nrn ti p'evrp'ep'a si laha a kam'i. Kam'i udlani pavv'rn a v'nenak. 15M'ertu lera ahavm'nm'n inep'a nut kvv'ahi inap'ei, sena ti hilaha iv'i m'etaneiel isav'et (9) uaki m'etav'aran. 16V'eti si laha iv'i sei pruvet, iv'i a Suil, itvr sarei, kavr ti a, 17#Suil 2:28-32.‘Atua ivr ti a, Naran ipihih ti nadep' ipahiris, Kana p'hsran M'im'ilk ipama aranar m'ertu udlani, laha a netm'i dui m'a tav'et apavvrp'ep'a v'nenan Atua. Malakal asnm'i apavla sei, m'er m'ertarep' asnm'i apavm'atr kavla sei. 18Aau, arna naran lera p'hsran M'im'ilk ipama aranar dui m'a tav'et na m'akarienak, laha hir apavvrp'ep'a v'nenak. 19Kana p'en pari lilil apatah ani arna p'knaran eia, kan pari lilil arna nadep'. P'en nadei m'a nep'v'en m'a ienap'. 20Neiel ipama kadam't, nal ipama kav'i nadei. Sarei, nelnal apavla napn lilan a Mlinad. 21Laha, arna naran lera, a Mlin Lilad ipalev'la m'ertu udlani apavv'ara a nahan.’

22M'ertu a Isrel udlani, pavv'rn a v'nen laha. Atua ittep'a sarei a Iesu, iv'i Dui a Nasaret, kav'iv'en a kam'i arna nut huan, m'a sei m'ertu apavtah ani, m'a pari lilil iv'iv'en sei la iani arna p't nut nam'i ha, a ti kam'i pavrndu ti Atua itap'ei. Kam'i ktvrndu sera si lera. 23#Mat 27:35; Mak 15:24; Luk 23:33; Sun 19:18.Atua ittu sarei katrndu sarei tituei a ti apatau a Iesu arna lm'am'i. Kam'i kvlav'i kavtaui al lm'ar m'ertu stu kavtaui arna su lamu kavrpep'ni. 24#Mat 28:5,6; Mak 16:6; Luk 24:5.Hin Atua iani ti ithal ml arna m'ien kulullei arna nut hua m'ien, sena ti m'ien iahua a ti ipahudei ml. 25#Npin 16:8-11.Sena ti a Divt ivruri kavr ti a, ‘Kana nlei a Mlinak arna nahk iel. Sena ti Hin ilak arna m'ldauk, kana nkavrdedrn ml. 26Sena si lera, kana nrn ip'as iel arna nlk, nm'k ilini a v'nen p'as. P'akk iparnrn hin katrah turanienan. 27Sena ti Nakm mkaln m'im'ilk ipalak al m'lnar m'ertu avram'a, mkam'ahu a ti p'ak M'ertu P'asam ipapu. 28Nakm kani ti nrndu navanel na silv'ien. Nakm pani ti p'ern ipap'as ipastudau, sena ti p'elak arna nahm.’

29Tv'alk udlani, kana nrn p'evr a kam'i arna nut m'auar, kavrur a tetiad iv'i a Divt. Hin im'a atini. Nut atini iter asnd dika. 30#Npin 132:11; 2 Sam 7:12,13.Hin iv'i pruvet, karndu sei Atua itturan sarei ani ihua. Atua iah lm'an arna nahn, a ti ipani a Kristu ipav'i a Natn dau kalak arna napl p'asan. 31A Div't itla sarei ti a Kristu ipathal arna m'ien, kavr ti m'im'iln ikalak al m'lnar m'ertu avram'a, p'akn ikahpu. 32A Iesu lera, Atua iani ti ithal ml arna m'ien. Kam'em' udlani nvlei kavvrp'ep'ei. 33Atua ilav'i iv'a eia arna m'ldaun, katu M'im'iln P'as ani, inep'a nut a Tetian itturan sarei ani inap'ei, laha, ihsran si la kam'i kvlei kavrni ha. 34#Npin 110:1.Sena ti a Div't hin iahv'a eia, v'eti ivr ti a, ‘A Mlin Eia ivr an a Mlin Lilak kavr ti a, “Palak arna m'ldauk. 35Dav'a ipaier naran p'etu m'ertu avlep'lah apavnep'a napl ktu tlm aranan.” ’

36Sena si lera, nrn ti m'ertu udlani avlak arna nl nam'el a Isrel apavrndu mamh ti Atua itaui ti a Iesu, la kam'i kvluei arna su lamu ra, iv'i a Mlin Lil kav'i a Kristu.”

37Laha, naran hir avrn v'nen lera, avrn ti ishs nlr ihuadau, kavvr an a P'ita m'er duanar apusel kavvr ti a, “?Tv'elm'em', p'van v'ata hilaha?”

38A P'ita ivr anr kavr ti a, “Kam'i udlani pavvav nlm'i kavpaptais arna nahan a Iesu Kristu, a ti Atua ipalev'la si stuam'i, sarei, ipatuvn a M'im'iln P'as a kam'i. 39Sena ti turanienan Atua iv'i nkam'i m'er a netm'i kav'i nkar nelnal avlak v'iv'a, hir udlani la a Mlin Eia iv'i Atuad ipav'ara anr ha.”

40Laha, ivr v'nen istudau ml aranan, kav'iv'en sei anr istudau, kav'ana m'er dav'a, kavr ti a, “Pavlev'la kam'i asnr m'ertu stu udlani avsilv' hilaha.” 41Sarei, hir udlani la avrn ip'as a v'nenan ha, avpaptais, laha, arna napn nen lera, Atua itup'lten m'ertu ihih tausen itl (3,000) anr.

P'klr m'ertu avv'ah a Iesu

42Iel avsapa mamh v'nenar apusel, kavlakp'lt nakl kavkaus p'ret kavtu tamat. 43Laha, nelnal udlani avrama kavdedrn. Laha, Atua ien pari lilil m'ertu avtah ani inelnal, m'a pari lil iv'iv'en sei, arna lm'ar apusel. 44#Parei 4:32-35.Hir udlani avv'ah a Iesu avlakp'lt a nut iamk, tv'aln itutu sei a tv'aln nakl. 45Kavulul a nadep'ar m'a siar kavtutu nav'et nen anr m'ertu udlani siar ialil.

46Laha, hir avlakp'lt al nmah tamat arna napn udlani kavp'lt arna v'ahienar, kavkaus p'ret kavhatat al nmahar udlani kavrn ip'as istudau, v'ahienar iamk uaki. 47Iel avpatei Atua. Nelnal udlani avrn ip'as anr. Laha, arna napn udlani a Mlin Lilad ilev'la m'ertu uraur arna si stuar kani ti avp'lt m'a sas.

Currently Selected:

Parei 2: nmb

Highlight

Copy