Parei 17

A Pul m'ei a Sailas arvrp'ep'a v'nen p'as arna nut a Tesalunaika

1Naran atrtpeia sarei arna nut Amvipulis m'ei Apulunia, arma karier a Tesalunaika. Nmah tamatar ardu a Isrel iter atlera. 2A Pul iv'a al nmah tamat lera, inep'a ti iani nakl, arna Sapat itl, kav'ana m'er kavrur Paivul. 3Kavrp'ep'ei kav'iv'en mamahi anr a ti a Iesu ikrn istu pr kadam'a kathal ml arna m'ienen. Ivr ti a, “A Iesu lera nvrp'ep'ei a kam'i ha, iv'i a Kristu.” 4Hir kinkin avv'ah a Iesu kavrama kavp'lt m'er a Pul m'ei a Sailas, du a Kris avpatei Atua nakl avnelnal, m'er tav'et lilil avnelnal.

Ardu Isrel kinkin avp'lt m'er dui stu kavan der asn nmahan a Sesun

5V'eti ardu a Isrel ahavv'ahi, nlr iprr kavtala anr dui stu kinkin avka der nakl, kavtupien m'ertu inelnal kavan v'lv'elien lil arna v'anu lera kavvrvr asn nmahan a Sesun kavrn ti apavani ti aparma av'aran asnr nelnal. 6V'eti ahavpaslar, laha, avrv'titah a Sesun m'er tv'ald kinkin kavuirv'a asn kavman arna v'anu kavv'ara eia kavvr ti a, “Ardu la arru ra, aruha v'ahiena m'ertu arna nadep' udlani, hilaha atrma etka.” 7Hin a Sesun ilav'r arv'a al nmahan. Hir udlani avluvn a v'nen huan a mlin lil a Rum, kavvr ti mlin lil uraur iak, nahan iv'i a Iesu. 8Naran nelnal udlani m'er kavman arna v'anu avrn v'nen lera, iani ti avv'lv'al istudau. 9Laha, kavman iani ti a Sesun m'er tv'ald uraur avp'kp'ak, iv'i turanien a ti apavlak ms. Sarei, avtap'er arhau.

Arvrp'ep'a v'nen p'as arna nut a Peria

10Ilahml sarei, naran nut ilihat, tv'ald avtap'er a Pul m'ei a Sailas aparv'a arna nut a Peria. Naran arier nut lera, arv'a al nmah tamatar ardu a Isrel. 11Hir ptr iahua kanap'ar ardu a Tesalunaika, sena ti hir avrn nam'er a ti apavlev' v'nen p'as, kavtala a v'nen arna Paivul arna napn udlani a ti apavla ti v'nenar iviviln v'aha ihei. 12Sena si lera, m'ertu avnelnal asnr avv'ah a Iesu. Tav'et lilil a Kris m'er ardu a Kris avnelnal ml avv'ahi. 13V'eti naran ardu a Isrel arna nut a Tesalunaika avrn ti a Pul ivrp'ep'a v'nenan Atua arna nut a Peria, hir avrav'a atlera ml, kavani ti nelnal avmlanr istudau. 14Ilahml sarei, tv'ald avtap'ei a Pul iv'a auei a p'ak nata, v'eti a Sailas m'ei a Timuti arlak uam a Peria. 15M'ertu la avsapei a Pul arna navanel ha avv'av'ei iv'a arna nut Atens. A Pul itu v'nen anr a ti apavvr an a Sailas m'ei a Timuti kavvr ti hir arru aparlahml karma karp'lt m'ei ml, sarei avrahum'alet ml.

A Pul iv'iv'en v'nen p'as arna nut Atens

16Naran a Pul ilaksrahr Atens, hin nln idv ihuadau, sena ti ila ti v'anu lera ilini a aitul. 17Sena si lera, a Pul iv'ana istudau al nmah tamat m'er ardu a Isrel m'er m'ertu uraur la avpatei Atua ha. Arna napn udlani iv'ana m'er nelnal avrama asnn arna nut aulul a sei. 18Laha, dui kinkin avrndu sei, hir kinkin avsapa v'nenar Epikuras, hir kinkin uraur avsapa v'nenar Stuik, avrama kavlei a Pul. Hir kinkin avvruri kavvr ti a, “?Dui ilev' v'nen unanut lera irn ti ipavr v'ata?”

Hir kinkin uraur avvr ti a, “Nsarei hin ivrp'ep'a atua kinkin uraur”, sena ti ivrp'ep'ei a Iesu anr, kavr ti ithal ml arna m'ienen.

19Laha, avlav'i kavuirv'a asn ptha iamk nahan iv'i Ariupakus, kavvr ti a, “?V'nen m'dah kvruri, krndu ti pavrp'ep'ei a kam'em'? 20Sena ti v'nen kuirma nvrn ti iuraur. Sena si lera nvrn ti p'vrndu mamh sei kvri.” 21Sena ti ardu Atens udlani m'er v'anudl avlak atlera, iel avrn ti apavlak kavrn si m'dah kinkin kavvruri.

A Pul ip'tir arna nut Ariupakus kavrp'ep'a v'nen p'as

22Laha, a Pul ip'tir arna nah nelnal arna nut Ariupakus, kavr ti a, “Ardu Atens, kana nla ti kvpatar atua inelnal iel. 23Sena ti naran nunanut kala sei kvtu tamat asnr nakl, npasla nev'etet aulul aranan kavr ti a,

SI LERA IV'I SANAN ATUA NAVRNDU NAHAN.

Sena si lera, Atua la kaavrndu nahan kavpatei ra, Hin nvrp'ep'ei asnm'i. 24#1 Armlin 8:27; Aisaia 42:5; Parei 7:48.Atua la ien nadep' m'a si udlani iter aranan ha, Hin ialak al nmah m'ertu uaki iani, sena ti Hin iv'i Mlin na nut eia m'a nut a nadep'. 25Nakd nkavmhmah ani a lm'ad, inep'a ti Hin ihei a si kinkin, sena ti Hin itu silv'ien, m'a nalen nvm'im'in ani m'a si udlani, anr m'ertu udlani. 26Hin ien m'ertu dir iamk uaki, a ti apavlak arna nut udlani arna nadep', kattu sera naranar m'a nut apavlak aranan, 27sena ti apavtala an a Mlin Eia, ipavr ti apavah lm'ar a ti apavpaslei. V'eti Hin ilak mima asnd udlani. 28Inep'a ti avr ti a, ‘Nakd nvsilv' kavlak kavunanut arna nut huan.’ Inep'a ti dui na npin kinkin arna v'anuam'i avulul ani, kavvr ti a, ‘Nakd ml nvv'i a natn.’

29Ipavr ti nvv'i a natn Atua, iaviviln a ti p'vv'ah ti a Mlin Eia inep'a sera kul v'aha silva, v'aha nav'et, la m'ertu irndu navanel nen kav'ahuri uaki katri. 30Tituei naran m'ertu iarndu sei, inep'a ti Atua itev'kar m'aten, v'eti hilaha itu v'nen anr nelnal udlani arna nut udlani sena ti apavvav nlr. 31Sena ti Hin ittu sera napn na ti ipav'ana hua m'a nelnal udlani arna nadep', ipaviviln m'a si p'sp'asan udlani, kattu sera Dui nen, kav'iv'en si lera anr m'ertu udlani, sena ti iani ithal ml arna m'ienen.”

32Naran avrn ti m'ertu ithal ml arna m'ienen, hir kinkin avvtmadidilin ani, v'eti m'ertu uraur avvr ti a, “P'vrn v'nen ivrur si lera asnm ml naran kinkin.” 33Sarei, a Pul iruh asnr. 34V'eti hir kinkin avrama kavp'lt m'ei kavv'ah a Iesu, hir kinkin iv'i a Taiunaisias, iv'i dui na kaunsel avani Ariupakus, m'a tav'et iamk nahan iv'i a Tamaris, m'er m'ertu kinkin ml uraur.

Currently Selected:

Parei 17: nmb

Highlight

Copy