Parei 16

A Timuti ip'lt m'er a Pul m'ei a Sailas arna pariar

1Sarei, A Pul ier a Tepi m'ei a Listra. Laha, pavrni, m'ertuan a Iesu iamk ilak atlera, nahan iv'i a Timuti, iv'i net tav'et a Isrel iamk iv'ah a Iesu, v'eti a tetian iv'i dui a Kris. 2Tv'ald avlak a Listra m'ei a Ikuniam avvr ti hin iv'i dui p'as iamk. 3A Pul irn ti hin ipasapei, kalav'i kan p'au nen. Iani inap'i lera sanar ardu a Isrel avlak atlera, sena ti hir udlani avrndu ti a tetian iv'i dui a Kris. 4Naran avtpeia arna v'anu lilil avtu v'nen la apusel m'er elta avlak a Serusalem avtaui ha, a ti apavsapei. 5Sena si lera sas udlani avp'tir ihua arna v'ahien p'asar, kavrama kavnelnal mau arna napn udlani.

A Pul im'atr kala dui a Masetunia iv'ara ani a ti apavrama atlera

6Dav'a naran avtpeia arna nut a Vritsia m'ei a Kalesia, M'im'iln P'as ivrkarr a ti amavvrp'ep'a v'nen p'as arna nut a Esia. 7Sarei, naran avier nut a Misia, avrn ti apavrav'a a Pitinia, v'eti M'im'iln P'as iam'ahu anr. 8Avv'el kavsapa p'ak nut a Misia kavrav'a auei a Truas. 9Laha, arna lihat nen, a Pul im'atr kala dui iamk a Masetunia ip'tir kamiman ani ihua kavr ti a, “Palu nata kadama a Masetunia kasr lm'am'em'.” 10Naran itla sera si lera, ilahml sarei, nvtala a navanel a ti p'vrav'a a Masetunia, sena ti nvla ti a Mlin Eia itv'ara sarei a kam'em' a ti p'vvrp'ep'a v'nen p'as anr.

A Pul ien paptais an a Litia arna nut a Vilipai

11Laha, nvv'el arna nauak kavln nut a Truas kavv'el viviln kavier a Samutresia. M'ih nen nvier a Niapulis kavrav'a aut. 12Kavv'el kavln nut lera kavier a Vilipai, iv'i v'anu lil arna pna nut a Masetunia lera, kav'i utar ardu a Rum. Nvlak atlera napn kinkin. 13Arna Sapat, nvandan arna v'anu lil kavrav'a asn nauei iamk, iv'i nut atu tamat nakl, kavlak kavv'ana m'er tav'et kinkin avp'lt iel atlera. 14Laha, tav'et iamk, nahan iv'i a Litia, iv'rn a kam'em'. Hin iv'i tav'et a Taiataira, kulul a kalik p'as m'ielm't nakl, kapatei Atua iel. A Mlin Lilad iela v'ahienan kani ti iv'ahur sei a Pul ivri. 15Naran itpaptais sarei m'er m'ertu udlani avlak al nmahan, imiman a kam'em' ihua, kavr ti a, “Ipavr ti kvv'ah ti kana nv'ahdau a Mlin Lilad, kam'i pavrama al nmahak kavlak atlera.” Laha, itp' kam'em' nvsapei.

Avsranr a Pul m'ei a Sailas al p'resin

16Dav'a, naran nvv'el kavrav'a a ti p'vtu tamat, vitar na m'akarien iamk ipasla kam'em' arna navanel. M'im'iln stu iamk, la ivrp'ep'a sei idatu hin nakl ha, ilak a nln. 17Hin isapa kam'em' m'er a Pul kav'ara eia kavr ti a, “Ardu laha avv'i ardu na m'akarienan a Mlin Lil Atua. Avv'iv'en a nakd navanel na ti a Mlin Eia ipalev'la nakd.” 18Hin ien si lera arna napn inelnal.

Laha, a Pul irn istu istudau, kavav hi n kavr a m'im'iln stu lahara, kavr ti a, “Arna nahan a Iesu Kristu, ntu v'nen anh, paruh a nl tav'et lera.” Iv'amk m'a ti m'im'iln stu lera iruh a nln. 19V'eti naran armlina vitar lera avla ti ahavrndu ti apavlev' nav'et ml arna navanel lera, avuadei a Pul m'ei a Sailas, kavlav'r kavtaur asn kavman, arna nut avan kut nakl.

20Kavlav'r arv'a asnr ardu a Rum la arv'ana hua m'a m'ertu nakl ha, kavvr ti a, “Ardu laha arv'i dui a Isrel, aran der lil arna v'anuad. 21Karvrp'ep'a p'kl kinkin iaviviln a ti p'vuadei kavsapei, sena ti nvv'i m'ertu a Rum.” 22Laha, m'ertu udlani avp'lt kavp'tir kavmlanr. Kavman lil aviapr klusar kavlev'lei aranar kavtu v'nen kavvr ti apavrpr a nai. 23Avrpr istudau laha, kavlav'r kavsranr al p'resin, kavtu v'nen a dui ip'aur p'resin a ti ipauadar ipahua, amarruh. 24Naran irn v'nen lera, ilav'r kataur al p'resin iv'iv'a eim aphat, kavlkasda tlr al nai.

Dui ip'aur p'resin iv'ah a Iesu

25Arna p't lihat lera, a Pul m'ei a Sailas artu tamat karhai a npin karpatei Atua. M'ertu avlak al p'resin avv'rn anr. 26Iv'amk m'a ti nami lil imi, kani ti nakal udlani na nmah p'resin idudul. Ilahml sarei karliu udlani ielulua hin, sen udlani avhuda m'ertu m'ei irsrs. 27Dui ip'aur p'resin itah kathal, kala ti liu na p'resin udlani itapar, karv'lua talian, karn ti ipatrp'n hin, sena ti iv'ah ti m'ertu avlak al p'resin atvruh tapei. 28V'eti a Pul iv'ara a nadl lil kavr ti a, “Mautakm anh, kam'em' udlani nvlak uam.”

29Laha, hin iv'ara kamiman lait kavrvr kadama eim kavrdedrn istudau, kadars arna nahr a Pul m'ei a Sailas. 30Kav'av'ar kavrama av'aran, kavr ti a, “?Armlinak, p'en v'ata a ti Atua ipalev'la kana?”

31Arvrprani karvr ti a, “Pav'ah a Mlin a Iesu Kristu, laha Hin ipalev'lah m'er m'ertu udlani avlak al nmaham.” 32Laha, arvrp'ep'a v'nen p'asan a Mlin Lilad ani m'er nelnal avlak al nmahan. 33Arna naran nen lera lihat, hin ilav'r kasila m'nh rana nai nar, kapaptais ilahml sarei, hin m'er nelnal avlak al nmahan. 34Sarei, kalav'r a Pul m'ei a Sailas avrav'a al nmahan katu tim'ah anr karn ip'as istudau, sena ti hin m'er m'ertu udlani avlak al nmahan avrama kavv'ah Atua.

A Pul iam'ahu a ti aparruh arna navanel tutuah

35Naran nut iren, kavman avtep'a ptm'iel asnn kavvr ti ipulnr.

36Laha, dui ip'aur p'resin ivr v'nen lera an a Pul kavr ti a, Kavman avtep'a v'nen a ti p'uln kam'i. Hilaha parv'el karhau arna tamat.

37V'eti a Pul ivr anr kavr ti a, “?Inap'i? Kam'em' nrv'i dui a Rum. Avrp p'akm'em' arna nah nelnal kavsran kam'em' al p'resin. V'eti ahavtu kam'em' arna kut kavvr sei nrani istu. Hilaha avrn ti apavtep'a kam'em' kavtutuani. Ikahei. V'eti hir akvrama pr kavlev'la kam'em'.”

38Sarei, ptm'iel avvrp'ep'a v'nen lera asnr kavman. Naran avrn ti hir arru arv'i du a Rum, avdedrn. 39Kavrav'a kavv'ana mamh m'er, kavlev'lar kavmiman anr a ti aparhau karln v'anu lil. 40Laha, arruh al p'resin karv'a al nmahan a Litia, karpasla tv'alr karv'ana karmhmah anr, sarei karhau.

Currently Selected:

Parei 16: nmb

Highlight

Copy