YouVersion Logo
Search Icon

Jenesis 49

49
Jekop boweneninome yawe galime gëgali tlelëme
1Jekop bubë nëbaleme gali telokwakeme, “Sobo esijome na bome lolime tafa eletëname. Fli wesibi some tokwafe fata mëgletëyobëme gëgali nanëglelëyome. 2O bobë nëbale, sobo bobë li mëta loko elelëyo, bobë gali aholokwane naegloname. Bo sobobë blijaya, Israel.
3Ruben, ju bobë abwa nëba. Bo falakeme nëgena, sebo bitana jume mana fu tëto. Ju flesu ho fata tle na ju tako afutukuna homu. Jubë afutuku jubë iniwa blijamonibë afutukume boblo lalotome. 4Jubë lowene haliji tuha sësëbo lëletë. Ho lëkle hana lëgëtatëme. Kwe, ju auto mago ho tafa hana egleme. Ju bobë mëseme atome fa tëgëtamëme nëgeme. Na bo tako tiniji latletë. Ju tëbo lowenemu esogo tlelële.
5Simeon bolijamo Livaina bu wame wesibi glo mëtlekefo na fli home wame motlokwefëmo. 6Bu wame lowene fa mogotokweflona, bu ho flime mogo nalë memëlagekefo. Na bu wame jwa tafa mëgelona, bu tuja ato bulmakau klelibë elebo salëme fwa hihli mototokwefëtemo. Këme nëgeme, bo bume ehe hana nolomë. Blalo kë sle motokweflobë galibëme, bo kë aholokwanebëme tole hana nëlekefëtemë. 7Bubë wame lowene bume fwa tëbo nalogotomeme. Bubë wame lowene takomu nëgeme, na wame lowene tëbowa tëbetëme. Bo bume hehë nanëletemë. Na bo bu tlemalë name na bubë nëbale name fufu nëbetokwakëmëme. Na bu Israel life mago onehona bwa bwa tafa namëglelëmame. Bo bume flëke hana yo noglomëme.
8Juda, jubë blijamoni na blijahani jume bibita mëgëtagujome. Jume fli oneho wame moglëyona, ju mou mëta fwa fafa egleme. Na jubë blijamoni na blijahani jume sëkefo bubusu motometëyome. 9Juda, bu afeku laion kleliha. Bu kleli fa fa lëlekëfe, na hihi lëlekëfe. Na bu kalëlegona këme tafa lëgleme. Bu elili elili lële na alabujuwa tafa lële, laion kleli fenene. Na ho li bume hana lëlelu logotleme. 10Bu eso home kë lëlekuju eglatlebë atobeila lehwamë. Na bu eso home unaunalëme natafa lëkoume. Bu kë atobeila mana lehwaguime na bu Silo lifewa mana fwa luleme. Na bu iniwa onehome tafa lugulelëmeme. 11Bubë wain taba feilawamu hulu lokoutle na bu lalemu. Na bubë donki kleli takuliji logotlena, bu wain taba mëta fwa takuliji lotokwefële. Bu feilawa wain taba liji tu kiki lotokwefëme. Këme nëgeme bubë ëho kë wain taba liji tuna këme swa lotokwefëme bu feilawa wain taba liji tuna nëgeme. 12Bubë naba kowa këme fata meletle, wain taba liji tu hi lëglekëfeme nëgeme. Na bubë enino tatiwamu mëbetle, bulmakau kleli maba fo hi lëglekefëme nëgeme.
13Sebulun bu nutu li mëta tafa lëgleme. Na bubë tu ku takomu lëgëbetleme. Këme nëgeme sibu lo tëbo hana mëgleme. Na bubë flëke meluguju tleme, Saidon life li mëta tou lokoutleme.
14Isakar bu kalëlego donki kleliha. Bu tële wesibi ku mëta fwa manawa meniniwa lëbekëfe. 15Bubë lale life lëselëwagule na melowene fa lotle, ‘O lale lifefe, bo këme tafa nanegelë.’ Na kë mëta bubë iniwa afutukuna wege lële. Kwe tokwafe, bu fli hobë manawa wege fa lëgëtatëmeme.
16Tokwafe, Dan bubë ilawa mago onehome eso home tafa lëgletëmeme, na bu Israel life mago fli oneho fene tafa mëla. 17Dan bu mefata lëgleme, taiju tëbo, alëge mëglëbo mëta fene sei lëlële. Hos kleli bu alëge elë fëka lokweina, kwe taiju hokweinawa okli lëkaketlebë na sëgetuju mëta latëtouwa lëlëleme. Na ho kë hos kleli matawa tafa logoletlena, kwe lalugujuwetigowa.
18Tako Ho, bo jume ekë hwi nëletë, ju bome egaitanë naegleme na jubë lale lifewa no enënëme.
19Gat, tokli ho jume wame mëglelëkakëjome. Kwe, ju kofayame yafe wame elomeme kwe bu mëglëboujame.
20Aser, jubë nuju mëta lale lale hi wesibi feilawa hulu mokoutëme. Eso ho kë hi hi mëglabë hi wesibi ahujume ahujume eglekëfeme.
21Naptali, bu waluju mago dia kleli ha. Bubë tolenawa fëka fëka lëbelëfa. Na bu lale lale nëbalemu nëbaneni lëlekëfe.
22Josep bu lale wain taba. Bu yefi tu li mëta hulu lële na bu feilawa liji lowalë. Bubë tikefo hele heletanëno nëgeme, na lëglesi lamu mototle. 23Wame ho bume nemona wame motlola, na sëfana mëtemila na tëbo mototla. 24Josep bu nemo hana tlëkële na bubë toba elili hana mëtletle. Jekopbë kalëlegona Goto, bume tëgaitaleme nëgeme na bume afutuku tëglëleme nëgeme. Kë Goto, Israel life mago onehome tafa lëlelëmeme na bubë kalëlego wame jiboha title lëletëmeme. 25Bu blijayabë Goto na bu tako kalëlego Gotomu. Buwa jume ululu sle lëgëtakefëme na laitakefëme. Na bu jume feilawa lale wesibimu lëglëkefëme. Bu jume tako tlibutu lëglëme, na jume life lokwalëfelë mago tu mata lëglëme. Na jubë ilawa mago oneho feilawa nëbaneni mëglame. 26Bo jubë blijaya. Bo jume lale gali nëlë, Goto jume ululu sle nalëtaguime na lëgaitawagume nalëgleme. Bo metole nanelë, ju lale wesibi kë glo eglebë, tako fatini lamu namëgëtatëme. Na kë wesibi, jubë afunino kë glo mëtëglabë wesibime boblo mogotomememu. Iniwa kë wesibi Josep ju mëta fata mëgleme. Ebë ho ju kënëgebë ëtani ju blijahani na blijamonibë naba li mëta eso ho fata tletëme.
27Benjamin, bu waluju ama ha. Bu kleli mogo nalë tëtëkle lëtakefë. Na iniwa olobalë bu kë tëtëkle lëtakefëbë kleli hihi lëlekëfe. Na taboklë ye, bu kë tëtëkle lëtakefëbë hi wesibi sa lëtakefëtëme.”
28Ta ebë kënegebë, Israelbë we ita tële enënebë. Na bubë bolijaya bu gli lëgleme kwene bubë nëbaleme kë lëgaitawagumeme anebo gali tlelëme. Na bume lale gali tlome, Goto bume fwa ululu sle nalëgëtagumeme na laitawagumeme.
Jekop gli tle na bume matëmatë mëta gwa mototla
29Na Jekop bu boweneninome lale gali wagali tlome, Goto bume ululu sle nalëgëtagumeme na lëgaitawagume nalëgleme. Na bubë nëbaleme megali latlome, “Bo gli nëgelëme nounou ekë nelë na bobë ilawa mago lebo hona tafa nanugulame, alibaho life mëta. Sobo bome bobë afuninobë aniji fuluju mëta gwa egëtaname, Efronbë life mëta kë lo eglabë. Efron Hitbë bolijafuju. 30Kë aniji fuluju bu Makpela life mëta lo elamë. Makpela life bu Kenan lifatebë tokwëfo life, Mamre life li mëta lo elamë. Ëtani Abraham bu aniji fuluju Efronna balitina hihijika mëtelo. Bubë matëmatë lëgëbetle na lëgleme. 31Bu Abrahamna bubë mëse Saraname, kë aniji fuluju mëta gogwa mëtla. Na Aisakna bubë mëse Rebekaname mata kë mëta gogwa mëtla. Na bobë mëse Leame mata kë mëta gwa tëtë. 32Ëtani Abraham bu kë aniji fuluju Hitbë ilawa mago hona balitina hihijika mëtelo.”
33Jekop bu yaweme gëgali tlelëmee na ni labuku mëta ni tëbe na lagliwa tle. Na bubë ilawa mago lebo enënena tafa mëtla, alibaho life mëta.

Currently Selected:

Jenesis 49: NCE

Highlight

Share

Copy

None

Want to have your highlights saved across all your devices? Sign up or sign in