Marcos 4

Ñimity'ia ryheva

1Jesús hykuãĩ õñepyrõ pyrỹmboijy yyvasu hỹmbeype, haipe kuareta hetava ou hai ẽvãpe, oho jupi vapy kanoape, hãrã ñymbaty'õre pyta yyvasu hỹmbeype. 2Hãrã heta mboishu reta mbai ñee ñymyhã'ãnga rupii, hãma pyrỹmboi'ẽrã hei: 3Pyhendu: Pente ñimity'ia oho ma'ẽty. 4Ma'ẽtyrã ĩme'ẽ oava pehupi, haipe ou vyrare opa hou. 5Ĩme'ẽjy oava ita pãũpe, yvykui jihiavaperã areã hẽño, yvy pyrẽrĩvape. 6Haivi kuarasy õhẽmarã opa hapy, hapõarã opa jipi. 7Ĩme'ẽ oava kapi'ãti pãũpe, hoka ñanavã vatema ohorã opa jasoi. 8Tẽvã ĩme'ẽjy oava yvy kavivape, hẽño, vatema ohorã heta'ia, ĩme'ẽ iava 30, ĩrũ 60 hareka 100 kavi pente jypyivi. 9Haivi Jesús heishu reta: Ĩme'ẽ japysa'iarã, tyhendu.

Marã'ĩrãra Jesús ijeta ñee ñymỹhã'ãnga rupii

10Haivi Jesús hã'ẽĩma ñỹnoĩ hãndirã pyrãndushu reta 12 ia mboireare hareka haipe õĩ hãndivare, mbaivara he'ise hoka ñee ñymyhã'ãnga, 11Jesús heishu reta: Pee rãnga ñemiãpe'õ Tũpa ẽvãpe'õ ryheva pynymbykuahaka, tẽvã yngavare mbe'uashu reta ñee ñymyhã'ãnga rupii; 12maĩtẽ jyreare tẽvã heshãã, hendutẽvare kuãã, potãã Tũpa kyty oujy retarã hai hejareiishi verã mbai porãmba japo vekuare.

Jesús mbeu kavivejy ñimity'ia ryheva

13Jesús heijyshu reta: Pikuããra ko ñee ñymyhã'ãnga? Hãmera marãpo pikuajykui yngavare? 14Ñimity'ia hai Tũpa ĩñee mbeu'ia. 15Ĩme'ẽ timity oava pe hymbeype hokava hai Tũpa ĩñee hendutẽva, Satanas ou opa hekyjyshi ñee pyape ñotỹhãtẽva. 16Ĩme'ẽjy timity oava ita pãũpe hokava hendu Tũpa ĩñeerã, areã vy'ape myvãhẽ, 17tẽvã hapo pukuãrã kỹã'ẽ, hãma oushu mbai porãmbarã, poi jyroja. 18Hãma ĩme'ẽjy oava kapi'ãti hetava pãũpe, hendu Tũpa ĩñee; 19tẽvã ojepy'apy ko yvy'ĩãrẽ'õreirã, jytavykashu iko katukue hareka pota hetare mba'ekue, kova opa ou ĩãrẽshi ñee hẽnduvarã, katoa ia. 20Tẽvã ĩme'ẽjy yvy kaviape oava: Hokava reta hai hendu Tũpa ĩñeerã pysykaviva, hãrã ia 30, ĩrũ 60 hareka 100 kavi ia.

Mba'ety ñemiape'õ jykuamba verã

21Hãrã heijyshu reta: Veruhara kuei tataĩndy hyru ñonoã verã maĩnunga hyru ipe maĩrã turupa ipe? Mba'ety! Mbai sapeka vateñõĩpo ñonohã sape kavi verã. 22Mba'ety maĩnunga ñemiãpe'õ kuaahamba verã; hareka ñomihareva heshahamba verã. 23Ĩme'ẽ japysavarã, tyhendu. 24Hãrã heijyshu reta: Pijasaka kavihe ko pyhendu pẽĩvare, papisha pijapova rãĩmi katĩĩpo, Tũpa pory jyve pyrehe; hãrã mi ĩrũhãvepojy pekui ko pyhenduvaivi. 25Shara ĩmemarea mẽ'ẽhãvepojyshu; tẽvã mba'etyreva, mĩshĩ ĩmetereamikue, hekyha jyvapypojyshi.

Ñee ñymyhã'anga timity hẽño kaviva ryheva

26Jesús heijyshu reta: Tũpa ẽvãpe'õ ryheva rãnga ova pente kuimbai ma'ẽty'ia; 27ocherã maĩrã sarekorã, hasa ara, pyhare, hãrã ñotyva hẽñoshu hai kuamba'õvã marãra. 28Yvy rãnga ha'ii myhẽño; tynonde mbyhapo, myhãka haivi mbypoty, mbi'ia hareka myhãỹjy. 29Haivi javyjemãrã myno'õhã, shara vãhẽma jy'ararã.

Ñee ñymyhã'anga mostaza hãỹ ryheva

30Hãma Jesús heijy: Mbaivarapo ñambivachehe Tũpa ẽvãpe'õ ryheva? Marãvara ova? 31Hãi rãnga mostaza hãy, yvype ñotyãvã. Hokava hai mbairãỹ mishĩveva opaite yvy'ĩãrẽ'õ retaivi. 32Hãma ñotyãmarã, hẽño, ikoshi marẽyveva opa yngava ñotyãva retaivi, hãkã marẽrẽyrã vyra retaave ñymby haitypy hareka ñykuãrãsyã'ipe reta.

Ñymyhã'ãnga Jesús poryva

33Kyrã Jesús heta ñee ñymyhã'ãnga rupii mbeushu reta Tũpa ĩñee, kuaa kavive verãre. 34Ñee ñymyhã'ãngambape Jesús ijetããshu reta; tẽvã mboireare hã'ẽĩ'õpẽĩ mbeu kavishu reta.

Jesús joko yvytu vasu

35Hokava arape pỹntuma potarã, Jesús heishu mboireare: Jahasa yy hyvaisho kyty. 36Haivi opajyma mondo kuareta hetavarã, mboireare rahashu Jesús kanoape. Ĩme'ẽjy ynga kanoape ohovare. 37Hãrã sapy'ãĩ vãhẽ yvytu vasukue, hãrã yy ñarõvã iche kanoaperã, õñepyrõ mynyhẽ rahare. 38Tẽvã Jesús oche'ẽ kanoa huva kyty. Hãma mombarã heishu reta: Pyrỹmboi'ia! Ryheshãra opamapo ñañapymỹĩrã? 39Jesús pũã hareka poshy ryheve heishu yvytu hareka yyvasu: Jasaka! Chirĩrĩ'ẽ! Haipevaĩ yvytu pyta, hãrã opaitea haikavijy'ẽ. 40Haipe Jesús heishu mboireare: Marã'ĩrãra pykyjepi? Pirojããmba teri? 41Tẽvã mboireare opa kyje retarã pyrãndujyre ijupe: Mbavarajy kova, yvytu hareka yyvasuave japoshuva hai heiva?

Currently Selected:

Marcos 4: TPJ

Highlight

Copy