Lucas 22

Pai ruvishare pota jukajyre Jesús

1Vãhẽserima arete pãhã jihiambaa mbai mby'oukavaperã, “Pascua” he'iashua, 2hãrã pai ruvishare hareka Moisés mbypara vekua pyrỹmboi'iheare, heka marãrapo ñemiãpẽĩ juka reta Jesús, shara henta'õre kyjeshi reta. 3Hãma Satanas iche Judas Iscariote pyape, hai jyve penteva 12 Jesús mboireare, 4hãrã oho ijeta hãndi pai juhuvishare hareka tũpao ñyngareko'ẽheare, haivi marãrapo meẽ Jesús haire ipope. 5Haire vy'a jyre, hareka pente ñeepẽĩ ñynoĩ, meẽshu verãre kyrypoti; 6hai rojaĩma, hãrã hekaima marãrapo meẽ Jesús haire ipope, kuaretare mba'ety'ẽrã.

Ñandeja pynturã karurã

7Vãhẽma pãhã jihiamba mbai mby'ouka ara mby'areteavaperã, ikoatevẽheape juka verã pente avisha ray Pascua pevarã. 8Hãrã Jesús mondo Pedro hareka Juan, heishureta: Pekua, opa pymyhẽvã ñande Pascuape jau verã. 9Haire pyrãndushu: Mãperapo ripota myhẽvãhã? 10Jesús heishu reta: Pichema tentaperã, pĩvãĩtĩ hãndi pente kuimbai yy rahava kambushipy. Pekua hipikui, oo icheapeve. 11Hãrã pereshukui oo ija: “Pyrỹmboi'ia rãnga pyrãnduka nde: Mapera'ẽ oo ñymbatyhaseape Pascuape akaru hãndi verã amboi'areare?” 12Hãrã oo ija pynymbyheshakapo pente oo vate'õ ñyvỹ tivishava opama'ẽvã. Haipe pymyhẽva ñande pynturã jau verã. 13Haire ohorã, Jesús heishua reta rãĩmi katĩ hesha reta. Hãma haipe myhẽva reta Pascuape hou verãre. 14Vãhẽma orarã, Jesús hareka jy'apostolre vapy hãndi reta mesape. 15Hãrã heishu reta: Hetama rãnga pota hau penendie kova jykaru pynturã ho'uava Pascua ryheva, ndeiteri ãmanorã. 16Haipope akaruveãmapokui kova jykaru pynturã ryheva, opa iko peve Tũpa ẽvãpe'õ ryheva. 17Haipe heky vaso vino ẽẽpyarã, jurure'ĩãrẽrã hei: Kõ'ẽ vino peupy, hareka pymbyhahasa pijupe; 18hãrã haijy pee, ãmbusururu vẽamapokui ko uva tyy oujypeve Tũpa ẽvãpe'õ ryheva. 19Haivi hekyjy pãhã; opama jururejy'ĩãrã, pyseã meẽshu retarã hei: Kova hai shyrete, me'ẽã pyndyrehe verã. Pynymanduajy shyrehe verã, pijapo kova. 20Kyrãĩ japojy opa karurã, heky vaso vino ẽpyarã hei: Ko vaso hai ñee me'ẽã py'ahuva shuruvype, ñohẽhã pyndyrehe verã. 21Tẽvã shymeẽ verã, kope vapy'ẽjyve shendie mesape. 22Ãñete kuareta Tay manoñõĩpo ñonoãshuva rãĩmi. Tẽvã, tengapokui meẽ vẽkua! 23Haipe õñepyrõ pyrãndujyre ijupe, mbavarapokui Jesús pysyka verã.

Mbavara hai vateve'õ

24Jesús mboireare õñepyrõ heheimi jyre ijupe, mbavarapo haire mbytepe vateve'ẽkui. 25Jesús heishu reta: Opaite tentape'õre juhuvisha haire ipope ĩmere, hareka huvishare hei'ijehe reta heta mboryva kuaretare. 26Tẽvã pee ha'ẽã kyrãpi verã; hãrã vateve'õ pynymbytepe taykueva rãĩmi tiko, hãrã mbai miñaka'õ tiko pyrỹmbory'ia rãĩmi. 27Mbavara hai vateve'õ, mesape vapy'õra, maĩrã pyrỹmbory'ia? Ha'ẽãrapo mesape vapy'õ? Tẽvã she aikojyve pynymbytepe pyrỹmboryĩ'ia rãĩmi. 28Pee rãnga shimi'ĩrũ ñoĩtepi jyve jyhasa'asy retape. 29Hãrã sheteivapo apirĩñono huvisha vasurã, Sheru shiñonova rãĩmi, 30pykaru verã hareka pimbyu verã jyve shymesape avapyape. Haivi pyvapypo mburuvisha vasu vapypyape, pimbivachekashu verã 12 kavi'õ tenta Israelvare.

Jesús mbeu Pedro ñomire verã

31Heijy Ñandeja: Pedrope: Simón, Simón, Satanas jururema pyndyrehe opa pynymomohẽ verã, trigo mbovaharã mbyvavaha'õ rãĩmi. 32Tẽvã airureshuje Tũpa, potãã nykangy rirojakueperã. Hãrã opama hasa mbai pohyvarã, mykyrẽyjyshukui ni'ĩrũre jyrojanõĩ shyrehe verãre. 33Simón heishu: Sheja, ãĩ rãnga jyve ha'ẽã shymbyperesoa verãĩ, ãmano rãngapo jyve nendiekui. 34Jesús heishu: Pedro, haiponde ã'ẽvãĩ ndeiteri uru ñyrãã'ẽrã, mbahajypo rerekui shykuamba.

Pyarã'ã hora vãhẽserimarã

35Haivi Jesús pyrãndushu reta: Apyrỹmondo kyrypoti hyrumbape, ho'uava hareka pepy ryhevambaperã. Pymbeushe, mbaivajyra mba'etype? Haire hei: “Mba'ety” 36Hãma heishu reta: Ã'ẽ haipojy pee, vosa ĩmereva tyraha hareka jyve kyrypoti hyru; kyse pukuva mba'etyrea hepyre tovende mondeva, hãrã tova ijupe pente. 37Hai rãnga pee potanõĩ opa iko shyrehe hekope kavi kuatia mbyparaha vekuapy: “Heko porãmbava rãĩmi rekoha”. Shara opaite he'ia shyrehe vekua, opa iko oho'i. 38Haire hei: Yreja, kõ'ẽ mokue kyse pukuva. Hai heishu reta: Haima!

Jesús ñymboi Getsemanipe

39Haivi Jesús õhẽ oho yvyturusu Olivo he'iashuape hai ohoñõĩ'õpe, hãrã mboireare jyraha jyve hipi. 40Vãhẽma jyraha haiperã heishu reta: “Pirure katu, mahẽ peakui pya hã'ãhãva ouperã”. 41Mbyry katu ohoshi reta pente ita vasu momboava rãĩmi. Hãrã haipe ĩñesu hareka ñymboirã, 42hei: Sheru, nde ripotarã, mbyhasa shyhevi kova kopa irova#22:42 Kopa irova He'ise “jyhasa asykue”.. Tẽvã avy tiko she aipotava, koñeĩ tiko nde ripotava. 43Haipe ijeshakashu pente Tũpa jokueva vate araivi ouva, mỹpyrãntashu verã. 44Hãrã Jesús vyamba japyraha'õpe, ñymyrõĩteve jurure; haivi tykyshi pirie yvype turuvy tivisha rãĩmi.#22:44 Mba'ety hai aryka'eiteve mbyparaha vekuape. 45Pũãjyma jurure õĩvirã, ohojy mboireare ẽvãpe haipe hesha opa oche, vyamba japyraha retarã, 46hãrã heishu reta: Marã'ĩrãra pechepẽĩ? Pupũã hareka pirure rãngapo, potãã pypya hã'ãrã.

Jesús pysyha

47Jesús ijetateri'ẽ vekua, vãhẽ ou kuareta hetava. Haipe penteva 12 Jesús mboireare Judas he'iashua hỹnonde oushu reta; ñymboja Jesús ẽvãperã hovape pyteshu. 48Jesús heishu: Judas, pente jypytevapera rymeẽ kuareta Tay? 49Jesús ẽẽ hãndiare, heshama mbaivara iko'ẽrã pỹrãndu jyreshu: Yreja, hỹpeñahãrapo reta kyse pukuvapy? 50Haipe pente hairetava, pai ruvisha jokuereirea jasyjashi nambi hyvaisho, jakata kyty'õ. 51Jesús hei: Pyma'ẽĩhese, haima. Hãma kuimbai nambi pokoherã, mynguera. 52Haivi Jesús heijyshu reta pai ruvisha hareka tũpao ñyngareko'ihea juhuvishare, hãndi kuakuavare; ou hekavare: Haira she mbai porãmba japo'iva peishe verã kyse pukuva hareka yvyra ryheve? 53Opa ara rãnga tũpao pe aiko'ai pynymbyteipi, mba'ẽã pijapo shyrehe. Tẽvã kova hai'ora pee pã'ãpova, ora mbaikatu timimbipyva.

Pedro hei Jesús kuambaa

54Hãrã pysyma retarã raha reta pai ruvisha hentape; Pedro mbyryĩ oho'i jyve haykue. 55Haipe oo hỹnonde mbytepetei jatapy retarã vapy juri reta; Pedro vapy'ẽ jyve haire mbytepe. 56Haipe pente taupe jokueharea hesha Pedro vapy'ẽjyve tata hyvacherã, mãĩkavi'ẽherã hei: Koo'ia, hai rãnga iko'i jyve hãndi ka'ãĩ. 57Tẽvã Pedro ñomirerã hei: Taupe, aikuãã rãnga jyveshu. 58Kỹyma'ẽrã yngava heshajyrã, heijy: Nde rãnga haijyve hai ryhevare. Pedro hei: Kuimbai, mba'ety, ha'ẽã rãnga she. 59Pente ora rupima hasarã, yngaa heijyshu: Ãñete rãnga koo'ia iko'i jyve hãndije, hai rãnga jyve Galileava. 60Pedro katy hei: Kuimbai, aikuãnyshe rijetaheva. Haipe Pedro ijeta teri'õ ryheve, uru ñỹrãã. 61Hãma Jesús jererã maĩhe Pedro. Haivi Pedro manduahe Ñandeja heishu vekua: “Ndeiteri uru ñyrããrã, mbahapyjypo rerekui shykuamba”. 62Hãma Pedro õhẽ katoaperã, jypavete jaheo'i.

Ñymbyhoryhe reta Jesús

63Hãrã kuimbaire Jesús ñyngareko'ẽheare, ñymbyhory jyrehe hareka nũpa jyre; 64hesa jokuashi retarã, nũpa jyre hovaipi, pyrãndu jyreshurã hei: “Mbeuno, mbavara ndyrovaipi nũpa?” 65Haipe heta ijeta porããshu reta.

Jesús huvishare hỹnonde

66Kõĩmajyrã, ñymbaty reta karai kuakuavare, hoka tentape'õre, pai ruvishare hareka Moisés mbypara vekua pyrỹmboi'iheare. Haivi raha reta Jesús ñymbatyha'õperã, haipe pyrãndushu reta: 67Mbeu ore, ndera hai Cristo? Jesús heishu reta: Hai rãnga haiperã, shyrojããpopi. 68Mbai apyrãnduperã, pymbe'uãposhe hareka pypoiãvãĩpojy shyhevi. 69Tẽvã, ã'ẽvãĩpo ko kuareta Tay vapykui Tũpa ñymbaikatuva jakata kyty. 70Haivi opaiteva pyrãndushu reta: Akuarã ndera hai Tũpa Tay? Jesús heishu reta: Hai rãnga, pee pereva rãĩmi. 71Haipe haire hei: Mbaveama katu heshavare mbeuvejy ñande. Ñandeteiva rãnga ñahendu juruivi heiva.

Currently Selected:

Lucas 22: TPJ

Highlight

Copy