Yohanes 9

Yesus nefekaꞌosa mobuntono mpini pakalenteno

9:1-41

1Wakutuuno Yesus nekala-kala, nowohamo seemie moꞌane mobuntono mpini pakalenteno. 2Anaguhuꞌino dofeenaemo ambado, “Guru, laꞌae bhahaa kodhosano sampe mie aini nobunto mpini pakalenteno, wutono kaa kamungkulano?” 3Notobhoosimo Yesus ambano, “Suano wutono, suano dua kamungkulano mehabuno dhosa, ampamo kaowu kakadhadhiaꞌano peda aini somo natiwohaꞌao kahadhaano Lahataꞌala ne anoa ini. 4Tinangke nandoo ole-oleo, tetewei dadhumalangiomu kahadhaano Tumudu kanau. Kapaꞌamo naohondo kaowu oleo, ingka bhe naseemie paemo bhe so moolino kumahadhaanoa. 5Tangasano aeate we dhunia ini, Idimo ini tilangano dhunia.”

6Pada nopugau peda naꞌa Yesus nekapehamo ne wite, eluno naꞌa nobhelu-bheluane wite maka noꞌapuleiꞌe ne matano mobuntono naꞌa. 7Nopugaumo ambano, “Kalamo meheꞌu we oe kaekadiuꞌa nekonando Siloam.” (Maꞌanano Siloam naꞌa “Mie netudu”). Mie amaitu nokalamo neheꞌu maka nosuli, gahaꞌa matano nofowohamo.

8Santieneno bhe mie mandeꞌaane endefiꞌini mie amaitu mesalo-salono, dopugaumo ambado, “Ingka anoa ini mie mengkoha-ngkohano maka nesalo-salo?” 9Nandoo dua pugauno, “Anoamo daanumo.” Ambado sigaoꞌano, “Suano, tamaka pototoꞌano ula.” Wutono nopugau ambano, “Nokotuꞌu, ingka idimo ini.” 10Dofeenae ambado, “Peda amai kafowohaꞌamu?” 11Ambano, “Mie nekonando Yesus nehabu katomba seendai maka noꞌapuleiꞌe ne mataku. Pada anaꞌa notudu kanau akala aeheꞌu we oeno Siloam. Idi akalamo, gahaꞌa pada aeheꞌu afowohamo.” 12Ambado toha, “Ne amaiꞌe mie anaꞌa?” Ambano, “Miina amandeꞌaanea.”

13Pada anaꞌa mie kabunto saꞌituini doowaemo ne miendo Farisi. 14Tamaka oleono Yesus nebhelu wite mbali nofekantalea matano mie amaitu oleono Sabat. 15Dadiꞌanomo miendo Farisi dofeenamo kabunto amaitu bhahaꞌi peda amai kafowohaꞌano. Notobhoosimo ambano, “Ingka noꞌapuleiane katomba ne mataku maka aeheꞌu, gahaꞌa afowohamo.” 16Seemie hodua miendo Farisi dopugaumo ambado, “Tetewei mie anaꞌa miina namaiꞌao ne Lahataꞌala, kapaꞌamo miina namiarae oleono Sabat.” Sigaꞌa dopugau dua ambado, “Nada amai bhahaa mie kodhosa nehabu tanda timenteꞌaono peda ini?” Sampe dewalamo dopotaga-tagali sapada-pada andoa. 17Pada aitu dopugaumo toha ne mie kabunto saꞌituini ambado, “Ane fekihimu hintu, laꞌae mie amaitu, ingka padamo nofekantalea matamu?” Notobhoosimo, “Anoa seemie anabii.”

18Tamaka miendo Yahudi dokiido damarasaeaꞌa anoa ini daanumo nobunto endefiꞌini, kaneꞌomo nofowoha. Dadiꞌanomo dobhasimo kamungkulaꞌino. 19Dofeenada ambado, “Anamiu gahaꞌa inia? Ingka ambamiu nobunto mpini pakalenteno. Tamaka peda ae ingka aitu nofowohamo?” 20Dotobhoosimo kamungkulaꞌino ambado, “Tapandeꞌaane ainimo ana mani. Tapandeꞌaane dua nobunto mpini pakalenteno. 21Tadua kafowohaꞌano itu, ingka miina tamandeꞌaanea. Laꞌae mekantaleano matano miina dua tamandeꞌaane. Feenaomu wutono, ingka nobhalamo namandemo napugauꞌao wutono.” 22Kapugauꞌando kamungkulano peda maitu doteꞌi miendo Yahudi, kapaꞌamo miendo Yahudi domafakaanemo sasuka kumonano Yesus maitu Mesias Omputo Fosalamatino, daꞌumeleꞌaanda damesua weo lambu kasambaheaꞌa. 23Dadiꞌanomo kapugauꞌandomo kamungkulano, “Ingka nobhalamo, feenaomu wutono.”

24Pada amaitu fenduamo dua dobhasi kabunto saꞌituini maka dopugauane ambado, “Pugau kumotuꞌuꞌano ne wiseno Lahataꞌala, tapandeꞌaane mie amaitu mie kodhosa.” 25Notobhoosimo ambano, “Bhahaa mie amaitu mie kodhosa miina amandeꞌaanea, nepandeꞌaoku sehonda kaowu, saꞌituini aobunto, aitu afowohamo.” 26Ambado dua, “Noafaꞌiangko gahaꞌa? Peda ae nofekantaleaꞌe matamua?” 27Notobhoosimo ambano, “Ingka padamo afohatokoomu, gahaꞌa mokiido metingke kanauꞌomua. Noafaꞌao dua mendua metingkeaneomu? Gaomiu membaliomu dua anaguhuno?” 28Gahaꞌa tadofeꞌawuti bhe dopugau ambado, “Hintu kaowu anaguhuno mie anaꞌa, insaodi ini anaguhuno anabii Musa. 29Tapandeꞌaane, Lahataꞌala padamo nokobhoasao ne anabii Musa, tamaka mie anaꞌa, miina tamandeꞌaanea bhahaꞌi nomaiꞌao ne amai.” 30Notobhoosimo kabunto saꞌituini ambano, “Ingka amente dua. Kamenteꞌaku miina mandeꞌaaneomu kamaiꞌaoꞌanoa, gahaꞌaitumo padamo nofekantalea mataku. 31Ingka dopandeꞌaaneomu Lahataꞌala miina naefetingke mie kodhosa, mpahinomo mie lumebeno dhumalangino kapoindalono. 32Mpini pakatandano dhunia taꞌampamo dua aitu miinaꞌo natifetingkea putae nandoo seemie mefekantaleano matando mobuntono mpini pakalenteno. 33Ane mie amaitu pae namaiꞌao ne Lahataꞌala, tetewei pae nakonipoolia.” 34Dotobhoosimo ambado, “Hintu ini lente weo dhosa, maka patudhumu moinaꞌu kainsami gahaꞌa?” Pada aitu dogihasiemo, miinamo naembali namesua weo lambu kasambaheaꞌa.

35Nofetingke kaowu mie anaꞌa dogihasiemo, Yesus nokalamo noꞌondofie. Nopoꞌawaane kaowu nopugaumo ambano, “Parasaea bhahaa ne Anano Manusia?” 36Ambano, “Laꞌae bhahaa mie anaꞌa Waompu? Fohato kanau amarasaeaꞌao ne Anoa.” 37Ambano Yesus, “Ingka wohaemo; mie puga-pugauno bhe hintu ini, Anoamo itu.” 38Ambano, “Aparasaea Waompu.” Lasao nosudhu notaohao sombano ne Yesus. 39Ambano Yesus, “Kahatoꞌaku we dhunia ini so afobhotusiꞌao, neanomo sasuka tapa mohano nafowoha, sasuka fowohano naobunto.”

40Pugauno Yesus naꞌa dofetingkee dua seemie hodua miendo Farisi ne itu. Dofeenamo ne Yesus ambado, “Patudhumu insaodi taobunto dua gahaꞌa?” 41Ambano Yesus, “Ane kotu-kotuꞌu mobuntoomu pae kodhosaomua, tamaka hampano ambamiu fowohaomu, dadiꞌanomo dhosamiu sadaa-daa.”

Currently Selected:

Yohanes 9: mnbSD

Highlight

Copy