Yohanes 13

Yesus nofewaniu aꞌendo anaguhuꞌino

13:1-20

1Tana seꞌoleo hohaeaꞌano Paska. Yesus nopandeꞌaanemo nohatomo tempono nahumunsa dhunia ini nasumuli te Amano. Anoa noasiꞌao mie mangkafie te dhunia ini, sadaa-daa noasianda ampa we kapuliaono.

2Yesus bhe anaguhuꞌino nandoo dohumaa. Kafeompuꞌando seetani padamo nokamuntui Yudas anano Simon Iskariot, nowaꞌane patudhu modai weo totono lalono so namowaꞌao Yesus ne limando kaewa. 3Yesus nopandeꞌaane Amano padamo nowaꞌane bhahi-bhahiꞌae kapooli. Nopandeꞌaane dua Anoa nomaiꞌao ne Lahataꞌala maka nasumuli dua ne Lahataꞌala. 4Dadiꞌanomo Yesus noehemo maka nolembi dhubano. Pada anaꞌa nealamo handu maka nowawee ne aano. 5Pada anaꞌa nesungkamo oe ne katoa, nofewaniu aꞌendo anaguhuꞌino maka nopusuliane handu kawaweꞌano ne aano naꞌa. 6Nohato ne Simon Petrus, nopugaumo ne Yesus ambano, “Waompu, gahaꞌa mewaniu aꞌeku?” 7Notobhoosimo Yesus, “Nehabuku ini miinaꞌo lumosangie aitu, tamaka namada kaowu lumosangiemo.” 8Ambano dua Petrus, “Paise Waompu! Ampa suhue dhamani pae mewaniu aꞌekua.” Ambano Yesus, “Ane paise amewaniu aꞌemu, hintu paise bhe taiꞌamu ne Idi.” 9Ambano dua Simon Petrus, “Waompu, bahangka koise kaowu aꞌeku, tamaka limaku bhe fotuku dua.” 10Ambano Yesus, “Ane padamo dekadiu, ingka nonggelamo koseꞌulu-ulundo. Dadiꞌanomo miinamo namaraluua damendua daekadiu, tadamewaniumo kaowu aꞌendo. Hintimiu daanumo monggelamoomu, tamaka miina kosasawimiua.” 11Yesus nopandeꞌaane laꞌae so mowae ne limano kaewa, kapugauꞌanomo, “Miina kosasawimiu monggelaomu.”

12Pada nofewaniu aꞌendo, Yesus nofokanamo toha dhubano maka suli nengkoha. Pada aitu nopugaumo ambano, “Losangieꞌomu bhahaa maꞌanano nehabuku ini? 13Hintimiu kona kanauꞌomu guru bhe Ompu, ingka anoamo naꞌa, kapaꞌamo Idimo ini guru bhe Ompu. 14Dadiꞌanomo ane Idi Ompu bhe gurumiu afewaniu aꞌemiu, hintimiu tetewei beano dua pofewa-fewaniuꞌomu aꞌe. 15Idi awaꞌangkoomu kasandaha neanomo mehabuomu dua peda nehabuku ne hintimiu. 16Amohatokoomu, kotu-kotuꞌu seemie bhatua paise namoliu kafeompuꞌano tawa seemie katudu nalumalo tumudue. 17Ane kosasawiꞌae ini pandeꞌaaneomu maka kodawua mpuu ane dhumalangieꞌomu. 18Idi apugau miina amulaoꞌao kosasawimiu, kapaꞌamo apandeꞌaanda ndo laꞌae nepiliku. Ampamo kaowu wambano Kitabi aini tetewei nakoꞌula, ‘Mie pombaliꞌaku namewangi kanau.’ #Mzm 41:9 19Aini afohatoangkoeꞌomu tinangke miinaꞌo nakumadhadhia, neanomo humato nakumadhadhia, marasaeamoomu putae Idimo ini nekonando Idi ndumandoono. #13:19 Idi ndumandoono gantino Lahataꞌala weo Kitabino Musa (Kel 3:14). 20Amohatokoomu, kotu-kotuꞌu sasuka tumahimano mie netuduku notahimamo dua Idi, sasuka tumahimano Idi notahimamo Tumudu kanau.”

Yesus bhe Yudas

13:21-30

Mat 26:21-25; Mrk 14:18-21; Luk 22:21-23

21Pada nopugau peda naꞌa Yesus nokompeahamo lalono maka nofohatoda mentalea-mentalea ambano, “Amohatokoomu, kotu-kotuꞌu seemie ne olotamiu itu namowa kanau ne limano kaewa.” 22Anaguhuꞌino tadopodoli-dolikimo, kapaꞌamo miina dakototolaloane bhahaꞌi laꞌae nepulaoꞌaono. 23Anaguhu kamoasiꞌaono Yesus, anoa ini nengkoha ne sohihino Yesus. 24Simon Petrus nokampihumo sabhangkano naꞌa notudue nameena, bhahaꞌi laꞌae nepulaoꞌaono. 25Anaguhu mengkohano ne sohihino Yesus naꞌa nodhulupiemo maka nofeena ambano, “Waompu, laꞌae bhahaa?” 26Ambano Yesus, “Mie newaꞌaoku roti so netandaku weo mangko, aituꞌaemo mieno.” Pada nopugau peda naꞌa Yesus nealamo roti, notandae weo mangko maka nowaꞌane Yudas anano Simon Iskariot. 27Sanoꞌawa roti anaꞌa Yudas nopesuakiemo Kafeompuꞌando seetani. Ambano Yesus ne Yudas, “Habumo fekahimba so nehabumu itu.”

28Tamaka ne olotando mengkoha-ngkohano momaano maitu bhe naseemie miina bhe lumosangie maꞌanano pugauno Yesus maitu ne Yudas. 29Hampano Yudas mintahanomo kaenteiꞌano dhoindo, nandoo kofekihino putae Yesus notudue nakoniꞌoli so kafaraluundo haroando naꞌa, tawa nakoniwaꞌao ne mie mokae. 30Pada notahima roti anaꞌa Yudas lasao nolimba. Oleo nohondomo.

Pahinta buꞌou

13:31-35

31Nokala kaowu Yudas, Yesus nopugaumo ambano, “Aitu kakalabhiano Anano Manusia natiwohamo bhe kakalabhiano Lahataꞌala natiwoha dua ne Anoa ini. 32Ane kakalabhiano Lahataꞌala natiwoha ne Anano Manusia, maka Lahataꞌala namotiwoha dua kakalabhiano Anano ne Wutono, maka kakalabhia aini napikitiwohamo.

33Anaguhuꞌiku, ingka paemo naomponaa aeate bhe hintimiu. Hintimiu umondofi kanauꞌomu. Tamaka pedamo pugauku ne miendo Yahudi, aitu apugauanemo dua ne hintimiu: paise mooliomua maiꞌomu we kakalaꞌaku. 34Awaꞌangkoomu pahinta buꞌou: pomoa-moasiꞌaoꞌomu. Tapedamo Idi aoasiangkoomu, nadamo dua anaꞌa hintimiu pomoa-moasiꞌaoꞌomu. 35Ane pomoa-moasiꞌaoꞌomu, kosasawindo mie damandeꞌaane putae hintimiu anaguhuku.”

Yesus nofodhaga Petrus

13:36-38

Mat 26:31-35; Mrk 14:27-31; Luk 22:31-34

36Nopugaumo Simon Petrus ne Yesus ambano, “Waompu, kumala ne amai gahaꞌa?” Ambano Yesus, “We kahopeꞌaku paise naembalia mangkafi kanau aitu, tamaka mada kaowu mangkafi kanau.” 37Ambano Simon Petrus, “Waompu, noafa so tapa kaembaliꞌano amangkafiko aitu? Idi aꞌunda amateangko.” 38Notobhoosimo Yesus, “Hintu momate kanau? Kotu-kotuꞌu amohatoko, paeꞌo nakumakuhua manu, natolu pakumo gumaga miina mandeꞌa kanau.”

Currently Selected:

Yohanes 13: mnbSD

Highlight

Copy