Yohanes 12

Yesus nominakie seemie hobhine te Betania

12:1-8

Mat 26:6-13; Mrk 14:3-9

1Tanomo oleo hohaeaꞌano Paska, Yesus nokalamo te liwuno Betania, kaeateꞌano Lasarus nefowanuno maiꞌao ne mate. 2Ne itu Yesus dopoharoaꞌane, Marta netaganaanda. Ne olotando mie momaano pombali-mbalino bhe Yesus maitu bhe Lasarus dua.

3Gahaꞌa Maria nealamo sebutolo mina warasituu napesetanga litere. Mina-mina kawondu aini noꞌali sepaliꞌa. Pada anaꞌa nosungkae ne aꞌeno Yesus maka nopusuliane wuluno fotuno, sampe wonono tanokasembo-sembomo koseꞌonuꞌae lambu. 4Tamaka Yudas Iskariot, seemie anaguhuno Yesus somo mowae ne limando kaewa, nopugaumo ambano, 5“Noafa mina-mina kawondu aini miina damasoane tolu moꞌono woka pera maka dhoino dadumawuandae mie mokae?” 6Kapugauꞌano peda naꞌa suano mbaꞌinomo noniniꞌao mie mokae, tamaka mbaꞌinomo anoa maitu seemie kasoꞌo, nentelamo nohumaa dhoi weo kaenteiꞌa dhoi neintahano. 7Nopugaumo Yesus ambano, “Heruane ae, hobhine aini nohabu peda ini somo katokano nahumato oleo katikobuhuꞌaku. 8Mie mokae sadhia dapobhai bhe hintimiu, tamaka Idi paise aeate kansuhu bhe hintimiua.”

Dopokanagau damongko Lasarus

12:9-11

9Dobhahi miendo Yahudi metingkeno putae Yesus nohatomo te Betania, sampe dokala dua te naꞌa. Kakalaꞌando suano kaowu dapoꞌawaꞌao Yesus, tamaka so damohaꞌao dua Lasarus nefowanuno Yesus maiꞌao ne mate. 10Dadiꞌanomo neangkaꞌindo imamu dosikoo-koomo damongko dua Lasarus, 11kapaꞌamo dobhahi miendo Yahudi dohunsadamo maka doparasaea ne Yesus, hampano Lasarus maitu.

Yesus doia-iaꞌe we Yerusalem

12:12-19

Mat 21:1-11; Mrk 11:1-10; Luk 19:28-38

12Hato nomentae mie bhahi maino we hohaeaꞌano Paska dofetingke putae Yesus we laanomo sala nohope we Yerusalem. 13Andoa lasao dealaꞌi hoono potubu maka dokala dosumpuiꞌe bhe dekei-kei ambado,

“Hosana, pudhi kaitaomu Lahataꞌala.

Notibarakati maino weo neano Ompu,

notibarakati Omputo miendo Israel.” #Mzm 118:25-26

14Yesus neꞌawamo seꞌulu anano keledai lasao nosawi, nopobutu bhe tibuhino weo Kitabi,

15“Koe moteꞌiomu, miendo Yerusalem, #12:15 Sakotuꞌuno: kalambeno Sion.

ondoomu omputomiu nohatomo,

nosawi ne anano keledai.” #Zak 9:9

16Wakutuu anaꞌa anaguhuꞌino miina dalumosangiea, tamaka nopalusi notiwoha kakalabhiano Yesus ⸤ ne mateno⸥ , kaneꞌomo dofeꞌulaiꞌe putae tibuhino naꞌa nopulaoꞌao Anoa, ingka padamo dua dodhalangie.

17Mie bhahi mangkafie wakutuuno noloꞌoi Lasarus nomaiꞌao weo kobuhu maka nofodadie, dosakusiiꞌaomo kadhadhia naꞌa. 18Dadiꞌanomo mie bhahi ne itu dokalamo dosumpuiꞌe, hampano dofetingke Anoamo humabuno tanda timenteꞌaono naꞌa. 19Dopugaumo miendo Farisi sapada-pada andoa ambado, “Ingka wohaꞌao wuntano matamiu, suanomo nepoolintoomua. Kosedhuniaꞌae doangkafimo Anoa.”

Yesus nofohatoanda so kamateꞌano

12:20-36

20Ne olotando mie kumalano sumambaheano ne hohaeaꞌa we Yerusalem, nandoo dua miendo Yunani. 21Mie andoa naꞌa dokalamo ne Filipus. Filipus ini nomaiꞌao ne liwuno Betsaida we kadieno Galilea. Dopugaumo ambado, “Waompu, gao mani tapoꞌawa bhe Yesus.” 22Filipus nofohatomo Andreas maka dopoowa dofohato Yesus. 23Tamaka Yesus tanotobhoosidamo ambano, “Nohatomo tempono Anano Manusia damekakalabhiaꞌe. 24Amohatokoomu, kotu-kotuꞌu ane onuno gandum pae naondawu ne wite maka namate, daa-daaꞌe seꞌonu. Tamaka ane namate, kaneꞌomo natumumbu maka naobhahi bhakeno. 25Sasuka moasiꞌaono inawano, namiinae inawano. Tamaka sasuka bansino inawano we dhunia ini, namekataaꞌe so dadi suhue dhamani. 26Laꞌae so umondofa kanau, tetewei namangkafi kanau. Ne amai kahatoꞌaku, ne ituꞌaemo dua so kahatoꞌano anoa. Laꞌae so umondofa kanau namosibhalae Amaku.

27Aitu nosabha handaku. Miina amandeꞌaanea apugauꞌao ae bhahaa. Ane apugau, ‘Ama, folapa kanau ne tempono kakadee-dee aini’, tamaka ingka kamaiꞌaku anumamisi kakadee-dee aini. 28Ama, fekakalabhia neamu.” Maka notifetingkemo suaha maiꞌao te lani, “Padamo afekakalabhiaꞌe, maka amekakalabhiaꞌe toha.”

29Mie meehe-eheno ne itu dofetingkee dua suaha aitu, tamaka dokonae guntu. Nandoo dua mugauno, “Seemie malaꞌekati nopugau bhe Anoa.” 30Ambano Yesus, “Suaha anaꞌa notifetingke suano so Idi, tamaka so hintimiu. 31Aitu nohatomo tempono o dhunia dabhitahakiemo, aitu dua Mowano Dhunia ⸤ maꞌanano Kafeompuꞌando seetani⸥ dakumabhambie we simbali. 32O Idi ini mada kaowu dasumangke kanau te melangkeꞌano te wawono dhunia ini, maka kosasawindo mie ahumelada damai se Idi.” 33Kapugauꞌano peda naꞌa nofohatoanda nada amai so kamateꞌano.

34Dotobhoosimo mie bhahi ambado, “Padamo tafetingke maiꞌao ne Kitabi, ingka Mesias Omputo Fosalamatino nadumadi ampa suhue dhamani. Noafaꞌao dua pugau Anano Manusia dasumangkee te melangkeꞌano? Laꞌae bhahaa Anano Manusia maitu?” 35Ambano Yesus, “Tana seendai tempono tilanga nandumandoo ne olotamiu. Tinangke nandoo bhe tilanga maitu mekala-kalamoomu, keana nohatofikoomu kahohondo. Sasuka mekala-kalano weo kahohondo miina namandeꞌaanea so kahopeꞌano. 36Parasaeamoomu ne Tilanga maitu, tinangke nandooꞌe bhe hintimiu, neanomo membaliomu miendo tilanga ⸤ maꞌanano mie mangkafino kapoindalono Lahataꞌala⸥ .” Pada nopugau peda naꞌa Yesus nokalamo, nokiidomo namotiwoha Wutono ne andoa.

Noafa tapa kaparasaeaꞌando miendo Yahudi

12:37-43

37Mahinggamo Yesus nobhahimo sepaliꞌa nofotiwohaanda tanda timenteꞌaono, tamaka miina dua damarasaea ne Anoa. 38Kakadhadhiaꞌano peda aini nokoꞌulaꞌao wambano anabii Yesaya,

“Ompu, nandoo bhahaa marasaeano bhihita neowa mani?

Laꞌae bhahaa mohano kuasano Ompu?

⸤ Ingka bhe naseemie miina.⸥ ” #Yes 53:1

39Pedamo anaꞌa tapa kaembaliꞌando doparasaea, kapaꞌamo Yesaya padamo nopugau dua peda aini, 40⸤ Ambano Lahataꞌala,⸥

“Padamo afekabuntoda bhe asongko totono lalondo,

keana dofowohaꞌao matando bhe dolosangiꞌao totono lalondo.

Dadiꞌanomo paise dadumoli se Idi maka amekaꞌosada.” #Yes 6:10

41Yesaya nopugau peda ini mbaꞌinomo nowohae kakalabhiano Yesus bhe padamo dua nokowambaane.

42Mahinggamo peda anaꞌa, dobhahi dua neangkando miendo Yahudi marasaeano ne Yesus. Tamaka miina daokadoa doꞌakui kaparasaeando kapaꞌamo doteꞌi miendo Farisi, bhahaꞌi tadoꞌeleꞌaanda damesua weo lambu kasambaheaꞌa. 43Andoa doasiane kafosibhala ne manusia bhe ne Lahataꞌalaa.

Bhoasaono Yesus fohukumuno

12:44-50

44Yesus nofekabhala toha suahano ambano, “Sasuka marasaeano ne Idi miina kaowu namarasaea ne Idi, tamaka noparasaea ne Tumudu kanau. 45Ane dowoha Idi, dowohamo dua Tumudu kanau. 46Kahatoꞌaku ne dhunia ini aembali tilanga, neanomo sasuka marasaeano ne Idi paise naeate weo kahohondo. 47Ane dofetingke kafoinaꞌuku, tamaka miina damangkafie paise ahumukumue Idi, kapaꞌamo kahatoꞌaku paise ahumukumu dhunia ini, tamaka amosalamatie. 48Sasuka mokiido kanau bhe miina natumahima kafoinaꞌuku, nandoomo so humukumue. Wambakumo toka nepugauꞌao naꞌa, somo humukumue ne Oleono Kiama. 49Kapaꞌamo wambaku ini miina namaiꞌao ne Wutokua, tamaka nomaiꞌao ne Amaku. Amaku tumudu kanau, Anoamo mahintangi kanau bhe nofohato kanau o ae so nepugauꞌaoku bhe so nefosampeku. 50Apandeꞌaane pahintano neowa dadi suhue dhamani. Dadiꞌanomo wamba nepugauꞌaoku, ingka o bhoasaonomo dua Amaku ne Idi.”

Currently Selected:

Yohanes 12: mnbSD

Highlight

Copy