Yohanes 11

Yesus nofowanu Lasarus nomaiꞌao ne mate

11:1-44

1Nandoo seemie mosakino neano Lasarus. Anoa neate we liwuno Betania, liwundomo dua Maria bhe Marta aino. 2Mariamo ini hobhine meꞌobhano mina-mina kawondu ne aꞌeno Yesus maka nopusuliane wuluno fotuno. Lasarus mosakino naꞌa finimoꞌanendo. 3Hobhine andoa naꞌa depakatumo bhihita ne Yesus ambado, “Ompu, mie nemoasiꞌaomu nosaki.” 4Nofetingke bhihita anaꞌa Yesus tanopugau ambano, “Saki anaꞌa paise naeowa mate, tamaka namotiwoha kakalabhiano Lahataꞌala, natiwohaꞌao dua kakalabhiano Anano Lahataꞌala.” 5Yesus noasiꞌao Marta bhe aino hobhine bhe Lasarus. 6Tamaka pada nofetingke putae Lasarus nosaki, Yesus nandoo dua neate ne itu tahaa oleo.

7Palusi anaꞌa nopugaumo ne anaguhuꞌino ambano, “Maimoomu dosuliomu we Yudea.” 8Ambado anaguhuꞌino, “Guru, ingka haꞌo-haꞌoleo ini miendo Yahudi dabhatuhiangko kontu. Nandoo dua sumuli we watu?” 9Ambano Yesus, “Ingka seꞌoleo ompulu haa dhamu. Sasuka mekala-kalano ole-oleo paise natitunoa, hampano nandoo nowoha kantaleano dhunia ini. 10Tamaka sasuka mekala-kalano kohondoꞌa natituno, hampano miina nakokantaleaꞌa ne wutonoa.”

11Pedamo anaꞌa wambano Yesus. Pada aitu nopugaumo dua ambano, “Lasarus sabhangkantoomu noodomo, tamaka akumala amowanue.” 12Maka ambado anaguhuꞌino, “Ompu, ane naodo, kaowua naoꞌosamo.” 13Gahaꞌa noodo naꞌa weo patudhuno Yesus nomatemo, kunaꞌendomo kaodo melaa. 14Dadiꞌanomo Yesus nopugau mentalea-mentalea, “Lasarus nomatemo. 15Tamaka aoꞌia miina bhe Idia ne naꞌa, kapaꞌamo netaamo peda naꞌa so hintimiu, neanomo poguhuomu marasaeaꞌomu. Maimoomu dokalaanaomu we anoa.” 16Tomas nekonando dua Didimus (maꞌanano o kalopo) nopugaumo ne sabhangkaꞌino anaguhu sigaoꞌano ambano, “Maimoomu, dokalaanaomu bhe intaodiomu, mahingga dasimate-mateꞌaomu bhe Anoa.”

17Gahaꞌa nohato we naꞌa, Yesus dofohatoemo putae Lasarus fato oleomo dokobuhue. 18Liwuno Betania naꞌa nokomaꞌo bhe Yerusalem, napetolu kilo kakodoꞌonoa. 19Ne itu dobhahi miendo Yahudi toka humatono dolawesi Marta bhe Maria aino, hampano isando mateno maitu. 20Nofetingke kaowu Yesus nohatomo, Marta lasao nokala nosumpuiꞌe, tamaka Maria neate we lambu. 21Ambano Marta ne Yesus, “Waompu, ane bhe Hintu ne ini, finimoꞌaneku tetewei paise namatea. 22Tamaka aitu apandeꞌaane dua, Lahataꞌala tetewei namaꞌangko sabhaha kamesalomu ne Anoa.” 23Ambano Yesus ne Marta, “Finimoꞌanemu itu namanu namaiꞌao ne mate.” 24Ambano Marta, “Ingka apandeꞌaane namanu namaiꞌao ne mate nahumato kawanuꞌando mie mate ne Oleono Kiama.” 25Ambano Yesus, “Idimo ini fofowanuno maiꞌao ne mate bhe meowano dadi. Sasuka marasaeano ne Idi nadumadi mahinggamo nomatemo. 26Sasuka mie dumadi marasaeano ne Idi paise namatea suhue dhamani. Parasaea kaa miina?” 27Ambano Marta, “Uumbe Waompu, aparasaea Hintumo Mesias Omputo Fosalamatino, Anano Lahataꞌala so humatono ne dhunia ini.”

28Pada nopugau peda naꞌa Marta nokalamo nosaliꞌi Maria aino bhe nokamuntuiꞌe ambano, “Guru nohatomo, nobhasiko.” 29Nofetingke peda naꞌa Maria lasao noehe nokalamo nopoꞌawaane. 30Tamaka wakutuu aitu Yesus miinaꞌo namesua weo liwu, nandooꞌe we katisumpuiꞌano ne Marta saꞌituini. 31Miendo Yahudi maino lumawesino Maria we lambu dowohae noehe lasao nokala, dadiꞌanomo doangkafiemo dua, kunaꞌendomo nakumala naoꞌae we kobuhu.

32Sanohato we kafetumpuꞌano Yesus bhe nowohaemo, Maria lasao nolongko ne aꞌeno bhe nopugau ambano, “Waompu, ane bhe Hintu ne ini finimoꞌaneku tetewei paise namatea.” 33Nowoha Maria noꞌae bhe miendo Yahudi mangkafie doꞌae dua, Yesus nosabha handano bhe nokompeaha lalono. Nopugaumo ambano, 34“Ne amai kobuhueꞌomu?” Ambado, “Waompu, mai wohaꞌao Wutomu.” 35Yesus tanopotuhumo luuno. 36Ambado miendo Yahudi, “Wohaomu itu, kaꞌosano kaasino ne Lasarus.” 37Seemie hodua ne olotando dopugaumo ambado, “Ingka nefekantalea matando kabunto. Pae namoolie bhahaa naeꞌondofiane dhala keana nomate?”

38Yesus nofenduamo nokompeaha lalono maka nohatomo se kobuhu. Kobuhu anaꞌa o lia dosongkoane kontu bhalano. 39Ambano Yesus, “Fogampieꞌomu kontu aitu!” Marta aino mateno maitu nopugau ambano, “Waompu, nokowonomo, ingka fato oleomo nomate.” 40Ambano Yesus, “Ingka padamo afohatoko, ane marasaea omoha kakalabhiano Lahataꞌala.” 41Dadiꞌanomo dofogampimo kontu anaꞌa. Pada aitu Yesus nototohanamo bhe nopugau ambano, “Ama, notumpu laloku ne Hintu hampano fetingke kanau. 42Apandeꞌaane sadhia fetingke kanau, tamaka kapugauꞌaku ini so mie lumibu-libu kanau ini neanomo damarasaea Hintumo tumudu kanau.” 43Pada nopugau peda naꞌa Yesus noloꞌoimo nofekabhala-bhala suahano, “Lasarus, limbaꞌo toha!” 44Mie mate naꞌa lasao nolimba, aꞌeno bhe limano nandoo nokakompoe kawalu, ulano dogantuane kabhia-bhia. Yesus nopugauandamo ambano “Lenseeꞌomu nekala-kalaꞌao.”

Dopokanagau damongko Yesus

11:45-57

Mat 26:1-15; Mrk 14:1-2; Luk 22:1-2

45Dobhahi miendo Yahudi maino lumawesino Maria doparasaeamo ne Yesus, hampano dowohaꞌao wuntano matando nehabuno maitu. 46Tamaka nandoo dua kumalano ne miendo Farisi maka detula-tulaꞌao nehabuno Yesus maitu. 47Dadiꞌanomo neangkaꞌindo imamu bhe miendo Farisi dofohompumo Sahano Agama bhe dopugau ambado, “Daeafaꞌimoomu bhahaa? Ingka mie amaitu nobhahi sepaliꞌa nehabu tanda timenteꞌaono. 48Ane tadakumatahomo kosasawindo mie damarasaea ne Anoa, mada kaowu damai tantarando Roma damobinasa Lambuno Lahataꞌala ini bhe kosasawindo raꞌeati.”

49Ne olotando maitu nandoo seemie neano Kayafas, o Imamu Bhalano ne taꞌu aitu. Nopugaumo ambano, “Hintimiu ini miina konipandeꞌaoꞌomua. 50Miina dua lumosangieꞌomua gahaꞌa, ingka nokofahalaa namate seemie so raꞌeati, bhe dabinasa koseꞌonu liwuntoomua.” 51Kapugauꞌano peda maitu miina namaiꞌao ne wutonoa, tamaka hampano nembali Imamu Bhalano ne taꞌu aitu, nokosuaha peda anabii putae Yesus namate so raꞌeati maitu. 52Gahaꞌaitumo suano kaowu so raꞌeatino Yahudi, tamaka nomateꞌao dua kosasawindo anano Lahataꞌala tikambisano, neanomo sumuli namoꞌonuda bhe namoseꞌiseda.

53Notanda oleo aitu andoa dosikoo-koomo damongko Yesus. 54Dadiꞌanomo Yesus miinamo naefemata-mataa naekala-kala ne olotando miendo Yahudi. Anoa nokalamo we owano pandaso bhalano ne seꞌonu liwu nekonando Efraim maka neate ne itu bhe anaguhuꞌino.

55Wakutuu anaꞌa nomaꞌomo Paska, hohaeaꞌando miendo Yahudi. Dadiꞌanomo dobhahi mie maiꞌaono ne sabhaha liwu dokala we Yerusalem damekangkilo wutondo ne wiseno Ompu, tinangke miinaꞌo nahumato oleono Paska. 56Andoa doꞌondofimo Yesus, poowa deehe-ehemo weo Lambuno Lahataꞌala dopofee-feenamo, “Peda ae fekihimiu, namai dua bhahaa Yesus ne hohaeaꞌa ini?” 57Kapugauꞌando peda anaꞌa kapaꞌamo neangkaꞌindo imamu bhe miendo Farisi padamo defolimba pahinta, putae laꞌae so mohano Yesus tetewei damohatoda, mudaꞌao dahumakoe.

Currently Selected:

Yohanes 11: mnbSD

Highlight

Copy