Marko 3

1Ni akayingili kawili mu sunagoge; na akayili bahapa mundu ayii ni kiwoko kya kuyuya. 2Na wandolalili, pangi yandwase pa ligono lya sabato; nausi wandungamakile. 3Na anjowela mundu yula ayii ni kiwoko kya kuyuya, Yima pagati. 4Na awajowela, Wila kiyitikalika pa ligono lya sabato kukita kinofu, pangi kukita kiwifu? kuyokola wumi, pangi kukoma? Leka wakatemi kinunu. 5Na pala akawagelawini pamonga nu kudada, pa kunyungunyika ndawa ya kunonopa mioyo yawe, anjowela mundu yula, Tambalisa kiwoko kyako. Na akatambalisi: ni kiwoko kyake kikakilawusiki. 6Na pakapititi waFarisayo, hino apa wakayili mu kupangana malango pamonga na waHerode kumpindika yombe, umu wanjanangile.

7Nu Yesu pamonga na wanafunsi wake akawukiti mwanja ku nyanja: ni lipuga likulungu likankisiti yombe kuhumila Galilaya: 8ni kuhuma pa Yudaya, na pa Yerusalem, na pa Idumaya, na pa lisi lingi lya Yordan, na pa kusyungutila Turo ni Sidon, lipuga likulungu, pa kuyufwana fiyi fyoha fila afikiti, wakanchilili yombe. 9Na akajowiti kwa wanafunsi wake, nausi kaboti kangohe ngani ndawa ya lipuga, kukita wasimfinyikisa: 10pakuya akalwasiti wingi; mpaka woha wakayili ni mitowo wakangwilili nausi wankwafye. 11Na roho sya wafu, payi poha sikandolakisi, sikagwili pasi palongolo pake, ni sikuwiti, kujowa, Wenga uyii Mwana wa Mulungu. 12Na akawataukili muni nausi wasinkita yombe wakumanyika.

13Na akwela pa kidunda, na ayikemelela wala akalonditi mwene: na wakabiti kwake. 14Na akawawikiti kumi na wawili, nausi waye pamonga nuyombe, ni nausi awatume kuwandisa, 15ni waye ni chengo kya kutaga kunja madaimon: 16ni akampili Simon lihina lyake Petro; 17ni Yakobo mwana wa Zebedayo, nu Yohana nung’una wa Yakobo; wala nawombe akawapili lihina lya Boanerges, liyii, Wana wa mbamba: 18nu Andrea, nu Filipo, nu Bartolomayo, nu Mattayo, nu Tomaso, nu Yakobo mwana wa Alfayo, nu Thadayo, nu Simon mKananayo, 19nu Yuda Iskariota, yula kawili akamfumbwili.

20Ni ayingila mu nyumba. Ni lipuga lichita kawili pamonga, mpaka nukuhotola wombe haka kulya nkate. 21Na apa wakayufwini wa kwake, wakapititi kunkamula: pakuya wakajowiti, Alutila muni. 22Na wakulembela wala wakaselili kuhuma pa Yerusalem wakajowiti, Ayii ni Beelzebub, ni, Kwa nduna wa madaimon ataga kunja madaimon. 23Ni akawakemili kwake, nakawajowili pa ngongo, Ahotola wuli Shetani kutaga kunja Shetani? 24Ni wona utwa ugawika kwipindika mugati mwake, uhotola lepe utwa wula kuyima. 25Na wona nyumba yigawika kwipindika mugati mwake, yayihotole lepa nyumba yila kuyima. 26Na wona Shetani ayimiti kwipindika mwene, na agawika, ahotola lepa kuyima, koma ayii pa umalilo. 27Leka pa waka mundu ahotola kuyingila pa nyumba ya mwene mbafu, ni kunyaka misewenje yake, wona alemiti pa kutumbula kunkunga yuyu mwene mbafu; na bahalapala yafufule nyumba yake. 28Chakaka niwajowela, Sambi syoha yasilekeleseke kwa wana wa adam, nu blasfemia syawe siyi syoha yawasikite: 29koma ayi yoha uyu yankitile Roho Mbalafu blasfemia ayilepe ni kulekelekesa miaka, leka apisika mhalo wa sambi ya miaka: 30ndawa wakajowiti, Ayii ni roho ya wafu.

31Ni wahicha nyina mundu na walongo mundu; na kuyima kunja, wakatumiti kwake, kunkemela. 32Ni lipuga likayili mu kutama pasi kunsyungutila; na wanjowela, Lola, nyoko na walongowo wayii panja kukulonda. 33Na pakahigiti akajowiti kwa wombe, Mao ayii nani na walongo wangu wayii nani? 34Na pakagelawini pa wala wakutama pasi kunsyungutila, ajowa, Lola, mao wangu na walongo wangu! 35Pakuya ayi yoha uyu yakite kila akilonda Mulungu, yuyu ayii ndongo wangu, nu ndumbu wangu, nu mao wangu.

Currently Selected:

Marko 3: MGS1937

Highlight

Copy