Mattayo 11
11
1Leka ikayili kukita pala Yesu akamaliti kuwataukila wanafunsi wake kumi na wawili, akawukiti bahapa kuwula ni kuwandisa mu makaya gawe.
2Leka Yohana pakayufwini pa kukungika makitiko ga Kristo, akatumiti pa mawoko ga wanafunsi wake, 3nakajowiti kwa yombe, Wila wenga uyii yula ahicha, pangi yatindolalele yungi? 4Na pakahigiti Yesu akajowiti kwa wombe, Mubitaye mwanja winu na munkokosele Yohana fila muyufwana ni mufiwona: 5wakukoyoka miho walola kawili, na wakuchipila wagenda‐genda, wa matana waguyulika, na wa kisiwasi wayufwana, na wakufwa wasyusiki, na kwa wagaju evangel yiwandasika. 6Na wakusengwa yula yaleme kukuwasika nu nenga. 7Leka pakubita mwanja wombe, Yesu akatumbwili kuwajowela mapuga fya Yohana, Kiki mukabiti ku dasi kukilolakesa? lidete lya kunyuka‐nyuka ni mbepo? 8Koma kulola kiki mukabiti? mundu wakufwata fyakutipitala? Lola, wala wakufwata fyakutipitala wayii pa nyumba sya watwa. 9Koma mukabiti kiki? kulola wakulweta ati? Ena, niwajowela, kulutila wakulweta. 10Yombe uyu kwalembiki kujowa,
Lola, nituma ntenga wangu palongolo pa miho pako,
Uyu yawikile ngani ndila yako palongolo pako.
11Chakaka niwajowela, Pa wala wakuhogoleka na wadala nakuyima lepa nkulungu kulutila Yohana Wakubatisa; leka uyu ayii nchoko pa utwa wa Mulungu, ayii kundutila yombe. 12Leka kitumbulile magono ga Yohana Wakubatisa mpaka hino utwa wa Mulungu ukikisika, na wakukikisila waunyaka kwa mbafu. 13Pakuya wakulweta woha ni torah wakalwetiti mpaka Yohana. 14Na wona mulonda kukiyupa, uyu yuyu Eliya yula ayii mu kuyicha. 15Uyu ayii ni makutu gakuyufwanila ayufwanaye. 16Leka ni kiki yanihwanakise kihogosi iki? Kihwanangana ni tuwana tututama pa machengo, tula tukemelana nu tuyawe, kujowa, 17Tikawakuwili fitulilo, na mukahiniti lepa; tikaliliti malilo, na mukaliliti lepa. 18Pakuya Yohana akachiti nukulya nukunywa, na wajowa, Ayii ni daimon. 19Mwana wa adam akachiti kulya na kunywa, na wajowa, Lola, mundu wa lulyo, na wakunywa mvinyo, nkosi wa wakuyupa nsongo na wene sambi! Na malango gapitiwa gakugoloka kuhuma pa makitiko gake.
20Bahalapala akatumbwili kukalapila makaya gala umu fingi fya makakala gake fikitiki, ndawa gakapeliti lepa. 21Ling’aho kwako, Korazin! ling’aho kwako, Bethsaida! ndawa wona pa Turo ni Sidon ngafikitiki fya makakala fila fikakitiki pa mwenga, mwandikati ngagapeliti pa mapinda na lifu. 22Koma niwajowela, mihalo ya Turo ni Sidon yayiye yakutopa lepa pa ligono lya kupawula, ngati yinu mwenga. 23Na wenga, Kapernaum, wila yaukweseke mpaka kunani? yauselele mpaka pandu pa mahoka: ndawa wona pa Sodom ngafikitiki fya makakala fila fikakitiki pa wenga, ngauhweliti mpaka lilino. 24Koma nikujowela wenga, mhalo wa Sodom pa ligono lya kupawula yautope lepa ngati wako.
25Pa lukumbi lululalula Yesu akahigiti ni kujowa, Nikusengusa, Dadi, Bambo wa kunani nu ndima, ndawa findu ifi ukawafihiti wala wa luhala na wakumanya, leka uwafunukulili wakeke: 26ena, Dadi, ndawa wiwi kikayili kinofu pa miho pako. 27Fyoha fikapelakiki kwangu nu Dadi wangu: na payilepe wakummanya Mwana, lema Dadi; haka payilepe wakummanya Dadi, lema Mwana, na ayi yoha yula Mwana alonda kumfunukulila. 28Muhichaye kwangu, woha mwenga wakutonda na wakutopeleka ni misigo, nenga nani yaniwapumise. 29Mwitwike lingoli‐ngoli lyangu, na mwiwule kwa nenga; ndawa na mwololo niyii ni wakwiselesa mu mwoyo: na yamukolele kupumulila mu mawumi mwinu. 30Pakuya lingoli‐ngoli lyangu nakutopa lepa, ni nsigo wangu uyii wakuyuyuka.
Currently Selected:
Mattayo 11: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
