Luka 20

1Ni yikayili kukita pa ligono limonga, pa kuwula nsafi pa hekalu, ni kuwandisa evangel, wakanjichili makasisi makulungu ni wakulembela ni wakuluwakulu; 2na wakajowiti, kunjowela, Utitawile: Kwa chengo wuli ukita ifi? pangi nani uyu akupili chengo iyi? 3Leka yombe akahigiti, nakajowiti kwa wombe, Nenga nani yaniwakote likoto; na munitawile: 4Ubatiso wa Yohana, ukayili wa kuhumila kunani, pangi pa wandu? 5Leka wombe wakakotini ni wakawene, kujowa, Wona titawila, Kuhumila kunani; yajowe, Ndawa kiki mukankeliti lepa? 6Leka wona titawila, Pa wandu; nsafi woha yautitumalile maganga: pakuya wakopiki kukita Yohana akayili wa kulweta. 7Na wakahigiti, Timanya lepa. 8Nu Yesu akajowiti kwa wombe, Haka nenga niwajowela lepa kwa chengo wuli nifikita ifi.

9Leka akatumbwili kuwajowela wandu ngongo iyi: Mundu akapanditi ngunda wa mbelesa, na akauyasamisi kwa wa kulima, na akahamiti ngumbi sya kuyenela. 10Ni pa lukumbi, akatumiti kwa wa kulima wala mbanda, nausi wampele fya fipambiko fya mu ngunda: leka wakulima wakantowiti na wakankilawisi waka. 11Na ndemuko akampeliki mbanda yungi: leka wombe wakantowiti yuyulayula kawili, na wakamhepiti, na wakankilawisi waka. 12Na pa ndemuko akampeliki wa kadatu: leka pa wakantemiti mawanga yula kawili, wakantagiti kunja. 13Leka bambo wa ngunda wa mbelesa akajowiti, Yanikite kiki? yanintume mwanangu wa kuganika: pangi yawanginike. 14Leka wa kulima, pa wakambweni, wakakotini yungi ni njini, kujowa, Uyu yuyu wakuyingila lipwela: tinkome, na lipwela yaliye litu. 15Na wakantagiti kunja kwa ngunda wa mbelesa, na wakankomiti. Mumu bambo wa ngunda yawakitile kiki? 16Yahiche na yawayanange wa kulima wala, nu ngunda wula yawapele wangi. Leka pa wakayufwini, wakajowiti, Kisiya wila. 17Leka yombe apa akawakwinulili, akajowiti, Mumu kiki iki kilembiki,

Liganga lila wakalikaniti wa kujenga nyumba,

Lililalila likapatiti kuya liganga lya ndusula?

18Ayi yoha uyu agwa pa liganga lila yadumulike‐dumulike; leka yula yalingwilile, yalinsiage yombe.

19Na wa kulembela na makasisi makulungu wakalonditi kumbikila mawoko pa saa yila; na wakayogwipi nsafi: pakuya wakawalalili kukita kuwapindika wombe akajowiti ngongo iyi. 20Na wakandolalili yombe, na wakatumiti wakusela, wa kwikupakisa kukita wayii wa malinga, nausi walikamule lilowe lyake, mpaka kumfumbukisa kwa utwa ni chengo kya nduna. 21Na wakankotiti, kujowa, Mwalimu, timanya kukita ujowa ni kuyigalisa fya chakaka, na ulolalela lepa kyene kya mundu, koma uyigalisa ndila ya Mulungu pa fya chakaka: 22Iyitikalika pa chengo, ati, timpele Kaisar nsongo, pangi nukuya wila? 23Koma pakawalalili uchenjefu wawe, akajowiti kwa wombe, Munilase denario. 24Kya nani kifwilifwili iki, ati, ni malembo? Na wakajowiti, Kya Kaisar. 25Leka akajowiti kwa wombe, Mumu mumpele Kaisar findu fya Kaisar, nu Mulungu findu fya Mulungu. 26Na wakayili nukuhotola lepa kulikamula lilowe ili pa miho ga nsafi: na wakakangichi pa lihigo lyake, na wakatemi kinunu.

27Na wakanjichili wangi wa waSadukayo, wala wajowa kusyuka pa waka; 28na wakankotiti, kujowa, Mwalimu, Musa akatilembili, wona afwili mbele mundu, ayii nu mhanu mundu, nuyombe ayii wangali mwana, nung’una antole mhanu mundu, na anjimakile mbele mundu mbeyu. 29Mumu wakayili walongo saba: na wakutumbula akantoliti ndala, na akafwili wangali mwana; 30na wa kawili; na wa kadatu akantoliti yombe; 31leka wiwila saba wala wakalekiti lepa wana, na wakafwili. 32Pa kumalakisa ndala yula akafwili kawili. 33Mumu pa kusyuka yaaye mhanu wa nani wa wala? pakuya saba wala wakatemi nako mhanu mundu. 34Nu Yesu akajowiti kwa wombe, Wana wa ndima uwu watuwula ni watuwulika: 35koma wala walangika kuyenela kupata miaka yiyilayila, ni kusyuka kwa wa kufwa, watuwula lepa, watuwulika lepa: 36pakuya haka kufwa wahotola lepa kawili: pakuya wayii kimonga‐monga na wamalaika: ni wana wa Mulungu wayii, pakuya wana wa kusyuka kula. 37Leka kukita wakufwa wasyuka, haka Musa akalasiti, pandu pa Matutu, pala ankemela Bambo Mulungu wa Ibrahim, ni Mulungu wa Isaak, ni Mulungu wa Yakobo. 38Ayilepe Mulungu wa wakufwa, koma wa wakulama: pakuya woha wandamila yombe. 39Na wangi wa wakulembela wakahigiti, Mwalimu, ukajowiti wicho. 40Pakuya wombe wakasindamili lepa kunkota kawili kindu.

41Na akajowiti kwa wombe, Wajowa wuli kukita Kristo ayii mwana wa Daudi? 42Pakuya Daudi mwene ajowa pa kitabu kya Saburi,

Bambo akajowiti kwa Bambo wangu,

Tama pasi kiwoko kyangu kya ndilo,

43Mapaka apa yaniwawike wa mitumba wako kyakuwikila kya njayo syako,

44Mumu Daudi ankemela Bambo, ni ayii wuli mwana mundu?

45Leka pakuyufwana pa nsafi woha, akajowiti kwa wanafunsi wake, 46Mwilolalele kwa wakulembela, wala walonda kugendagenda pa mingila milachu, wawagana malowe ga kulamusana mu machengo, ni fitihu fya liginiko mu masunagoge, ni pandu pa liginiko pa fyakulya: 47wala walisa nyumba sya wafwili, ni pa kuwoneka wasali sala sitali: wala yawapisike mhalo wa kulutila.

Currently Selected:

Luka 20: MGS1937

Highlight

Copy