Luka 11

1Ni yikayili kukita pakuya yombe pandu kitinu kusali, pakakotwiki, yumonga wa wanafunsi wake akajowiti kwa yombe, Bambo, utiwule tenga kusali, ngati umu Yohana akawawuliti wanafunsi wake. 2Leka akajowiti kwa wombe, Apa yamusali, mujowe, Dadi, Lihina lyako liwalalike. Utwa wako uyiche. 3Utipele ligono ni ligono kyakulya kitu kya ligono. 4Na utilekelekese sambi situ; pakuya tenga nati tiwalekelekesa ayi yoha yuayili ni misigilo na tenga. Na usititolela kuyingila pa kugeseka.

5Ni akajowiti kwa wombe, Nani wa mwenga yuayili ni nkosi, na yangendele mwanja pagati kilo, na yajowe kwa yombe, Nkosi, unipingise mikate yidatu; 6ndawa nkosi wangu anifikili kuhuma pa mwanja, na niyilepe ni kya kumbakulila; 7nuyombe wa mugati yahige ni kujowa, Usinihumbusa: hino litanga lidindiki, na wanangu wayii pamonga nu nenga pa lugono; nihotola lepa kuyimuka ni kukupela? 8Niwajowela, Haka yayimuke lepa ni kumpela, ndawa ayii nkosi mundu, koma ndawa ya kuyumalakila kwake yayimuke ni kumpela fyoha fila afililila. 9Nenga nani niwajowela, Muluwe, ni yakipelewe kwinu; mulondelonde, ni yamukolele; mukinge, ni yakidindulike kwinu. 10Pakuya ayi yoha uyu aluwa ayupa; ni wakulondalonda akolela; ni kwa wakukinga yakidindulike. 11Leka nani wa mwenga dadi yanduwe mwana mundu nkate, na yampele liganga? pangi somba, na pandu pa somba yampele liyoka? 12Pangi yaluwe lihumbi, na yampele kipilili? 13Mumu wona mwenga, pakuya wawifu, mumanya kuwapela wana winu fiyetulo finofu, apa Dadi winu wa kunani si kulutila yawapele wala wakunduwa Roho Mbalafu?

14Ni akayili mu kutaga kunja daimon mbuwuta. Leka yikayili kukita, pakapititi daimon, mbuwuta akalongili; na mapuga gakakangichi. 15Leka wangi wakajowiti, Pa Beelzebub nkulungu wa madaimon ataga kunja madaimon. 16Na wangi, kungesa yombe, wakalonditi pa yombe kiwalalilo kuhumila kunani. 17Leka yombe, pakamanyi maholo gawe, akajowiti kwa wombe, Utwa uyi woha wona ugawikana mugati mwake ulemaneka; ni nyumba kwipindika nyumba yigwa. 18Na wona Shetani kawili mugati mwake agawikana, yauyime wuli utwa wake? ndawa mujowa, pa Beelzebub nenga nitaga kunja madaimon. 19Leka wona nenga pa Beelzebub nitaga kunja madaimon, pa nani wana winu wagataga kunja? kwa ndawa iyi wombe yawaye wakupawula winu. 20Leka wona nenga nigataga kunja madaimon pa kikonji kya Mulungu, utwa wa Mulungu uwafikili. 21Pala mwene mbafu, wa kufwata fya ngondo fya mfilimila, alindalila pa lihegele lyake mwene, findu fyake fiyii pa kindamba: 22leka mwene mbafu wa kundutila yombe, wona anjichila na kumhotola, anjupa fya ngondo fila akafihuwalili, na agawa fya mateka fyake. 23Yuyu nukuya pamonga na nenga ayii wakunipindika; na yula awungana lepa nu nenga ayambanisa waka. 24Roho ya wafu wona yipititi mwa mundu, yigenda ntambo wangali machi, kilondile pa kupumulila; na pa kupakolela lepa, bahalapala yijowa, Yanikilawukile kuyingila pa nyumba yangu uko nikapititi. 25Na pa kuhicha yiyikolela yipyagaliki, yitendakasiki. 26Bahalapala yibita, ni yitola roho singi saba pamonga nuyombe siwifu kulutila yene; ni siyingila mula ni sihwela mumula: na matamilo ga kumalakila ga mundu yula gakitiki mawifu kulutila gala ga kutumbula.

27Leka yikayili kukita, pakujowa yombe malowe aga, ndala nunuyu wa pa lipuga akakwesiti lilowe, nakajowiti kwa yombe, Lwakusengwa luleme lulu lukakuhogwili, na mawele gala ukagayongiti. 28Koma yombe akajowiti, Muni muni wa kusengwa wala wayufwana lilowe lya Mulungu, ni kuligoha.

29Leka pala mapuga gakayili mu kumbunganakila, akatumbwili kujowa, Kihogosi iki kihogosi kiwifu: kilondalonda kiwalalilo; leka yakipelewe kwawe lepa lema kiwalalilo kya Yona. 30Pakuya ngati umu Yona akapatiti kuwayila wa Nineve kiwalalilo, mumu kawili Mwana wa adam yaaye kwa kihogosi iki. 31Mutwa ndala wa ku nkachi yayimakike pa kupawula kula pamonga na wagosi wa kihogosi iki, na yawapise wawifu: ndawa akachiti kuhumila pa songo sya ndima kuyufwanila malango ga Solomon; na lola, wa kundutila Solomon ayii apa. 32Wagosi wa Nineve yawayime pa kupawula kula pamonga ni kihogosi iki, na yawakipise kiwifu: pakuya wakapeliti pa kuwandisa kwake Yona; na lola, nkulungu wa kundutila Yona ayii apa.

33Nukuya mundu apamba nyali, na ayiwika kiyingalile pa kimbetula, haka pasi pa kikong’ondela, koma pa kuwikila nyali, nausi wala wayingila mumu walole lulangalila lula. 34Nyali ya mbili wako yiyii liho lyako: pala liho lyako liyii limonga, mbili wako wa mfilimila kawili umemiti nu lulangalila; leka wona liyii liwifu, mbili wako wa mfilimila kawili umemiti nu lwisi. 35Mumu ulole nausi lulangalila lula luyii pa wenga lusiya lwisi. 36Mumu wona mbili wako wa mfilimila umemiti nu lulangalila, wangali lilundu liyi lyoha lya lwisi, wa mfilimila yauye wa lulangalila, ngati pala nyali yimulikila ni kukupela lulangalila.

37Leka pa kulongela yombe, mFarisayo ankota alye kwake: na akayingili, nakatemi pasi kulya. 38Leka pakaweni mFarisayo, akaganaganiti pakuya akakusiti lepa mawoko gake palongolo pa kulya. 39Leka Bambo akajowiti kwa yombe, Hino mwenga waFarisayo muguyula kya kunja kya ntimbo na kya kiheneko; leka mugati mwinu mumemiti fya kuyupika nu uwifu. 40Mwenga wahimu, yula akapangiti kya kunja si yuyu akapangiti kya mugati ati? 41Haka fya mugati mupelekaye fya lipyana; na lola, fyoha fiyii fyakuguyulika kwinu.

42Koma ling’aho kwinu waFarisayo! pakuya mulipa kyakumi kya kinunganunga ni rue ni likolo lyoha, ni mugwala pa kupawula ni pa kiganano kya Mulungu: koma ifi mulinganila kufikita, ni fifilafila ngakufileka waka. 43Ling’aho kwinu waFarisayo! pakuya mugana fitihu fya liginiko pa masunagoge, ni malowe ga kulamusa pa machengo. 44Ling’aho kwinu! ndawa muyii ngati manyinja gala gangawoneka, na wandu wakugendagenda panani pawe nakumanya lepa.

45Leka yumonga wa wa torah pakahigiti akanjowili, Mwalimu, pa kujowa aga utikitila tenga kawili mihenje. 46Leka akajowiti, Ling’aho kwinu wa torah kawili! ndawa muwapindisa wandu misigo yanganyanyamulika, na mwenga mwawene mukwafya lepa nsigo uyi woha ni lukonji lwinu lumonga. 47Ling’aho kwinu! ndawa mujenga manyinja ga wakulweta, na wakadadi winu wakawakomiti. 48Wiwila muyii wakulungamakila na muyitingana nawo mahengo ga wakadadi winu: pakuya wombe wawakomiti, na mwenga mujenga manyinja gawe. 49Kwa ndawa iyi malango ga Mulungu gakajowiti kawili, Yanitume kwawe wakulweta na maapostolo; wa wombe yawawakome ni kuwahyunga; 50nausi mwasi wa wakulweta woha, uyambaniki kitumbulile kuupanga ndima, ulondekili ngani pa kihogosi iki; 51kihumile mwasi wa Habil mpaka mwasi wa Zakariya, uyu akatagiki pagati pa mathbahu ni nyumba yapakape: ena, niwajowela, yaulondeke pa kihogosi iki. 52Ling’aho kwinu wa torah! pakuya mukatoliti funguo ya kupata kumanya: mumu mwenga mwawene mukayingili lepa, na wakuyingila mukawasiwalakisi.

53Na pakapititi yombe bahalapala, wakulembela na waFarisayo wakatumbwili kumfinyikisa ni mbafu ni kunjowesa pa malowe ga findu fyanawingi; 54kumhyalika, kutega kindu kya kipita pa ndomo pake.

Currently Selected:

Luka 11: MGS1937

Highlight

Copy