Yohana 13

1Leka palongolo pa pasaka, Yesu pakamanyi kukita saa yake yifiki nausi awuke pa ndima uwu kubita kwa Dadi, pa akawaganiti wake wa pa ndima uwu, akawaganisi mpaka pa kumalakila. 2Ni pa kyakulya kya ndalilo, pala diabolo akayingisi mu mwoyo mwa Yuda Iskariota, mwana wa Simon, 3nausi anfumbukise, Yesu, pakamanyiti kukita Dadi ampili fyoha mu mawoko gake, ni kukita apititi kuhumila pa Mulungu, 4ni aluta kwa Mulungu, ayima pa kyakulya, ni awika fifwato fyake; ni akatoliti kitambaa, ni akikungiti mu kiwuno. 5Pala alekela machi mu kisayi, ni akatumbwili kuyosa njayo sya wanafunsi, ni kusungula ni kitambaa kila akikungiti nakyo kila. 6Mumu anjichila Simon Petro. 7Anjowela, Bambo, uniyosa magulu? Yesu akahigiti nakajowiti kwa yombe, Iki nikita nenga wenga ukimanya lepa hino; leka yauwalalile panyuma pake. 8Petro anjowela, Yauniyose lepa magulu mpaka miaka ni miaka. Yesu akamhigiti yombe, Wona nilemiti kukuyosa, uyilepe ni lilundu pamonga nu nenga. 9Simon Petro anjowela, Bambo, nukuya magulu gangu gakape, koma ni mawoko gangu nu mutu kawili, 10Yesu anjowela, Uyu ayogiki asowa lepa kandu lema kuyosa magulu, koma ayii wa kuguyulika wa mfilimila: na mwenga muyii wa kuguyulika, koma nukuya woha. 11Pakuya akammanyi uyu yanfumbukise; kwa ndawa iyi akajowiti, Nakuya mwawoha wakuguyulika.

12Mumu pala akakusiti magulu gawe, na akatoliti fifwato fyake, na akatemi pasi kawili, akajowiti kwa wombe, Muwalalila iki nikawakitili? 13Mwenga munikemela, Mwalimu, nu Bambo: nu mujowa wicho; pakuya niyii. 14Mumu wona nenga nikawakusiti magulu, na Bambo nu Mwalimu, muyii ni nsigilo mwenga kawili kukusana magulu ga yungi ni njini. 15Pakuya nikawapili ndingo, nausi umu nikawakitili mwenga, nu mwenga namu mukite. 16Chakaka, chakaka, niwajowela, Mbanda nukuya nkulungu kulutila bambo mundu; haka ntenga nakuya nkulungu kulutila uyu akampeliki. 17Wona mumanya aga, wakusengwa mwenga pa kugakita. 18Nijowa lepa ya mwenga mwawoha: nenga nimanya nani nikahagwili: koma nausi lilembo limemasike, Wakudakula nkate wangu akaninyanyamulili kisekeseke kyake. 19Kitumbulile hino niwajowela palongolo pa kupata kuya, nausi mukele, baha yayipate kuya, kukita nenga niyii. 20Chakaka, chakaka, niwajowela, Uyu anjupa yula yanimpeleke aniyupa nenga; na uyu aniyupa nenga anjupa yula akanipeliki.

21Yesu apa akajowiti aga, akayambaniki mu roho, na akalungamakili, nakajowiti, Chakaka, chakaka, niwajowela, kukita yumonga wa mwenga yanifumbukise. 22Wanafunsi wayili mu kulolesana yungi nu njini, kuganagana nyahope ajowa fya nani. 23Akayili pa mesa wakugona pa kifimba kya Yesu yumonga wa wanafunsi wake, yula Yesu akanganiti. 24Wiwi Simon Petro akinyili yula, na anjowela, Utitawile nani ayii ajowa fya wombe. 25Na yula pakansagamili Yesu pa kifimba anjowela yombe, Bambo, nani ayii? 26Mumu Yesu ahiga, Yuyulayula ayii uyu nenga yaninjinile ndongi ni kumpela. Mumu apa akayiniti ndongi, atola ni kumpela Yuda, mwana wa Simon Iskariota. 27Na panyuma pa ndongi, bahalapala Shetani akayingili mugati mwake. Mumu Yesu anjowela, Iki ukita, ukitaye nyata. 28Pakayili lepe wa wala wakutama pa mesa wakawalalili ndawa ya kiki akajowiti kila kwa yombe. 29Pakuya wangi wakaholiti, ndawa Yuda akayili nalo lihako, kukita Yesu anjowela, Uhemelaye fila fya kutisowa kwa ligono likulungu; pangi, nausi awapele wagaju kindu. 30Mumu pakayupiti ndongi yombe akapititi hino apa kunja: leka kwayili ni kilo.

31Mumu pala akapititi, Yesu ajowa, Hino Mwana wa adam akwisike, nu Mulungu akwisike pa yombe; 32nu Mulungu yankwise pa yombe mwene, na hino apa yankwise. 33Wakeke, niyii nako pachokope pamonga na mwenga. Yamunilondelonde; nu umu nikajowiti kwa waYehudi, Uko nibita, mwenga nakuhotola kuhicha; ni hino niwajowela mwenga. 34Luwimbi lwa hino niwapela mwenga, kukita muganane; ngati umu niwaganili mwenga, kukita mwenga kawili muganane. 35Pa iki wandu woha yawapate kumanya kukita muyii wanafunsi wangu, wona muyii ni kiganano yungi ni njini.

36Simon Petro anjowela, Bambo, ubita kuliku? Yesu akahigiti, Kuku nibita, uhotola lepa kunikisa hino; leka yaunikise panyuma. 37Petro anjowela, Bambo, ndawa kiki nihotola lepa kukukisa hino apa? yaniwike wumi wangu pa mhalo wako. 38Yesu ahiga, Yauwike wumi wako pa mhalo wa nenga ati? Chakaka, chakaka, nikujowela, Lijogolo lingawika, mpaka yaunikanile kadatu.

Currently Selected:

Yohana 13: MGS1937

Highlight

Copy