मरकुस 3

हाँथ सुखल आदमी के ठीक करेक

(मत्ती 12:9-14; लूका 6:6-11)

1फिन यीशु यहूदी मनक प्रार्थना घर में गेलक आउर हूवाँ एगो आदमी रहे, जेकर हाँथ सूइख जाय रहे। 2आउर फरीसी आदमीमन यीशु केर उपरे दोष लगाएक लगिन मोका खोजत रहैं कि यीशु यहूदी मनक आराम केर दिन में हाँथ सुखल आदमी के बेस करेला कि निहीं। 3यीशु हाँथ सुखल आदमी से कहलक, “सोउब आदमीमन केर माझे ठड़ाव।” 4आउर यीशु फरीसी आदमीमन से कहलक, “का यहूदी मनक आराम केर दिन मूसा केर नियम केर मोताबिक भला करेक ठीक अहे या बुरा करेक, जीउ के बचाएक ठीक अहे या मोराएक?” मगर उमन कोनों जबाब नी देलैं। 5यीशु चाइरो बटे देखलक आउर उ मनक ढींठ के देइख के उदास होई गेलक, तब यीशु उमन के खिसे देइख के हाँथ सुखल आदमी के कहलक, “अपन हाँथ के बढ़ाव” उ बढ़ालक, आउर तुरते उकर हाँथ ठीक होई गेलक। 6तब फरीसी दल केर आदमीमन बाहरे निकइल के तुरते हेरोदेस राजा केर साथ देवेक वालामन केर संगे, यीशु केर बिरोध में सलहा करेक लगलैं कि उके का लेखे माइर मोराब।

भीड़ केर यीशु ठिना आवेक

7-8इकर पाछे यीशु अपन चेलामन केर संगे गलील झील बटे चाइल गेलक। आदमी मनक एगो बड़का भीड़ उकर पिछे-पिछे चाइल जात रहे। इमन गलील परदेस केर दोसर-दोसर ठाँव से, यरुशलेम शहर से, यहूदिया आउर इदूमिया परदेस से, यरदन नदी केर पूरब बटे से आउर सूर आउर सैदा नगर केर आसे-पासे केर इलाका से आय रहैं। इ सोउब आदमीमन यीशु ठिना इ लगिन आय रहैं काले कि उमन यीशु केर सोउब महान काममन केर बारे सुइन रहैं, जेके उ करत रहे। 9आउर यीशु अपन चेलामन से कहलक, “मोर बइठेक लगिन एगो छोटका डोंगा लेई लाना होले आदमीमन मोके ना ढेकलोक।” 10ओहे दिन यीशु ढेइर आदमीमन के ठीक काइर रहे। से लगिन बेमरिया आदमीमन उके छुवेक ले ढेकला-ढेकली होवत रहैं ताकि उमन ठीक होई जाओक। 11जखनोहों भूत धारल आदमीमन यीशु के देखत रहैं, उके आदर देवेक लगिन उकर आगे गिरत रहैं आउर चिल्लाय के कहत रहैं, “तोंय परमेश्‍वर केर बेटा हेकिस।” 12यीशु भूतमन के कड़ा चेतावनी देते कहलक, “आदमीमन के ना बतावा कि मोंय केहर हेकों।”

बारह खास चेलामन केर चुनल जाएक

(मत्ती 10:1-4; लूका 6:12-16)

13उकर पाछे यीशु पहार उपरे चाइढ़ गेलक आउर जेमन के अपन चेला बनाएक ले पतियात रहे, उमन के अपन ठिना बोलालक, आउर उमन भीड़ में से निकइल के उकर ठिना आलैं। 14तब यीशु उमन में से बारह गो आदमीमन के चुनलक आउर उमन के खास चेला कहलक। यीशु एइसन इ लगिन करलक कि उमन उकर संगे-संगे रहबैं, आउर उ, बचन केर परचार करेक लगिन उमन के भेजेक पारी। 15आउर उमन भूतमन के निकलाएक केर अधिकार रखबैं। 16इ बारह खास चेलामन इमन हेकैं: सिमोन जेकर नाँव उ पतरस रखलक। 17आउर जबदी केर बेटा याकूब, आउर याकूब केर छोटका भाई यूहन्ना, जेकर नाँव उ बूअनरगिस रखलक, जेकर माने गरजन केर बेटा हेके। 18सिमोन केर छोटका भाई अन्द्रियास, आउर फिलिप्पुस, बरतुल्मै, मत्ती, थोमा, हलफई केर बेटा याकूब, तद्दै, आउर दोसर सिमोन, जे उ क्रांतिकारी दल केर सदस्य रहे, जे रोमी सरकार केर बिरोध में रहे। 19आउर यहूदा इस्करियोती जे करियोत गाँव केर रहेक वाला रहे, जे पाछे यीशु के धरुवइयो देलक।

यीशु आउर भूत मनक सरदार

(मत्ती 12:22-32; लूका 11:14-23)

20इकर पाछे यीशु आउर उकर चेलामन एगो घर में गेलैं, आउर हूवाँ एतना आदमीमन जमा होई गेलैं कि यीशु आउर उकर चेलामन के खाएक केर हों समय नी मिललक। 21जेखन यीशु केर परिवार वालामन इकर बारे में सुनलैं, तो उमन अपन संगे यीशु के घर लेगेक लगिन हूवाँ आलैं। काले कि उमन कहत रहैं कि उकर दिमाग ठीक नखे। 22आउर जे मूसा केर नियम के सिखाएक वालामन यरुशलेम शहर से आय रहैं, उमन कहत रहैं, “यीशु में शैतान अहे, आउर उ, भूतमन केर सरदार केर मदइत से भूतमन के निकलायला।”

23यीशु उमन के अपन ठिना बोलालक आउर उदाहरन देई के कहेक लगलक, “का शैतान अपनेहें भूतमन के आदमीमन से बाहरे निकलेक लगिन मजबूर करी? निहीं, एकदम निहीं। 24अगर एक राइज केर आदमीमन एक दोसर से लड़ते रहबैं, तो उमन केर राइज बगरा समय तक नी टिकी। 25एहे लेखे कोनों घर केर आदमीमन एक दोसर से लड़ते रहबैं, तो उ घर सोउब दिन लगिन कइसन बनल रही? 26आउर अगर शैतान अपनेहें बिरोधी बाइन के अपन बिरोध में काम करी, तो उकर हिंयाँ अनबन होई जाई आउर उ टिकेक नी पारी, मगर उ तो नाश होई जाई।”

27“केऊ आदमी कोनों बलवान आदमीमन केर घर में ढूइक के उकर चीज के लुटेक नी पारी, जब तक कि उ आगे बलवान आदमी के बाइंध नी लेवी, इकर पाछे हें उकर घर के लुटेक पारी।”

28“मोंय तोहरेमन से सच कहाथों कि आदमीमन केर सोउब रकम केर पाप आउर निंदा, जेके उमन परमेश्‍वर केर बिरोध में करैना, क्षमा करल जाई। 29मगर जे केऊ पवितर आत्मा केर बिरोध में निंदा करेला, उकर पाप कहियो क्षमा नी करल जाई: मगर परमेश्‍वर उके सोउब दिन लगिन दोषी ठहराई।” 30काले कि उमन इ कहत रहैं कि उकर में भूत अहे।

यीशु केर आयो आउर उकर भाईमन

(मत्ती 12:46-50; लूका 8:19-21)

31जब यीशु केर आयो आउर उकर छोट भाईमन हूवाँ पोहोंचलैं। तो उमन घर केर बाहरे हें ठड़ाल रहलैं आउर यीशु के बोलाएक लगिन कइह भेजलैं। 32काले कि यीशु केर चाइरो बटे ढेइर आदमीमन बइठल रहैं, आउर उ आदमीमन यीशु से कहलैं, “देख, तोर आयो आउर तोर छोट भाईमन बाहरे तोके खोजाथैं।” 33यीशु उ आदमीमन से पूछलक, “मोर आयो आउर मोर भाईमन केमन हेकैं?” 34तब यीशु अपन चाइरो बटे बइठल आदमीमन बटे देइख के कहलक, “देखा, मोर आयो आउर मोर भाईमन एहेमन हेकैं। 35काले कि जे केऊ परमेश्‍वर केर इच्छा केर मोताबिक चलेला, ओहे मोर भाई, बहिन, आउर आयो हेके।”

Currently Selected:

मरकुस 3: SCK

Highlight

Copy