लूका 8

उ जनानामन जेमन यीशु केर चेला रहैं

1इकर पाछे यीशु नगर-नगर आउर गाँव-गाँव में परचार करेक, आउर परमेश्‍वर केर राइज केर शुभ समाचार के घुइम-घुइम के सुनाएक लगलक। आउर उकर बारह खास चेलामन उकर संगे रहैं। 2आउर थोरेक जनानामन हों यीशु केर संगे रहैं, जेमन के यीशु भूतमन से आउर बेमारीमन से ठीक काइर रहे। आउर उ जनानामन इमन हेकैं: मगदला गाँव केर मरियम जे मगदलीनी कहल जात रहे, उकर में से सात गो भूतमन के निकलाय रहे। 3आउर राजा हेरोदेस केर भंडारी खोजा केर जनाना योअन्ना रहे, आउर सूसन्ना आउर ढेइर हें जनानामन रहैं। इमन अपन धन-सम्पति से यीशु आउर उकर खास चेलामन केर सेवा-सुसइर करत रहैं।

बिहीन बुनाइया केर उदाहरन

(मत्ती 13:1-9; मरकुस 4:1-9)

4आदमीमन नगर-नगर से यीशु ठिना चाइल आवत रहैं, आउर जब आदमी मनक बड़का भीड़ जमा होलक, तब यीशु उदाहरन देई के बताएक लगलक, 5“सुना, एगो किसान बिहीन बुनेक निकललक, बुनेक बेरा थोरेक बिहीन डहर केर किनारे गिरलक आउर रौंदाय गेलक, आउर आकाश केर चरईमन उके खाय देलैं। 6आउर थोरेक बिहीन रुगड़ी भूंई उपरे गिरलक, हूवाँ माटी ढेइर कम रहे, से लगिन जल्दी ओंकरलक। मगर नमी नी भेटाएक केर चलते सूइख गेलक। 7आउर थोरेक बिहीन काँटा झूँड़ केर माझे गिरलक, आउर काँटा झूँड़ संगे-संगे बाइढ़ के उके दबाय देलक। 8आउर थोरेक बिहीन बेस भूंई उपरे गिरलक आउर ओंकइर के सौ गुणा फार लानलक।” इ कइह के यीशु जोर से कहलक, “जे केऊ मोर इ गोइठ के धेयान से सुनाथा, उमन से मोंय कहाथों, इकर बारे में समझेक केर कोशिश करा।”

उदाहरन केर मकसद

(मत्ती 13:10-17; मरकुस 4:10-12)

9जब यीशु अपन उपदेस देई के सिरालक तब चेलामन उकर से पूछलैं कि इ उदाहरन केर अर्थ का हेके? 10यीशु जबाब देलक, “तोहरेमन के तो परमेश्‍वर केर राइज केर भेदमन के जानेक केर समझ देवल जाय हे। मगर आउर आदमीमन के उदाहरन में सुनाल जायला, जेकर से कि उमन देखेक तो पारबैं मगर उमन के कोनों ना सुझोक, सुनेक तो पारबैं मगर कोनों ना बुझोक।

बिहीन बुनेक वाला उदाहरन केर अर्थ

(मत्ती 13:18-23; मरकुस 4:13-20)

11उदाहरन केर अर्थ इ हेके, बिहीन तो परमेश्‍वर केर बचन हेके। 12डहर किनारे केर भूंई नियर उ आदमीमन अहैं, जेमन बचन के सुनलैं, मगर शैतान आय के उ मनक मन में से सुनल बचन के मेटाय देवेला, कहीं एइसन ना होवोक कि उमन बिसवास काइर के बाइच जाबैं। 13रुगड़ी भूंई नियर उ आदमीमन अहैं, जेमन बचन के सुनैना आउर रिझे-रिझे अपनाय लेवैना, मगर अपन मन में भीतरे तक बचन के नी बसाएक केर चलते उमन थोरेक दिन लगिन बिसवास करैना, आउर बचन केर चलते जब उ मनक उपरे बिपइत या ससइत आवेला तो उमन भटइक जायना। 14आउर थोरेक आदमीमन उ भूंई नियर अहैं, जहाँ काँटा झूँड़ अहे जेकर उपरे बिहीन गिरलक, उमन बचन के तो सुनैना मगर उमन आगे जाय के चिंता फिकिर, धन आउर जिंदगी केर भोग-बिलास में फाँइस जायना, आउर बचन से उमन के कोनों फायदा नी भेटायला। 15मगर थोरेक आदमीमन उ उपजाऊ भूंई नियर अहैं, जेमन बचन सुइन के भला आउर ईमानदार मन में जोगाय के रखैना आउर स्थिर रइह के फार लानैना।

दीया केर उदाहरन

(मरकुस 4:21-25)

16केऊ आदमी दीया के बाइर के बासन से नी ढाँपेला, आउर ना खटिया केर हेंठे रखेला, मगर चौखट केर उपरे रखेला कि भीतरे अवाइया आदमीमन के उकर से इंजोत दिसोक। 17परमेश्‍वर सोउब गोइठमन के जे आगे से लुकल रहे दिस्तार करी, आउर सोउब भेद केर गोइठमन के जेके आदमीमन अब तक नी जानैना, सोउब केर सामने सफा-सफा उजागर करी। 18इकर लगिन जे गोइठ मोंय तोहरेमन के कहाथों उके धेयान से सुना, काले कि जेके समझेक केर इच्छा अहे परमेश्‍वर उके आउर समझ देई। मगर जे समझेक केर इच्छा नी रखेला कि मोंय का सिखाथों, तो उकर ठिना जे समझ अहे, उखो परमेश्‍वर उकर से लेई लेवी।”

यीशु केर आयो आउर भाईमन

(मत्ती 12:46-50; मरकुस 3:31-35)

19यीशु केर आयो आउर उकर छोट भाईमन उकर से भेंट करेक लगिन आलैं, मगर भीड़ केर चलते उकर ठिना पोंहचेक नी पारलैं। 20तब भीड़ में से केऊ आदमी यीशु से कहलक, “तोर आयो आउर तोर छोट भाईमन बाहरे ठड़ाल तोर से मिलेक चाहाथैं।” 21यीशु उकर जबाब में उमन से कहलक, “मोर आयो आउर मोर भाई इमन हेकैं, जेमन परमेश्‍वर केर बचन के सुनैना आउर मानैना।”

आँधी धुका के शांत करेक

(मत्ती 8:23-27; मरकुस 4:35-41)

22फिन एक दिन यीशु अपन चेलामन से कहलक, “आवा, हमरे झील केर उ पाखी जाब।” आउर उमन उ पाखी जाएक लगिन डोंगा में बाइठ गेलैं। 23मगर जब डोंगा चलत रहे, तब यीशु निंदाय गेलक आउर ओहे बेरा झील में आँधी-धुका आलक, आउर डोंगा पानी से भाइर जात रहे, उमन मुसीबत में पाइड़ जाय रहैं। 24तब उमन यीशु ठिना आय के उके जगाय के कहलैं, “मालिक! मालिक! हमरे नाश होई जाथी।” यीशु उइठ के आँधी के आउर पानी केर लहरा के डाँटलक, आउर उ रूइक गेलक आउर स्थिर होई गेलक। 25इकर पाछे यीशु अपन चेलामन से कहलक, “तोहरे केर बिसवास कहाँ रहे?” मगर उमन डराय गेलैं आउर ताजुब होई के एक-दोसर से कहेक लगलैं, “इ के हेके? जे आँधी आउर पानी के हों आगया देवेला आउर उमन उकर आगया के मानैना।”

भूत धारल आदमी के ठीक करेक

(मत्ती 8:28-34; मरकुस 5:1-20)

26उमन गलील झील के पार काइर के गिरासेनी आदमी मनक परदेस में पोहोंचलैं, जे झील केर भीरे अहे। 27जब यीशु झील केर किनारे उतरलक, तो उ नगर केर एगो आदमी उके भेटालक, जेकर में भूतमन रहैं, उ ढेइर दिन से ना तो लुगा पिंधत रहे आउर ना घर में रहत रहे, उ मसनामन में रहत रहे। 28उ आदमी यीशु के देइख के चिल्लालक, आउर उकर आगे गिर के जोर से कहलक, “हे परमप्रधान परमेश्‍वर केर बेटा यीशु, मोके तोर से का काम अहे! मोंय तोर से बिनती कराथों, मोके दुःख ना दे।” 29काले कि यीशु भूत के उ आदमी में से निकइल जाएक केर आगया देई रहे, उ भूत आदमी केर उपरे घरी-घरी हमला करत रहे, आउर आदमीमन सिकड़ आउर बेरीमन से उके बाँधत रहैं, मगर उ बाँधल के हों तोइर देवत रहे, आउर भूत उके सुनसान ठाँव बटे लेई जात रहे। 30यीशु भूत से पूछलक, “तोर का नाँव हेके?” उ कहलक, “मोर नाँव फौज हेके।” काले कि उ आदमी में ढेइर भूतमन रहैं। 31आउर उमन यीशु से बिनती करलैं कि हमरे के बेथाह गढ़हा में जाएक केर आगया ना दे। 32हूवाँ पहार उपरे सुवइर मनक एगो बड़का गोंहड़ा चरत रहे, भूतमन यीशु से बिनती करलैं कि हमरे के सुवइरमन में ढूकेक दे। यीशु उमन के जाएक देलक। 33तब भूतमन उ आदमी में से निकइल के सुवइरमन केर भीतरे ढूइक गेलैं, आउर उ गोंहड़ा केर सोउब सुवइर पहार से हेंठे ढलाउन में कूदते गलील झील में डूइब मोरलैं।

34सुवइर चरवाहामन इ सोउब घटना के देइख के, हूवाँ से भाइग के नगर आउर गाँवमन में गेलैं, आउर आदमीमन के इकर बारे में बतालैं। 35आउर आदमीमन जे कुछ होई रहे इके देखेक लगिन यीशु ठिना आलैं, आउर उ आदमी के जेकर में से भूतमन निकइल रहैं, लुगा पिंधल आउर पूरा होस में यीशु केर गोड़ तरे बइठल पाय के डराय गेलैं। 36जेमन इ सोउब घटना के अपन आँइख से देइख रहैं, उमन दोसर आदमीमन के बतालैं कि का लेखे भूत धारल आदमी ठीक होई हे। 37तब गिरासेनी परदेस आउर आसे-पासे केर सोउब आदमीमन यीशु से बिनती करलैं कि हमर हिंयाँ से चाइल जा, काले कि उमन ढेइर डराय जाय रहैं। से लगिन यीशु डोंगा उपरे चाइढ़ के घूइर गेलक। 38आउर जे आदमी से भूतमन निकइल रहैं, उ यीशु से बिनती करेक लगलक, “मोखों तोर चेलामन नियर अपन संगे रहेक दे।” मगर यीशु उके इ कइह के बिदा करलक, 39“अपन घर घूइर जा आउर आदमीमन के बताव कि परमेश्‍वर तोर लगिन कइसन बड़का-बड़का काम काइर हे।” उ जाय के गोटा नगर में परचार करेक लगलक कि यीशु मोर लगिन कइसन बड़का-बड़का काम करलक।

याईर केर मोरल बेटी के जियाएक आउर एगो बेमरिया जनाना केर ठीक होवेक

(मत्ती 9:18-26; मरकुस 5:21-43)

40जब यीशु गलील झील के पार काइर के इ पाखी घूइर आलक, तो हूवाँ केर आदमीमन उकर स्वागत करलैं, काले कि सोउब आदमीमन उकर आसरा देखत रहैं। 41उ बेरा यहूदी मनक प्रार्थना घर केर एगो सरदार आलक, उकर नाँव याईर रहे। उ यीशु केर गोड़ तरे निहइर के यीशु से बिनती करेक लगलक कि मोर घर चल, 42काले कि उकर बारह बरिस केर एकला बेटी रहे, जे मोरेक नियर रहे।

जब यीशु उकर घर जात रहे, तब आदमीमन भीड़ केर चलते ढेकला-ढेकली होवत रहैं। 43आउर ओहे बेरा एगो जनाना जेकर बारह बरिस से लोहू बहेक केर बेमारी रहे, जे अपन बेमारी से ठीक होवेक लगिन अपन सोउब धन सम्पति के बाइधमन केर पिछे खरचा काइर के सिराय देलक, सेकरो में उ जनाना केकरो हाँथ से ठीक होवेक नी पारलक। 44पिछे से आय के यीशु केर लुगा केर आँचरा के छुई देलक, आउर तुरते उकर लोहू बहेक केर बेमारी ठीक होई गेलक। 45तब यीशु तुरते जाइन गेलक आउर कहलक, “मोके के छुलक?” जब भीड़ केर सोउब आदमीमन मुकरेक लगलैं, तो पतरस आउर उकर संगमन कहलैं, “हे गुरु, तोर पिछे तो भीड़ केर आदमीमन ढेकला-ढेकली होवाथैं, आउर तोर उपरे गिर जाथैं।” 46मगर यीशु कहलक, “केऊ मोके छुई हे, काले कि मोंय जाइन जाय हों कि मोर में से ठीक करेक केर शक्ति निकइल हे।” 47जब जनाना देखलक कि मोंय लुकेक नी पारमूँ, तब उ थरथराते यीशु ठिना आलक, आउर उकर गोड़ तरे निहइर के प्रणाम करलक, आउर सोउब आदमीमन केर सामने बतालक कि मोंय का लगिन उके छुलों, आउर कइसन तुरते ठीक होई गेलों। 48यीशु उकर से कहलक, “बेटी तोर बिसवास तोके ठीक काइर हे, शांति से चाइल जा।”

49यीशु इ कहते हें रहे कि केऊ यहूदी मनक प्रार्थना घर केर सरदार, याईर केर घर से आय के कहलक, “तोर बेटी मोइर जाहे। अब गुरु के आउर तकलीफ ना दे।” 50यीशु उ आदमी केर गोइठ के सुइन के प्रार्थना घर केर सरदार से कहलक, “ना डराव, सिरिफ बिसवास रख, तोर बेटी बाइच जाई।” 51जब यीशु उ घर में आलक, तो उ अपन संगे पतरस, यूहन्ना, याकूब, आउर छोंड़ी केर आयो-आबा के छोइड़ के आउर केखो भीतरे आवेक नी देलक। 52आउर सोउब आदमीमन उकर लगिन काँदत रहैं, मगर यीशु कहलक, “ना काँदा, छोंड़ी नी मोइर हे, मगर निंदाथे।” 53उमन इ जाइन के कि बेटी मोइर जाय हे, यीशु केर मजाक करेक लगलैं। 54मगर यीशु उकर हाँथ के धाइर के जोर से कहलक, “हे छोंड़ी उठ!” 55तब उकर जीउ घूइर आलक आउर उ तुरते उठलक, फिन यीशु उमन के आगया देलक कि इके कोनों खाएक लगिन देई देवा। 56उकर आयो-आबामन ताजुब होलैं, मगर यीशु उमन के आगया देलक कि इ जे कुछ होई हे, केखो ना बताबा।

Currently Selected:

लूका 8: SCK

Highlight

Copy