Maariko 4

Ekirengekanyo kya omubhibhi wa gimbibho

(Mataayo 13:1-9; Ruuka 8:4-8)

1Yeesu ˆnaamba okwiyigisha kweki abhaanu ku-ngego ya omwaro. Esangi enene muno erya abhaanu ndimusangira ayo. Niwe Yeesu ˆneengira mu-bhwato, ˆneekara muyo. Abhaanu mbasigara ku-murambo. 2Yeesu ˆnaabheeyigisha mangʼana maafu mu-bhirengekanyo. Mu-meeyigisho gaaye ˆnaaika ati, 3“Mwitegeereshe! Omubhibhi ꞉aagendere okubhibha gimbibho mw-isambu ryaye. 4Bhunu ꞉aabhibhaga, gimbibho egindi ngigwa ku-njira, giinyonyi ngiija, ngigirya. 5Egindi ngigwa kw-itare anu atari na mayaru maafu. Ngimera bhwangu, kwa okubha amayaru ꞉gaariga gari matooto. 6Nawe bhunu omuumwi ꞉gwabharire ngiwotoka, kwa okubha ꞉gyariga gitasirire emisi. 7Gimbibho egindi ngigwa mu-mawa. Bhunu amawa gayo ꞉gaakurire, ngagiyiganya, ngitaamibhwa okutwasha. 8Nawe, gimbibho egindi ngigwa ku-mayaru amajomu, ngitwasha amatwasho. Eyimwi niitwasha makumi gasatu, eyindi niitwasha makumi gasansabha, eyindi niitwasha egana rimwi!” 9ˆNaamara ˆnaabhabhwira ati, “Omuunu unu ari na amatwi aga okuungwira, noongwe kujomu.”

Insonga ya Yeesu okwiyigisha mu-bhirengekanyo

(Mataayo 13:10-23; Ruuka 8:9-10)

10Bhunu abhaanu ꞉bhaagendere, Yeesu ˆnaasigara na abheeyigira bhaaye ekumi na bhabhiri na abhaanu abhandi bhanu ꞉bhaariga bhamwikirisiishe. Niwe mbamubhuusha insonga ya ebhirengekanyo bhinu ꞉aariga abhabhwiriiye.

11ˆNaabhasubhya ati, “Emwe Nyamuwanga abhayaaye okumenya imbisike ya obhukama bhwaye. Nawe bhanu bhatakunseeta, goone kutyo enibhabhwirira mu-bhirengekanyo, 12insonga amangʼana gabhe rwa kutyo omuragi Isaaya ꞉aakaamire ati,

‘Bhakaringira, bharingire,

nawe bhasige okurora.

Na bhakoongwa, bhoongwe,

nawe bhasige okusombookerwa,

insonga bhaasiga okuuyindukira mbansubhira,

nimbawonʼya.’#4:12 Ringira Isaaya 6:9-10.”

Yeesu kaasomboora ekirengekanyo kya omubhibhi

(Mataayo 13:18-23; Ruuka 8:11-15)

13Niwe Yeesu ˆnaabhabhwira ati, “Mutakusombookerwa ekirengekanyo kinu? Woori omuuja okusombookerwa kutiki ku-bhirengekanyo ebhindi? 14Omubhibhi ni unu kaaraasisha abhandi Riingʼana rya Nyamuwanga. 15Abhaanu abhandi abharengekanyibhwa na gimbibho gya ku-njira. Bhakoongwa era Riingʼana rya Nyamuwanga, Sitaani kaaja, ˆnaasoosha riingʼana riyo mu-mitima gyebhwe. 16Gimbibho ginu ꞉gyaguuye kw-itare anu atari na mayaru maafu, egirengekanyibhwa na abhaanu bhanu abhoongwa era Riingʼana rya Nyamuwanga, mbariramira bhajomeewe. 17Nawe bhatasirire misi, abhagenderera kabhaga kafuyi era, bhakanyansibhwa ku-nsonga ya riingʼana riyo, abhasiga obhwikirisha. 18Gimbibho ginu ꞉gyaguuye mu-mawa, egirengekanyibhwa na abhaanu bhanu abhoongwa Riingʼana rya Nyamuwanga, 19nawe mbajimibhwa na obhwiganiirisha iiguru ya obhurame na okwenda obhuniibhi na amangʼana agandi. Amangʼana gayo agayiganya Riingʼana rya Nyamuwanga, mbataamibhwa okugenderera okukora engʼana ryoneryone ejomu. 20Gimbibho ginu ꞉gyaguuye ku-mayaru amajomu egirengekanyibhwa na abhaanu bhanu abhoongwa Riingʼana rya Nyamuwanga mbariramira. Bhayo nibho abhatwasha owumwi makumi gasatu, owundi makumi gasansabha, owundi woone egana rimwi.”

Ekirengekanyo kya intara

(Ruuka 8:16-18)

21Yeesu ꞉aabhabhwiriiye ekirengekanyo ekindi kweki ati, “Angu, ariwo omuunu unu kaakongeesha intara ˆnaayituura mw-ifuufu, amwi ati kuyifundikira mw-idebhe? ˆNaasiga okuyituura iiguru ku-kisiri? 22Nikwo kutyo, ryoneryone rinu ribhisirwe, ribhisirwe insonga riije rituurwe abhweru. Ryoneryone rinu rifundikiiywe, rifundikiiywe insonga rituurwe abhweru. 23Omuunu unu ari na amatwi aga okuungwira, noongwe kujomu.”

24Niwe Yeesu ˆnaagenderera okubhabhwira ati, “Mwitegeereshe kujomu! Indengo inu omurengera abhandi, iyoiyo niyo mwone murirengerwa, na eyeemwe irikira-wo. 25Omuunu unu ari na ekiinu aryongesibhwa na unu atari na kiinu, na ekitooto kinu ari nakyo ariteesibhwa.”

Ekirengekanyo kya gimbibho ginu egimera

26Yeesu ˆnaabhabhwira kweki ati, “Obhukama bhwa Nyamuwanga obhurengekanyibhwa kutya, omuunu ꞉aabhibhire gimbibho mw-isambu, 27ginsiku ngitura, ˆnaawongeraga ˆnaaramuka, atakugenda okurora mw-isambu. Imbibho irya niimera, niikura, nawe omwene atakumenya kutyo ꞉yaakuraga. 28Insi eyeene niyo eyikora imbibho niimera okuyikira okutwasha. Okwamba eyimera riri enyansi erere, ndifuuka, ku-bhuteero nkibha-ko ekyangara kiriko ngano njomu. 29Ingano iyo ikakomeera, omurimi kaagega omuworo ˆnaagenda okugesa.”

Ekirengekanyo kya akabhibho akatooto

(Mataayo 13:31-32, 13:34; Ruuka 13:18-19)

30Yeesu ˆnaabhabhwira kweki ati, “Obhukama bhwa Nyamuwanga kibhususanye naki? Kibhurengekanye naki? 31Obhususana na akabhibho ka iiyaradaari.#4:31 Akabhibho ka iiyaradaari. Ni kabhibho katooto muno, obhutooto bhwako ewaasu enu, ekitura okukariingʼaanya na akabhibho ka omuchicha. Raabhé kutyo ni katooto okukira gimbibho gyone kutyo ginu egiyambwa, 32kakamera, akabha eti enene okukira emikubhi gyone kutyo mw-isambu. Akabha eti rya masagi manene na giinyonyi nginyoora imbewo ya okuwooyera-mo.”

33Yeesu ꞉aaikaga Riingʼana rya Nyamuwanga okuturira ku-bhirengekanyo bhyafu rwa bhinu, okuriingʼaana na kutyo ꞉bhaaturaga okusombookerwa. 34꞉Ataabheeyigisiishe kyonekyone ataaikiiye mu-bhirengekanyo. Nawe, bhunu ꞉aasigaraga omwene na abheeyigira bhaaye era, ꞉aabhasombooreraga ebhirengekanyo bhyone kutyo.

Yeesu kaasiiga omuyaga na amabhooka bhitemekere

(Mataayo 8:23-27; Ruuka 8:22-25)

35Orusuku ruyo keegoro, Yeesu ˆnaabhwira abheeyigira bhaaye ati, “Kyambuke, kije ngʼambu.” 36Mbasiga riisangi rya abhaanu, mbeengira mu-bhwato munu Yeesu ꞉aariga ari, mbeemuka nawe. ꞉Gaariga gariwo na amaato agandi ganu geemukiiye amwi nabho. 37Mbataka era muyaga mwafu muno ngutiimuka. Amabhooka ngabhuma obhwato, amanji ngamba okwijura mu-bhwato.

38Akabhaga kayo, Yeesu ꞉aariga awongeeye iinyuma mu-bhwato, eesaguuyega ku-musago. Abheeyigira bhaaye mbamuramusha, mbamubhwira ati, “Mwiyigisha, utakwigana ati kirebhereeye okufwa?”

39Niwe Yeesu ˆneemuka, ˆnaasiiga omuyaga na amabhooka bhitemekere. Omuyaga ngutemekera, ndibha etore. 40Mmbe Yeesu ˆnaabhuusha abheeyigira bhaaye ati, “Kubhaki mwobhaya? Na woori mutari na bhwikirisha?” 41Mboobhaya muno, mbabhuushaanya ati, “Kana unu nniga, ndora omuyaga na amabhooka ebhimuungwa?”

Currently Selected:

Maariko 4: kya

Highlight

Copy