Mataayo 21

Masiya Yeesu keengira Yerusareemu

(Maariko 11:1-11; Ruuka 19:28-40; Yowana 12:12-19)

1Bhunu Yeesu na abheeyigira ꞉bhaarebhereeye Yerusareemu, mbayika mw-igunguri rya Bheetifage ku-kiima kya Emijeyituuni. Niwe Yeesu ˆnaatuma abheeyigira bhaaye bhabhiri, ˆnaabhabhwira ati, 2“Mugende mw-igunguri rinu riri imbere weemwe. Mukayika ayo era, omuuja okurora insikiri isibhikirwe, iri na ekimoori kyayo. Mugisibhure, mugindeetere anu. 3Raabhe omuunu woonewoone akabhabhuusha ati omusira aaki ginsikiri giyo, mumusubhye ati, ‘Raatabhugenyi niwe kaagikena,’ omwene woone kaaja okubheekirisisha mugireete.”

4Gayo goone kutyo ꞉gaabheeye, insonga Riingʼana rya Nyamuwanga rinu ꞉aaikire okuturira ku-muragi waaye, rikuumire ati,

5“Mubhwire abhaanu bha Sayuuni#21:5a Sayuuni. Omusi gwa Yerusareemu nigwo ayandi ogubhirikirwa ati Sayuuni. ati,

‘Muringire, omukama weemwe kaaja,

ni mufura, kaaja ariinyire ku-nsikiri,

na ekimoori kya insikiri.’”#21:5b Ringira Jaakariya 9:9.

6Mmbe, abheeyigira bhaaye mbagenda, mbakora rwa kutyo Yeesu ꞉aabharagiriiye. 7꞉Bheejire bhaasubha bhari na insikiri na ekimoori kyayo, mbaanja gingibho gyebhwe ku-nsikiri, Yeesu ˆnaariinya-ko mbeemuka. 8Bhaanu bhaafu muno bhanu ꞉bhaariga bhari ayo, mbaanja gingibho gyebhwe ku-njira. Abhandi mbatema amatabhi mbagaanja ku-njira okukorera Yeesu ekibharo. 9Abhaanu bhanu ꞉bhaariga bhatangatire na bhanu ꞉bhaamuseetaga iinyuma, mbaamura obhuraka mbaaikaga ati,

“Wosaana#21:9a Wosaana. Insonga yeende-ko mu-Kiebhuraaniya, ꞉yaariga iri ati, “Yeerusha woori!” Nawe mu-kabhaga ka Yeesu ꞉bhaaikaga riingʼana riyo okukumangya Nyamuwanga amwi ati Masiya. Ringira Ijabhuri 118:25. Omuyiiri Dawudi!

Ayaaywe giinonkwe unu kaaja kw-isiina rya Raatabhugenyi!#21:9b Ringira Ijabhuri 118:25-26.

Wosaana mu-rwire!”

10Bhunu Yeesu ꞉eengiiye mu-musi gwa Yerusareemu, omusi gwone kutyo nguyirira. Abhaanu mbaamba okubhuushaanya ati, “Ni niga unu?” 11Abhaanu bhanu ꞉bhaariga bhari amwi na Yeesu, mbabhasubhyaga ati, “Unu ni muragi wurya kaatogwaga Yeesu, owa Naajareeti mu-kyaro kya Gariraaya!”

Yeesu kaabhirimya abhasuruja mw-iyekaru rya Nyamuwanga

(Maariko 11:15-19; Ruuka 19:45-48; Yowana 2:13-22)

12Niwe Yeesu ˆneengira mw-ibhanja rya riiyekaru rya Nyamuwanga. ꞉Eejire eengira, ˆnaanyoora bhaanu bhaafu mbagusha na okugura ebhiinu mw-ibhanja muyo, ˆnaabhabhirimya bhoone kutyo. ˆNaagaramura giimeeja gya bhanu ꞉bhaariga mbaswenʼya giiyera, na ebhitebhe bhya bhanu ꞉bhaariga mbagusha ginguuti gya okusoosisha ebhimweso. 13Yeesu ˆnaabhabhwira ati, “Ikaamirwe mu-Makaamo Amataakatiifu ati, ‘Iinyumba yaani iribha nyumba ya okusaasaamira-mo.’#21:13a Ringira Isaaya 56:7. Nawe emwe omuyikora okubha nsenga ya abheefi.”#21:13b Ringira Yeremiya 7:11.

14Bhunu Yeesu ꞉aariga ari mw-ibhanja rya riiyekaru muyo, abhawofu na abharema mbamugenda-ko, ˆnaabhawosha. 15Nawe abhakuru bha bhashengesi, na abheeyigisha bha ebhiraagiro bhya Musa, ꞉bhaabhiiyiiywe bhunu ꞉bhaarorere ebhigwa bhinu Yeesu ꞉aakorere, na bhunu bhoonguuywe abhaana mw-iyekaru bhaamuuye obhuraka mbaaikaga ati, “Wosaana Omuyiiri Dawudi!” 16Niwe mbabhuusha Yeesu ati, “Owuungwa kutyo abhaana bhanu abhaaika?” Yeesu ˆnaabhasubhya ati, “Enuungwa. Emwe mukyariga okusoma amangʼana ganu gakaamirwe mu-Makaamo Amataakatiifu ati,

‘Wiituuriiye-wo ginkuma,

okuturira ku-bhaana abhatooto na abhajaare’#21:16 Ringira Ijabhuri 8:2.?”

17Yeesu ˆnaabhasiga ayo, ˆnaasooka Yerusareemu, ˆnaagenda mw-igunguri rya Bhetaaniya, ˆnaamaama eyo.

Yeesu keeyiima riiti rinu ritari na matwasho

(Maariko 11:12-14, 11:20-24)

18Mwejo weende-ko, bhunu Yeesu ꞉aariga ˆnaasubha Yerusareemu, ˆnoongwa omweko. 19Niwe ˆnaarora riiti rya giitiini ku-njira, ˆnaarija-ko, ˆnaanyoora ni masha era ritariko etwasho na rimwi. Kimwi ˆneeyiima riiti riyo ˆnaaribhwira ati, “Okwambira reero inu na akajaanende koone kutyo waasiga okutwasha etwasho kweki!”#21:19 Yeesu keeyiima riiti rya giitiini okweresha kutyo Nyamuwanga ariramurira Abhayawudi, kwa okubha ꞉bhaariga bhatari na amatwasho ga gintungwa ginjomu. Ayoayo, riiti riyo ndyuma.

20Bhunu abheeyigira bha Yeesu ꞉bhaarorere gayo, mbaruguura muno. Mbamubhuusha ati, “Yaabha kutiki riiti rinu ryoma ayoayo?” 21Yeesu ˆnaabhasubhya ati, “Kimari enibhabhwira, mukabha na obhwikirisha bhunu bhutari na kiitimaato, emwe mwone omuuja okukora ritari rya kuumya etiini era, nawe omuuja okubhwira ekiima kinu ati, ‘Iiyika wiiyese mu-nyanja,’ niibha kutyo. 22Kyonekyone kinu omusabha Nyamuwanga muri na obhwikirisha, murikiramira.”

Riibhuusho iiguru ya obhuturo bhwa Yeesu

(Maariko 11:27-33; Ruuka 20:1-8)

23Yeesu ˆneengira kweki mw-ibhanja rya riiyekaru rya Nyamuwanga. Bhunu ꞉eeyigishaga, niwe abhashengesi abhakuru, na abhakaruka bha Abhayawudi mbaaja mbamubhuusha ati, “Owukora amangʼana ganu ku-bhuturoki? Niga unu akuyaaye obhuturo bhuyo?” 24Yeesu ˆnaabhasubhya ati, “Okwamba anye noone nibhabhuushe engʼana rimwi. Raabhe mukansubhya riyo, noone enibhabhwira enikora ganu ku-bhuturoki. 25Angu, obhuturo bhwa Yowana obhwa okubhatiisha abhaanu, ꞉bhwasookere aaki? ꞉Bhwasookere ku-Nyamuwangaa, ꞉bhwasookere ku-bhaanu?” Niwe mbaamba okwaikana ati, “Raabhe kikamusubhya ati ꞉bhwasookere ku-Nyamuwanga, kaaja okukibhuusha ati, ‘Ndora mutaamwikirisiishe?’ 26Kweki, raabhe kikamusubhya ati ꞉bhwasookere ku-bhaanu, ekyubhaya riisangi rya abhaanu bhanu, kwa okubha bhoone kutyo bhamenyere ati Yowana ꞉aariga ari muragi.” 27Okubha kutyo mbamusubhya ati, “Kitakumenya.” Mmbe, Yeesu woone ˆnaabhabhwira ati, “Anye noone nitakubhabhwira ati enikora ganu ku-bhuturoki.”

Ekirengekanyo ekindi ekya abhamura abhabhiri

28Yeesu ˆnaagenderera okubhabhwira ati, “Woori, omurora kutiki ekirengekanyo kinu? ꞉Aariga ariwo muunu wumwi unu ꞉aariga ari na bhamura bhabhiri. ˆNaagenda ku-wa okwamba, ˆnaamubhwira ati, ‘Mwana waani, reero genda ukore emirimu mw-isambu ryani rya emijabhiibhu.’ 29Omumura uyo ˆnaamusubhya ati, ‘Nitakuja eyo!’ Nawe ˆnaamara, ˆneeganiirisha, ˆnaagenda ˆnaakora emirimu. 30Esemwene ˆnaagenda ku-wa akabhiri, ˆnaamubhwira kutyo ꞉aabhwiriiye owa okwamba. Weeki ˆnaamusubhya ati, ‘Enigenda raata!’ Nawe ꞉ataagendere.

31“Angu, ku-bhabhiri bhayo, niga unu ꞉oonguuywe esemwene?” Mbamusubhya ati, “Ni owa okwamba wurya.”

Niwe Yeesu ˆnaabhabhwira ati, “Kimari enibhabhwira, abhatobhesha bha riigooti na abhasimbe bharibhatangatira okwingira mu-bhukama bhwa Nyamuwanga. 32Yowana ꞉eejire insonga abheereshe injira ya obhurengeresi, ꞉mutaamwikirisiishe. Nawe, abhatobhesha bha riigooti na abhasimbe nibho ꞉bhaamwikirisiishe. Raabhé kutyo ꞉mwarorere gayo goone kutyo, nawe, ꞉mutaasigire obhwiganiirisha bhwemwe, mumwikirishe.”

Ekirengekanyo kya abharimi abhakosi bha amabhiibhi

(Maariko 12:1-12; Ruuka 20:9-19)

33“Mwitegeereshe ekirengekanyo ekindi. ꞉Aariga ariwo omuunu wumwi unu ꞉aariga ari na riisambu. Mw-isambu ryaye muyo, ꞉aariga ayambire-mo emijabhiibhu, arisitiiye orubhago, ˆnaasimba na riitoko erya okumigira-mo amanji ga giijabhiibhu mw-isambu agati, kweki ˆnoombaka-mo ekiisonge kireera ku-nsonga ya abhariisi. Mmbe, riisambu riyo ˆnaariyaana abharimi#21:33 ˆNaariyaana abharimi. Ku-Bhayawudi omuunu akayaana abharimi riisambu bharime, abharimi bhayo bhakagesa, abhagabhana ebhigeswa bhinu bhanyoorere na omwene esambu. bharirimega, ˆnaakora orugendo.

34“Bhunu akabhaga ka okugesa ꞉kaayikire, omwene esambu uyo, ˆnaatuma abhagaya bhaaye ku-bharimi bhayo, insonga bhamuyaane ebhigeswa okuriingʼaana na kutyo ꞉bhaariga bheekirishaanyiishe. 35Nawe bhunu abhagaya bhaaye ꞉bhaayikire, abharimi bhayo mbabhagwata, owumwi mbamubhuma, owundi mbamwita na owundi mbamubhuma na amagina. 36Mmbe, omwene esambu ˆnaatuma kweki abhagaya abhandi, bhaafu okukira bhanu ꞉aatumire okwamba. Abharimi bhayo mbabhakorera kubhiibhi rwa kutyo ꞉bhaakoreeye abha okwamba. 37Mmbe, ˆnaatuma omumura waaye. ˆNeeyaikira omwene ati, ‘Unu ni mumura waani, abhaaja okumwiswara.’ 38Nawe bhunu abharimi bhayo ꞉bhaarorere omumura waaye, mbaaikana ati, ‘Unu niwe omugabhi wa ebhiinu bhya esemwene. Kimwite insonga kigege omugabho gwaye.’ 39Mmbe, mbamugwata, mbamusoosha mw-isambu, mbamwita.”

40Yeesu ˆnaabhabhuusha ati, “Angu, bhunu omwene esambu arisubha okusooka mu-rugendo rwaye, arikora kutiki abharimi bhayo?” 41Mbamusubhya ati, “Aribheeta kubhiibhi abhakosi bha mabhiibhi bhayo, na riisambu ryaye ariyaana abharimi abhandi bhanu bharimuyaanaga ebhigeswa bhyende-mo.”

42Niwe Yeesu ˆnaabhabhwira ati, “Angu, mukyariga okusoma ganu gakaamirwe mu-Makaamo Amataakatiifu? Ati,

‘Abhoombaki ꞉bhaaremere riigina rinu.

Nawe, riigina rinu niryo ribheeye riigina riinene erya mu-rufuka.#21:42a Riigina riinene erya mu-rufuka. Abhayawudi abhoombaki ꞉bhaariga mbagega riigina riinene mbarituura ku-bhukoti bhwa omusingi gwa iinyumba ndigwatirira mbaara ebhiri egya indugu, na iinyumba yoone kutyo.

Riingʼana rinu risookere ku-Raatabhugenyi,

na ni engʼana rinu erikiruguusha.’#21:42b Ringira Ijabhuri 118:22-23.”

43Yeesu ˆnaaika kweki ati, “Ku-nsonga iyo, enibhabhwira ati, obhukama bhwa Nyamuwanga obhuuja okusooshwa kw-imwe. Nyamuwanga ariyaana abhaanu bha ebhyaro ebhindi bhanu bharikora ganu geesire okukorwa na abhaanu bha mu-bhukama bhwaye. 44Mmbe, omuunu akagwa kw-igina kuyo, kaabhutukabhutuka, na riigina riyo rikagwira omuunu, erimusanjagasanjaga kubhiibhi.”#21:44 Ringira Isaaya 8:14-15; Daniyeri 2:31-45.

45Bhunu abhakuru bha bhashengesi na Abhafarisaayo ꞉bhoonguuywe ebhirengekanyo bhya Yeesu, mbeemenya ati nibho kaaikira. 46Okwambira ayo, mbaamba okwagara injira ya okumugwata. Nawe mboobhaya riisangi rya abhaanu, kwa okubha abhaanu bheeki ꞉bhaariga bhamenyere ati Yeesu ni muragi.

Currently Selected:

Mataayo 21: kya

Highlight

Copy