Ruuka 7

Omukuru owa abhasirikare eekirisha Yeesu

(Mataayo 8:5-13)

1Bhunu Yeesu ꞉aamarire okubhwira riisangi rya bhaanu amangʼana gayo goone kutyo, ˆnaagenda ˆneengira mu-musi gwa Kaperinawumu. 2Mu-musi guyo, ꞉aariga arimo omukuru wa abhasirikare abha Ekiruumi ari na omujuuma waaye amwendere muno. Omujuuma uyo ꞉aariga ari murwaye musinge. 3Mmbe, omukuru uyo, ꞉eejire okuungwa amangʼana iiguru ya Yeesu, ˆnaatuma abhakaruka bha Abhayawudi ku-Yeesu, bhamusabhe agende okuwosha omujuuma waaye. 4Bhunu abhakaruka bhayo ꞉bhaayikire ku-Yeesu, mbamwisaasaama muno mbamubhwira ati, “Omuunu unu eesire umukorere riingʼana rinu, 5kwa okubha eendere ekyaro kyeswe, na niwe ꞉aakyumbakiiye riisunagoogi ryeswe.”

6Niwe Yeesu ˆneemuka ˆnaagenda na abhakaruka bhayo ewa omukuru uyo. Bhunu ꞉bhaarebhereeye okwingira, omukuru uyo ˆnaatuma abhasaani bhaaye mbagenda mbayikisha Yeesu amangʼana, mbamubhwira ati, “Raatabhugenyi, siga okwinyansha, kwa okubha anye niteesire awe wingire mu-nyumba yaani. 7Kyakora naarora ati niteesire na okuuja ku-awe. Nawe, awe yaaika engʼana era, omujuuma waani kaaja okuwora. 8Anye noone niri emwaro wa abhakuru bhaani, na niri na abhasirikare bhanu bhari emwaro waani. Nikabhwira owumwi ati, ‘Nuugende,’ kaagenda. Nikabhwira owundi ati, ‘Nuuje,’ kaaja. Na omugaya waani, nikamubhwira ati, ‘Kora kutya,’ nikwo kutyo kaakora.”

9Bhunu Yeesu ꞉oonguuywe amangʼana gayo, ˆnaamuruguura muno. ˆNaaringira iinyuma kw-isangi rya abhaanu bhanu ꞉bhaariga mbamuseeta, ˆnaabhabhwira ati, “Enibhabhwira ati, mu-Bhaijirayeeri bhoone kutyo, nikyari okurora obhwikirisha obhunene rwa bhunu!” 10Abhaanu bhanu ꞉bhaariga bhatumirwe, anu ꞉bhaasubhire iika ewa omukuru uyo, mbanyoora omujuuma waaye aaworere.

Yeesu kaasuura omufuuye

11Mwejo, Yeesu ˆnaagenda na abheeyigira bhaaye mu-musi gwa Naayini, bhari na abhaanu abhandi bhaafu. 12Bhunu ꞉aariga arebhereeye kw-irango rya okwingira mu-musi guyo, ˆnaanyookana na abhaanu bhanu ꞉bhaariga bhayangire omufuuye. Omufuuye uyo, ꞉aariga ari mwana mumura, wumwi era ku-nyiramwene, nyiramwene ꞉aariga ari mukimari. Omugasi uyo, ꞉aariga ari na abhaanu bhaafu abha mu-musi guyo.

13Raatabhugenyi ꞉eejire aarora omugasi uyo, ˆnaamufwira ekigongo, ˆnaamubhwira ati, “Jibhira.” 14ˆNaayika ayeeyi ˆnaakuunʼya kw-iraro rinu ꞉bhaariga bhagegeeye-ko omufuuye. Bhanu ꞉bhaariga bhariyangire mbayambaara. Yeesu ˆnaaika ati, “Yego, ramuka!” 15Omufuuye uyo, ˆneemuka ˆneekara, kimwi ˆnaamba okwaika kweki. Niwe, Yeesu ˆnaamumuyaana nyiramwene. 16Abhaanu bhoone kutyo mbayaya, mbaamba okugungya Nyamuwanga, mbaaikaga ati, “Omuragi omukuru, aakiijira agati weeswe!” Mbaaika kweki ati, “Nyamuwanga, eejire okusakira abhaanu bhaaye!” 17Iingʼana iyo niiswerana muno Ebhuyawudi na mu-bhyaro ebhindi bhinu ꞉bhyariga bhisiijeene.

Yowana Omubhatiisha kaatuma abheeyigira bhaaye ku-Yeesu

(Mataayo 11:2-19)

18Bhunu Yeesu ꞉aariga ˆnaakora gayo goone kutyo, abheeyigira bha Yowana Omubhatiisha, mbasirira Yowana amangʼana. 19Yowana woone ˆnaabhirikira abheeyigira bhabhiri mu-bheeyigira bhaaye, ˆnaabhatuma bhagende okubhuusha Yeesu ati, “Angu ni awe unu ꞉aakaamiiywe ati ariija,#7:19 Ni awe unu ꞉aakaamiiywe ati ariija. Unu ꞉aariga akaamiiywe ati ariija ni Kiriisitu. amwi ati kirindirire owundi?” 20Bhunu abheeyigira bhayo ꞉bhaayikire ku-Yeesu, mbamubhwira ati, “Yowana Omubhatiisha aakituma ku-awe, kikubhuushe ati, ‘Angu ni awe unu ꞉aakaamiiywe ati ariija, amwi ati kirindirire owundi?’” 21Mu-kabhaga kayokayo, Yeesu ꞉aariga ˆnaawosha abhaanu bhaafu amarwara geebhwe. ꞉Aariga ˆnaawosha na bhanu ꞉bhaariga bhawungirwe ebhiwi. Na abhawofu bhaafu ꞉aabhasakiiye, mbaamba okurora kweki. 22Niwe Yeesu ˆnaabhasubhya ati, “Mugende mubhwire Yowana goone kutyo ganu mwarora, na ganu mwoongwa. Mumubhwire ati, abhawofu abharora, abharema abharibhata bhuyambaaye, abhagenge abhawosibhwa, abha amatwi abhoongwa, abhafuuye abhasuurwa, na abhatobhu abharaasibhwa Amangʼana Amajomu.#7:22 Omuragi Isaaya ꞉aasoosiishe obhuragi ati, Kiriisitu arikora emirimu giyo gyone kutyo. Ringira Isaaya 35:5-6, 61:1. 23Nyakara, omuunu unu atakunyiitimaata.”

24Abheeyigira bha Yowana ꞉bheejire bhaagenda, Yeesu ˆnaamba okwaikira Yowana ˆnaabhwira abhaanu ati, “꞉Mwariga mugenda okuringiraki mw-ibhara? ꞉Mwariga mugenda okuringira bhunyansi mbuyembwaga na omuyaga? Wuri! 25Mmbe, ꞉mwariga mugenda okuringiraki? Omuunu afwaye ngibho njomu? Wuri! Mwitegeereshe! Abhaanu bhanu abhafwara gingibho ginjomu, na okwijomya okuriingʼaana na obhwafu bhwa ebhiinu bhinu bhari nabhyo, bheekaaye mu-nyumba gya ekikama! 26Mmbe woori! ꞉Mwariga mugenda okuringiraki? ꞉Mwariga mugenda okuringira omuragi? Yee! Enibhabhwira ati, ni muragi, okukira abharagi. 27Uyo niwe omuunu unu Amakaamo Amataakatiifu agaaikira ati, ‘Iitegeeresha, enituma omureeti wa iingʼana yaani imbere waawo, akutangatire akuroosishe injira.’#7:27 Ringira Maraaki 3:1.”

28Yeesu ˆnaaika kweki ati, “Anye enibhabhwira ati, mu-bhaanu bhoone kutyo bhanu bheebhuuywe mu-kyaro anu, atariwo na wumwi unu kaakira Yowana. Nawe, omuunu omutooto okukira bhoone kutyo mu-bhukama bhwa Nyamuwanga, ni mukuru okukira Yowana.” 29Abhaanu bhoone kutyo bhanu ꞉bhoonguuywe amangʼana gayo, bharimo na abhatobhesha bha riigooti, mbagungya Nyamuwanga, kwa okubha ꞉bhaariga bhabhatiisiibhwe na Yowana. 30Nawe Abhafarisaayo na abheeyigisha bha ebhiraagiro, abheene ꞉bhaaremere ganu Nyamuwanga ꞉aariga ˆneenda bhakore, kwa okubha ꞉bhaaremere okubhatiisibhwa na Yowana.

31Yeesu ˆnaaika kweki ati, “Woori nisusanye naki abhaanu bha orwibhuro runu? Ni bhaanu bha mbagaki? 32Abhasusana na abhaana bhanu bheekaaye mw-igusisho, mbasubhyaanyaga na abheejaabho ati,

‘꞉Kyabhabhumiiye ebhironge, nawe mutaabhinire!

꞉Kyabheembiiye ameembo ga okubhasurumbasha, nawe mutaaririre!’

33“Nikwo kutyo Yowana Omubhatiisha ꞉eejire, atakurya emikaate, na okunywa iidivaayi, emwe mwaika ati awungirwe ebhiwi! 34Bhunu Omwana wa Adaamu eejire, omwene kaarya bhinu abhandi abharya na okunywa iidivaayi, omwaika ati, ‘Muringire! Ni muwubhaaru unu, na ni mukorwa! Ni musaani wa abhatobhesha bha riigooti, na abhakosi bha ebhikayo!’ 35Nawe, obhwenge bhwa Nyamuwanga obhumenyekana ati ni bhwenge, ku-mirimu ginu abhaanu bhaaye abhakora.”

Yeesu kaabhira owa ebhikayo

36Omufarisaayo wumwi, ꞉aaraarikire Yeesu agende okurya ewaaye. Niwe, Yeesu ˆneengira mu-nyumba ya Omufarisaayo uyo, mbeekara okurya amwi kw-igari. 37Mu-musi guyo, ꞉aariga ariwo omugasi wumwi, unu ꞉aariga amenyekeene ati ni mukosi wa bhikayo. Omugasi uyo, bhunu ꞉oonguuywe ati Yeesu ari ewa Omufarisaayo uyo kaarya, ˆneengira mu-nyumba muyo na inchupa irimo amafuta amarange. Amafuta gayo ꞉gaariga gari na bhugusi bhunene. 38Omugasi uyo ˆnaayambaara iinyuma wa Yeesu, ayeeyi na amaguru yaaye. ˆNaamba okurira, amasiga gaaye ngatonyeraga ku-maguru ga Yeesu. Bhunu ꞉gaariga ngatoonya, omugasi uyo ꞉aariga ˆnaagafwafuuta na ginfwiri gyaye, ˆnaabhuusubhuusu amaguru ga Yeesu, na okugayaka ebhirange.

39Omufarisaayo unu ꞉aariga araarikire Yeesu ꞉eejire aarora kutyo, ˆneeyaikira mu-mutima gwaye ati, “Omuunu unu, akabheeye muragi, akamenyere ati, omugasi unu kaamukuunʼyakuunʼya-ko, ni omuunu wa mbagaki. Akamenyere ati, omugasi unu ni muunu wa bhikayo!” 40Kimwi Yeesu, enu amenyere kutyo Omufarisaayo uyo keeganiirisha, ˆnaamubhwira ati, “Awe Simooni, niri na riingʼana eneenda nikubhwire.” Simooni woone ˆnaamusubhya ati, “Ee Omwiyigisha waani, mbwira.”

Niwe, Yeesu ˆnaaika ati, 41“꞉Bhaariga bhariwo bhaanu bhabhiri, abhaanu bhayo ꞉bhaariga mbatongwa giiyera na unu ꞉aabhayaaye amasiiri. Owumwi weebhwe, ꞉aariga ˆnaatongwa dinaari,#7:41 Dinaari. Iiyera ya Ekiruumi. Mu-nsiku giyo, iidinaari eyimwi ꞉yaariga iri ndiyo ya rusuku rumwi. magana gataanu. Owundi ˆnaatongwa dinaari makumi gataanu. 42Bhunu ꞉bhaataamiibhwe okuriya indii yeebhwe, unu ꞉aabhayaaye amasiiri ˆnaabhabhwira ati bhasige okumuriya. Mmbe, ku-bhabhiri bhayo, ni wuuya unu aryenda muno, unu abhaabhiiye?” 43Simooni ˆnaamusubhya ati, “Enigamba ati, ni unu ꞉aabhiiywe riisiiri riinene.” Yeesu ˆnaamubhwira ati, “Waasubhya kujomu.”

44Yeesu ˆnaaringira omugasi uyo, ˆnaabhwira Simooni ati, “Owurora omugasi unu? Neengira ewaawo anu, utaanaana amanji ga okwiyosha amaguru gaani.#7:44 Ku-Bhayawudi, ꞉yaariga iri ntungwa yeebhwe okuyaana omugenyi amanji aga okwiyosha amaguru gaaye, kwa okubha ginjira gyebhwe ꞉gyariga giijuuye oruteeri, ku-kabhaga ka ingubha amatoto agabha maafu. Nawe omugasi unu weeki, aanjaja amaguru gaani na amasiga gaaye, ˆnaanyeya amasiga gayo na ginfwiri gyaye. 45Bhunu awe wandamira, utambuusu.#7:45 Okubhuusu ni ntungwa gya Abhayawudi ku-bhukeeshaanya bhwebhwe. Abhakuunʼyanʼya eminwa ku-bhisaya mbakora muna omuunu kaabhirikisha giingʼoko. Nawe omwene, okwambira bhunu neengira munu, akyari kuyigwa okubhuusu amaguru gaani. 46Utaanaana ekibharo kya okunʼyaka omutwe gwani amafuta. Nawe omwene, aayaka amaguru gaani ebhirange. 47Mmbe, enikubhwira ati, ku-bhwendi obhwafu obhwa omugasi unu, obhweresha ati ebhikayo bhyaye na obhwafu bhwabhyo, bhyaabhirwa. Nawe, unu kaabhirwa kutooto, okwenda kwaye kwone ni kutooto era.” 48Kimwi Yeesu ˆnaabhwira omugasi uyo ati, “Ebhikayo bhyawo, bhyaabhirwa.”

49Abhagenyi abhandi bhanu ꞉bhaariga bhari kw-igari, mbaamba okubhuushaanya ati, “Niga unu, ature okwabhira abhaanu ebhikayo?” 50Yeesu ˆnaabhwira omugasi uyo ati, “Obhwikirisha bhwawo nibhwo bhwakwerusha! Nuugende na omurembe.”

Currently Selected:

Ruuka 7: kya

Highlight

Copy