Ruuka 6

Yeesu niwe Omukuru wa Insabhaato

(Mataayo 12:1-8; Maariko 2:23-28)

1Orusuku rumwi ꞉yaariga iri Nsabhaato, Yeesu na abheeyigira bhaaye ꞉bhaariga mbatura mu-masambu ga ingano, abheeyigira bhaaye mbabhutura ebhyangara bhya ingano, mbawungurura na amabhoko, mbarya obhweke.

2Niwe Abhafarisaayo abhandi mbabhabhwira ati, “Ndora omukora ganu gateesire okukorwa ku-rusuku rwa Insabhaato!#6:2 Ringira Obhungʼaanyi 20:8-11. Orusuku runu, ebhiraagiro bhyeswe ebhikigaanya okukora emirimu!” 3Yeesu ˆnaabhasubhya ati, “Mukyariga okusoma mu-Makaamo Amataakatiifu kutyo Dawudi ꞉aakorere bhunu omweko ꞉gwamurumire ari na abheejaabho?#6:3 Ringira 1 Samweri 21:1-6. 4꞉Eengiiye mu-nyumba ya Nyamuwanga. Mu-nyumba muyo ꞉gyariga girimo emikaate ginu ꞉gyasoosibhwaga ku-Nyamuwanga. Mmbe, Dawudi ˆnaagigega, ˆnaarya! ˆNaayaana na abheejaabho. Bhoone kutyo ꞉bhaariga bhateesire okugirya okuriingʼaana na ebhiraagiro bhya Musa, tari ꞉gyaribhwaga na bhashengesi era.” 5Yeesu ˆnaamariisha ˆnaaika ati, “Omwana wa Adaamu, niwe omukuru wa Insabhaato.”

Okukora amajomu ku-rusuku rwa Insabhaato

(Mataayo 12:9-14; Maariko 3:1-6)

6Ndubha-wo orusuku orundi rwa Insabhaato, Yeesu ꞉eengiiye mw-isunagoogi, ˆnaamba okwiyigisha abhaanu. Mw-isunagoogi muyo, ꞉aariga arimo omuunu wumwi, unu okubhoko kwaye okuryo ꞉kwariga kufuuye. 7Abhafarisaayo na abheeyigisha bha ebhiraagiro bhya Musa, ꞉bhaariga mbeenda bhanyoore iingʼana eya okusitaakisha-ko Yeesu. Mbarindirira okurora raabhe Yeesu araawoshe omuunu uyo ku-rusuku rwa Insabhaato. 8Nawe, Yeesu ˆnaamenya obhwiganiirisha bhwebhwe, kimwi ˆnaabhwira omuunu unu okubhoko kwaye ꞉kwariga kufuuye ati, “Nuuje, uyambaare agati anu.” Omuunu uyo ˆneemuka, ˆnaayambaara agati weebhwe.

9Kimwi, Yeesu ˆnaabhwira abhaanu bhayo ati, “Enibhabhuusha emwe, ni riiya riisire okukorwa ku-rusuku rwa Insabhaato, ni okukora amajomuu, ni kukora mabhiibhi? Orusuku ruyo kiwonʼye emyoyo, kigiite?” 10Yeesu ˆnaamogorera ameeso abhaanu bhoone kutyo bhanu ꞉bhaariga bhari muyo. Kimwi ˆnaabhwira omuunu uyo ati, “Iimusha okubhoko kwawo.” Omuunu uyo woone ˆnaakwimusha. Bhunu omuunu uyo ꞉eemusiishe okubhoko, ayoayo okubhoko kwaye nkuwora. 11Abhafarisaayo bhayo, riisungu ndibheeta. Mbaamba okubhuushaanya ati bhakorereki Yeesu.

Yeesu kaasora abhatumwa ekumi na bhabhiri

(Mataayo 10:1-4; Maariko 3:13-19)

12Mu-nsiku giyo, Yeesu ˆneemuka ˆnaagenda okusaasaama Nyamuwanga mu-kiima, ˆnaasaasaama bhwire bhwone kutyo. 13꞉Bhweejire bhwakya, ˆnaabhabhirikira abheeyigira bhaaye. Agati weebhwe ˆnaasora-mo abheeyigira ekumi na bhabhiri, ˆnaabhatoga ati abhatumwa.#6:13 Abhatumwa. Ringira riingʼana rinu mu-Mangʼana Amakomeeye. 14Abhatumwa bhayo ni Simooni, unu Yeesu ꞉aamutogere riisiina erya akabhiri ati Peetero na Ndereya, omumura waabho Peetero, Yakobho, Yowana, Firipo, Bhatoromayo, 15Mataayo, Tomaaso, Yakobho omumura wa Arufwayo, na Simooni owumwi wa mu-bhaanu bha ekyama kya Abhajeroti,#6:15 Simooni owumwi wa mu-bhaanu bha ekyama kya Abhajeroti. Simooni ꞉aariga ari na amasiina gabhiri, erya okwamba Simooni Omujeroti, erindi ni Simooni Omukananaayo. Amasiina ganu ꞉bhaabhirikiraga omuunu unu ꞉aariga arwanire riiremo rya okunyoora obhwiyagaaro okusooka mu-bhutungi bhwa Ekiruumi. 16Yuuda omwana wa Yakobho, na Yuuda Esikariyooti, unu ꞉aariiye Yeesu injeejemo.

Yeesu kaawosha abharwaye bhaafu

(Mataayo 4:23-25)

17Yeesu ˆneeka ku-kiima, ari na abheeyigira bhaaye. ˆNaayambaara ku-kibhara ari amwi na abheeyigira bhaaye bhaafu. Ku-kibhara ayo woone ꞉bhaariga bhariwo abhaanu abhandi bhaafu. Abhaanu bhayo ꞉bhaariga bhasookereeye ekyaro kyone kutyo ekya Ebhuyawudi, na Yerusareemu, na ku-ngego ya Tiiro na Sidooni. Abhaanu bhayo ꞉bhaariga bheejire okumwitegeeresha na okuwosibhwa amarwara geebhwe. 18Bhanu ꞉bhaariga mbanyansibhwa na ebhiwi, bhoone ˆnaabhasoosha-ko ebhiwi. 19Abhaanu ꞉bhaariga mbeenda bhakuunʼye-ko Yeesu, kwa okubha obhuturo ꞉bhwariga mbumusooka-ko mbubhawosha bhoone kutyo.

Ameeyigisho iiguru ya abha riibhando na bhanu garinyoora

(Mataayo 5:1-12)

20Yeesu ˆnaaringira abheeyigira bhaaye, ˆnaaika ati,

“Nyakara emwe abhatobhu,

kwa okubha obhukama bhwa Nyamuwanga ni bhwemwe.

21Nyakara emwe bhanu muri na omweko woori,

kwa okubha muriiguta mmara.

Nyakara emwe bhanu omurira woori,

kwa okubha muriseka mmara.

22Nyakara emwe, raabhe abhaanu bhakabhasoka,

ku-nsonga ya Omwana wa Adaamu,

mbabhengʼangʼa, mbabhafumaga,

mbabhaaika ati muri bhakosi bha mabhiibhi.

23Nikwo kutyo na bhaajaaji bhaabho bhoone

꞉bhaakoreeye abharagi bhanu ꞉bhaabheejire-ko.

Mmbe, orusuku ruyo mujomerwe, na okubhina,

kwa okubha ekiyaanwa kyemwe ni kinene mu-rwire.

24Nawe emwe abhaniibhi, garibhanyoora!

Kwa okubha obhuwooyereshwa bhwemwe,

mwabhunyooreeye mu-kyaro anu.

25Garibhanyoora emwe, bhanu mwigutire woori!

Kwa okubha muryungwa omweko mmara.

Garibhanyoora emwe, bhanu omuseka woori!

Kwa okubha muririra mutogoonyaga mmara.

26Garibhanyoora emwe bhanu abhaanu abhabhakumangya!

Kwa okubha, bhaajaaji waabho bhoone,

꞉bhaakoreeye kutyokutyo abharagi abhabheeyi.”

Ameeyigisho iiguru ya okwenda abhasoko

(Mataayo 5:38-48, 7:12)

27“Nawe enibhabhwira emwe bhanu omunyiitegeeresha, mwende abhasoko bheemwe. Na abhaanu bhakabhabhiiyirirwa, emwe mubhakorere amajomu. 28Na abhaanu bhakabheendera amabhiibhi, emwe mubheendere giinonkwe. Abhaanu bhanu abhabhanyansha, emwe mubhasabhire amajomu ku-Nyamuwanga. 29Omuunu akakubhuma ku-kisaya orubhaara orumwi, muyindurire na orubhaara orundi. Omuunu akakuteesha riikabhuuti ryawo, umusigire agege na insaadi.#6:29 Ringira Obhungʼaanyi 22:26-27; Ekiyiityo kya Ebhiraagiro 24:12-13. 30Omuunu akakusabha ekiinu, nuumuyaane. Omuunu akagega ebhiinu bhyawo, usige okwenda ati akusubhishe. 31Mukorere abhandi kutyo emwe omwenda bhabhakorere.

32“Mukeenda era bhanu abhabheenda emwe, omubha mukorere majomuki? Na abhakosi bha ebhikayo bhoone abheenda abhaanu bhanu abhabheenda! 33Na mukakorera amajomu bhanu abhabhakorera amajomu era, omubha mukorere majomuki? Kwa okubha, abhakosi bha ebhikayo bhoone abhakora kutyo! 34Mukayaana abhaanu amasiiri enu mwisiga ati abhabhasubhisha, omubha mukorere majomuki? Kwa okubha abhakosi bha ebhikayo bhoone abhayaana abhaanu amasiiri mbeesiga okusubhisibhwa!

35“Nawe emwe, mwende abhasoko bheemwe, mubhakorere amajomu. Mubhayaane amasiiri, tari musige okwisiga ati bharibhariya. Mukakora kutyo omuyeero gwemwe ni mwafu mu-rwire, mukasiga riyo, muribha bhaana bha Unu ari iiguru wa bhyone kutyo. Kwa okubha Nyamuwanga weeki kaasakira na bhanu bhatakumukumya, na abhakosi bha amabhiibhi. 36Mmbe mufwire ekigongo abhaanu abhandi, rwa kutyo Esomwana wa mu-rwire ari na ekigongo ku-bhaanu.”

Ameeyigisho iiguru ya okusiga okuramurira abhandi

(Mataayo 7:1-5)

37“Mwasiga kuramurira abhandi, mwone mwasiga okuramurirwa. Mwasiga okwaika ati abhandi bharamurirwe, mwone mwasiga okuramurirwa, mwabhire abhaanu mwone muryaabhirwa. 38Muyaane abhaanu ebhiinu, niwe emwe mwone omuuja okuyaanwa mu-ngaro gyemwe indengo iigatiiywe, iijuuye muno niitika, kwa okubha indengo inu omurengera abhandi, niyo mwone murirengerwa na Nyamuwanga.”

39Yeesu ˆnaabhabhwira ekirengekanyo kinu, “Angu omuwofu kaatura okutangasha omuwofu weejaabho? Toga bhoone kutyo abhatura okugwa mw-itoko? 40Omwiyigira atakutura okumenya okukira omwiyigisha waaye. Nawe, akamara okwiyigisibhwa ˆnaamenya, kaariingʼaana na omwiyigisha waaye. 41Ndora owuringira akati kanu kari mu-riiso rya oweejaanyu, enu utakuringira riibhaawu rinu riri mu-riiso ryawo? 42Na owutura kutiki okubhwira oweejaanyu ati, ‘Musaani, siga nikusoosishe akati kanu kari mu-riiso ryawo,’ enu awe omwene utakurora riibhaawu rinu riri mu-riiso ryawo? Mubheeyi awe! Nuusooshe okwamba riibhaawu rinu riri mu-riiso ryawo, niwe owuuja okurora kujomu akati akatooto mu-riiso rya oweejaanyu, ukasooshe-mo.”

Riiti erimenyekanira ku-matwasho gaaryo

(Mataayo 7:16-20, 12:33-35)

43“Nikwo kutyo, riiti riijomu ritakutwasha matwasho mabhiibhi. Na riiti riibhiibhi ritakutwasha matwasho majomu. 44Obhujomu bhwa riiti obhumenyekana okuriingʼaana na amatwasho gaaryo. Abhaanu bhatakunoga giitiini ku-mati ga amawa,#6:44 Amatwasho ga amatiini gari na obhutetere bhwafu munsi, muna makomamanga. rwa kutyo bhatakunoga giijabhiibhu ku-masongoma. 45Omuunu omurengeresi kaakora amajomu, kwa okubha mu-mutima gwaye garimo amajomu. Na omuunu omukayi kaakora amabhiibhi kwa okubha mu-mutima gwaye garimo amabhiibhi. Kwa okubha omuunu kaaroma ganu geejuuye mu-mutima gwaye.”

Okuumbaka kw-itare, na okuumbaka ku-nsenyi

(Mataayo 7:24-27)

46“Ndora omumbirikira ‘Raatabhugenyi, Raatabhugenyi,’ nawe amangʼana ganu enibhabhwira, mutakugakora? 47Siga nibhabhwire kutyo enirengekanya omuunu unu kaanyiija-ko, ˆneetegeeresha amangʼana gaani na okugakora. 48Kaarengekanywa na omuumbaki wa iinyumba unu ꞉aasimbire ansi muno, ˆnaayikira ku-rutare, ˆnoombaka omusingi gwa iinyumba yaaye ku-rutare. Bhunu ingubha ꞉yaaguuye nyafu, oruuji ndutuumuka, iinyumba iyo niibha mu-ruuji agati. Amanaga ga oruuji ꞉gataayisingisiishe, kwa okubha ꞉yaariga yumbakirwe kujomu. 49Nawe, omuunu unu kaageetegeeresha amangʼana gaani ˆnaasiga okugakora, uyo, kaarengekanywa na omuunu unu ꞉oombakiiye iinyumba yaaye iiguru ku-nsi atayisimbiiye ansi. Bhunu oruuji ꞉rwatumuuye, amanji ngabhuma iinyumba iyo, kimwi niigwa, niinyaragana yoone kutyo.”

Currently Selected:

Ruuka 6: kya

Highlight

Copy