Ruuka 5

Yeesu kaasora abheeyigira bhaaye abha okwamba

(Mataayo 4:18-22; Maariko 1:16-20)

1Rusuku rumwi, Yeesu ꞉aariga ayambaaye ku-ngego ya omwaro gwa Genejareeti,#5:1 Omwaro gwa Genejareeti. Omwaro gunu ogutogwa riisiina erindi ati omwaro gwa Gariraaya. enu ˆneeyigishaga bhaanu bhaafu Riingʼana rya Nyamuwanga. Abhaanu mbamufugerera okwitegeeresha, mbaamba okumusamba. 2Ku-ngego ya omwaro ayo, Yeesu ˆnaarora maato gabhiri gasigirwe na abhategi, kwa okubha ꞉bhaariga bhari ku-mbarika mbooshaga emitego gyebhwe. 3ˆNaariinya mu-bhwato obhumwi, obhwa Simooni unu riisiina ryaye erindi ꞉aatogwaga Peetero, ˆnaabhwira Simooni abhufugeshe-wo imbere mu-manji. Kimwi Yeesu ˆneekara mu-bhwato, ˆnaagenderera okwiyigisha abhaanu.

4Na bhunu ꞉aamarire okubheeyigisha, ˆnaabhwira Simooni ati, “Fuga obhwato kigende ebhusibha, mwese riikokooro ryemwe, mutege ginswi.” 5Simooni ˆnaamusubhya ati, “Ee Raatabhugenyi, kyakokoora bhwire bhwone kutyo kitanyoora kiinu! Nawe kwa okubha awe waaika ekikokoora kweki.”

6Mmbe Simooni na abheejaabho mbeesa riikokooro ryebhwe mu-manji. Okumara okukora kutyo, mbeeta nswi nyafu muno, riikokooro ryebhwe ndyamba okutamuka. 7Mbaragirisha abheejaabho bhanu ꞉bhaariga bhari mu-bhwato obhundi bhurya, bhaaje okubhasakira. Mbaaja mbeejusha maato gabhiri ginswi, amaato ngarebherera okusika. 8Simooni Peetero ꞉eejire aarora kutyo, ˆneefukama imbere wa Yeesu, ˆnaamubhwira ati, “Ee Raatabhugenyi, nuunsige anye, kwa okubha niri muunu wa ebhikayo!” 9Simooni ꞉aaikire amangʼana gayo, kwa okubha omwene na abheejaabho, ꞉bhaaruguuriiye kutyo ꞉bhaariga bheetire nswi nyafu muno. 10Yakobho na Yowana, abhaana bha Jebhedaayo, ꞉bhaariga mbategeraga amwi na Simooni, bhoone amangʼana gayo ngabharuguusha. Niwe Yeesu ˆnaabhwira Simooni ati, “Awe Simooni, siga okuubhaya! Kwa okubha okwambira woori, owubha mutegi wa abhaanu.”#5:10 Mutegi wa abhaanu. Insonga yeende-ko ni ati asooshe abhaanu okusooka mu-bhikayo bhyebhwe, ˆnaabhakumanya amwi bhabhe mw-ikemba rya abhaanu bha Nyamuwanga. 11Mmbe, Simooni na abheejaabho mbasubhya amaato ku-kyaro, mbasiga ebhiinu bhyebhwe bhyone kutyo, mbaseeta Yeesu.

Yeesu kaawosha omuunu wa ebhigenge

(Mataayo 8:1-4; Maariko 1:40-45)

12Bhunu Yeesu ꞉aariga ari mu-musi gumwi, ˆnaaja omuunu wumwi. Omuunu uyo ꞉aariga awooye bhigenge mubhiri gwone kutyo. ꞉Eejire aarora Yeesu, ˆneefumbika ansi imbere waaye, ˆnaamwisaasaama ˆnaaika ati, “Raatabhugenyi, uri na obhuturo obhwa okuuwosha. Ukeenda, enikusabha uuwoshe nisige okubha munaabhi.”#5:12 Munaabhi. Ringira riingʼana Obhunaabhi mu-Mangʼana Amakomeeye. 13Yeesu ˆneemusha okubhoko, ˆnaamukuunʼya-ko, ˆnaamubhwira ati, “Eneenda, nuuwore!” Ayoayo, ebhigenge bhyaye mbiwora. 14Yeesu ˆnaamubhwira ati, “Waasiga okubhwira muunu, tari, nuugende ku-mushengesi#5:14 Ku-mushengesi. Okuriingʼaana na ebhiraagiro bhya Musa, omushengesi niwe ꞉aariga ˆnaamenyegesha raabhe omuunu aawosibhwa ebhigenge. Ringira Abharaawi 14:1-32. akurore, usooshe omugabho ogwa obhwiyesha bhwawo rwa kutyo omuragi Musa ꞉aaragiriiye, insonga abhaanu bhamenye ati waawora.” 15Amangʼana ga Yeesu ngagenderera okuswerana ku-bhaanu. Bhaanu bhaafu ꞉bhaariga mbamuuja-ko okwitegeeresha ameeyigisho gaaye, na okuwosibha amarwara geebhwe. 16Nawe omwene ꞉aariga ˆnaabhasiga ˆnaagenda anu bhatari bhaanu, ˆnaasaasaama Nyamuwanga.

Yeesu ari na obhuturo bhwa okwabhira ebhikayo

(Mataayo 9:1-8; Maariko 2:1-12)

17Orusuku rumwi, Yeesu ꞉aariga ˆneeyigisha abhaanu, agati weebhwe bharimo Abhafarisaayo,#5:17a Abhafarisaayo. Ringira riingʼana rinu mu-Mangʼana Amakomeeye. na abheeyigisha bha ebhiraagiro bhya Musa#5:17b Abheeyigisha bha ebhiraagiro bhya Musa. Ringira riingʼana rinu mu-Mangʼana Amakomeeye. bhoone ꞉bhaariga bhariwo. Abhaanu bhayo, abhandi ꞉bhaariga bhasookere mu-magunguri goone kutyo aga Gariraaya, abhandi bhasookere aga Ebhuyawudi, na abhandi bhasookere mu-musi gwa Yerusareemu. Yeesu ꞉aariga ari na obhuturo bhwa Nyamuwanga obhwa okuwosha abharwaye.

18Niwe, mbaaja-wo abhaanu, bhayangirega riiraro ariko omuunu afuuye omubhiri. Mbeenda okumwingisha mu-nyumba, bhamusire ku-Yeesu. 19Nawe bhataaturire okumwingisha muyo kwa okubha abhaanu ꞉bhaariga bhayigeene. Niwe mbamuriinya iiguru ku-nyumba, mbasoosha-wo amatafwari ga iiguru kw-idaari, ndibha-wo ewundu enene.#5:19 Ringira impicha ya iinyumba ya Abhayawudi mu-kitabho kya Ruuka 17:31. Enu omurwaye uyo ari ku-bhuriri bhwaye, mbamwisha mu-nyumba anu Yeesu ꞉aariga ari. 20Yeesu ꞉eejire aarora obhwikirisha bhwa abhaanu bhayo, ˆnaabhwira omurwaye uyo ati, “Musaani, waabhirwa ebhikayo bhyawo!”

21Abheeyigisha bha ebhiraagiro bhya Musa na Abhafarisaayo mbaamba okubhuushaanya mu-mitima gyebhwe ati, “Ni niga unu? Ndora keerengekanya na Nyamuwanga? Atariwo unu kaatura okwabhira ebhikayo bhya omuunu, tari ni Nyamuwanga era!” 22Ganu ꞉bhaariga mbeeganiirisha mu-mitima gyebhwe, Yeesu ˆnaagamenya, ˆnaabhabhuusha ati, “Kubhaki omwiganiirisha kutyo mu-mitima gyemwe? 23Riiwuuwu kw-imwe ni riiya? Okwaika ati ‘Waabhirwa ebhikayo bhyawo,’ na okwaika ati ‘Iimuka, ugende?’ 24Anye, eneenda mumenye kujomu ati, Omwana wa Adaamu#5:24 Omwana wa Adaamu. Ringira riingʼana rinu mu-Mangʼana Amakomeeye. ari na obhuturo bhwa okwabhira abhaanu ebhikayo mu-kyaro anu.” Kimwi Yeesu ˆnaabhwira omurwaye uyo ati, “Enikubhwira ati, iimuka! Gega obhuriri bhwawo, ugende ewaawo.”

25Ayoayo, omuunu uyo ˆnaayambaara mu-meeso ga abhaanu bhoone kutyo, ˆneetwika obhuriri bhwaye, ˆnaagenda iika ewaaye enu ˆnaagungyaga Nyamuwanga. 26Abhaanu bhoone kutyo mbaruguura muno, mbaamba okugungya Nyamuwanga, mboobhaya, mbaaika ati, “Bhamura, reero kyarora amangʼana ga okuruguusha!”

Yeesu eejire okwerusha abhakosi bha ebhikayo

(Mataayo 9:9-13; Maariko 2:13-17)

27Gayo ꞉geejire gaawa, Yeesu ˆnaasooka mu-nyumba. Bhunu ꞉aariga ˆnaasooka ayo, ˆnaarora omutobhesha wumwi owa riigooti#5:27 Omutobhesha wumwi owa riigooti. Ringira riingʼana Abhatobhesha bha riigooti mu-Mangʼana Amakomeeye. eekaaye mu-kiwuuna kyaye ekya okutobhesisha riigooti. Riisiina rya omutobhesha uyo ꞉aariga ˆnaatogwa Raawi. Mmbe, Yeesu ˆnaamubhwira ati, “Nseeta!” 28Raawi ˆnaasiga ebhiinu bhyone kutyo, ˆneemuka ˆnaamuseeta.

29Kimwi Raawi ˆnaakorera Yeesu obhugenyi bhunene iika ewaaye. Ewaaye ayo ꞉bhaariga bhasangiiye-wo abhatobhesha bha riigooti bhaafu na abhaanu abhandi, mbeekara egari rimwi okurya. 30Riingʼana riyo ndikora Abhafarisaayo, na abheeyigisha bheebhwe abha ebhiraagiro bhya Musa, mbagenda okwisigiinyirira abheeyigira bha Yeesu, mbaaika ati, “Ndora omurya na okunywa amwi na abhatobhesha bha riigooti, na abhakosi bha ebhikayo?”#5:30 Ku-bhiraagiro, abharengeresi ꞉bhaariga bhatakwenderwa okwikara amwi na abhakayi, mbariira amwi. 31Yeesu ˆnaabhasubhya ati, “Abhaanu abhaworu, bhatakukena muragusi. Tari abharwaye nibho abhamukena! 32Nikwo kutyo, anye noone niteejire okubhirikira bhanu abheerora ati ni bharengeresi mu-meeso ga Nyamuwanga bhanseete. Tari niijire okubhirikira abha ebhikayo, insonga bhanuge ebhikayo.”

Yeesu kaaikira okwiyima ebhyokurya

(Mataayo 9:14-15; Maariko 2:18-20)

33Abhaanu bhayo mbabhwira Yeesu ati, “Abheeyigira bha Yowana na abha Abhafarisaayo abheeyimaga ebhyokurya bhakabha mbasaasaama Nyamuwanga. Nawe abheeyigira bhaawo bhatakwiyima, bheeki abharya na okunywa!” 34Yeesu ˆnaabhasubhya ati, “Omutura okubhwira abhagenyi bha mu-bhwenga bhasige okurya enu omugabhusi akyari amwi nabho? 35Nawe, ginsiku egiija ginu bharisoosibhwa-wo omugabhusi, mu-nsiku giyo niwe bhariiyima ebhyokurya.”

Yeesu kaariingʼaanya ameeyigisho ga kara na amayaaya

(Mataayo 9:16-17; Maariko 2:21-22)

36Yeesu ˆnaabhabhwira ekirengekanyo ekindi, ˆnaaika ati, “Omuunu atakutema ekirapa ku-ngibho iinyaaya ˆnaakituura ku-ngibho inkokoro. Kwa okubha aakakora kutyo, kaanyamura ingibho iinyaaya, na ekirapa kya ingibho iinyaaya kitakutura kususana na ingibho inkokoro. 37Na omuunu atakutuura iidivaayi#5:37 Iidivaayi. Ringira riingʼana rinu mu-Mangʼana Amakomeeye. iinyaaya mu-bhituumo ebhikokoro, kwa okubha aakakora kutyo, iidivaayi iinyaaya eyaata ebhituumo bhiyo, iidivaayi niyiitika, ebhituumo bhyone mbyatika. 38Nawe iidivaayi iinyaaya, eyeendwa ituurwe mu-bhituumo ebhiyaaya! 39Omuunu atakutura kunywa iidivaayi eya okwamba kweki ˆneegomba iidivaayi insingirisi. Kwa okubha kaaika ati, ‘Eya okwamba niyo yaayijomere.’ ”

Currently Selected:

Ruuka 5: kya

Highlight

Copy