Ruuka 20

Riibhuusho iiguru ya obhuturo bhwa Yeesu

(Mataayo 21:23-27; Maariko 11:27-33)

1Orusuku rumwi bhunu Yeesu ꞉aariga ari mw-ibhanja rya riiyekaru rya Nyamuwanga ˆneeyigishaga abhaanu, na okubharaasisha Amangʼana ga Nyamuwanga, abhashengesi abhakuru, abheeyigisha bha ebhiraagiro bhya Musa, na abhakaruka bha Abhayawudi mbamuuja-ko. 2Mbamubhuusha ati, “Nuukibhwire! Owukora amangʼana ganu ku-bhuturoki? Nniga ꞉aakuyaaye obhuturo bhunu?”

3Yeesu ˆnaabhabhwira ati, “Okwamba anye noone nibhabhuushe engʼana rimwi. Mumbwire, 4obhuturo bhwa Yowana obhwa okubhatiisha abhaanu, ꞉bhwasookere aaki? ꞉Bhwasookere ku-Nyamuwangaa ꞉bhwasookere ku-bhaanu?” 5Kimwi mbaamba okubhuushaanya mbaaikaga ati, “Kikaaika ati ꞉bhwasookere ku-Nyamuwanga, kaaja okukibhuusha ati, ‘Ndora mutaamwikirisiishe?’ 6Abhaanu bhanu bhoone kutyo abheekirisha ati Yowana ni muragi. Raabhe kyaika ati obhuturo bhwaye ꞉bhwariga bhusookere ku-bhaanu era, abhaanu abhaaja okukibhuma na amagina.” 7Okubha kutyo mbabhwira Yeesu ati, “Kitakumenya obhuturo bhwaye ati ꞉bhwasookereeye aaki.”

8Yeesu woone ˆnaabhabhwira ati, “Anye noone nitakubhabhwira ati enikora gayo ku-bhuturoki.”

Yeesu kaarengekanya abhatangasha na abharimi abhakosi bha mabhiibhi

(Mataayo 21:33-46; Maariko 12:1-12)

9Kimwi Yeesu ˆnaagenderera okubhwira abhaanu ekirengekanyo kinu, ˆnaaika ati, “꞉Aariga ariwo omuunu wumwi unu ꞉aariga ari na riisambu. Mw-isambu ryaye muyo, ꞉aariga ayambire-mo emijabhiibhu. Riisambu riyo ˆnaariyaana abharimi#20:9 ˆNaariyaana abharimi. Ku-Bhayawudi omuunu akayaana abharimi riisambu bharime, abharimi bhayo bhakagesa, abhagabhana ebhigeswa bhinu bhanyoorere na omwene esambu. bharirimega, omwene ˆnaakora orugendo ˆnaagenda mu-kyaro kya areera, ˆnaamara-yo nsiku nyafu. 10Bhunu ginsiku gya okugesa ꞉gyayikire, ˆnaatuma omugaya waaye ku-bharimi bhayo, ˆneenda bhamuyaane-ko omugabho gwaye ogwa ebhigeswa. Nawe, bhunu omugaya uyo ꞉aayikire, abharimi bhayo mbamubhuma muno, mbamubhirimya mabhoko ageene.

11“Omwene esambu, ˆnaatuma kweki omugaya owundi. Nawe omwene woone mbamubhuma mbamukorera amangʼana amabhiibhi muno, kimwi mbamubhirimya ˆnaasubha-yo kutyo. 12Omwene esambu ˆnaatuma omugaya owundi owa akasatu. Uyo woone mbamuwutaasha, mbamubhirimya.

13“Ku-bhuteero, omwene esambu ꞉aaikire ati, ‘Woori, nikore kutiki? Woori, eniija okutuma omwana waani omwende unu! Amwi, omwene abhaaja okumwiswara.’ 14Nawe bhunu abharimi bhayo ꞉bhaamurorere, mbabhwirana ati, ‘Unu niwe omugabhi wa ebhiinu bhya esemwene. Kimwite, omugabho gwaye gubhe gweswe.’ 15Mmbe, mbamusoosha mw-isambu, kimwi mbamwita.”

Yeesu ˆnaabhabhuusha ati, “Angu, omwene esambu kaaja okukora kutiki abharimi bhayo? 16Enibhabhwira ati ariija ˆnaabheeta, na riisambu riyo, ˆnaariyaana abhandi!” Abhaanu ꞉bheejire okuungwa amangʼana gayo, mbaaika ati, “Iingʼana iyo isige okubha-wo kajaanende!” 17Yeesu ˆnaaringira abhaanu bhayo, ˆnaabhabhuusha ati, “Mmbe, amakaamo ganu gari na nsongaki?

‘Abhoombaki ꞉bhaaremere riigina rinu.

Nawe, riigina rinu niryo ribheeye riigina riinene erya mu-rufuka.’#20:17 Riigina riinene erya mu-rufuka. Abhayawudi abhoombaki ꞉bhaariga mbagega riigina riinene mbarituura ku-bhukoti bhwa omusingi gwa iinyumba ndigwatirira mbaara ebhiri egya indugu, na iinyumba yoone kutyo. Ringira Ijabhuri 118:22.

18“Omuunu akagwa kw-igina kuyo, kaabhutukabhutuka, na riigina riyo rikagwira omuunu, erimusanjagasanjaga kubhiibhi.”#20:18 Ringira Isaaya 8:14-15; Daniyeri 2:31-45.

19Abheeyigisha bha ebhiraagiro bhya Musa na abhashengesi abhakuru ꞉bheejire okuungwa gayo, mbamenya ati ekirengekanyo kiyo ꞉kyariga nkyaikira abheene. Amangʼana gayo ngakora mbeenda okugwata Yeesu ayoayo, nawe mboobhaya abhaanu.

Riibhuusho rya okuteganya Yeesu

(Mataayo 22:15-22; Maariko 12:13-17)

20Okwambira ayo abhakuru bha Abhayawudi, mbaamba okufwima Yeesu muno, mbatuma abhaanu ku-Yeesu. Abhaanu bhayo ꞉bheekorere ati ni bhaanu bharengeresi. Insonga ya okubhatuma, ꞉bhaariga mbeenda bhagwatire Yeesu ku-mangʼana gaaye, bhamugwate bhamusitaakye ku-mutungi.#20:20 Abhatungi bhanu ꞉bhaariga bhatuuywe-ko na Kayijaari. 21Abhaanu bhayo mbaaja ku-Yeesu mbamubhuusha ati, “Omwiyigisha, kimenyere ati owaaika na okwiyigisha amangʼana ga obhurengeresi kweki awe utakwigana kibharo kya muunu. Na utakuubhaya muunu woonewoone, tari owiiyigisha amangʼana ga Nyamuwanga ku-kimari kyago. 22Angu, ku-bhiraagiro, eswe ekyendwa kitobhe riigooti ku-Kayijaari,#20:22 Kayijaari. Ringira riingʼana rinu mu-Mangʼana Amakomeeye. kisige okutobha?”

23Kimwi Yeesu ˆnaamenya obhwenge bhwebhwe, ˆnaabhabhwira ati, 24“Munyereshe iidinaari. Orususo runu na riisiina rinu rikaamirwe ku-dinaari inu, ni bhyaga?” Mbamusubhya ati, “Ni bhya Kayijaari.” 25Yeesu ˆnaabhabhwira ati, “Mmbe, ebhya Kayijaari, muyaane Kayijaari. Na ebhya Nyamuwanga, muyaane Nyamuwanga.”

26Riisubhyo rya Yeesu riyo, ndiruguusha muno abhaanu bhayo, mbajibhira. Mmbe, mbataamibhwa okumugwatira ku-mangʼana gaaye.

Amakaamo Amataakatiifu ageekirisha ati obhusuuki bhwa abhaanu bhuriwo

(Mataayo 22:23-33; Maariko 12:18-27)

27Kimwi Abhasadukaayo abhandi mbaaja ku-Yeesu. Abhasadukaayo#20:27 Abhasadukaayo. Ringira riingʼana rinu mu-Mangʼana Amakomeeye. ꞉bhaariga mbeeyigisha ati abhafuuye bhatakutura okusuuka kajaanende. Mbabhuusha Yeesu ati, 28“Omwiyigisha, ku-bhiraagiro Musa ꞉aakikaamiiye ati, raabhe omuunu akafwa, ˆnaasiga mukaaye ateebhuuye nawe omwana na wumwi, omumura waabho agabhe omugasi uyo, insonga ayambaasishe omufu waabho omusi. 29Mmbe kyaike ati, ꞉bhaariga bhariwo bhamura mungati bhari bha nda yimwi. Omumura wa okwamba ˆnaagabhura omugasi. Kimwi omumura uyo ˆnaafwa ˆnaasiga omugasi atari na abhaana. 30Oruuse rwaye, [ndugabha omugasi uyo. Oruuse rwone ndufwa akyari kwibhura na omugasi uyo.] 31Owa akasatu, woone ˆnaamugabhura, ˆnaafwa. Niibha kutyokutyo ku-bhamura bhoone kutyo mungati, unu ꞉aagabhuraga omugasi uyo ˆnaafwa ateebhuuye nawe omwana. 32Ku-bhuteero, omugasi uyo woone ˆnaafwa. 33Mmbe! Bhunu obhusuuki bhwa abhaanu bhuriyika, omugasi uyo aribha mugasi waaga? Bhoone kutyo mungati ꞉bhaamugabhuuye!”

34Yeesu ˆnaabhasubhya ati, “Ku-bhurame bhwa abhaanu ku-nsi kunu, abharume abhagabhura na abhagasi bhoone abhagabhurwa. 35Nawe, abhaanu bhanu Nyamuwanga arirora ati bheesire okusuurwa okusooka mu-bhafuuye, bhakayika mu-kyaro kirya, abhaanu bhatarigabhura na okugabhurwa. 36Abhaanu mu-kyaro kiyo bhatakutura okufwa kweki, kwa okubha bharibha rwa bhaamaraayika. Abhaanu bhayo ni bhaana bha Nyamuwanga, kwa okubha bhasuurirwe okusooka mu-bhafuuye.

37“Nawe okwaika ati abhafuuye bharisuuka, Musa woone ꞉eeresiishe ati abhafuuye abhasuukaga. Mu-Makaamo bhunu ꞉aakaamire ˆnaaikiraga mu-kasaka karya, ꞉aaikire ati ‘Raatabhugenyi Nyamuwanga, niwe Nyamuwanga wa Bhurayimu, na owa Isaaka, na owa Yakobho.’#20:37 Ringira Obhungʼaanyi 3:6. 38Nyamuwanga weeki atari Nyamuwanga wa abhafuuye, tari omwene ni wa bhanu abheesha omwoyo. Kwa okubha mu-meeso ga Nyamuwanga bhoone kutyo bhakyeesha omwoyo.”

39Kimwi abheeyigisha abhandi abha ebhiraagiro bhya Musa mbaaika ati, “Mwiyigisha, waaika kujomu!” 40Okwambira mu-kabhaga kayo mboobhaya okubhuusha Yeesu amabhuusho agandi.

Yeesu ni Muyiiri Dawudi na niwe Raatabhugenyi

(Mataayo 22:41-46; Maariko 12:35-37)

41Nawe, Yeesu ˆnaabhuusha abheeyigisha bhayo ati, “Kubhaki abhaanu abhaaika ati, Kiriisitu ni muyiiri omukama Dawudi? 42Dawudi omwene, mu-kitabho kya Ijabhuri, aaikire ati,

‘Raatabhugenyi Nyamuwanga ꞉aabhwiriiye Raatabhugenyi waani,#20:42 Raatabhugenyi waani. Anu eyeeresha Yeesu Kiriisitu.

iikara orubhaara rwani orwa ebhuryo,

43okuyikira anu nikatuure abhasoko bhaawo emwaro,

awe ubhatunge.’#20:43 Ringira Ijabhuri 110:1.

44“Raabhe Dawudi kaabhirikira Kiriisitu ati, ‘Raatabhugenyi.’ Kiriisitu kaatura kutiki kweki okubha muyiiri Dawudi?”#20:44 Muyiiri Dawudi. Yeesu ꞉eebhuuywe okusookerera mu-rwibhuro rwa Dawudi, kyakora abhaanu ꞉bhaamubhirikiraga ati Omuyiiri Dawudi. Nawe Yeesu omwene ꞉aariga ariwo mu-rwire okwambira kara, ku-nsonga iyo Dawudi woone ꞉aariga ˆnaamubhirikira ati Raatabhugenyi. Ringira riingʼana Omuyiiri Dawudi mu-Mangʼana Amakomeeye.

Yeesu kaagonya Abhafarisaayo na abheeyigisha bha ebhiraagiro

(Mataayo 23:1-36; Maariko 12:38-40; Ruuka 11:37-54)

45Bhunu abhaanu ꞉bhaariga bhasangire mbeetegeereshaga, Yeesu ˆnaabhwira abheeyigira bhaaye ati, 46“Mwikenge na abheeyigisha bha ebhiraagiro bhya Musa! Abheeyigisha bhayo bheendere okufwara giikanju gyebhwe ndeera, mbakeesibhwa na okuyaanwa ekibharo mu-maguriro. Bheendere okwikara ku-bhitebhe bhya ekibharo mu-masunagoogi, na mu-bhugenyi. 47Abhateesha abhakimari bha ekigasi ebhiinu bhyebhwe, abhasabha nsaara ndeera insonga abhaanu bhabharore ati ni bharengeresi. Abhaanu bhanu Nyamuwanga aribharamurira makomeeye muno!”

Currently Selected:

Ruuka 20: kya

Highlight

Copy