Ruuka 19

Yeesu keerusha Jaakayo

1Kimwi Yeesu ˆneengira mu-musi gwa Yeriko. Bhunu ꞉eengiiye aaturire agati wa omusi guyo. 2Mu-musi guyo, ꞉aariga arimo omuniibhi wumwi, riisiina ryaye ˆnaatogwa Jaakayo. Jaakayo, ꞉aariga ari mukuru wa abhatobhesha bha riigooti. 3Jaakayo ꞉aariga ˆnaaranga muno arore Yeesu ati ni muunu wa mbagaki. Nawe ꞉ataaturire okumurora, kwa okubha abhaanu ꞉bhaariga bhari bhaafu muno. Na Jaakayo ꞉aariga ari mufuyi. 4Kimwi Jaakayo ˆnaabhirima bhwangubhwangu, ˆnaatangata imbere wa riisangi rya abhaanu, ˆnaariinya kw-iti rya riikuyu, insonga arore Yeesu, kwa okubha Yeesu ꞉aariga ˆnaatura ku-njira kuyo.

5Bhunu Yeesu ꞉aayikire ayo, ˆnaaringira iiguru kw-iti, ˆnaaika ati, “Jaakayo, yiika bhwangu! Eyeendwa nibhe mugenyi wa mu-waawo reero.” 6Kimwi Jaakayo ˆneeka okusooka kw-iti riyo, ˆnaaramira Yeesu mbagenda nawe iika ewaaye enu Jaakayo ajomeeywega.

7Bhunu abhaanu bhoone kutyo ꞉bhaarorere amangʼana gayo, mbaamba okwisigiinyira, mbaaikaga ati, “Ndora kaagenda okurya na omuunu wa ebhikayo!” 8Nawe, Jaakayo ˆnaayambaara, ˆnaabhwira Yeesu ati, “Iitegeeresha, Raatabhugenyi! Woori kutya, riibhaara erimwi rya ebhiinu bhyani eniyaana abhatobhu. Na raabhe ꞉naateesiishe omuunu woonewoone ebhiinu bhyaye, eniija okumusubhisha kana okukira bhinu ꞉naamuteesiishe.”

9Yeesu ˆnaaika ati, “Reero inu, obhwerusha bhwayikira abhaanu bha mu-nyumba inu. Kwa okubha omuunu unu woone, ni muyiiri Bhurayimu.#19:9 Okubha muyiiri Bhurayimu ku-Bhayawudi, okuyika omuunu ukanuga ebhikayo bhyawo, nuwaamba okukora amangʼana amajomu mu-bhaanu. 10Omwana wa Adaamu ꞉eejire okwagara na okwerusha abhaanu bhanu bhabhurire.”

Abhagaya abheetongeeye na bhanu bhatari bheetongeeye

(Mataayo 25:14-30)

11Abhaanu bhanu ꞉bhaariga mbamwitegeeresha, ꞉bhaatogaga ati, obhukama bhwa Nyamuwanga bhuri ayeeyi okuyika mu-kabhaga kayo, kwa okubha Yeesu ꞉aariga arebhereeye Yerusareemu. Niwe Yeesu ˆnaabhabhwira ekirengekanyo, 12ˆnaaika ati, “꞉Aariga ariwo omuunu wumwi mu-ruganda rwa abhakama. Omuunu uyo, ꞉aakorere orugendo okugenda ekyaro kya areera okwagara obhuturo bhwa okubha omukama, akabhunyoora asubhe atunge ekyaro kyaye.#19:12 Mu-kabhaga ka Abharuumi, Abharuumi nibho ꞉bhaayaanaga abhaanu obhukama bhwa okutunga mu-bhyaro ebhitoototooto. Nawe, abhatunga bhari emwaro wa Abharuumi. Abharuumi nibho bhari abharamusi abhasiiti.

13“Akyari okugenda, ˆnaabhirikira abhagaya bhaaye ekumi, ˆnaabhayaana wumwiwumwi giiyera,#19:13 ˆNaabhayaana wumwiwumwi giiyera. Mu-Kiyunaani ikaamirwe ati, ˆnaabhayaana wumwiwumwi mina. Inu ꞉yaariga iri indii ya meesi gasatu eya omukosi wa emirimu ku-nsiku giyo. ˆnaabhabhwira ati, ‘Mwibhushe giiyera ginu okuyikira anu nirisubhira.’ 14Nawe omuunu uyo, ꞉aariga asokerwe muno na abhaanu bha mu-kyaro kyaye. Mbatuma abhaanu bhasire amangʼana mu-kyaro kirya ati, ‘Omuunu unu, kitakwenda abhe mukama weeswe!’ 15Nawe, omutungi wa mu-kyaro kirya ˆnaamuyaana era obhuturo bhwa okubha omukama. Bhunu ꞉aasubhire ari mukama, ˆnaabhirikira abhagaya bhaaye ekumi bhanu ꞉aayaaye giiyera, insonga wumwiwumwi amubhwire ati eebhusiishe yera eringa ku-yera ginu ꞉aabhasigiiye.

16“Omugaya wa okwamba ˆnaayika, ˆnaabhwira esebhugenyi ati, ‘Raatabhugenyi, ꞉waansigiiye giiyera ginu, ku-giyo anye niibhusiishe egindi ekumi.’ 17Omukama ˆnaabhwira omugaya uyo ati, ‘Mugaya waani owa omutima omujomu, ukorere kujomu! Mmbe woori kwa okubha ubheeye mwitongeeye ku-bhitooto bhinu ꞉naakuyaaye, woori enikuyaana obhuturo bhwa okutunga magunguri ekumi.’

18“Omugaya wa akabhiri woone ˆnaayika, ˆnaabhwira esebhugenyi ati, ‘Raatabhugenyi, noone ꞉waansigiiye giiyera ginu, ku-giyo anye noone niibhusiishe-ko ka taanu.’ 19Omukama ˆnaamubhwira ati, ‘Woone, enikuyaana obhuturo bhwa okutunga magunguri gataanu.’

20“Omugaya owundi ˆnaayika, ˆnaaika ati, ‘Raatabhugenyi, giiyera gyawo ngigi anu. ꞉Naagibhisire mu-kitambaara, gisige okubhura. 21꞉Naakorere kutyo kwa okubha ꞉naakuubhayaga, awe uri muunu mururu. Owugega ganu ꞉utaatuuye-wo na owugesa ganu ꞉utaayambire.’

22“Omukama ˆnaabhwira omugaya uyo ati, ‘Uri mugaya mubhiibhi awe! Woori noone enikuramurira okuriingʼaana na amangʼana gaawo omwene. Toga waaika ati, umenyere anye niri omuunu mururu muno, enigega ganu ꞉nitaatuuye-wo, na enigesa ganu ꞉nitaayambire. 23Raabhe nikwo kutyo niri, mmbe, kubhaki ꞉utaatuuye giiyera gyani ku-bhanu abheebhusha, insonga nikasubha ninyoore giiyera gyani giibhuuye?’

24“Abhaanu ꞉bhaariga bhayambaaye ayo, kimwi omukama uyo ˆnaabhabhwira ati, ‘Muteeshe uyo giiyera giyo, mwongeshe unu ꞉eebhusiishe egindi ekumi.’ 25Abhaanu bhayo mbamubhwira ati, ‘Nawe raatabhugenyi, unu ꞉eebhusiishe egindi ekumi!’

26“Kimwi omukama uyo ˆnaaika ati, ‘Enibhabhwira ati, omuunu woonewoone unu ari na ekiinu, aryongesibhwa. Nawe omuunu woonewoone unu atari na kiinu, na ekitooto kinu ari nakyo ariteesibhwa. 27Na abhasoko bhaani bhanu ꞉bhaariga bhatakwenda anye nibhe mukama weebhwe, mubhareete anu, mubheete nimbarora na ameeso gaani!’ ”

Masiya Yeesu keengira Yerusareemu

(Mataayo 21:1-11; Maariko 11:1-11; Yowana 12:12-19)

28Bhunu Yeesu ꞉aamarire okwaika amangʼana gayo, ˆnaagenderera na orugendo rwaye rwa okugenda Yerusareemu, enu atangatiiyega riisangi rya abhaanu. 29Bhunu ꞉aariga arebhereeye amagunguri ga Bheetifage na Bhetaaniya, ku-kiima kya Emijeyituuni, ˆnaatuma abheeyigira bhaaye bhabhiri bhatangate, 30ˆnaabhabhwira ati, “Mugende, imbere weemwe ririwo riigunguri. Na mukayika mw-igunguri muyo, omuuja okunyoora ekimoori kya insikiri kisibhikirwe. Ni kimoori kinu kikyariga kuriinywa-ko na muunu. Mukisibhure, mukindeetere anu. 31Raabhe omuunu akabhabhuusha ati, ‘Ndora omusibhura insikiri inu?’ Mumubhwire ati, ‘Raatabhugenyi niwe kaayikena.’ ”

32Mmbe, abheeyigira bhayo mbagenda, mbanyoora goone kutyo gabheeye rwa kutyo Yeesu ꞉aariga abhabhwiriiye. 33Bhunu ꞉bhaariga mbasibhura ekimoori kya insikiri, abheenekyo mbabhabhuusha ati, “Ndora omusibhura insikiri yeeswe?” 34Abheeyigira bhayo mbabhasubhya ati, “Raatabhugenyi weeswe kaayikena.” 35Mbayireetera Yeesu, mbaanja gingibho gyebhwe ku-kimoori kya insikiri kuyo, kimwi mbariinya-ko Yeesu, ˆneemuka ayo.

36Bhunu Yeesu ꞉aariga ˆnaagenda ari ku-nsikiri, abhaanu ꞉bhaariga mbaanja gingibho gyebhwe ku-njira okukorera Yeesu ekibharo. 37Na bhunu ꞉aariga arebhereeye ku-kyoromoko kya ku-kiima kya Emijeyituuni, abheeyigira bhaaye bhaafu muno, mbeemusha obhuku bhwebhwe mbaamba okukumangya Nyamuwanga enu bhajomeeywega, ku-bhigwa na amangʼana goone kutyo ganu ꞉bhaariga bhaarorere. Abhaanu bhayo mbaamura obhuraka, 38mbaaikaga ati,

“Ayaaywe giinonkwe omukama unu kaaja kw-isiina rya Raatabhugenyi!#19:38 Ringira Ijabhuri 118:26.

Omurembe gubhe mu-rwire,

na obhugungyo bhubhe mu-bhwikaro bhwa Nyamuwanga, iiguru!”

39Mw-isangi rya abhaanu muyo, ꞉bhaariga bharimo Abhafarisaayo. Kimwi mbabhwira Yeesu ati, “Omwiyigisha, nuugaanye abheeyigira bhaawo bhasige okwaika amangʼana gayo!” 40Yeesu ˆnaabhasubhya ati, “Enibhabhwira ati, raabhe bhanu bhakajibhira, amagina agaaja okumwaya!”

Yeesu kaaririra omusi gwa Yerusareemu

41Bhunu Yeesu ꞉aarebhereeye omusi gwa Yerusareemu, ˆnaagurora, ˆnaamba okuguririra. 42ˆNaaika ati, “Naneendere muno ati awe Yerusareemu, reero inu umenye injira ya okunyoora omurembe! Nawe woori ibhisirwe mu-meeso gaawo utakutura okuyirora. 43Kwa okubha ginsiku egiija, abhasoko bhaawo abhaaja okukuumbakira orubhago rukwiyinde, bhakamara, mbakusingira okukurwana mbaara gyone kutyo. 44Ku-bhuteero bhwa gayo, bharikumarira ansi awe na abhaanu bhaawo bhoone kutyo. Ritarisigara egina ku-rindi, kwa okubha bhunu Nyamuwanga ꞉aakwijire-ko, awe ꞉waataamiibhwe okumusombookerwa!”

Yeesu kaabhirimya abhagusha bha ebhiinu mw-iyekaru

(Mataayo 21:12-17; Maariko 11:15-19; Yowana 2:13-22)

45Bhunu Yeesu ꞉eengiiye Yerusareemu, ˆneengira mw-ibhanja rya riiyekaru rya Nyamuwanga. Mw-ibhanja muyo ꞉bhaariga bharimo abhasuruja. Kimwi Yeesu ˆnaabhabhirimya-mo. 46ˆNaabhabhwira ati, “Ikaamirwe mu-Makaamo Amataakatiifu ati, ‘Iinyumba yaani, iribha nyumba ya okusaasaamira-mo.’#19:46a Ringira Isaaya 56:7. Nawe emwe, muyikorere okubha nsenga ya bheefi.”#19:46b Ringira Yeremiya 7:11.

47Ku-nsiku, Yeesu ꞉aariga ˆneeyigisha abhaanu mw-ibhanja rya riiyekaru. Abhashengesi abhakuru, abheeyigisha bha ebhiraagiro bhya Musa na bhakaruka bha Abhayawudi, ꞉bhaariga mbaagara injira ya okumwita, 48nawe, bhataanyoorere njira ya okumwita, kwa okubha abhaanu ꞉bhaamuseetereraga okwitegeeresha amangʼana gaaye.

Currently Selected:

Ruuka 19: kya

Highlight

Copy